Etiketa Artxiboak:Rabobank

Menchov geldiezinak Giroa irabazi du

Menchov. 2009ko Giroko garaileaErrusiarrak azken kilometroan erorikoa izan du, baina ez da nahiko izan maglia arrosa galtzeko. Segur aski mekanikariari izan duen azkartasunagatik eskerrak emateaz ez da aspertuko errusiarra, lurrera erortzerako hor baitzen aldamenean beste bizikleta batekin prest. Merezita irabazi du Menchovek aurtengo Giroa eta gaurkoan ere erlojupekoan Di Luca baino gehiago zela argi erakutsi du.

Gaurko 14 kilometrotako erlojupekoa Erromako kaleetan zehar jokatzen zen. Jokoan etapa garaipena eta sailkapen nagusiko postuak ziren. Lehen hogei postuei begiratuta lehia ezberdinak aurreikusi genitzake. Lehena Armstrong, Serpa eta Seeldrayersen artean zen, hirurak 42 segundoren tartean baitziren. Bigarrena Bruseghin eta Valjavecen artekoa, Valjavecek italiarra 50 segundora baitzuen. Hirugarrena Rogers eta Garzelliren artekoa, 52 segundo aurretik baitzen italiarra eta Rogers erlojupeko espezialista izaki, lehia aurreikusi zitekeen. Eta garrantzitsuena, nola ez, maglia arrosa eta ciclaminoaren artekoa, aurrez esan bezala, 20 segundoko tarte estuan.

Erromako erlojupekoa 23 bihurgunez osatutako ibilbidea zen, eta atzo aurreratzen genuen bezala, euria aurreikusita zegoen eta euria izan da protagonista. Ibilbideak lehenak egiten izan direnak lurzoru lehorra izan dute eta horrek denbora hobeak egiteko erraztasuna eman diete. Horren erakusgarri gaurko etapan lehen hiru postuetako sailkatu diren txirrindulariak: Konovalovas, Wiggins segundo batera eta hirugarren Boasson Hagen 7ra. Horrenbestez gaurko etapa garaipena Cervéloko txirrindulari lituaniarrak egindako denbora bikainari esker. Gaurko garaipenarekin Cervélok laugarren etapa garaipena lortu du aurtengo Giroan, bi Sastrek eta bat Gerransek. Hala ere, gaurkoan etapa garaipena bigarren maila batean zegoen 2009ko Italiako Giroaren garailea baitzegoen jokoan.

Armstrong, Serpa eta Seeldrayersen arteko lehiak espero baino gutxiagorako eman du. Armstrongek etapa lehiatu baino Erromatik pasieratxo bat eman duela esan daiteke eta helmugan 1’19”ra sartu da. Serpak 29 segundo kendu behar zizkion Armstrongi sailkapenean aurrera egin nahi bazuen, baina azkenean 10 bakarrik izan dira. Seeldrayersek, berriz, Serparena 13 segundoan hobetzea zuen helburu, baina ez da gauza izan eta sailkapen nagusian Serparekiko 4ra geratu da . Beraz, eguneko leheneko lehia bere horretan geratu da.

Aipatu dugun bigarren lehia Bruseghin eta Valjavecen artekoa izan da. Italiarrak denbora bikaina egin du baina gaurkoan Valjavec ondo ibil da eta azkenean 15 segundorengatik ez du aurreratu esloveniarra. Hauen arteko lehia ere, beraz, bere horretan.

Sailkapenean aurrerago joanaz, Rogers eta Garzelliren artekoa ezustekoa izan dela esango nuke. Rogersek espero baino erlojupeko pattalagoa egin du eta Garzellik, berriz, ikaragarria. Gaurko etaparen ostean Garzellik Rogersi 1’18”ko aldea atera dio sailkapen nagusian. Zenbaitek Tropeleko blogean Garzelliren emaitzak susmopean jarri dituzte. Hori antolatzaileek eta kontrolak egiten dituztenek esan beharko dute, baina aitortu beharra dago gaurkoa behintzat aurreikuspenetatik kanpoko emaitza izan dela. Nik bederen Rogersek Garzelli aurreratuko zuela edo behintzat justuan ibiliko zela uste nuen, baina esan bezala, oker nenbilen.

Eta lehia nagusia azkenik. Killerra eta Menchov, Giro honetan elkarren inguruan ibili diren bi txirrindulari eta zalantzarik gabe Giroko txirrindularirik erregularrenak. Di Lucak atzokoan kolpe morala jaso zuela uste dut. Atzoko emaitzak bestelakoak izan baziren, beharbada Di Lucak gaur maglia arrosarekin ekingo zion lasterketari eta erreferentziak izango zituen, baina ez da horrela izan. Kontua da Spoltoreko txirrindulariak gaur dena eman behar zuela eta arriskatzea besterik ez zitzaiola geratzen. Menchovek, berriz, bereari eustea besterik ez zuen. Italiarrak bizikleta arrunt batekin ateratzea erabaki du. Errusiarrak, berriz, erlojuaren kontra lehiatzeko bizikleta berezia. Euria ere ari zuen eta lur bustiak zeresana emango zuela bagenekien.

Lasterketan zehar hiru erreferentzia puntu ziren. Killerra bizi atera da eta lehen erreferentzia puntuan 5 segundoko errenta ateratzen zion errusiarrari. Bazirudien Di Lucak hobeto ekin diola erlojupekoari, baina kilometroetan aurrera egin ahala, Menchoven aldeko erreferentziak ematen hasi dira. Di Lucak ezin zuen azken une arte etsi eta denbora ona markatu du: 19’23”. Denbora hori kontutan hartuta, Menchovek 19’43” azpitik egin behar zuen ibilbide kurbatua.

Rabobankeko liderra azken kilometroan sartu denean denbora oso ona ari zen markatzen eta etaparen lehian sartuta zen. Momentu horretan Giroaren garaipena eskuan zuen. Baina orduan zoru bustiak behar baino protagonismo handiagoa hartu du. Menchov zuzen zihoan erritmo bizian, baina badirudi pedal kolpea ematerakoan atzeko gurpilak irrist egin diola eta oreka galdu arazi diola. Ez zen posible! Lasterketa liderra lurrera erori egin da eta han joan da arrastaka zenbait metro. ETBko emanaldian zehar ikusi ez duguna liderrari gertatu zaio. Bitartean Di Luca telebistaz Menchoven lana jarraitzen ari zen aurpegi serioz. Baina Rabobankeko kotxean adi ziren guztiak, baita mekanikaria bera ere eta Menchov bizikleta jasotzera hurbildu denerako mekanikariak beste bat jarri dio txirrindulariari alboan. Lasterketa era horretan galdu behar al zuen errusiarrak? Ba ez. Errusiarrak badaezpada etapa hasieratik lehiatu egin du eta horri eskerrak Di Lucarekiko aurreratuta zituen segundoak nahikoak izan dira erorikoan galdu dituenak konpentsatzeko. Erorikoa izan arren, Menchov Di Luca baino 21 segundo hobea izan da. Erorikoak ere ez du errusiarra garaipenetik baztertzerik lortu. Hori da hori garrasia bota duena errusiarrak helmugan! Ikaragarria gaur Menchovek egin duena.

Zalantzarik gabe Menchovek irabazi behar zuen, izan ere erlojupekorik onena egitera zihoan errusiarra (segur aski erori ez bazen etapa garaipena ere hortxe izango zukeen). Egia da Di Lucak egundoko ikuskizuna eman duela lasterketa guztian zehar eta penaz izango dela, baina erorikoaren ondorioz Di Lucak irabaztea bidezkoa izango al litzateke? Ez dago erantzun beharrik ez baita horrelakorik jazo. Merezimendu osoz, beraz, 2009ko Italiako Giroaren garaipena Menchoventzat.

Gainontzeko sariei dagokienez, mendiko maillota Garzellik irabazi du, gazteena Seeldrayersek eta ciclaminoa, merezimendu osoz, Di Lucak.

Gilbertek etapa garaipena eta Di Luca segundorik gabe

Gilbert. 20. etapan garaipenaGilbertek ederki irabazi du gaurko etapa, azken igoeratxoan erasoa joaz. Gaurkoan Di Lucak etapa garaipena behar zuen sailkapen nagusian Menchovekin zuen tartea jaisteko, etapa irabazleak 20 segundoko gain saria baitzuen. Italiarra ez etapa garaipen ez gain saririk irabazteko gai ez da izan eta maglia arrosa janzteko zituen amets eta asmoak ezerezean geratu zaizkio gaurko etaparen ondoren.

Tropelak etapari ekin bezain laster eguneko ihesaldia osatu da. Zortzi izan dira ihesalditxoa osatu duten txirrindulariak: Bonnafond, Cardenas, De Bonis, Förster, Angel Gómez, Lastras, Lund eta Swift. Cardenas (10, 17 eta 18 etapetan), De Bonis, Angel Gómez eta Lastras aurreko etapetan ere ihesaldietan sartutako txirrindulariak izan dira. Tropeltxo honek ia lau minutuko tartea atera dio tropel nagusiari, baina LPRko txirrindulariek garbi zuen gaurko etapan bere taldeko liderrari lagundu behar ziotela ahalik eta gain sari gehien eskuratzeko Menchovekin zuen errenta jaisteko.

Gaur Di Lucaren lehen helburua Frosinoneko tarteko helmugako gain saria bereganatzea zen 6 segundo baitziren lehenarentzat. LPRek ihesaldia neutralizatzea lortu du tarteko helmuga hori baino 8 kilometro inguru lehenago. Guztia eskura zuen Killerrak, baina azken aldapatxoan Menchovek erasoa jo du segundo horien bila. Atzetik Di Luca eta Petacchi, aurtengo Giroan bi etapa garaipen lortu dituen txirrindularia. Di Lucak ez du orain arteko freskotasuna erakutsi eta ez da gauza izan errusiarraren aurretik pasatzeko. Eskerrak Petacchi taldekidea erne ibili den eta errusiarrari gailendu zaion. Ondorioz, Petacchik 6 segundoko gain saria, Menchovek 4koa eta Di Lucak 2koa jaso dute. Momentu horretan Di Lucak sailkapen nagusian 20 segundoko atzerapena zuen. Di Lucaren gaurko lehen hutsa izan da.

Tarteko helmugak sailkapen nagusian zuen garrantziaren presioa pasata, tropela erlaxatu egin da eta abentura zaleek beste saiakera bat egin dute. Brutt eta Fothen izan dira horiek, baina hauen ihesaldiak ez du gehiegi iraun. Ez da bestelako ihesaldirik sortu Agnani inguruetara iritsi arte. Szmydek tropel buruan sakabanaketa eragin du taldetxo bat osatuz, baina ez da behar bestekoa izan eta bat egin dute aurrerago.

Tropela helmugatik lehen aldiz pasa denean guztiak elkarrekin ziren. Gaurko etapan ere txirrindulariek zirkuitu bati buelta eman behar zioten eta gaurkoan itzuli hori 18 kilometroko zen. Agnaniko aldapan behera saiakera gehiago izan dira. Anabasa sortu da tropel buruan eta mugimendu asko izan badira ere, ganoraz osatu den ihesaldia Charteau, Huzarski, Pinotti eta Tiralongok osatu dutena izan da. Hauen ihesaldia ia 15 kilometrotakoa izan da baina aurrez esan bezala, LPR taldeak garbi zuen Di Lucari lagundu behar ziotela etapa garaipenean. Bosisio buruan zuela, Agnani aldapan eta etapa amaierarako 2 kilometroren faltan,  ihesaldia harrapatu dute. Oraindik etapa garaipena nahi zuten txirrindulariak ziren eta horien artean Gilbert. Belgikarrak erasoa jo du eta bere atzetik Popovych eta Voeckler joan zaizkio. Hirurak bat egin dute eta tartea atera tropel nagusiari, baina Popovych geratzen hasi da. Frantziarra belgikarraren gurpilean zen kilometro bat falta zenean, baina Gilbert indartsuagoa zen eta etapa amaiera hori beretzako aproposagoa. Erritmo aldaketa berri bat egin du eta Voeckler atzean utzi. Azkenean belgikarrak etapa garaipena eskuratu du eta Di Luca gain saririk gabe utzi. Etapa amaiera bikaina Gilbertek egin duena eta merezitako garaipen ikusgarria berarentzat eta Silence-Lotto taldearentzat.

Gaurko etapan LPRek bere ahaleginak egin ditu biharko erlojupekorako Rabobankeko liderrari tartea txikitzeko, baina ez tarteko helmugan ez etapa amaieran ez da gauza izan gain saririk lortzeko. Ez hori bakarrik, tarteko helmugako gain sariei esker Menchovek tartea 2 segundo gehiagotan gehitu du. Nire ustez, atzokoan aurreratu bezala, Menchovek Giroa erabakita utzi du batez ere gaurkoa ikusita. Iragarpenek Erroman eguraldi txarra izango dela esaten dute eta horrek zalantzarik gabe erlojupekoari eragingo diote, baina ez zait iruditzen Di Lucari horrek laguntzen dioenik.

David Lopez erori eta erretiratu egin da

Ez dute aurtengoan euskaldunek Giroan zorterik. Dagoeneko hirugarren euskalduna da era honetan Giroa uzten duena. Lehena Pedro Horrillo ermuarra izan zen, gero Iban Mayoz eta azkena David Lopez. David Lopezek ETBn esan dutenaren arabera, behin erori eta jarraitu egin omen du, baina bigarren eroriko bat izan omen du eta orduan bai, lasterketa utzi beharrean izan da. Ez dut berri gehiagorik. Iban Mayozi dagokionez, dirudienez ez zuen hausturarik izan eta honez gero etxean izango da. Pedro Horrilloren inguruan ditugun azken berrien arabera etxera ekartzekoa ziren aste honetan.

Iker Camaño bakarrik geratzen da tropelean eta aurtengo Giroa bukatuko duen euskaldun bakarra izango da biharko erlojupekoan ez bazaio ezer gertatzen behintzat (hala espero dezagun).

Menchovek bigarren garaipena eta Giroko lidertza

Menchov. 12. etapan garaileRabobankeko liderrak 2009ko Italiako Giroa irabazi nahi duela argi erakutsi zuen atzokoan. Erlojupeko ikaragarria egin zuen eta behar besteko tartea atera zion Killerrari maillot arrosa kentzeko.

Atzoko greba egunak Italiako Giroari eragin ziola esan daiteke. Asko ginen atzoko erlojupekoa ETBn ikusteko irrikan, baina langileek greba egiteko erabakia hartuta ez zuten erlojupekoa eskaini. Hala ere Tropela.net-eko erabiltzaileek etapa internet bidez jarraitzeko beharrezko argibideak emanda ikusi nahi zuenak ikusteko aukerak izan zituela uste dut.

Esan bezala Menchovek izugarrizko erlojupekoa egin zuen eta Giroa irabaztera doala argi utzi. Atzokoa bigarren etapa garaipena izan zuen errusiarrak eta garaipen hau oraindik ospitalean den Pedro Horrillori eskaini nahi izan dio. Bazirudien atzoko etapak sailkapenean aldaketa handiak eragingo zituela, eta hala izan bazen ere, ez nuen usteko Di Lucak hain erlojupeko ona egingo zuenik. Harrituta utzi ninduen. Azkenean maillota galdu bazuen ere, bigarren postuari eusteko moduan izan da 34 segundoko tarte txikiarekin. Leipheimer amerikarrak ere berdin pentsatuko zuela uste dut, honek ere erlojupeko bikaina egin bazuen ere, ez baitzen Killerra gainditzeko gai izan eta 6 segundotara geratu da. Argi dago, beraz, Di Lucak ez duela hain erraz etsiko eta arerioei kolpe psikologiko gogorra eragin diela, hori uste dut bederen.

Lasterketa ikusten hasi nintzenean Pinottik zuen denborarik onena. Espezialista izaki, erreferentzia ona zela uste nuen, baina zeharo harritu nintzen Viscontik helmuga pasa zuenean. ISDko txirrindulariak 39 segundotan hobetu zuen denbora. Ezin, ordea, denbora hau hobetuko ez zutenik pentsa tarteko helmugetan denbora hobeak egiten ari baitziren ondorengo txirrindulariak. Wiggins izan zen, oker ez banaiz, denbora hobetu zuen hurrengo txirrindularia. Ingelesak 49 segundotan hobetu zuen denbora. Oraindik denbora hobeak etortzekoak ziren, eta horretan Brajkovic, Garzelli eta lehen aipatutako Leipheimer eta Menchov izan ziren.

Lasterketa ikusteko aukera izan zenutenok pentsatzen dut nirekin ados izango zaretela etapako protagonista nagusia Armstrong izan zela esaten dudanean. Hori da jarraipena egin ziotena Texaseko txirrindulariari! Ezin da ukatu amerikarra nahiko ondo ibili zela eta sailkapen nagusian aurrera egin duela, baina lasterketaren denbora gehiena berari eskaintzea… Argi dago Astanako “izarrak” medioak erakartzen dituela eta atzokoan ere hala izan zen.

Bukatzeko, gainontzeko faboritoen inguruan esan Basso espero baino apalago ibili zela. Ezin esan Giroaren garaipenaren lehiatik kanpo dagoenik, baina ez zituen sentsazio onak adierazi. Sastre, berriz, erlojupekoetako espezialista ez den heinean lan ona egin zuela esango nuke. Pellizotti ere bikain.

Gaurkoak esprinteko etapa izango denaren itxura guztia du. Cavendish eta Petacchiren berdinketa haustearen eguna izan daiteke beraz.

Atseden eguna hausnarketa egun bihurtuta

Tropelaren protestaAsteburuak, tamalez, txirrindularitzaren alderik arriskutsuena jarri du agerian eta gaurkoan, txirrindulariek atseden hartzeaz gain, gogoetarako unea bihurtu dela ezin dezakegu uka.

Zorionez Pedro Horrilloren osasun egoerak hobera egin du. Horrek ez du erorikoaren larritasuna ezkutatzen, 60-80 metrotatik erortzeak (distantziaren zehaztasuna dagoeneko gutxienekoa da) edonori ikaragarrizko hotzikara sortzen baitio. Burmuinaren egoera ona dela adierazten dituzten emaitzak argitaratu dira eta esperantzarik onenak piztu ditu horrek bai familian baita zalegoan ere. Batek baino gehiagok hasperen egingo du hau jakinda, nik behin behin bai, nahiz eta gorputzeko ia hezur eta muskulu gehienak minduak dituen ermuarrak. Baina horiek, zorionez, konpontzeko moduko lesioak dira medikuen arabera. Animo Pedro!

Atzoko postean txirrindulariek egin zuten protestaren berri ematen nizuen. Segur aski Pedro Horrillori jazotakoa tropeleko edonori gerta ziezaiokeela jakiteak ikara sortuko zien, beraien segurtasunarekiko kezka muturreraino eramateraino. Milanotik kilometro askotara eta zirkuitua ezagutu gabe, ez naiz gai ikusten txirrindularien kexak arrazoizkoak ala gehiegizkoak ziren esateko moduan. Agerian geratu zen, ordea, txirrindulari eta antolakuntzaren arteko desadostasuna, baita txirrindularien beraien artean ere. Eta badirudi gaurko eguna atseden egun baino iritzi horiek guztiak plazaratzeko egun bihurtu dela.

Di Lucak, Giroko liderrak, “pailazoarena” egin zutela azaldu dio Gazzettari. Tropelak etapa ez lehiatzea eta Rabobank taldea aurretik zutela ibiltzea adostu zutela adierazi du Rabobankek etapa garaipena Pedro Horrillori eskaini ziezaion. Baina, beti ere bere esanetan, zenbaitzuk ados ez eta etapa lehiatzeari ekin omen zieten.

Bassoren dioenez, lehen itzulian 20 bat txirrindularik eroriko izan eta horrek izua zabaldu omen zuen tropelean. Ez zegoela polemika sortzeko asmorik eta protesta burutzearen arrazoia gailendu zen izu hori omen zen. Armstrongek ere ibilbideari buruzko iritzi negatiboa plazaratu du eta Pellizzotti, Killerra bezala, elkarrekin hartutako erabakia guztiek aurrera eraman ez izanak tristatzen du.

Dopin kasuekin gertatzen denaren antzera, atzokoan ere tropela iritzi oso ezberdinak ikusi genituen eta, ondorioz, jokamolde ezberdinak. Batzuk etapa Horrillori eskaini asmotan eta beste batzuk aukera alferrik pasatzen utzi ezinda, etapa lehiatzen. Cavendishek argi adierazi du etapa garaipena lortuta: “Giroan lauzpabost etapa bakarrik izango dira esprintean bukatuko direnak. Lehiatu nahi ez duenak ez dezala lehiatu”.

Columbia-High Road ase ezina

Siutsou. 8. etapan garaipenaEtapa mugitua izan zen atzokoa. Ihesaldi desberdinek tropela zatitzea ekarri zuten eta helmugaratu zen tropel nagusia 45 bat kidekoa izan zen. Noski, multzo honetan ez zeuden ez Petacchi, ezta Cavendish ere, beraz, ez gintuen harritu azken kilometroetako ihesaldi batek garaipena bereganatzea.

Colle de Galloren igoeran Garzelli, Horner, Leipheimer, Pellizotti, Rogers, Arroyo, Cunego eta Boasson (bezperako garailea) zortzikote arriskutsua tropelaren aurretik zen. Lortutako errentarekin Leiphemier birtualki lider izan zen karreraren une batean, baina LPR taldeak gogor ekin zion lanari zortzikotea harrapatzeko. 16 kilometrotan aurreko txirrindulari guztiek bat egin zuten eta Liquigas tropela kontrolatu nahian jarri zen buruan. Columbia-High Roadek Cavendish tropelean ez zuenez, ihesaldi saiakera egin zuen Siutsou txirrindulari bielorrusiarrarekin helmugarako 15 kilometro faltan. Lonbardiako itzuliko ibilbide zaila egin behar zuten azken kilometroetan eta ibilbideak ihesaldiari mesede egin zion. Bide estu, kurbatu eta har-bideek tropelari oztopo gehiago eragin zieten Siutsouri baino. Azkenean Siutsou 21 segundoko errentarekin helmugaratu zen Columbia-High Road-i aurtengo Giroko hirugarren garaipena emanez. Eta beharbada kontutan hartu beharreko beste datu bat: bigarren eta laugarren postuak ere Columbia-High Roadeko bi kidek eskuratu zituzten, Boasson eta Rogersek.

Atzoko etapak, ordea, alde ilun bat ere utzi zigun. Culmine di San Pietroren jaitsieren Pedro Horrillo txirrindulari ermuarrak 80 metrotako pendizetik behera erori zen. Gorputz osoan jaso zituen hausturak eta berehala bidali zuten erietxera. Koma egoeran aurkitzen da baina heriotza arriskutik kanpo omen dago. Gure animorik beroenak Rabobankeko txirrindulari euskaldunari.