Euskara, teknologia eta txirrindularitza
Jada eskura duzue aurtengo denboraldirako aukeratu dugun lasterketen egutegia. Guztira 32 izango dira, UAE Tourrarekin hasi eta Lombardiako klasikoarekin amaituko dena. Ohi bezala, lehiaketa hauek 5 multzotan banatuta izango dira: Itzuli Handiak, Itzuli Txikiak, Klasikoak, Emakumezkoak eta EH Kopa.
Zerrenda hemen aurki dezakezue, Denboaraldiak atalean.
Espero dugu gustuko izatea aukeratu dugun egutegia eta prest izatea denboraldi berri batetarako!
Atzo izan balitz bezala dugu gogoan nola ekin genion proiektu honi orain dela 20 urte. A ze garapena izan duen Tropelak eta baita geuk ere! Atxikitako bideoa ikusi besterik ez duzue.
Txirrindularitzarako griñak, sarean zegoen mugimenduak eta euskararen erabilera sustatzeak eragin zuen Tropelaren jaiotza. Gaur ere hiru oinarri horiek eusten dute Tropela dagoen lekuan. Nabaria da, ezta?
Ibilbide luze honetan mugarri hauek aipatu nahiko genituzke:
Eta seguru beste asko aipatu gabe utzi ditugula.
Zorionak Tropela! Zorionak zuei guztioi, denon artean osatzen baitugu proiektu bikain hau!
Javier Tebas Mendrano jaunak zuzentzen duen LaLiga erakundeak, Tropela.eus-erako konektatzeko arazoak eragin ditu asteburuan zehar bai Euskal Herrian bai penintsulako beste hainbat lekutan ere, beste makina bat webguneri gertatu zaien bezala. Nork pentsatuko zuen futbola Tropela blokeatzeraino iritsiko zenik! Gaur hori baiezta dezakegu.
Egia da denboraldi hasieran aplikazio berria jarri dugula martxan eta horrek zailtasun batzuk sortarazi dizkigula, espero genituenak neurri batean. Berrikuntzen artean segurtasuna ere ardatz hartu dugu eta horregatik Cloudflare zerbitzua txertatzea erabaki genuen. Teknikoki zalantzarik ez dugu erabaki zuzena izan dela. Espero ez genuena zen, ordea, LaLigaren handikeria guganaino iritsiko zenik.
Iaz gogor aritu zen Javier Tebas Mendrano jauna pirateria kontra, futbolaren erronkarik handiena bera zela argudiatuz. Bide horretan, LaLigak pirateriaren kontrako borroka hori gauzatzeko, badirudi Cloudflareko makina bat IP helbide blokeatzen hasi direla Espainiako zenbait internet zerbitzu emaile azken egunetan. Eta asteburu honetan, 2025ko martxoaren 8 eta 9a, Tropelari tokatu zaio. Izan ere asteburu guztian zehar eta gaur gauerarte, tarteka izan da Tropelara sartzeko aukera. Eta hau era desberdinean pairatu duzue erabiltzaileok, internet hornitzaileen baitan afekzioa desberdina izan baita.
Cloudflare berak adierazi zuen akzio legalak hartuko zituela kontu honen inguruan internetaren askatasuna urratzen ari direlako.
Geuk ere hori uste dugu, ez baitzaigu normala iruditzen, inongo abisurik gabe, interneteko zerbitzu legalak erabilita – kasu honetan Cloudflare-, webgune guztiz legitimo bat, Tropela.eus den bezala, blokeatuta geratzea. Gaur hori egin dute penintsulatik Tropelara konektatzen saiatzean: sarrera blokeatu. Ez gara bakarrak izan, izan ere aurreko asteburuan arazo bera izan zuen Berria.eus webguneak.
Espero dugu astean zehar arazo gehiagorik ez izatea – LaLigako partidarik ez dagoelako- . Ez dakigu, ordea, hurrengo LaLigako jardunaldian arazoak izango ditugun ala ez. Edozein kasutan, zerbait pentsatu beharko dugu LaLigaren “bolanta sare honek” berriro ere harrapa ez gaitzan.
Jakin, beraz, asteburu honetako arazoa ez dela geurea izan, LaLigarena baizik.
Alternatibarik?
Berriz gertatzen bada, VPN bidez saia gaitezke, izan ere sarbide blokeoa Espainian ematen ari da. Beraz, beste herrialderen batean bageunde bezala nabigatu ezkero, posible izan behar litzaiguke arazo hori gainditzea. Horretarako aukera desberdinak badaude ere, Tropelatik 1.1.1.1 zerbitzua erabiltzea gomendatzen dizuegu. Berau Cloudflare berarena da eta doakoa. Behin erabiltzen hasita, ziurtasuna ematen duen zerbitzuak erabili, aukera honen moduan. Gainontzean Proton VPN (konexio bat doan eskaintzen du) edo NordVPN aipa genitzazke.
Adinez handi izatera pasako da gaur Tropela. 2005ean ekin genion ibilbide luze honi eta zorionez, gai ikusten gara aurrera egiteko!
2005 hartan Frantziako Tourra eta Espaniako Vuelta izan genituen, nahiz eta datubasean jada ez ditugun. Hastapen polita izan zen, batez ere Bertatik Bertara saioan azaltzeak eman zigun bultzadari esker. 2.800 erabiltzaile inguru izan genituen lehen lehiaketa hartan, guk pentsatu baino gehiago! Arazo tekniko batzuk ere gainditu behar izan genituen, ez pentsa, hori guztia orduan genuen – eta egun dugun! – lantalde bikainari esker.
Urte hauetan guztietan zuen babesa ezinbestekoa izan zaigu aurrera egiteko. Baita izan ditugu babesle desberdinak urte hauetan guztietan – Eroski Bidaiak, Cafes Baqué, Berria,… -, non guztietan Laboral Kutxa nabarmentzen dugun. Izan ere Laboral Kutxa gurekin dugu 2014tik eta asko eskertzen diogu gugan jarritako konfidantza osoa.
Dakizuen moduan, ibilbidean ere astelehenean abiatuko den Itzuliarekin aritu gara webgune eta sare sozialak kudeatzen. Askotan esan dugun moduan, harro batez ere itzulia izena indartzeko egin genuen lanagatik. Berdin Klasikoarekin edota Birarekin. Esan dezakegu guri eskerrak euskararen presentzia indartzeaz gain, nazioartera ere zabaltzen lagundu geniela ingelera ere komunikazioan txertatuz.
Adierazi bezala, urte asko eta ekintza asko burutu ditugu denbora honetan. Zerrendan ere gehitu beharko genuke Tropela Hondartzan, aspaldiko ohiturak ondar gainera ekarri baikenituen, ondoren pandemiak moztera behartu izan bagaitu ere.
Ez dakigu Euskal Herriko txirrindularitzaren inguruan erreferente garen, baina bai gure lekutxoa lortu dugula. Ea ba munduan ere lekutxoa izatea lortzen dugun, batez ere hizkuntza gutxituei dagokien lekua eskainiz, gure izatearen parte baita.
Azken asteetan Musk jaunaren abokatu taldearekin hartu emanetan izan gara akordioaren azken xeheetasunak isten eta gaur jada publiko egin dezakegu akordioa gauzatu dela. Hurrengo egunetan bilduko da Elon Musk bera gurekin erosketa guztiz formalizatzeko. Noiz eta non izango den esan ezin badizuegu ere, jakin bilkura Euskal Herrian bertan izango dela.
Tropela bereganatzearen arrazoia Twitter indarberritzeko estrategiaren barruan kokatzen du Muskek. Gauza jakina da sare soziala bere eskutan hartu duenetik zailtasunak izaten ari dela norabide egokia emateko garaian. Prozesu horretan Tropelak emango dion laguntzan kokatzen du Musk berak eta bere lan taldeak erosketa hau.
Alde batetik, Tropelak txirrindularitzaren komunitateari ematen dion ekarpena nabarmendu dute eta, era berean, Tropelak berak sortu duen komunitate propioa. Prozesu hori bera hartu nahiko lukete eredu Twitterrentzat. Bestetik, euskara eta beste zenbait hizkuntza gutxitu erabili eta uztartzeko Tropelaren gaitasuna balioan jarri dute. Twitterren hizkuntza desberdinak izan arren zerbait falta gehiago falta zaiolea eta Tropelak hori baduela diote. Teknikoki gauzak hobeto egin daitezkeela ere esan digute guk geuk hori badakigun arren, baina, gure harridurarako, txundituta geratu omen ziren Tropelaren atzean elkarte bat zegoela jakin zutenean; gutxienez 120 pertsonatako enpresa bat espero zutela aitortu ziguten.
Gurekin hartuemanetan lehenik email bidez eta ondoren telefono bidez izan zen lehen bideo bilera gauzatu zen arte. Bilera horretan Musk jauna bera izan zen. Gu nahiko urduri ginen, baina esan beharra dugu tentsioak azkar uxatu zirela Musken beraren gertutasun eta umoreari esker. Horren erakusgarri, ez zaigu ahaztuko lehen bideodeian esan ziguna algara artean: “egia esan ez zineten (Tropela) lehen aukera. Nire lan taldeak hobe nuela lasterketa profesional bat erostea esaten zidaten Tropela beharrean, Itzulia eta Klasikoa antolatzen dutenak hain justu, baina webguneko atzera kontagailua ikustea nahikoa izan zitzaidan aukera hori baztertzeko”.
Eta hemendik aurrera zer? Tropelaren dinamikari dagokionez, printzipioz bere horretan jarraituko du. Guk eramango dugu ardura orain arte moduan. Aldatuko den gauza bakarra hurrengo asteetan Los Angeleseko Twitter taldeko jendearekin elkarlanean hasi beharrean izango garela da. Musken eskakizunei jarraiki, Tropelak bere izaera eta dinamika mantenduko du eta gehiago izango da Twitterrekoei kontsultoria moduan gidaritza ematea. Bestaldera era Muskek nahi du Tropelak bere bidea eginez handitzen joatea eta Los Angeleseko baliabideak gure eskura izango ditugu. Guretzat garrantzitsua da oso gure identitatea eta jardueraren esentzia bere horretan uztea, eta, nola ez, Tropelaren zuzendaritzaren egoitza Euskal Herrian mantentzea. Hori horrela izango ez balitz, ez genukeen pausu hau emango.
Garrantzitsua iruditzen zitzaigun berri hau guk geuk lehenik zuenganatzea medioetan azaldu baino lehen. Tropelaren lan taldeko kideok intentziorik onenarekin gauzatu dugu salmenta eta espero dugu erabiltzaile eta jarraitzaile zareten guztiok begionez ikustea. Gu gogotsu baginen dagoeneko 2023ko denboraldirako, orain hare eta gehiago!