Gonbidapen garestiak Frantziako Tourrean

Argazkia: letour

Pasa den astean jakin ziren 2019ko Frantziako Tourrerako azken gonbidapen edo wild card-ak. Ez zen sorpresarik izan. Direct Energie eta Arkea-Samsic Frantziako taldeak izan dira aukeratuak. Espero zena, Arkea-Samsic taldearen lekuan Vital Concept ikustea ere posible ikusten genuen arren askok. Ez alferrik, UCI rankingean hobeto kokatua dago Vital Concept (25) Arkea-Samsic baino (28). Baina erabakigarria izan da, dudarik gabe, azken talde honetako bi izarren distira: André Greipel eta Warren Barguil, biak ere protagonista izanak aurreko ediziotan.

Aurretik jakinaraziak zituen ASOk beste bi gonbidapenak. Cofidis eta Wanty taldeenak, UCI rankingean hobetoen kokaturiko bi profesional kontinental taldeak. Gogoratu behar dugu 2020. urtetik aurrera indarrean izango den arautegiaren arabera, aurreko urteko maila horretako 2 talde onenek 3 handietan lehiatzeko aukera izango dutela, eta honenbestez, 2 gonbidapen bakarrik izango dituztela ASO, RCS edo Unipublic-ek beren eskura, nahi bezala banatzeko.

Honenbestez, hainbat taldek Frantziako Tourrean izateko erakutsitako asmoek (tartean Euskadi-Murias taldeak) gero eta urrutiago egon litekeen ametsa dirudite. Datuek diote Frantzian orain bezala 5 talde profesional kontinental dauden bitartean, Tourrean izateko bide bakarra UCIren urteko rankingean lehen bi talde profesional kontinentalen artean geratzea dela. Ez da erraza, baina ez da beste biderik. Hau ez da harreman publikoen kontu bat. Inoiz baino gehiago, matematika kontua da hau.

Hitz egin dezagun bada zenbakiez hurbileko adibide zehatz batzuen laguntzaz. Uneotan Euskadi-Murias 42. postuan dago UCIko taldeen rankingean eta Euskadi Fundazioa 99. postuan, Higuitaren garaipenari esker top100an sartuz. Bigarrenak, inolaz ere ezingo luke gonbidapena jaso dagoen mailagatik, baina norbaitek pentsatzen du ASOk gonbidapen bat luzatuko liokeela top40an ere ez dagoen talde bati? Arkea-Samsic eta Direct Energie ez dira profesional kontinental talde onenak, baina uneotan rankingeko 28. eta 20. postuan daude (hots, pro kontinentalen 10. eta 3. talde onenak). Aipagarria baita, nola Direct Energie (eta aurretik Wanty eta Cofidis), oso pattal dabilen Katusha World Tour taldearen aurretik daudela rankingean. 17 lehenengo postuak, logikoa denez, World Tour taldeei dagozkie.

Argazkia: @inrng

Are gehiago, aurtengo denboraldiaren amaieran 2 profesional kontinental onenak frantziarrak ez balira ere, eta haiek lortuko balute 2020rako Tourrerako sarbide zuzena, 5 talde frantziarrak oso ondo kokatuak daude sailkapenean, denak ere, bostak, lehen aipaturiko Euskadi-Murias edo Caja Rural (33) taldeen aurretik.

Irabaztea beti da zaila. 3 etapa garaipen itzuli batean emaitza bikaina da eta asko poztu gara Euskadi-Muriasek Alentejon lortutakoarekin, baina taldearen helburua Frantziako Tourra bada, ezer gutxirako balio dute, ez bada prestakuntza findu eta konfidantza irabazteko. Aste zoragarri batean, Enrique Sanzek 23 puntu bakarrik pilatu ditu beretzat eta bere taldearentzat Alentejon (2.2), 3 etapa irabazi eta 2 egunetan lider egotearen ondorioz. Bitartean, Wanty taldeak egun berdinetan, eta Dupont-ekin bakarrik, 210 puntu, GP Denain (1.HC) eta Bredene Koksijde Classic-en (1.HC) lorturiko postuekin. Van der Poelek bakarrik ere, 200 puntu igandean bere Corendon-Circus taldearentzat edo Roubaix – Lille Metropole kontinentalak 140 puntu GP Denain-en 2 ziklista top 10-an sartzeagatik. Hau da, dela rankingeko lehen 2 postuetan urtea amaitzeko, dela ASOren aurrean erakargarri azaltzeko (frantziarren aurretik behar lukete horretarako) puntu ehiza beste biderik ez dago.

Norbaitek esan dezake ez direla puntuak bakarrik begiratzen. Adibidez, beste taldeek ez dutela euskal zalegoa bezalakorik atzean (begira Pirinioak!!), edo Tourra laster Bilbora omen datorrenez agian orduan egongo dela euskal talde batentzat aukera (Giroak ere 2018an Israel Cycling Academy gonbidatu zuen irteera han zelako!!). Baina agian, ahazten zaie Israel Cycling Academy uneotan Italiako talde guztien aurretik dagoela UCI rankingean, eta hala ere, bai egin dituen fitxaketak, bai egutegia, UCI rankingeko puntuak pilatzera bideratu dutela. Ez dira bakarrak. Esango nuke 4 talde direla 2 postu horien lehian buru-belarri sartu direnak: Wanty, Cofidis, Direct Energie eta Israel Cycling Academy.

Eta egia esan, harrituta nago bai zaleen aldetik eta esango nuke bai talde askoren aldetik ere zer jarraipen gutxi ematen ari zaion aurten berrikuntza handi honi. 2. mailatik 1.go mailara igotzearen baliokideak diren 2 txartel daude lasterketetan jokoan eta txirrindularitza bere osotasunean erakargarriagoa eta gardenagoa egiten du honek.

Rap batekin hasi zen dena

Errepideko denboraldia hasi berri denean, marka batzuek egin dute posizionamendua. Zenbaki politak lortu dituzte denbora gutxian. Lau dira nabarmendu diren taldeak, lorturiko garaipenei esker: Astana (15), Deuceninck-Quick Step (13), Michelton-Scott (11) eta UAE-Team Emirates (10). Gainerakoak koska bat beherago daude, sasoiko lehendabiziko lasterketetan.

Garaipen zakua ikusita, Euskal Herriko hainbat txirrindulari dituen taldea da zer esana ematen ari dena. Ezizen ugari irabazi dituzte, batez ere, denboraldi berrian. Esaterako, #AstanaMotors eta #Eustana. Eta dena rap batekin hasi zen. Ahaztuko ez dugun bideo hori. Alexander Vinokourov ziklista ohia eta Astanako burua dute MC nagusi.

Ion eta Gorka Izagirrek asmatu dute talde aldaketarekin, eta seguru Euskal Herriko gainerako kideek eskertu dutela. Anai bakoitzak itzuli bana eskuratu du dagoeneko: Ionek Valentziako Volta eta Gorkak Proventzako Tourra. Baina guztira, zazpi itzuli irabazi dituzte zeru-urdin kolorekoek. Kolonbian, Omanen eta Ruandan onenak izan dira, txirrindulari hainbaten biziberritzearekin.

Harbideetako klasikoetan ere muturra sartu nahi izan dute, momentuz, lorpenik gabe. Oraindik egutegi luzea dute aurretik, harbideetan ez bada, muinoetan gailentzeko. Gero gerokoak. Alegia, hiru itzuli handiak.

Tropela.eus atariaren lehia osasungarria ere hastear da Strade Bianche klasikoarekin. Akaso, komeni da Astanako baten bat, gutxienez, aukeratzea.

argazkia: pezcyclingnews.com

Orange eta Amena euskal txirrindularitzan interesa jarrita [inozentada]

Azken asteetan gure blogean asko aritu gara euskal txirrindularitzaren inguruan. Beno, asko aritu da Eneko Garate eta benetan irakurgai interesgarriak utzi dizkigu. Oraindik ez badituzu irakurri garaiz zabiltza.

Jakingo duzuen moduan 2018ko denboraldian Murias taldea Continental Profesional kategorian izango da eta Euskadi Fundazioa, berriz, Continental, Murias baino maila bat baxuago. Orain gutxi jakin dugu Euskadi Fundazioaren maillot berria laranja kolorekoa izango dela, Euskaltel-Euskadi taldea gogora ekarri asmoz. Ekimenak, ordea, euskal telekomunikabide enpresaren interesa piztu beharrean Orange frantziarrarena piztu du. Continue reading “Orange eta Amena euskal txirrindularitzan interesa jarrita [inozentada]”

Murias Taldea aurrera pausuaren bila

Odriozolaren mutilek erronka handia dute aurtengo egutegian

Dakizutenez, Euskadi – Basque Country izango da Murias Taldearen izena 2016-ean. Euskaltelen agurraren ondoren eta Euskadi Fundazioak Kontinental maila utzi zuenetik Euskal Herriko talde profesional bakarra.

Aurtengo denboraldirako taldea handiagotu da Pello Olaberria, Alex Aranburu, Gotzon Udondo, Mikel Iturria, Aitor Gonzalez gazteen fitxaketekin nahiz eta Cofidisetik iritsi zen Egoitz Garcia eta gaixo ibili zen Haritz Orbe besteak beste galdu dituen arren. Continue reading “Murias Taldea aurrera pausuaren bila”

Adi! Dauphinen ere TTTa izango da eta puntuak banatuko dira

Italiako Giroa 2015: EQS erlojupekoa

ADI! Aurten lehen aldiz taldekako erlojuaren kontrako saioak puntuagarri izaten ari dira. Lehena Italiako Giroa izan genuen eta hurrengoa Dauphine Kriteriuma izango da izan ere 3. etapa taldekako erlojupekoa izango da. Giroarekiko desberdintasun bakarra puntua kopuruan izango da, Dauphine astebeteko lasterketa izanik, puntu gutxiago emango ditu:

– Lehen sailkatutako taldeko txirrindulari bakoitzari 35pt
– Bigarren sailkatutako taldeko txirrindulari bakoitzari 15pt
– Hirugarren sailkatutako taldeko txirrindulari bakoitzari 5pt

Informazio hau ikusgai duzue Puntuazio Sistema atalean.

Gogoratu kiniela egiterako garaian ez da aldaketarik egongo, erabiltzaileak beti bezala aukeratu beharko ditu txirrindulariak. Oraingoan ordea, erabiltzaileak kontuan hartu beharko du taldekako erlojupekoek puntuazio sistema berezia edukiko dutela eta hori kontuan hartu beharreko faktore bat izango da kiniela egiterako garaian.

Etapa bakoitzaren ondoren banatzen diren sailkapen nagusiko puntuak beti banatu izan diren bezala banatuko dira. Hau da, taldekako erlojupekoaren ondoren sailkapen nagusian lehen 6 sailkatuek puntuak bilduko dituzte.

OHARRA! Erlojupekoa amaitzen duten lehen hiru taldeetako txirrindulari orok bilduko dituzte puntuak, nahiz eta bere taldearekiko denbora galera eduki. Txirrindulari batek ez baldin badu erlojupekoa amaitzen (erretiratua) ez du punturik bilduko, nahiz eta bere taldea lehen hiruen artean sailkatu.