Kolonbian kezkatuta omen daude. Ez dakite futbol selekzioko izarrak, Falcaok, Brasilgo Munduko Txapelketarako osatuko den. Dena dela, sufritu baino, herrialdeak gozatu beharko luke, izan ere, bere txirrindulariak bikain ari dira Italiako Giroan. Uranek erlojuz kontrako etapa irabazi zuen eta lider da. Horrekin nahikoa ez eta Uranen aurkari nagusienetakoa -nagusia ez bada- Quintana herrikidea da. Gainera, beste txirrindulari batzuek, Pantanok eta Duartek kasu, etapa irabazteko lehian zutoina jo dute azken egunetan eta Arredondo ere ez dago kieto. Mendiko sailkapena lehiatzen ari da eta ustekaberik ezean, borrokalari peto izanik, bere horretan jarraituko du azken etapetan.
Arrosak duenean protagonismoa horiz jantzi da
Astelehen egunak izan dira atseden egunak Italiako Giroan. Askok arratsalde horietan hutsune bat somatu dugu. Baina azken urteetan txirrindularitza globalizatuan gertatzen den bezala, lehen mailako txirrindularitzaz gozatzeko aukera izan dugu baita ere atlantikoaren beste aldean: Californiako itzulia ospatu da eta zeresana eman du. Eta atseden eguna baliaturik, gogoeta txiki bat egin nuen.
Saihestezina da batzuetan Frantziako Tourrari buruz ez hitz egitea, txirrindularitzan jartzen diren foku guztiak uztaileko ekitaldira egoten dira begira.
“Arrosak duenean protagonismoa horiz jantzi da” irakurtzen jarraitu
Evansek, hordagoa handira
Idatz nezakeen Julen Gabiriaren abenturaz, baina ez dut egingo, Berria egunkarian artikulu gozagarria plazaratu berri dutelako eta nik ezingo nukeelako hobetu. Analisi sakon bat ere banuen buruan, baina Hibaik Tropela.net blog honetan bertan Kittel eta bere taldeari buruz egindakoa azterketa xehe eta zabalari itzal egiteko, nahikoa lan (irakurri duzu?). Hortaz, Evansi gorazarre egiteko aprobetxatuko dut. Behin baino gehiagotan txalotu dut plaza honetan azken urteetan Cadel Evansen itzuli txikiak irabazteko nahia, itzuli handiak irabaztetik urrun ikusten nuelako, baina hara non eta Giroa irabazteko borrokan dugu gizona, 37 urterekin. Lehen astea joan zaigu, eta mendiko lehen etapak eta gero, BMC taldeko liderra da sailkapen nagusiaren buruan. Arrosaz jantzita hartuko du australiarrak asteleheneko atseden eguna.
Giant-Shimanoren uzta, fruituak eman eta eman
Irlandar asteburuaren ostean, eta ostiralean Garmin-Sharp taldeak izan zuen zorigaiztoko erorketaren ondorioak alde batera utzita, hizketagai bakarra dago azken orduotan Italiako Giroaren inguruan: Marcel Kittelen garaipenak, eta batez ere, Dublingo helmugan egindako berebiziko erakustaldia. Bi garaipenak, gainera, sprint antolatu baten gidaritza baliatu barik bereganatu ditu. Honek bere gaitasunaren maila goratzen du, taldearen lana zalantzan jar lezakeen hein beretsuan.
Albaina, Giant-Shimanoren lanak orain arte eman dituen fruituak ukaezinak dira. Taldeak mota guztietako sprintetan lortutako emaitzak hor daude, eta Kittelek berak behin baino gehiagotan bere onespena erakutsi izan du taldearen bideratzaile-trenaren inguruan hitz egiterako unean.
Sprintetako metodologiaz haratago, ordea, urtez urte egindako lan zuzen eta eraginkorrari erreparatu behar zaio egitura herbeherearraren arrakastaren gakoak bilatzen hasita, jakina, sprintetan bere gailurra erakusten duena. Izan ere, 2009. urtean Frantziako Tourrak Skil-Shimano xumea gonbidatu zuenean, inork gutxik esperoko zuen bost urteren buruan nazioarteko tropeleko erreferenteetako bat izango zenik. ASOk taldearen ibilbide eredugarria saritu nahi izan zuen orduko hartan, eta era berean jakina zen UCIren gustokoa ere bazela. Normaltzat jo beharreko egoera, taldeen hazkunde eta desagertzeak inbertsore handien mugimenduek baldintzatzen dituzten kirol honetan.
“Giant-Shimanoren uzta, fruituak eman eta eman” irakurtzen jarraitu
Tropelan taldekako erlojupekoek ere eragina dute (bideoa)
Gauza jakina da Tropelan erlojuaren kontrako etapak ez direla puntuagarriak, baina atzo garbi ikusi da zenbaterainoko eragina izan dezakeen.
Espero bezala, Orica Green Edgek irabazi du etapa. Bigarrenak ziren gaur arratsaldean irteten, euria hasi aurretik nahiz eta saioa amaitu aurretik euria hasi zaien. Bazirudien euriak gainontzekoei kalte egin behar zirela, baina bukaeran atertu eta Omegak, adibidez, denbora ona egiteko aukera izan dute zenbait taldek. Tuft (OGE, %0,2) izan da talde australiarrean lehena helmugaratzen eta berak jantzi du maglia arrosa. Baina hau baino gehiago eman du etapak.
D.Martin eta Koldo Fdez de Larrearen erorikoa “Tropelan taldekako erlojupekoek ere eragina dute (bideoa)” irakurtzen jarraitu