Azken bi etapak Caisse D’Epargneko bi euskaldunentzat

David LopezGustura izango da Eusebio Unzue. Igandean David Lopezek etapa garaipen bikaina lortu bazuen, gaurkoan Imanol Ervitik lortutakoa ez da gutxiagorako.

10 etapa jokatu dira aurtengo Espainiako Vueltan eta horietako hiru euskaldunek irabazi dituzte. Gainera gaur arte Igor Anton lasterketako lider izan da, baina tarteko helmugako gain sariei esker, Puritok liderraren maillota kendu dio.

Esan bezala, gaur Imanol Ervitiren garaipenarekin 3. euskal garaipena aurtengo Espainiako Vueltan. Gehiago izango direlakoan naiz. Zorionak guztiei!

2010eko taldeen analisia (III): Caisse d’Epargne, berebiziko bidegurutzean

Talde aski ezaguna da Caisse d’Epargne, eta tropelean sustrairik zaharrenetakoak dauzkan egitura, 1980an profesionaletan estreinatu zen Reynolds taldearen oinordekoa baita. Eta oraindik orain, bere hastapenetako filosofia eta izan berdinak dauzka: itzuli handietan erreferentzia izatea.

valverde

Horixe berretsi baino ez du egiten euren buru eta izar handia den Alejandro Valverde hiru asteko gizon izatera bultzatzeak. Iazkoan azkenik Espainiako Itzulian gailentzea lortu zuela, aurten Paris-en podiuma zapaltzeko asmo betean da. Zale asko eta asko dira murtziarrarentzat helburu zailegia dela pentsatzen dutenak (ni neu euren artean), baina egia da bestalde palmaresa ederki loditurik duela, huts egiteak horrenbeste kalterik egingo ez liokeela.

Alabaina, bere aurreneko koxka, gogorrena akaso, ez du Rotterdam-eko atariarekin izango espainiarrak, ez eta aurreko lasterketekin egin beharreko prestakuntzan, oraindik Puerto Operazioarekin izan zuen ustezko loturak justiziaren aurrera deklaratzera eraman duen auziagatik baizik. Eta epaiaren zain, espainiarraz gain, talde osoa egongo da, zalantzarik gabe. Horri gainera multzoaren etorkizuna kolokan egotea gehitu behar zaio, orain egun gutxi jakin baitzen ofizialki euren babesle nagusiak ez duela eurekin jarraituko.

FRANCIA CICLISMO

Ez da justua taldea Valverde-rekin hasteaz batera bukatu egiten dela esatea, nazioarteko multzorik sendoenetakoa baita Caisse d’Epargne, baina zutabe aldaezina da euren liderra, zalantza izpirik gabe, eta bere inguruan altxatzen da gainerako egitura; euren mesedetan jardun ahal izateaz gain espainiarraren alde lan egin ohi duten txirrindulariz josia dago talde nafarra. Salbuespenetako bat, beren bigarren erreferentzia den Luis León Sánchez da. Eta kasu honetan ere, bere indarrak eta lasterketan azaldutako jokaerak besterik iradoki balezakete ere (berriki lehiatutako Down Under-eko Tourrean erdietsitako etapa garaipena horren lekuko), hiru astetako gizon bilakatzeko asmotan dira Eusebio Unzue eta konpainia. Txirrindulari ausart bezain ikusgarria; ikusteke da oraindik sabaia non ote duen.

Taldeko hirugarren murtziarra ere beste eginkizun batzuentzako zuzendurik dago, taldeko gizon azkar ia bakarra baita José Joaquín Rojas. Dena den, bere abiadurak munduko onenen artera eramaten ez duela jakinda, beste ezaugarri batzuk biltzen ditu berak, ibilbide zailagoetan aukera gehiago aurkitu ohi duelarik. Hala ere, bere iparraldeko lasterketetarako zaletasunari so eginda, talderik egokienean ez dela pentsatzea ez da okerregia.

cobo

Eta ia horrarte ailegatzen da Caisse d’Epargne-k bete lezakeen espektroa. Taldeak askoz gehiago dauka, baina itzulietan maila ematen duen profila betetzen duena ia bere osotasunean. Batzuk talde buru izateko aukeraren batekin, beste batzuek ia bat bera ere ez. Hurrengo mailan, progresioagatik baino ez bada ere, Rigoberto Uran kolonbiar gazte dohatsua aurki genezake, oraindik nazioarteko erreferentzia izan gabe, izar handia izateko ezaugarriak izan badituena. Mauricio Soler herkidea ere Giroan gizon garrantzitsu izateko fitxatuko zuten seguru asko, eta berarekin batera, ondo bidean Juanjo Cobo-k ere, bere talentuari erreparatuz gero behintzat, behar luke leku batean edo bestean lider izateko aukerarik. Italian beste buru bat David Arroyo izango dela pentsa liteke, azkeneko urteotako ohiturari jarraiki, nahiz eta gerora bestelako eginkizunak ezarriko dizkioten.

marzio

Akaso Rubén Plaza izan liteke aste bakarreko lasterketaren bat lehiatzeko moduan, baina oro har gainontzeko taldeak Valverdek Frantziako Tourreko podiumerako jauzia eman nahi horretan osatutako multzoa dirudi. Egin kontu: Marzio Bruseghin (honek ere Giroan behar luke) eta Christophe Moreau zakur zaharrak fitxatu berritan, Vasil Kiryienka Bielorrusiako mando nekaezina euren artean, eta baita alor pertsonalean protagonismoa galduz dihoan José Iván Gutiérrez erlojuz kontrakoaren espezialista ere, besteak beste. Eta horiekin batera, bakoitza bere eginkizunekin, talde nafarrean diren lau euskal herritarrak: Txente Garcia hilezkorra, bere ondorengoa dirudien Imanol Erviti, Xabier Zandio talde-lagun aparta, eta David Lopez eskalatzaile fina.

Aurrez aipatutako batzuk (Uran eta Rojas kasu) ere oraindik gazteak badira ere, alor honetan zailtze bidean diren beste gizon batzuk ere aipatu behar dira. Hauen artean, Rui Costa portugaldarra da esanguratsuena, iazkoan ezertan bereziki nabarmendu gabe eremu guztietan ongi molda daitekeela erakutsi zuena. Gizon indartsua izateaz gain, erlojuaren aurkakoan sendoa, mendian gora ez da gaizki moldatzen, hortaz aurten derrigorrean jarraitu beharreko gizonetako bat dugu. Costa Ricako Andrey Amador-ek ere hasiera batean antzeko txirrindularia dirudi, nahiz eta bere garapenak motelagoa dirudien, Ángel Madrazo espainiarrarekin gertatzen den bezalaxe.

Esan bezala, tropeleko talderik indartsuenetakoa da Caisse d’Epargne, bai banan-banan zein talde gisa hartuta. Alabaina, Martxoa aldera jakingo den epaiak esango du taldeak bide beretik jarraituko duen, multzo handi xamarra Valverde-ren eginkizunetara kateaturik dela, edo guzti horiek beren aukerak jorratzeko modurik izango duten. Bigarren kasu honetan, epaiak Valverde errudun joko balu alegia, Joaquim Rodriguez eta Dani Moreno jada taldean ez izatea, Oscar Pereiro-z gain, antzemango lukete seguru asko, kataluniarraren kasuan batik-bat. Badaezpada, iazko Espainiako Itzuliko garailea denboraldi hasieran ohikoa baino gehiago lehiatuko dela dirudi. Hortik aurrerakoak, ikusi behar. Edozein kasutan ere, Unzue-renek ez dute lo hartzerik, ez inongo gertakariren zain egoterik, egiturak bere horretan jarraituko badu.

Galdera ikur ugari beraz aurtengoan taldearen inguruan. Erantzunak, datozen hilabeteotan.

Gilbertek etapa garaipena eta Di Luca segundorik gabe

Gilbert. 20. etapan garaipenaGilbertek ederki irabazi du gaurko etapa, azken igoeratxoan erasoa joaz. Gaurkoan Di Lucak etapa garaipena behar zuen sailkapen nagusian Menchovekin zuen tartea jaisteko, etapa irabazleak 20 segundoko gain saria baitzuen. Italiarra ez etapa garaipen ez gain saririk irabazteko gai ez da izan eta maglia arrosa janzteko zituen amets eta asmoak ezerezean geratu zaizkio gaurko etaparen ondoren.

Tropelak etapari ekin bezain laster eguneko ihesaldia osatu da. Zortzi izan dira ihesalditxoa osatu duten txirrindulariak: Bonnafond, Cardenas, De Bonis, Förster, Angel Gómez, Lastras, Lund eta Swift. Cardenas (10, 17 eta 18 etapetan), De Bonis, Angel Gómez eta Lastras aurreko etapetan ere ihesaldietan sartutako txirrindulariak izan dira. Tropeltxo honek ia lau minutuko tartea atera dio tropel nagusiari, baina LPRko txirrindulariek garbi zuen gaurko etapan bere taldeko liderrari lagundu behar ziotela ahalik eta gain sari gehien eskuratzeko Menchovekin zuen errenta jaisteko.

Gaur Di Lucaren lehen helburua Frosinoneko tarteko helmugako gain saria bereganatzea zen 6 segundo baitziren lehenarentzat. LPRek ihesaldia neutralizatzea lortu du tarteko helmuga hori baino 8 kilometro inguru lehenago. Guztia eskura zuen Killerrak, baina azken aldapatxoan Menchovek erasoa jo du segundo horien bila. Atzetik Di Luca eta Petacchi, aurtengo Giroan bi etapa garaipen lortu dituen txirrindularia. Di Lucak ez du orain arteko freskotasuna erakutsi eta ez da gauza izan errusiarraren aurretik pasatzeko. Eskerrak Petacchi taldekidea erne ibili den eta errusiarrari gailendu zaion. Ondorioz, Petacchik 6 segundoko gain saria, Menchovek 4koa eta Di Lucak 2koa jaso dute. Momentu horretan Di Lucak sailkapen nagusian 20 segundoko atzerapena zuen. Di Lucaren gaurko lehen hutsa izan da.

Tarteko helmugak sailkapen nagusian zuen garrantziaren presioa pasata, tropela erlaxatu egin da eta abentura zaleek beste saiakera bat egin dute. Brutt eta Fothen izan dira horiek, baina hauen ihesaldiak ez du gehiegi iraun. Ez da bestelako ihesaldirik sortu Agnani inguruetara iritsi arte. Szmydek tropel buruan sakabanaketa eragin du taldetxo bat osatuz, baina ez da behar bestekoa izan eta bat egin dute aurrerago.

Tropela helmugatik lehen aldiz pasa denean guztiak elkarrekin ziren. Gaurko etapan ere txirrindulariek zirkuitu bati buelta eman behar zioten eta gaurkoan itzuli hori 18 kilometroko zen. Agnaniko aldapan behera saiakera gehiago izan dira. Anabasa sortu da tropel buruan eta mugimendu asko izan badira ere, ganoraz osatu den ihesaldia Charteau, Huzarski, Pinotti eta Tiralongok osatu dutena izan da. Hauen ihesaldia ia 15 kilometrotakoa izan da baina aurrez esan bezala, LPR taldeak garbi zuen Di Lucari lagundu behar ziotela etapa garaipenean. Bosisio buruan zuela, Agnani aldapan eta etapa amaierarako 2 kilometroren faltan,  ihesaldia harrapatu dute. Oraindik etapa garaipena nahi zuten txirrindulariak ziren eta horien artean Gilbert. Belgikarrak erasoa jo du eta bere atzetik Popovych eta Voeckler joan zaizkio. Hirurak bat egin dute eta tartea atera tropel nagusiari, baina Popovych geratzen hasi da. Frantziarra belgikarraren gurpilean zen kilometro bat falta zenean, baina Gilbert indartsuagoa zen eta etapa amaiera hori beretzako aproposagoa. Erritmo aldaketa berri bat egin du eta Voeckler atzean utzi. Azkenean belgikarrak etapa garaipena eskuratu du eta Di Luca gain saririk gabe utzi. Etapa amaiera bikaina Gilbertek egin duena eta merezitako garaipen ikusgarria berarentzat eta Silence-Lotto taldearentzat.

Gaurko etapan LPRek bere ahaleginak egin ditu biharko erlojupekorako Rabobankeko liderrari tartea txikitzeko, baina ez tarteko helmugan ez etapa amaieran ez da gauza izan gain saririk lortzeko. Ez hori bakarrik, tarteko helmugako gain sariei esker Menchovek tartea 2 segundo gehiagotan gehitu du. Nire ustez, atzokoan aurreratu bezala, Menchovek Giroa erabakita utzi du batez ere gaurkoa ikusita. Iragarpenek Erroman eguraldi txarra izango dela esaten dute eta horrek zalantzarik gabe erlojupekoari eragingo diote, baina ez zait iruditzen Di Lucari horrek laguntzen dioenik.

David Lopez erori eta erretiratu egin da

Ez dute aurtengoan euskaldunek Giroan zorterik. Dagoeneko hirugarren euskalduna da era honetan Giroa uzten duena. Lehena Pedro Horrillo ermuarra izan zen, gero Iban Mayoz eta azkena David Lopez. David Lopezek ETBn esan dutenaren arabera, behin erori eta jarraitu egin omen du, baina bigarren eroriko bat izan omen du eta orduan bai, lasterketa utzi beharrean izan da. Ez dut berri gehiagorik. Iban Mayozi dagokionez, dirudienez ez zuen hausturarik izan eta honez gero etxean izango da. Pedro Horrilloren inguruan ditugun azken berrien arabera etxera ekartzekoa ziren aste honetan.

Iker Camaño bakarrik geratzen da tropelean eta aurtengo Giroa bukatuko duen euskaldun bakarra izango da biharko erlojupekoan ez bazaio ezer gertatzen behintzat (hala espero dezagun).

Scarponik Beneventon bigarrena

Scarponi. 18. etapan garaipena

Ihesaldiak gaurkoan ere bere fruitua eman du eta Scarponi txirrindulari beteranoak, ihesaldiak emandako abantailaz baliatuz, aurtengo Giroko bere bigarren etapa garaipena lortu du. Hirugarren garaipena, beraz, Diquigiovannik. Ihesaldiak gaurkoan esprinterrak aukerarik gabe utzi ditu Petacchiren kaltetan.

48 kilometro inguruan osatu da gaurko ihesaldia. 14. etapan eta 15. etapan jazo bezala, gaurkoan ere ondo antolatutako eta kide ugariz osatutako ihesaldian zegoen garaipena eskuratu duen txirrindularia. Talde mardula Popovych, Zeits, Cardenas, Voeckler, Deignan, Dean, Pate, Visconti, Grabovskyy, Gavazzi, Quinziato, Bosisio, Devenyns, Seeldraeyers, Scarponi, Bertolini, Ljungblad, Lovkvist, Siutsou, Petrov, McCartney, Bak, Vorganov eta David Lopezek osatzen zuten. Sailkapen nagusiari begira aurreratuen zegoen txirrindularia Popovych zen eta badaezpada Caisse D’Epargne lan egin du tropel nagusian denbora tarte handirik izan ez zedin. Beste talde batzuk ere izan dira tropel buru horretan Fuji-Servetto kasu, baina azkenean ahaleginak alferrikakoak izan zaizkie.

Gaurkoan garbi zegoen sailkapen nagusian aldaketa nabarmenik ez zela izango eta hala izan da. Txirrindulariek helburu etapa garaipen zuten. Aurreko tropelak zituen kide kopurua ikusita eta 3 minutuko errenta izanda, garaipena eskura zutela ikusten zen. Taldean 15 kilometroetara gerturatu arte ez da sakabanaketarik izan eta orduan Grabovskyy ukraniarra izan da lasterketa mugitzen hasi dena. Gainontzeko txirrindularietako zenbaitek jarraitu egin diote eta mugimendu askoren ondoren, zortzikotea osatu da: Zeits, Cardenas, Pate, Scarponi, McCartney, Bak, Devenyns eta Grabovskyy bera.

Beneventon Italiako Giroan ohikoak diren bukaerako zirkuitu bat egin behar izan dute, 8 kilometro inguruko itzulia. Cardenas urrutitik jotzen saiatu da zortzikotea puskatuz, baina azken kilometrorako zortzikotea batera zen. Saxo Bankeko bi txirrindulari ziren aurrealdean, baina ez dira bi izatearen abantailaz aprobetxatzeko gauza izan. Devenynsek berak jo du lehenengo, baina azkarregi. Azkenean Scarponik, Cardenas eta  Pate gailenduta, aurtengo Italiako Giroko bigarren garaipena.

Sailkapen nagusiko txirrindulari nagusiak biharko etapan kontzentratzeko baliatuko ziren gaurko etapaz, nahiz eta liderraren inguruan kontzentrazioa kentzeko moduko berriak argitaratu diren. Ez al dute nahi italiarrek Menchovek irabazterik, ala?

Sastrek etapa garaipena eta podiumeko postua

Sastre. 16. etapan garaipenaSastrek egin du egin beharrekoa bere helburua lortzeko. Monte Petranon hasieran erasoa jo eta etapa garaipeneraino igoera bikaina egin du. Eta bigarren saria: sailkapen nagusiko hirugarren postura pasa da Leganeseko txirrindularia. Mendiko etapak sortu du bai espero zen zalaparta.

2. kilometrorako eguneko ihesaldia osatu da, larunbateko eta igandeko etapetan gertatu zen bezala, baina gaurkoan amaiera ezberdinarekin. Txirrindularien artean Dion, Popovych, Bellotti, Sprick, Jeannesson, Angel Gómez, Danielson, Wiggins, Visconti, Cunego, Carlström, Bosisio, Cataldo, Ardila, Tjallingii, Scarponi, De Bonis, Brutt, Voigt, Delio Fernández eta David Lopez euskalduna. Aurretik Monte delle Cesane (2. mailakoa), Monte Nerone (1. mailakoa), Monte Catria (1. mailakoa) eta helmuga zuen Monte Petrano mendiak zituzten eta 235 kilometro egiteko. Tropeltxoak tarte handia hartu du tropel nagusiarekiko, baina ibilbidean aurrera zihoazen heinean, txirrindulari askori ezinak jo die eta tropeltxoa utzi beharrean izan dira.

Mugimendurik garrantzitsuena Cantianoko igoeratxoan izan da, Monte Catriara iritsi aurreko igoeratxoan. Bertan Scarponik taldetxoa astindu du eraso batekin. Tropeltxotik jarraitu dioten bakarrak Cunego, Bosisio eta Popovych izan dira. Laukoteak aurrera egin du eta tropel nagusiarekiko tartea 5’30”eko zen Monte Catria igoera gogorrari aurre egin aurretik. Atzealdean, berriz, Menchov eroso xamar taldekidez inguratuta.

Monte Catria igotzen ari zirela, Scarponik ikaragarrizko txakalaldia izan du eta ez da gauza izan gainontzeko taldekideei jarraitzeko. Bitartean Cunego, Bosisio eta Popovychek aurrera egin dute. Cunegok beste eraso bat ere jo du eta Bosisiok bakarrik jarraitu ahal izan dio. Popovych, justu xamar, metro batzuetara baina distantzia mantenduz igoera osoan jarraitzen izan da. Atzeko tropeltxo nagusian beharbada oilarren arteko lehia igoera honetan espero zen, baina azkenean ez da hala izan igoera honetan.

Behin Monte Catria igota, Popovychek bere jaisteko abileziez baliatuta, aurreko bikotea harrapatu eta ihestea lortu du. Ukraniarra sendo ikusi da eta azken 15 kilometroetako pankartan Cunegori 35 segundo inguruko tartea ateratzen zion. Bosisio, berriz, matxuragatik edo beharbada Killerrari laguntzeko, geratu egin da tropel nagusiarekin bat egiteko.

Espektakulua Monte Catria igoeran hasi da. Igoera 11 kilometrokoa zen eta malda gogorrekin. 225 kilometro egin ostean, egiten zuen beroa eta igotako gainontzeko mendiak igota, indarrak behar ziren azken mendia igotzeko. Popovych erritmo onean ari zen igotzen. Atzetik Cunego apalago. Tropel nagusian, lehen malda igotzearekin batera, erasoak hasi dira. Basso izan da aurrena erasotzen. Faborito gehienek eutsi egin diote Leipheimer eta Pellizottik izan ezik. Bassok birritan ere saiatu da, baina alferrik. Orduan Sastrek jotzea erabaki du. Lehenengoan ez da izan, baina bigarrenean bai. Menchov Di Luca markatzen ari zen eta Bassok aurretik egindako saiakeretan ez da ihesteko gauza izan; nolabaiteko zalantzak sortu dira txirrindularien artean eta Sastrek ederki aprobetxatu du.

Leganeseko txirrindulariak metroak ateratzen joan da eta Bassok atzetik jarraitu beharra zuen sailkapen nagusian arerio zuzena baitzuen. Atzean Menchov eta Di Luca elkar kontrolatzen zirela. Sastre aurrerantz sendo joan da eta Cunego erraz pasa du. Berdin egin du Popovychekin ere helmugarako 2 kilometro falta zirela (egin duen ezintasun keinua adierazgarria). Menchov eta Di Lucak Sastrek atera zitzakeen segundoak ekiditeko aurrera egin dute Bassorekin bat egiteraino. Azkenean helmugan Sastre maisuki garaile, Menchov bigarren eta Di Luca hirugarren.

Sailkapen nagusian, beraz, aldaketak: Sastre 3. postura pasa da 2’19”ra eta Leipheimer 6.era 3’21”ra. Gazteen sailkapenean era Lovkvistek denbora asko galduta Seeldrayers da lider berria.

Bihar atseden eguna izango dute. Askok eskertuko dute. Sastrek, behintzat, lasai deskantsatuko du bere helburuetako bat lortzeko zorian baita: Giroko podiumean izatea.