Etiketa Artxiboak:Cancellara

Cancellara motoen pare

Cancellara. Vueltako 1. etapan garaipenaBai, egia da. Beharbada gehiegizko konparazioa izan da, baina suitzarrak 4,8 km-tako motoak aritzen diren zirkuituan azkarrena bera dela erakutsi du 54km/h bataz-besteko abiadurarekin. Motoen zirkuituan bihurguneak ere etzan-etzan eginda eman ditu. Zalantzarik gabe erlojuaren aurkako espezialista bikaina da Cancellara eta gaur ere hala erakutsi du.

Bazirudien protagonista euriak izan behar zuela. Erlojupekoa 15:30ak inguruan hasi da eta lehen irten direnei lur lehorra egokitu zaie eta horien artean denborarik onena markatzen Kreuziger izan da 5’37”ko markarekin.

Euria hasi du eta lurzorua asko busti da eta TVEkoek transmisioari ekin diotenean nabarmen ikusten zen txirrindulariak ez zeudela arriskatzeko. Horren adibide Barredok irteerako maldan izan duen erorikoa. Hala ere, faborito nagusiak irten aurretik, eguraldiak hobera egin du eta lasterketarako prestatutako zirkuitua izaki, azkar lehortu da beranduago irten diren txirrindularien mesedetan.

Lur lehor horretaz aprobetxatzen lehena Mouris izan da. Vacansoleil taldeko txirrindulariak ezustekoa eman eta 3 segundoz hobetu du txekiarraren marka. Kontuan hartzekoa lehen etapa honetan Vacansoleil taldeko kideak egin duena, izan ere taldea holandarra Vueltak gonbidatutakoa baita. Hasiera ona hauentzat.

Eguraldia hobera zioan eta faboritoak zirkuituari ekiten hasi dira. Erlojupeko laburra izanik begik esprinterretan jarriak nituen, hauek gaitasuna baitute denbora gutxian esfortzu handiak egiteko. Horren adibide Bennati izan da, Mouris eta Kreuzigerren artean sailkatu baita. Beranduago zen, ordea, Boonen flandestarra lanak bukatzekoa eta bikain aritu da Quick Step-ekoa. Denborarik onena markatzera iritsi da, 5’29”. Ez nuen uste Boonen hain ondo ibiliko zenik, baina gaurko etapari gogotsu ekin dio zalantzarik gabe.

Farrar zen hurrengoa iristen. Estatu Batuarrak garaipen aunitz eskuratu ditu azken egunetan eta oso motibatuta zetorren. Bere helburuetako bat gaur urre koloreko maillota janztea zen, baina Boonengandik 3 segundora helmugaratu da. Sailkapen nagusikok txirrindulariek denbora onak egin dituzte, baina ez etapa irabazteko modukoak espero zen bezala. Aipatutako txirrindulariak helmugaratuak zirela, Cancellara jotzen zen denbora hobetzeko hautagai.

Esan bezala, kilometro gutxiko erlojuaren kontrako lana izaki, garaipena esprinterren artean izango zela uste handiagoa nuen Cancellara berarengan baino. Baina argi dago oker nintzela. Cancellarak izugarrizko erlojupekoa egin eta 9 segundotan hobetu du Boonenen denbora. Merezimendu osoz beretzat etapa garaipena eta lasterketako lidergoa.

Sailkapen nagusiko faboritoei dagokienez, gaurkoa trantsizio egun bat besterik ez da izan eta postuetan alde handiak egon badaitezke ere, denborei dagokienez tarteak ez dira nabarmenak. Beraz, esan daiteke, aurrerago ala atzerago, guztiak espero bezala aritu direla. Hori bai, nabarmentzekoa Liquigasek emandako erakustaldia, lehen 10 postuetan lau txirrindulari sailkatu baitira.

Euskaldunei dagokionez, Imanol Erviti, David Herrero eta Markel Irizarren lanak gogoratu nahiko nituzke, 16, 17 eta 23. postuetan sailkatu baitira.

Astanak estu hartu du Cancellara

Astana. 4. etapan garaipena0 segundo. Hori da Cancellara eta Armstrongen arteko diferentzia sailkapen nagusian gaur jokatu den 4. etaparen ondoren. Cancellarak antolakuntzak berria eman duenean bi erroskillen keinua egiten zion norbaiti “0.0”. Gaurko etapan ez ziren diferentzia handirik espero, baina ia ia lidergo aldaketa izan da.

Etapari jarraipena egiten hasi naizenean Liquigasek zuen denborarik onena helmugan. Lehiatzen ari ziren gainontzeko taldeak ikusi ditudanean, orduan jakin dut Garmin-Splistream taldea 5 txirrindularirekin bakarrik ari zela lehian gainontzeko lauak bidean utzi ondoren. Eta ez ziren kilometro gutxi falta, baina arriskatzea erabaki du taldeak. Hori ikusita marka guztiak puskatuko zituztela uste nuen, baina ez da hala izan. Hala ere, Vandevelderen taldea helmugara sartzean denborarik onena egin dute.

Cancellararen Saxo Bank taldeak maillot horia defendatu beharra zeukan. Schleck anaiei ere komeni zitzaien denbora ona egitea eta horretan saiatu dira. Indarrak mugaraino eraman dituzte eta babesean joateko ahaleginak ere bai, behin baino gehiagotan elkarren kontra jotzeraino arriskatuz. Erreferentziak ikusita, bazirudien maillota mantentzeko gai izango zirela. Helmugaratzean Garmin-Splistreamen atzetik geratu dira baina Liquigasen aurretik 22 segundo soilik galduaz. Denbora ona zen, baina Columbia-HTC eta Astanak zer egiten zuten ikusi beharra zegoen.

Cavendishen taldeak aurre ikuspenetatik oso aparte ibili da. Bazirudien blokeak atzo bezala gaur ere etekina ateratzeko gai izango zela, baina ibilbideak hain estua izateak eta hain konplikatua, gauzak asko zaildu dizkio Columbia-HTC taldeari eta Liquigasen atzetik helmugaratu da.

Astana zen azkena helmugaratzen eta tarteko helmugetan denbora oso onak markatzen ari zen. Garmin-Splistream taldeari 17 segundoko tartea ateratzen zion helmuga horietan eta garbi ikusten zen etapa garaipena poltsikoan zuela, baina maillot horiaren lehian sartu da orduan bete betean. 3. mugarrian 41 segundo ateratzen zizkion eta Armstrongek Cancellararekiko zuen atzerapena 40 segundokoa zen. Birtualki Armstrong lider zen, baina helmugan 40 segundoko atzerapena izan dutela esan dute. Hortxe hasi dira zalantzak epaileek zerbait esan artean. Azkenean mili segundoak tarteko, Cancellarak maillot horia mantentzen jarraitzen duela adierazi dute.

Ikaragarria Astana taldeak eman duen erakustaldia. Ez dago esaterik talde lanean aritu ez denik. Bi oilar ditu oilategi honek, baina gaurkoan biek lan ukondoz ukondo egin dute eta ederki egin ere. Munduko talderik onena dela argi erakutsi dute eta gure zorionerako Haimar Zubeldiaren garaipena ospatu beharko genuke, helmugaratu den taldean baitzegoen gainontzekoek besteko lana eginda. Zorionak Haimar!!!

Aipatu era berean Euskaltel-Euskadik egindako lan bikaina. Bagenekien Tourrera joan aurretik taldeak erlojupeko hau prestatzen jardun zuela eta oso ondo egin dutela esango nuke. 10. postua lortu dute Rabobank bezalako talde baten aurretik.

Faboritoei dagokienez, gaurko etapak Evans eta batez ere Menchov kaltetu dituela esango nuke. Evans 2’59”ra jarri da eta Menchov 3’52”. Errusiarrak erorikoa izan du etapa hasieran eta horrek asko baldintzatu die gaurko erlojupekoa Rabobankeko txirrindulariei.

Biharko etapa laua izanik ere itsaso bazterretik egin behar dute ibilbidea eta atzoko mozketaren bat gerta daiteke tropelean, kosta aldean beti ere haizeak indar gehiagoz jotzen baitu. Hala ere, ez dut uste atzoko gertakaria errepikatzeko moduan izan daitekeenik guztiak ere tentuz ibiliko baitira. Gauzak ondo bidean eta helmugan gain saririk ez dagoenez, Pirinioetako etapen zain geratu beharko dugu sailkapen nagusian aldaketak ikusteko.

Lehen esprinta, Cavendishen lehen garaipena

Lehen esprinta jokatzen zen gaurkoan eta Cavendish britainiarrak esperotako lortu irabazi du bideoan ikusi dezakezuen bezala. Lan bikaina Columbia-High Road taldeak egin duena ihesaldia kontrolatuz eta Cavendishi esprinta ederki irekiaz.

Gaurko etapak muino batzuk zituen, baina esprinterrentzat bere biziko zailtasunik izango ez zuena ikusi dugun bezala. Etapa hasieran Dumoulin frantziarra saiatu da tropela atzean uzten baina bere saiakera ezerezean geratu da. Lehen igoera aprobetxatuaz, La Turbie, laukote batek ihesaldia osatzea lortu dute: Clement, Veikkanen, Dessel eta Augé izan dira. Hauek 5 minututako errenta izateraino iritsi dira, baina beti izan dira tropelaren kontrolpean. Hasieran Saxo Bank Cancellararen taldea arduratu da tartea murrizteaz ez baitzuten lidergorik galtzerik nahi. Beranduago, ordea, esprinterren taldeak sartu dira, Columbia-High Road eta Milram tropelaren buruan.

Laukotea harrapatu bezain laster Ignatiev errusiarrak saiakera egin du. 10 kilometroren faltan erasoa jo eta 11 segundoko tartea atera ahal izan dio tropelari. Hala ere esprinterrak ez zeuden etapa oparitzeko moduan eta hala izan da. Maldan behera zihoan tropela Brignoleseko helmugarantz. Ibilbidean bi errotonda zituzten helmugara iritsi aurretik. Horrek tentsioa areagotu du tropelean. Abiadura handiak eta tentsioak, bideoan ikusten den bezala, Koldo Fernandez de Larrearen erorikoa behartu du tropela bi zatitan banatuaz. Cavendish aurreko multzoan zen ondo babestua eta ez du arazorik izan Farrar, Feillu eta Hushovd gainditzeko. Etapa garaipena, beraz, Cavendishentzat. Lehena etapa garaipena eta oraingoz maillot berdearen jabe. Sailkapen nagusian aldaketarik ez.

Aipatutako erorketa horretan ez dirudi Koldo Fernandez de Larreak eroriko larria izan duenik, urratuak eta antzerakoak, baina jarraitzeko moduan izango da. Ezin esan saiatu ez denik. Baina ez da erori den euskaldun bakarra. Igor Antonek ere etapan zehar eroriko bat izan du, baina honek ere ez du ezer larririk esan dutenez.

Cavendishek lehen garaipena eskuratu du, baina gaurko esprinta “benetakoa” ez dela esango nuke. Hau da, Koldo Fernandez de Larrearen erorketak tropela bitan zatitu du eta zenbait txirrindulari esprinta jokatzetik kanpo geratu da, Freire esate baterako. Erorketak berak ere zer esan asko emango du, izan ere zalantzan jarri baita bihurgunea ongi adierazita zegoenik. Ez dakit zer esan.

Cancellara lokomotoraren beste erakustaldi bat

Cancellara. 1. etapan garaipenaAurre ikusi bezala, suitzarrak ez du hutsik egin eta etapa eta maillot horia eskuratu ditu. Tropela.net-eko lehiaketako %69,5a gustura izango da beraien aukeraketak ez baitie hutsik egin.

Lasterketa 16:00etan hasi da Van Hummel herbeheretarrarekin eta ordu horretan bukatu da kiniela egiteko epea. Ordurako asko zuen kinielari azken errepasoa egin eta telebistara joango zineten, izan ere Armstrong 16:17an ateratzen baitzen. Ikusmin ikaragarria estatu batuarrak eragin duena. %23,8ak ondo ibiliko dela espero du eta gaurko etapan zer egiteko gai zen ikusi nahi genuen. 18. txirrindularia zenez lasterketari ekiten, ez zuen zail denborarik onena egitea. Hala izan da nahiz eta guztiz eroso ez dugun ikusi bizikleta gainean. Bagenekien gainontzeko espezialistak denbora hori hobetuko zutela, baina zenbaterainoko ona izan den ez genekien. Momentuz amerikarra lasterketako lehen postuan zen.

33. txirrindularia irteeran Tony Martin genuen. Alemaniarra ondo zegoela bagenekien, izan ere Suitzako Itzulian etapa garaipena eskuratzeaz gain mendiko sailkapena irabazi baitzuen. Baina espero al zenuten hain erlojupeko onik egingo zuenik? Alemaniarrak Armstrongen denbora 7 segundotan hobetzea lortu du. Tropelean %25,6ak aukeratutako txirrindularia eta badirudi lehen egunetik etekina aterako diola Tropeleko laurdenak.

Erlojupekoa aurrera zioan eta espezialistak agertzen hasi dira. Hurrengo Leipheimer zen eta honek ere ez du hutsik egin. Tony Martinen denbora 3 segundotan hobetzeko gauza izan da. Orduan konturatzen hasi gara Armstrongek egindako denbora ona izan zitekeela. Momentu horretan Astanak bi txirrindulari lehen hiru postuetan zituen eta etapako sailkapenak ez du aldaketarik izan Kreuzigerrek bere lana egin arte. Txekiarrak forma onean dela erakutsi du eta 2 segundogatik ez da lehen postuan sartu. Liquigaseko txirrindulariaren denborak Armstrong podiumeko postuetatik at utzi du momentu horretan.

Astanak, ordea, gaur ederki erakutsi du talde ikaragarria duela. Klöden izan da hurrengoa lehen postuak dantzan jarri dituena. Erlojupeko bikaina alemaniarrak egin duena eta bere taldekidearen ordurako markarik onena 8 segundotan hobetu du. Helmugaratu denean Astana taldeak 3 txirrindulari zituen lehen 5 postuetan. Ikaragarria!

Lasterketako lehen postuek, beraz, horrela jarraitu dute azken 6 txirrindulariek denborak jakin ditugun arte. Wiggins britainiarrak, erlojuaren kontrako espezialista britainiarra, bidea bere ezaugarrietarako egokia izan ez arren, Klödenen denbora hobetzea zegoela erakutsi du. 3 segundotan murriztu du bere denbora eta behin behineko lider jarri da ingelesa. Baina oraindik Cancellara, Contador eta Evans falta ziren besteak beste helmugaratzeko eta denborak hobetu dituzte.

Hurrengoa helmugaratzen Cancellara, Suitzako lokomotora geldiezina eta aurtengo Suitzako Itzuliaren irabazlea izan da. Honena bai izan dela erakustaldia! Cancellarak bere aurretik zuen txirrindularia harrapatzeko gauza izan da, eta ez zen edozein txirrindulari, Menchov bera baizik, aurtengo Giroko garailea. Suitzarrak Wigginsen denbora 19 segundotan hobetu du.

Contadorrek gaur Espainiako koloreak zituen maillota estreinatu du eta esan behar ez duela batere gaizki egin. Espainiarrak taldeko liderra zein den erakutsi nahi zuen eta Amstrong, Leipheimer eta Klöden taldekideen denbora hobetu du nahiz eta Cancellararena ezin izan duen hobetu. Pintokoak bigarren postuarekin konformatu behar izan du. Hala ere, erlojupeko bikaina 2007ko Tourreko garaileak gaur egin duena.

Dagoeneko Evans eta Sastre falta ziren helmugaratzeko. Evansek, ohi bezala, denbora polita egin du eta Klödenengandik 1 segundora geratu da etapako 5. denborarik onena eginaz. Sastre, berriz, erlojupekoetan ondo moldatzen ez dela ezagun du eta faboritoen multzotik ia minutu bat galdu du.

Euskaldunei dagokionez, Mikel Astarlozaren lan bikaina aipatu nahiko nuke. Pasaiatarrak 12. postuan amaitu du gaurko etapa eta sailkapeneko faboritoenekiko 26 segundoko atzerapena besterik ez du. Ia gaurko sentsazio on honek horrela jarraitzen duen eta pozen bat ematen digun pasaiatarrak.

Gaurko etapari dagokionez, ondorengo ondorio hauek atera daitezke. Alde batetik, espero bezala, Cancellarak etapa irabazi du eta lider jarri da. Ez dakiguna da ia asteazkeneko taldeko erlojupekoaren ondoren lidergoari eusteko gauza izango den Contador 18 eta Wiggins 19 segundora izanda. Erlojupeko ona egin beharko du Saxo-Bankek asteazkenean maillotari eutsi nahi badio. Beste ondorioetako bat faboritoek gaurkoan ez dutela hutsik egin Menchov eta Kirchen izan ezik. Errusiarrak Contadorrekiko 1’13” atzeratu da eta Kirchenek 1’39”. Badirudi bi txirrindulari hauek ez diotela bide onetik ekin aurtengo Tourrari. Armstrong, berriz, faboritoen artean da Contadorrengandik 22 segundora. Ezustekoren bat emateko gai izango al da Texaseko txirrindulari mediatikoa?

Frantziako Tourra. Multzoen analisia (II): Beste hautagaiak eta espezialistak

Ez da erraza talde honetan hiru txirrindulariren aldeko aukera egitea. Maila handiko txirrindulariak dira guztiak eta hauetako norbait Parisera horiz jantzita iristea zaila izango bada ere, ziur podiumean muturra sartuko duela zerrenda honetako norbaitek. Ziur Tourrean ikusiko ez duguna Ivan Basso dugu, Dauphine Libere-n gaixotasun bat medio jaitsi baizen bizikletatik eta ez baitugu irteeran izango.

Schleck anaiak
Irteeran izango diren arren, Bassoren hainbat herrikide ere ez ditut ikusten Tourrerako lehian, Vincenzo Nibali eta Franco Pellizotti kasu. Nibalik Giro dell´Appennino irabazi berri du baina Tour-ak beste maila bat du eta egun distiratsu bat eduki badezake ere, etaparen bat poltsikoratzea izango du helburu. Pellizottiri, baina Giroaren ondoren italiar gehienei bezala kosta behar zaio orduko sasoi puntua mantentzea. Marzio Bruseghin “zaharra”, aurten Giroan apalxeago ikusi duguna, duen eskarmentua tarteko izan daiteke salbuespena. Bere neurrian halere, emaitza ona bailitzateke 10 lehenengoetan amaitzea edo etaparen bat ehizatzea. Hortik gora nahiko lan. Michael Rogers italiarra ez bada ere, egin duen Giro politaren ondoren italiarren taldean sartuko nuke.

Beteranoekin jarraituz, Christophe Moreau handia aurten ere irteera puntuan ikusiko dugu. Hortik aurrera, bere berri gutxi izango ditugula iruditzen zait. Christian Vandevelde, aldiz, aurtengo sorpresa izan daiteke. Suitzan berragertu da soinu handirik atera gabe, baina Giroan erori izana ongi etor lekioke Tourrera fresko iristeko. Oso ongi iritsi zen Girora eta pedal kolpea berreskuratzen badu iazko bosgarren postua hobetu dezake. Continue reading “Frantziako Tourra. Multzoen analisia (II): Beste hautagaiak eta espezialistak”