Kategoria Artxiboak:Analisia

Vuelta hasteko bezperan ibilbideari begira

2009ko Espainiako Vuelta24 ordu eskas falta da 2009ko Espainiako Vuelta hasteko. Badirudi dagoeneko txirrindulariak prest daudela Holandako parajeetan edizio berri honi ekiteko.

Abraham Olano eta bere lankideek aurtengo Vuelta Holanda, Belgika eta Espainiako errepideetan jokatzea erabaki dute. Biharko hasiera Assenen jokatuko den erlojupeko motza izango da (4,8km) ingurukoa, esprinterrentzat egokia urrezko maillota janzteko. Erlojupekoa arratsaldeko 15:30ak aldera hasiko da eta azken txirrindulariaren helmugaratzea arratsaldeko 19:00etarako aurre ikusten da.

Holandan 2. eta 3. etapak jokatuko dira, lehena Assen eta Emmen artean, eta bigarrena Zuphen eta Venlo artean. Etapa hauek ia laua dira eta esprinterrentzako egokiak dirudite. 4. etapa Holandako Venlo eta Belgikako Liège herri ezagunean amaituko da. Etapa honetan 4. mailako mendate batzuk sartu dituzte, beraz, pentsa daiteke klasikoetan bezala ihesaldiren batek erabakiko duela etapa honetako garailea.

Asteazkenez atseden eguna izango dute txirrindulariek, Belgikatik Espainiara egin behar baitute “salto”. Garbi dago ibilbideak eskatuta hartu dutela egun hau atseden egun gisa eta zalantzarik gabe txirrindularientzat goizegi izan daiteke.

5. eta 6. etapak mediterraneo kostaldean jokatuko diren bi etapa  izango dira, bata Tarragona eta Vinaròs artean eta bestea Xàtiva inguruan.  Vinaròsen amaituko den etapan 2. mailako mendate bat igo beharko dute, baina etapa hasieran denez, ez zait iruditzen esprinterren taldeek etapa hau ihesaldiren bati oparitzeko izango direnik. Xàtivan jokatuko denak, berriz, 3. mailako hiru mendate izanik, ihesaldientzako aproposa dela deritzot. Ikusi beharko da.

7. etapan beste erlojupeko bat jokatuko da. Oraingo hau Valentzian izango da eta 30km distantzia izango duena. Erabat laua izaki, Cancellara bezalako espezialistentzat egokia ikusten dut.

Irailak 6 igandez hasiko dira mendiko etapak. Bigarren aste honetan 2009ko Vueltako mendiko etapa garrantzitsuenak pilatu dituzte eta badirudi Vueltaren garailea aste honetan bertan erabakiko dela. Alicanteko probintzian aurkitzen den Alto de Aitana izango da sailkapen nagusian eragiten hasiko den lehen igoera. 8. etapa amaiera bertan izango da 3. mailako 4 eta 2. mailako 3 mendate igo eta gero. 18 km inguruko igoera izango eta etapa amaieran bertan izaki, faboritoek beren indarrak erakutsi beharko dituztelakoan naiz.

9. etapak Alicanten bertan jarraituko du. Etapa hau ere menditsua da eta helmuga baino lehenago 1. mailako mendate bat igo beharko dute, Xorret de Cati gaina. Hau sailkapen nagusiko txirrindularientzat baino ihesaldi edota mendiko maillotaren lehian arituko direnen artean izango da interesgarri.

10. etapa trantsiziozko etapa bat izan daiteke. Ez dauka berezitasun gehiegirik Alicante eta Murtzia batuko dituen etapa honek ez bada azken kilometroetan dagoen 2. mailako mendatea. Mendate hau helmugatik 12 km ingurura dago eta kalte egingo die esprinterrei etaparen garaipenaren lehian zalantzarik gabe.

11. etapa azken atseden egunaren aurretik jokatuko da Murtzia eta Caravaca de la Cruz artean. Irteeratik 50 km-tara 1. mailako mendate bat aurkitzen da eta honek ihesaldiak sortzen lagunduko duela uste dut. Eguneko ihesaldia ondo antolatzen bada etapa garaipenaren lehian izan daitezkeela deritzot.

Ostegunean atseden hartuko dute txirrindulariek, beharko duten atsedena. Lasterketa lider denak hurrengo hiru egunetan jasan beharko dituen erasoetarako indarrak errekuperatzeko beharrezko izango du, eta berdin urrezko maillot horren atzetik dabiltzanek, indar guztiak beharko baitituzte hiru etapa horiei etekina ateratzeko. Hiru etapa hauek amaierak goian izango dituzte: lehena Velefiqueren gainean erabakiko da, bigarrena Sierra Nevada gainean eta hirugarrena Sierra de la Pandera gainean. Lehen bi etapak 170 km ingurukoak dira eta azken hau (beharbada txirrindulariek pilatuta izango duten nekea kontutan hartuta edo) 152 km-takoa. Abraham Olano eta bere taldeak, beraz, Almeria, Granada eta Jaenen jokatuko diren hiru etapa hauetan sailkapena erabakitzeko moduko etapak prestatu dituzte. Iraileko bigarren asteburua gorriz markatu beharrean izango gara ibilbide hau ikusita.

Vueltak izango dituen bi atseden egunak agortuta, astelehenean ere aurrera jarraitu beharko du tropelak. Esan bezala, nire ustez ordurako sailkapen nagusiko posturik garrantzitsuenak erabakita izan daitezke. 3. asteko lehen etapatan esprinterrak eta oraindik garaipenik eskuratu ez duten taldeetako iheslariak izango dira.

Oraindik sailkapen nagusian postuak aurreratu nahi dituztenek ostegun eta ostiralean jokatuko diren 18 eta 19. etapak erabil ditzakete horretarako, baina etekina atera nahi badute lasterketa asko gogortu beharko dutela iruditzen zait eta hori, itzuliko azken egunak direla kontutan izanda eta indarrak sobran izango ez direnez, zail iruditzen zait. Hori bai, mendiko maillotaren lehian dihardutenek ezin dituzte bi etapa hauek alferrik galdu.

Madrila iritsi bezperan, Vueltako hirugarren eta azken erlojupekoa jokatuko da. 27,8 km-tako neurketa izango da Toledon. Distantzia motz xamarra sailkapen nagusiari begira zerbait egin nahi bada, baina hori denbora tarteen araberakoa izango da. Lasterketaren nondik norakoaren arabera, erlojupeko hau zirraragarria ala tramite hutsa izan daiteke, eta zoritxarrez, interes gehiegirik piztuko ez duelakoan nago.

Igandean, irailak 20ean iritsiko da Vuelta Madrileko kaleetara. Itzuli handietan egin ohi den bezala, hiriburuan sei itzuli eman beharreko zirkuitu bat prestatu dute. Zalantzarik gabe esprinterrek beraien gaitasunak erakusteko azken etapa izango da. Lasterketako liderrak, berriz, ospakizunez eta podiumean jartzen dioten ereserkia egokia den ala ez ziurtatzeaz besterik ez du arduratu beharko.

Ikuskizuna hastear dago. Kinielak prest? Ba zorte on guztioi!

Frantziako Tourra. Multzoen analisia (II): Beste hautagaiak eta espezialistak

Ez da erraza talde honetan hiru txirrindulariren aldeko aukera egitea. Maila handiko txirrindulariak dira guztiak eta hauetako norbait Parisera horiz jantzita iristea zaila izango bada ere, ziur podiumean muturra sartuko duela zerrenda honetako norbaitek. Ziur Tourrean ikusiko ez duguna Ivan Basso dugu, Dauphine Libere-n gaixotasun bat medio jaitsi baizen bizikletatik eta ez baitugu irteeran izango.

Schleck anaiak
Irteeran izango diren arren, Bassoren hainbat herrikide ere ez ditut ikusten Tourrerako lehian, Vincenzo Nibali eta Franco Pellizotti kasu. Nibalik Giro dell´Appennino irabazi berri du baina Tour-ak beste maila bat du eta egun distiratsu bat eduki badezake ere, etaparen bat poltsikoratzea izango du helburu. Pellizottiri, baina Giroaren ondoren italiar gehienei bezala kosta behar zaio orduko sasoi puntua mantentzea. Marzio Bruseghin “zaharra”, aurten Giroan apalxeago ikusi duguna, duen eskarmentua tarteko izan daiteke salbuespena. Bere neurrian halere, emaitza ona bailitzateke 10 lehenengoetan amaitzea edo etaparen bat ehizatzea. Hortik gora nahiko lan. Michael Rogers italiarra ez bada ere, egin duen Giro politaren ondoren italiarren taldean sartuko nuke.

Beteranoekin jarraituz, Christophe Moreau handia aurten ere irteera puntuan ikusiko dugu. Hortik aurrera, bere berri gutxi izango ditugula iruditzen zait. Christian Vandevelde, aldiz, aurtengo sorpresa izan daiteke. Suitzan berragertu da soinu handirik atera gabe, baina Giroan erori izana ongi etor lekioke Tourrera fresko iristeko. Oso ongi iritsi zen Girora eta pedal kolpea berreskuratzen badu iazko bosgarren postua hobetu dezake. Continue reading “Frantziako Tourra. Multzoen analisia (II): Beste hautagaiak eta espezialistak”

Frantziako Tourra. Multzoen analisia (I): Hautagai nagusiak

Ia denok aurreikusten genuen bezala, azkenean faborito handi bat Tourretik kanpo geratu da. Azkenean CONIk Alejandro Valverde Tourretik kanpo utzi du, etapa bat kilometro batzuetan zehar Italian barneratuta ibiliko baita. Gauzak horrela, hautagai nagusien multzoa sei izenetara murriztu da. Hona hemen izen handi hauen azterketa txiki bat.

armstrongLance Armstrong : Estatubatuarra da edizio honetako izen berezia. Bere itzulerak beste edozein izen propio eklipsatu du, bai Gaztela Leonen, Giroan, eta nola ez, Tourrean. Hiru urte lehiatu gabe, baina maila txukuna erakutsi zuen Giroan, batez ere azken astean, eta ziurrenik geroztik bere prestakuntza afinatzen egongo zen, buru-belarri. Atzo bertan estreinatu zuen aurtengo palmaresa, Nevada City Classic lasterketa estatubatuarrean gailenduz. Ez da egutegiko lasterketa entzutetsuena, jakina, baina esanguratsua da dena den Lancek berriz eskuak jaso dituela jakitea. Gerra emango du, ziur, baina 37 urte ditu, eta horrek bere aurka jokatzen du. Gainera, taldeko giroa ere ez da onena izango, etsai nagusia (Contador) etxean baitu. Ez du zortzigarren Tourrik lortuko, nire aburuz.

contadorAlberto Contador: Munduko igotzaile onenak aurten inoiz baino mendiko etapa deskafeinatuagoak aurkituko ditu errepide frantziarretan, oso etapa gutxi bukatzen baitira goian. Mendate gogorrak helmugatik urruti ordea, etapa askotan aurkitu daitezke. Evansen maila ikusita, badirudi mendian jo egin beharko duela erlojupekoetara aldetxoarekin iristeko. Denboraldi hasiera ederra egin ostean (Algarve eta Euskal Herrian sailkapena eta etapak, eta Paris-Nizan 2 etapa eta podiuma), hanka jaso zuen Tourrari begira. Dauphiné-Libérén erakutsi zuen bide onetik doala bere prestakuntza. Kilometroak egitera zihoala esan zuen, eta beregan arraroa bada ere, erasorik jo gabe igaro zuen aste osoa. Dena den, aldapa gora oso maila ona eman zuen, eta sailkapen nagusian minutu eskas bat baino ez zuen galdu. Faborito nagusia da, ez da alferrik hiru handiak irabazi dituzten eliteko klubeko kidea, baina ikusi beharko da Astanak nola erantzuten duen talde bezala. Diotenez, taldea banatuta omen dago: batzuk Armstrongetzat, eta besteak madrildarrarentzat. Morboa behintzat zerbitzatuta dago.

evansCadel Evans: Australiarra pasa den Dauphiné-Libérén inoiz baino erasokorrago (eta indartsuago) agertu zen. Nire ustez, ez du berriro aurkituko aurtengoa baino ibilbide hoberik bere ezaugarrientzat (nahiz eta taldekako erlojupekoa egiteko bere taldea ez den oso indartsua), eta hori berak badaki. Motibaziorik ez zaio faltako, Tourreko azken 2 edizioak 2º postuan bukatu baititu, eta pixka bat gehiago nahiko du. Alberto Contador mendian kate motzean lotzea lortzen badu, asko izango du irabazita. Etapen perfil aldetik, Tourrak ez dirudi oso zirraragarria izango denik, baina horrek sailkapenean lehia itxiagoa egotea ahalbidetuko du. Gauzak horrela, irabazteko gehien duenetariko bat Cadel Evans da.

leipheimerLevi Leipheimer:Estatubatuarra ez du inork aipatzen, baina Tourrean izango da, eta ez gonbidatu bezala. Armstrong-Contador lehiak (edo konfliktoak) bigarren plano batera bidali du Levi, baina ezin dugu ahaztu Tourreko podiuma ezagutzen duela, eta baita Espainiako Itzulikoa ere. Gainera, Astanan askatasuna izango du, ondo bidean, eta probetxua atera dezake bere bi taldeburu nagusien artean ez baita giro izango. Evansi bezala, ibilbidea oso ondo datorkio, erlojupekoetan maisua baita. Dena den, ikusi genuen moduan, Girora dena ematera joan ostean, lasterketa luzea egin zitzaion. Hori, edo azkenean ez zuen zeukan guztia eman, Uztailera begira. Interesgarriak izan daitezke Montanako txirrindulariaren mugimenduak lasterketan zehar.

menchovDenis Menchov: Errusiar-nafarrak Giroan sekulako erakustaldia eman zuen. Erraz asko irabazi zuen, nahiz eta azken erlojupekoko azken kilometroan, nahi gabe emozio kotak zeruan jarri zituen. Dena den, Tourrean maila handiagoko aurkariak izango ditu, bera baino lasterketa egun gutxiagorekin joango direnak, eta hori erabakigarria izan daiteke. Taldean bertan, Robert Gesink gaztea ez du urruti izango, akaso aurrean ere. Lasterketa frantziarrean beti egin izan du “kale”, sailkapen nagusiari dagokionean, eta aurten beste horrenbeste gerta dakioke. Dena den, Denis etxeko lanak ondo asko eginda iritsi da Tourreko irteera lerrora, eta ez dauka galtzeko ezer. Ikusi egin behar ez ote zaion lasterketa oso luzea egingo, batez ere Mont Ventouxen bukatzen den azken aurreko etapa.

sastreCarlos Sastre: Iazko Tourreko irabazleak aurten taldearekin batera egutegia aldatzea erabaki du. Giroko sailkapena lehiatzera joan zen, baina 4º postu batekin konformatu beharra izan zuen, hori bai, mendiko etapa eder bi irabazi ostean. Orain Tourrean aurretik inoiz ez bezala arituko da, hanketan lehiaketa egun askorekin eta desgaste handia jasan ostean. Hala ere, gaztelarra txirrindulari zaildua eta “diesela” da. Ez du sekulako eraso kolperik joko, baina aurrean egongo da. Hori bai, aurten garaipeneko jokotik at ikusten dut.

Alejandro Valverde: Azkenean, aurretik esan bezala, murtziarra ez da irteeran izango. Beraz, kinielan baduzue, azkar aldatu!

Berrikuntza bezala, Tour honekin batera, Tropelako blogariok aztertutako talde bakoitzean zein txirrindulari hartu ditugun aipatuko dugu. Kasu hontan, nik neuk ez dut asko arriskatu: Evans-Contador. Gainontzeko multzoetan egin beharko da “apustu pertsonal” bat edo beste, sorpresaren bila.

Puntuak aztertzen: Ezusteko gutxi (I)

EH Itzulia 2009. podiumaOraingo honetan Euskal Herriko Itzuliaren azterketa lehiaketaren ikuspuntutik egin nahiko nuke. Joko guztietan bezala, Tropela.net lehiaketetan ere bi motako parte hartzaileak izan ohi dira. Arriskatzen dutenak eta segurura jokatzen dutenak. Beno, gero ideiarik ez dutenak ere badaude, toki guztietan bezala eta gainera denborarik dedikatu gabe Tropelaren aurrealdean ibili nahi izaten dute.

Hemen ez dago misterio gehiegirik, ordea, aurrealdean ibiltzeko txirrindularitza gertutik jarraitzea komeni da. Aurreko lasterketen emaitzak jarraitu, iazko lasterketa gogoratu, ziklisten forma punttua zaindu eta aukeraketa buruarekin egin, lasterketaren garapena nondik nora joango den imajinatuz. Hori bai, Tropelako 5.000 erabiltzaileen artean lehenengoetakoa izateko, guzti horretaz gain, lasterketako ezustekoa zein izango den ere asmatu behar da. Eta horretarako zorte apur bat, edo dezente, ere behar izaten da.

Beraz, irabazi nahi duenak, guztia asmatu behar izaten du, arriskurik gabeko ziklisten aukeraketan eta lasterketa horretako ezustekoak zein izango diren. Ikus dezagun multzoz multzo zer egin behar zen aurtengo Euskal Herriko Itzulian Tropelean lehen postuetan ibiltzeko: (txirrindularien puntuazioak ikusteko sakatu hemen eta hauen aukeraketak ikusteko sakatu hemen)

HAUTAGAI NAGUSIAK

Hautagaiek puntu asko lortu ohi dituzte eta aurten ere horrela izan da, beraz, Continue reading “Puntuak aztertzen: Ezusteko gutxi (I)”

Multzoen azterketa (II). Euskaldunak

Oraindik ez dago ziur zein izango diren aurtengo Euskal Herriko Itzulian parte hartuko dutenak baina behin-behineko dortsalak aztertuta euskaldun dezente izango dira 160 ziklistaz osatuko den tropelean. Iaz 20ren bat txirrindulari izan genituen eta aurtengoan bat edo beste gehiago izango direla dirudi lasterketa hasteko bi egun falta direnean.

Egoi Martinez eta Iban Mayoz ihesiOhikoa den bezala, txirrindulari euskaldun gehien izango dituen taldea Euskaltel-Euskadi izango da. Samuel asturiarraz gain, gainontzekoak euskaldunak izango dira. Pena euskaldun guztiak Samuelentzat lanean aritu beharrean izatea. Hala eta guztiz ere Egoi Martinez kontutan hartu beharko genuken txirrindularia dela deritzot sasoiko baitago. Iaz urte sasoi honetan ederki ikusi genuen mendiko sariaren jabe eta guzti egin zelarik. Aurrealdean ikusi dugun beste txirrindulari laranja Ruben Perez izango da eta lan txukuna egin dezakeelakoan naiz. Zalantza asko Igor Antonekin ditut. Asko bere aldeko apostua egin duzue, baina lasterketan parte hartuko ez duenaren zurrumurruak iritsi zaizkit. Egia den ala ez bi egun barru jakingo dugu, baina garbi dagoena da zurrumurruak badaude sasoian ez dagoelako izan daitekeela.

Aipatzekoa Contentpolis-Ampo talde murtziarrak ekarriko duen taldea. Izan ere erdia baino gehiago euskalduna izango da kontrakoa pentsa badezakegu ere. Oker ez banaiz 5 txirrindulari euskaldun izango dira bertan eta hauetatik norbait nabarmentzekotan Mikel Gaztañaga izango dela uste dut. Gizon azkarra izaki, sprinten baten edo besten aurrealdean izan daiteke.

David Lopez garaileEuskal txirrindulari kopuruaren araberako ordenari jarraiki, Matxinen taldea aipatzea dagokit. Fuji-Servetto 3 txirrindulari euskaldunek Coborentzat egin beharko dute lan 2007ko garaipena errepikatu nahiko baitu kantabriarrak, beraz, Beñat Intxausti, Arkaitz Duran eta Iker Camañori morroitza lanak egitea egokituko zaie.

Antzeko zerbait gertatzen da Caisse D’Epargnen. Faborito nagusia Luis Leon Sanchez izaki, itzalean geratzen dira Imanol Erviti eta David Lopez. Baina Mitxinen taldean ez bezala, David Lopez askeago utziko dutelakoan naiz eta aukerarik ikusten badu aurrealdean izango dela uste dut.

Eroriko edo ezustekoren bat gertatzen ez bada, Juanma Garate apustu segurua izango da. Garatek Rabobank taldearen laguntza izango duela uste dut eta horrek lasterketan aurrealdean izaten lagunduko dio. Ez da itzulia irabazteko lehian arituko, baina etapa garaipenen bat lortzeko moduan ikusten dut.

Garate garaileAipatzeko geratzen zaizkidan hirurak talde ezberdinetan banatuak daude eta zalantzarik gabe beraien taldeburuentzat aritu beharko dute lanean. Haimar Zubeldiak Contador idolatratuarentzat bota beharko du izerdia Astana taldean, Jose Luis Arrietak Efimkin Ag2Reko taldeburuarentzat eta Bingen Fernandezek Moncoutierentzat Cofidisen. Aipatu Bingenek iaz erorikoa izan eta lasterketa amaitzerik ezin zuela izan.

Gogoan dugu nola iaz David Herrero itzuliaren garaipenaren lehian izan zen. Zoritxarrez azken aurreko Orioko amaieran izandako erorikoak lasterketatik at utzi zuen eta ez zuen azken erlojupekoa jokatzerik izan. Pena galanta euskal jarraitzaileontzat. Aurtengoan zail izango da euskaldunen bat lasterketa lehiatzen aritzeko moduan ikustea, baina norbaitengan apustu egitekotan aurrez aipatutako Egoi Martinezengan egingo nuke.