Etiketa Artxiboak:Cancellara

2010eko taldeen analisia (XII): Team Saxo Bank, Tourra begi tartean sartuta

Maillot horia kentzea helburu Helburu nagusia da. Andy Schleckek Alberto Contador Parisen goitik behera begiratzea, podiumeko lehenengo postutik beste batera begiratzea, alegia. Eta hori buruan sartuta antolatu du denboraldia talde danimarkarrak. Dena den, bajak asko igarri ditzake Team Saxo Bankek, izan ere urte batetik bestera Kurt Asle Arvesen, Karsten Kroon, Jurgen Van Goolen, Alexander Kolobnev, Lars Bak eta Mathew Goss galtzea ez baita broma. Sei izen horietan kalitate asko dago: txirrindulari azkarrak, Goss kasu, klasikomano apartak (Kroon, Kolobnev eta Bak), urte osoan maila harrigarria ematen duen Arvesen, eta, azkenik, aldapa gora txukun moldatzen den belgikar bat (Van Goolen). Hauek ordezkatzeko nortzuk fitxatu dituzte? Laurent Didier frantziarra, Baden Cooke (honek ez du aurkezpenik behar), Jonas Aen Jorgensen, Jaroslaw Marycz, Richie Porte eta Lucas Sebastian Haedo, Juan Joséren anai gaztea. Lehen begiradan, eta baita bigarrenean ere, badirudi taldeak kalitatea galdu duela. Ikusi egin behar jokaldia nola ateratzen zaion Bjarne Riisi. Momentuz hiru garaipen pilatu dituzte: Cancellarak Omango sailkapen nagusia, JJ Haedok Mumbai Cyclothon lasterketa eta Rasmussenek Andaluziako Itzuliko erlojupekoa.

Gauzak honela, talde honetan bi izen aipatu behar dira beste guztien gainetik: Andy Schleckek iaz erakutsi zuen zertarako gai den. Liège-Bastogne-Liège maisuki irabazi ostean, Tourrean aldapa gora Contadorri gertu xamarretik jarraitzeko gai izan zen bakarra bera izan zen. 25 urtera bidean, kalitatea soberan dauka, eta beste pausu bat eman behar du bere karreran. Ez dauka arerio makala Pintoko mutiko apartean, ordea. Dena den, badirudi erlojuz kontra anaia bezain gaizki ez dela moldatzen, eta progresio marjina ere baduela, beraz, lehia polita ikusteko moduan egon gaitezke aurtengo Tourrean.

Beste izen propioa Suitzatik datorren lokomotora da. Fabian Cancellarak denboraldia hasi berri lehen garaipena lortu du, esan bezala, eta ziur aski aurten ere daudenak eta ez daudenak irabaziko ditu, gehienak erlojuaren kontra, logikoki. Tourreko sailkapenaren asaltoa gaizki aterata (inor harritu al zen ba hori ikusita?), beharbada bere lekua zein den garbi ikusi du. Dena den, duda datorren Uztailean kenduko digu. Ordura arte, hamaika garaipen eta beste horrenbeste erakustaldi emango ditu, ziurrenik.

Esanda bezala, Team Saxo Bankek kalitatea galdu duela dirudi, aurreko urteekin alderatuta, behinik behin. Dena den, Tourrean garantia handiko taldea aurkeztuko du, eta izen hauek ez dira urruti ibiliko: Jakob Fuglsang norvegiarrak (nahiz eta Suitzan jaioa) iaz erakutsi zuen zertarako gai den. Aldapa gora sekulako maila erakutsita, normalean Tourreko taldean behar luke. Ezin ahaztu beste txirrindulari puska bat, Fränk Schleck, alegia. Udaberriko klasiketan maila ona eman ostean, Tourrean bigarren forma puntua bilatuko du, bere anaiari lagundu eta, zergatik ez, bere kabuz ere helbururen bat lortzeko, gaitasuna badauka eta. 38 urteko morrosko alemaniar bat ere garrantzitsua izango da. Jens Voigtek ez du ezagutu urte bakar bat hutsean, palmaresean ezer idatzi gabe, profesional bilakatu zenetik, 1997 urrun batean. Aurten tendentzia apurtzen ez badu gutxi harrituko dira. Gustav Erik Larsson suediarra taldekako erlojuz kontrakoan ezinbesteko makulua izango da Schleck anaientzat, eta, ondo bidean, Frantzian behar luke baita ere.

Gainontzekoen artean, Matti Breschel eta Haedo anaiak esprintetan musturra erakutsiko dute. Talde gizon badirenak, baina hala eta guztiz ere garaipenak lortzeko gai direnak ere badaude, Chris Anker Sorensen, Nicki Sorensen, Stuart O’Grady eta Alex Rasmussen kasu.

Laburbilduz, “minatutako” taldea da Saxo Bank, baina oraindik sekulako potentziala daukana. Beste behin, onenen artean izango ditugu Riisen gizonak, doazen lekura doazela.

Evansek denboraldi amaieran urteko saria jaso du

Evans. 2009ko Munduko Txapelketako garaile errepideanMerezi zuen. Egia esan australiarrak ez zen batere ondo ibili Tourrean eta Vueltan zulatu baten ondorioz Espainiako lasterketak eskuetatik alde egin zion nahiz eta azkenean podiumean sartzea lortu zuen. Gaur, lan guztiaren emaitza eskuratu du: ostadar maillot preziatua.

Eguneko ihesaldia lehen itzulian osatu da. Bertan Greipel zen Espainiako Vueltan 4 garaipen lortu zituena. Tropeltxo honek ia 11 minututako tartea izateraino iritsi dira. Hala ere azken aurreko itzulian sartu arte ez dira faboritoak mugitzen hasi. Hauen aurretik beste tropeltxo bat ere osatu da 19 txirrindularirekin, tartean Boonen, Hoogerland, Ballan, Cobo eta Rodriguez zirelarik besteak beste.

Australiako taldeak ez zuen ordezkarik aurreko bi tropeltxoetan eta bere txirrindulariak tropel nagusiari tiraka jartzea erabaki dute ihesaldiak zapuzteko. Beraien lanari eta beranduago Juanma Garate eta beste zenbait txirrindulariei esker, ihesaldiak neutralizatzea lortu dute.

RTVEkoak, ordea, ez dira batere fin ibili. Azken aurreko itzulian sartu direnean txirrindulariak publizitateetara jo dute eta erabakigarriak izan diren mugimenduak galdu ditugu. Ohikoa zoritxarrez aspaldi honetan telebista publikoaren jokabide hau. Ez al zituzten ba anuntzioak kendu behar kate publikotik?

Azken bi itzulietan faborito nagusienak biltzen ziren tropeltxoa osatu da eta gainontzekoak garaipenetik kanpo geratu dira. Hauen artean Evans, Valverde, Samuel Sanchez, Freire, Rodriguez, Gilbert, Cunego, Cancellara eta beste zenbait txirrindulari aurkitzen ziren. Bazirudien Cancellara sasoi onean zegoela eta garaipena lortuta historia egiteko gauza izango zela, baina ez da horrela izan azkenean.

Tropeltxo honetan mugitzen lehena Kolobnev izan da eta atzetik Rodriguez atera zaio. Valverde eta Samuel Sanchez uneoro Cancellararen gurpila zaintzen ari ziren. Egoera horretaz baliatuz, Evansek aurrera jo du eta Kolobnev eta Rodriguez harrapatzeaz gain aurrera jotzea erabaki du Espainiako eta Errusiako txirrindulariak kontrol lanetan hasiak baitziren. Australiarrak jotako erasoa gogorra izan da eta zirkuituko azken aurreko igoeraz baliatuz, tarte polita ateratzea lortu du. Tarte horrek urrezko domina norentzat izango zen erabakita utzi du.

Atzean errusiarrak lan gogor egin du eta bigarren postuan sailkatzea lortu du 27 segundora atzetik Rodriguez zuela. Cancellara Valverderen tropeltxoan zegoen eta azken metroetan azken indarrak xahutzea besterik ez zitzaion geratzen baina dagoeneko podiumetik kanpo zen. Samuel Sanchez izan da azkenean laugarren, atzetik Cancellara.

Hurrengo urtean, beraz, Evansek eramango du ostadar maillota tropelean. Ez dira gustura izango espainiarrak eta italiarrak hauek baitziren faborito nagusienak gaurko lasterketarako. Datorren urtean Melbournen jokatukoda Munduko Txapelketa eta horrek seguru Evansi oraindik bereziago egingo zaiola lortu duen garaipena.

Cancellara bikoitzaren bila

Cancellara. 2009ko Munduko Txapelketako erlojuaren kontra urrezko dominaEtxean ari da eta horrek motibazio bikoitza ematen dio Cancellarari. Gaur erlojupeko ikaragarria egin du. Bagenekien irabaziko zuela, baina erakutsi duen nagusitasuna ikaragarria izan da. Bigarrena izan den Larsson-i 1’27”ko tartea atera dio eta hori azken 200 metroetan garaipena zaleekin ospatzen joan dela, esku lekutik eskuak gora jasota. 51,58 km/h bataz besteko abiadura ikaragarrian joanda ez nau harritzen areriorik ez izatea. Hirugarren Tony Martin izan da 2’30”ra.

Esan bezala bagenekien Cancellarak gaur irabazi egingo zuela. Ez da ezustekoa izan. Berak esan zuen aurtengoan historia egiteko asmotan dela eta erlojuaren kontrako urrezko domina janzteaz gain errepidekoa ere jantzi nahi duela. Iazko Beijingeko joko olinpikoak gogora ekarri nahi izan du gaurko domina eskuratu eta gero. Oroitzen bazarete, iaz azken kilometroetan ihes eginda zirenak atzetik aurrera eginda harrapatzeko gauza izan zen, baina esprintean hirugarren postua besterik ezin izan zuen lortu Samuel Sanchez eta Rebellinen atzetik. Aurtengoan bi arrazoi eman ditu igandean bigarren urrezko domina lortzeko: alde batetik etxean ari dela (gaurko erlojuaren kontrako saioan 23000 ikusle ziren, gehienak bera animatzen, noski) eta bestetik zangoak Beijinen baino hobeto dituela.

Garbi dago erabat kontzentratuta dagoela aurtengo munduko txapelketa hauetarako. Hala ere ez zait iruditzen gainontzekoek gauzak erraz jarriko dizkiotenik, baina saiatuko dela seguru naiz.

Esan bezala Larsson izan da bigarren sailkatu dena. Esanguratsua bere adierazpenak. Bere hitzetan Cancellara dagoen erlojuaren kontrako saioan zilarra lortzea urrea lortzea bezala sentitzen duela. Ez zait harritzen suitzarraren ibilbidea ikusita.

Gaurkoa irudirik kaxkarrena eman duena Wiggins izan da. Aurreko postuetan ikustea espero genuen, baina ez da gauza izan maila emateko. Larssonek berak ere aurreratu egin du eta muinora azkenekoz igotzen ari zela arazo mekanikoak izan ditu katearekin edo, eta ezinak jota, amorrazioz, bizikleta lurrera bota du. Beharbada denbora gehiegi lehiaketetatik kanpo?

Errepidekoari begira

Tropelean guztiok igandeko saio horren zain gaude. Ez da erreza 10 txirrindulari aukeratzea eta informazio oro gutxi da. Zenbait iruzkinetan Haussler-en eta Frank Schlecken inguruan galdezka aritu zarete.

Lehenaren inguruan esan, ondo zenioten bezala, egun Alemanian bizi den arren Australian jaiotakoa da. Bi naziotasunen jabe da eta Alemaniako taldeak txirrindularia Mendrision nahi bazuen ere, berak ezetz esan du alde batetik bere egutegian ez zuelako aurre ikusita eta bestaldetik ibilbide hori ez omen da egokia bera bezalako txirrindulari batentzat. Hurrengo urtean, berriz, Melbournen jokatuko da munduko txapelketa eta badirudi han izango dela. Bai, badirudi alemaniar baino australiarrago sentitzen dela Haussler.

Frank Schlecki dagokionez, Vueltako 11. etapan lasterketa uztea erabaki zuen. Dirudienez Amstel Gold Race klasikoan izan zuen erorikoak arazoren bat sortu zion belaunetako batean eta ebakuntza egitera eraman zuten. Hau horrela izanda, zail ikusten zen Mendrisioko munduko txapelketarako errekuperatuta izatea.

Cancellarak ez du hutsik egin

Cancellara. 2009ko Vueltako 7. etapan garaipenaAssenen motoen zirkuitu batean irabazi zuen Cancellarak eta motoekin konparatze nuen. Gaurkoan F1eko autoak ibiltzen diren Valentziako kaleetatik aritu dira txirrindulariak erlojuaren kontra eta oraingoan ere Cancellarak ez du areriorik izan. 49 km/h inguruko bataz besteko abiaduraz gailendu zaie gainontzeko txirrindulariei eta maillot horia berreskuratu du. Millar eta Grabsch 32 eta 36 segundotara sailkatu dira hurrenez hurren espero bezala.

Gaurko etaparen nondik norakoak espero bezala joan dira. Beharbada eguraldiak batzuri kalte gehiago egin badie ere, orokorrean ez da ezusteko nabarmenik izan. Millar eskoziarrak denbora oso ona jarri du eta denborarik onena izan da Cancellarak bere lanak burutu dituen arte. Bazirudien Grabschek Millarren denbora gaindi zezakeela, baina azkenean 2 segundora sailkatu da alemaniarra.

Faboritoetan lanei ekiten lehena Vinokourov izan da. Kazakhstandarrak zerbait egitekotan gaurko erlojuaren kontrako saioan egingo zukeela pentsatzen nuen, baina ez da hala izan. Berak egin ohi izan dituen saioetatik urruti izan da eta Millarren denbora baino 41 segundo gehiago behar izan ditu.

Mosquera Samuel Sanchezen aurretik ekin dio saioari, baina galiziarra pattal zebilen erlojuaren kontrako espezialista ez baita, eta asturiarrak gainditu egin du. Bazirudien oso ondo ari zela Euskaltel-Euskadiko txirrindularia eta helmugan ere hala izan da. Millar gainditzeko gai izan ez bada ere, 15 segundora helmugaratu da eta faboritoen artean denborarik onena egitea lortu du gaurkoan.

Danielsonek tarteko mugarrietan denbora kaxkarragoak egiten joan den arren, bukaeran Samuel Sanchez baino 3 segundo gehiago behar izan ditu ibilbidea egiteko.

Haimar Zubeldia izan da hurrengoa helmugaratzen eta denbora bikaina egin du usurbildarrak. Aspaldian erlojuaren kontrako saioetan ez dut ikusi hain ondo eta sailkapen probisionalean 10. sailkatzea lortu du Millarrengandik 46 segundora.

Dagoeneko Valverde, Evans eta Bassok zer egingo zutenaren zain ginen. Lehen mugarrian murtziarrak 20 segundo galtzen zituen, 10 australiarrak eta 29 italiarrak. Bigarren mugarrian 23, 23 eta 49 ziren hurrenez hurren. Gaizki, beraz, italiarra. Helmugan azkenean, 33, 30 eta 1’11”. Evansen denbora ez da espero bezain ona izan kontutan izanda bera erlojuaren kontra espezialista dela. Valverde ohiko moduan, eta Basso espero baino askoz okerrago.

Faborito nagusien atzetik, Kiriyenka eta David Herrero bilbotarrak egindako denborak benetan aipagarriak. Errusiarra 14 Millarrek baino 14 segundo gehiago besterik ez ditu behar izan eta bilbotarrak 10 besterik ez. Ikaragarria David Herrerok egindako erlojuaren kontrako saioa eta ondorioz sailkapen nagusian 3. postuan aurkitzen da.

Cancellarak lehen mugarrian ez du denborarik onena egin, baina kilometroak aurrera zihoazen heinean, abiadura handitzen joan da. Esan bezala azkenean helmugan lehen postuan sailkatu da eta Millarri 30 segundo jan dizkio.

Aipatzekoa Bennati eta Boonek egin duten saioa. Bennatik lehen mugarrian denborarik onena egin du Millarrena 4 segundoz hobetuz. Ez genuen espero erritmo horri eusteko gai izango zenik. Ezin jakingo dugu hori zehazki, izan ere zulatua izan du italiarrak eta azkenean Cancellararengandik 1’12”ra sailkatu da. Antzeko zerbait izan da Booneni gertatutakoa eta azkenean 1’02”ko denbora egin du. Denbora bikain honi esker sailkapen nagusiko bigarren postuari eusten dio.

Honenbestez esan Cancellarak ez duela areriorik. Biharko etapan liderraren maillota eramango du baina etzi ez. Vueltan egin behar zituen lan guztiak, beraz, egin dutela dirudi eta ez harritu laster erretiratzen bada. Ez dio axola, bere espezialitatean onena dela erakutsi baitigu berriro ere.

Faborito nagusiei dagokienez, Samuel Sanchezek egin du gaurko saiorik onena eta Bassok txarrena. Sailkapen nagusiari begirada bat ematen badiogu, faboritoetan lehena Evans dela ikusten dugu eta atzeratuena Basso australiarrarengandik 40 segundora. Beste faboritoei begiratuta, berriz, atzeratuena Mosquera dugu 1’40”ra. Ahaztu gabe beharbada kontutan hartu beharko genuke Kiriyenka mendian ondo moldatzen den txirrindularia baita. Hau 5. aurkitzen da sailkapenean, Evansen aurretik 4 segundo gutxiagoz.

Euskaldunetan esperantza pizten dizkiguten bi txirrindulari aipatu nahi nituzke. Alde batetik David Herrero. Gaur egin duen erlojupeko bikainaren ostean sailkapen nagusian 3. postuan baitago. Ez dakit bihartik aurrerako lanetan nola moldatuko den, baina oraingoz bikain dabil. Bestea Haimar Zubeldia dugu. Horner-ek lasterketa utzi ostean eta Vinokourov %100ean ez dagoela ikusita, Astana taldearen lider bihurtu daiteke usurbildarra bere mendiko ezaugarriak kontutan hartzen baditugu. Hala ere kazakhstandarraren baimena beharko du, baina seguru aurrealdean ikusiko dugula.

Bihartik aurrera benetako lasterketa hasiko da. Aitana gainak lehen filtro lana egingo du. Gaurko erlojuaren kontrako saioak sailkapena pixka bat nahastu badu ere (batez ere esprinterrak lehen postuetatik atzeratuz), biharkoan lehen hamabost postuetan beharko du izan Vuelta irabazi nahi duenak. Adi izango gara, zalantzarik ez.

Erorketa ikusgarriak Greipeli garaipena erraztu dio

Liège-Bastogne-Liège klasiko ezaguna izaten den parajeetan ibili da gaur tropela, baina ez da espero zen ikuskizuna izan. Eguraldiak protagonismo handia hartu du eta ikuskizuna bestelakoa izan da. Helmugarako kilometro t’erdira izan den eroriko itzelak eman du. Biribilgune bat igarotzen ari zirela, tropelaren aurre aldean zihoanetako txirrindulari bat erori egin da eta atzetik zituen guztiak lurrera bidali ditu. Aurrekoak, Greipel tartean, ez du zailtasun gehiegirik izan Weylandti esprintean irabazteko.

TVEk gaurko etapatik espero zuena ez du jaso. Guk ere ez, noski. Hauen ustetan gaurko etapan ikuskizuna bermatua zegoen eta horren erakusgarri eguerdiko 13:30etatik Teledeporteko seinaletik etaparen jarraipena egiten hasi dira. Zorionez lana nuen eta ez naiz jarri arratsaldeko 16:30ak arte lasterketa ikusten, eta eskerrak! Klasikorik onenen pareko etapa espero zen, baina esprintean amaitu den horietako bat izan da, atzokoaren antzekoa euriagatik izan ez balitz.

Boom eta Roels (gaur ere bai), Ramirez Abeja eta Lagutinek osatu dute gaurko ihesaldia. Boomek helburu garbia zuen, hiru mendateetatik lehen postuan igaro eta mendiko maillota eskuratzea eta bere helburua lortu du. Tropelak, une oro, lasterketa kontrolpean. Hori bai, euria ari zuen eta arriskua aurre ikusten zen.

Liègeko helmugatik lehen aldiz bezain laster ihesaldian ziren kide guztiak harrapatu dituzte eta esprintean pentsatzen hasiak ziren txirrindulariak. Hala ere Kirchen edo Gasparotto bezalako txirrindulariak saiatu dira lasterketa puskatzen, baina ez dute posible izan.

Esan bezala gaurko etapa erabaki duen unea helmugatik kilometro t’erdira izan den erorikoak markatu du. Ikaragarria izan da erorikoa eta 50 txirrindulari inguru lurrean ziren beren zauriei begira. Aurre aldean, Columbia-HTCko eta Quick Stepeko hiruna txirrindularik helmugara bidea hartu dute, eta erraztasun handiz, Greipelek garaipena lortu du. Atzetik Weylandt eta Grabsch taldekidea izan ditu. Honenbestez, eta nahiz eta Cavendish ez den Vuelta lehiatzen ari, bigarren garaipena lortu du Columbia-HTCek eta biak esprintean.

3 kilometro barruan izan da eroriko ikusgarria eta horregatik Cancellarak lidergoari eusten jarraitzen du. Hala ere ezin esan zorteko dabilenik, erorikoan min hartu duela ikusi baitugu. Biharkoa atseden eguna dela kontutan izanda, zauritutako txirrindulariek beren egoera aztertuko dute eta etzi Tarragonako irteeran izaten saiatuko dira, baina ez harritu norbait erretiratzen bada min hartuta. Hori da adibidez Horner-en kasua. Dagoeneko taldeak jakitera eman du Horner-ek Vuelta utziko duela erorikoan eskumuturra autsi baitu.