Scarponik Beneventon bigarrena

Scarponi. 18. etapan garaipena

Ihesaldiak gaurkoan ere bere fruitua eman du eta Scarponi txirrindulari beteranoak, ihesaldiak emandako abantailaz baliatuz, aurtengo Giroko bere bigarren etapa garaipena lortu du. Hirugarren garaipena, beraz, Diquigiovannik. Ihesaldiak gaurkoan esprinterrak aukerarik gabe utzi ditu Petacchiren kaltetan.

48 kilometro inguruan osatu da gaurko ihesaldia. 14. etapan eta 15. etapan jazo bezala, gaurkoan ere ondo antolatutako eta kide ugariz osatutako ihesaldian zegoen garaipena eskuratu duen txirrindularia. Talde mardula Popovych, Zeits, Cardenas, Voeckler, Deignan, Dean, Pate, Visconti, Grabovskyy, Gavazzi, Quinziato, Bosisio, Devenyns, Seeldraeyers, Scarponi, Bertolini, Ljungblad, Lovkvist, Siutsou, Petrov, McCartney, Bak, Vorganov eta David Lopezek osatzen zuten. Sailkapen nagusiari begira aurreratuen zegoen txirrindularia Popovych zen eta badaezpada Caisse D’Epargne lan egin du tropel nagusian denbora tarte handirik izan ez zedin. Beste talde batzuk ere izan dira tropel buru horretan Fuji-Servetto kasu, baina azkenean ahaleginak alferrikakoak izan zaizkie.

Gaurkoan garbi zegoen sailkapen nagusian aldaketa nabarmenik ez zela izango eta hala izan da. Txirrindulariek helburu etapa garaipen zuten. Aurreko tropelak zituen kide kopurua ikusita eta 3 minutuko errenta izanda, garaipena eskura zutela ikusten zen. Taldean 15 kilometroetara gerturatu arte ez da sakabanaketarik izan eta orduan Grabovskyy ukraniarra izan da lasterketa mugitzen hasi dena. Gainontzeko txirrindularietako zenbaitek jarraitu egin diote eta mugimendu askoren ondoren, zortzikotea osatu da: Zeits, Cardenas, Pate, Scarponi, McCartney, Bak, Devenyns eta Grabovskyy bera.

Beneventon Italiako Giroan ohikoak diren bukaerako zirkuitu bat egin behar izan dute, 8 kilometro inguruko itzulia. Cardenas urrutitik jotzen saiatu da zortzikotea puskatuz, baina azken kilometrorako zortzikotea batera zen. Saxo Bankeko bi txirrindulari ziren aurrealdean, baina ez dira bi izatearen abantailaz aprobetxatzeko gauza izan. Devenynsek berak jo du lehenengo, baina azkarregi. Azkenean Scarponik, Cardenas eta  Pate gailenduta, aurtengo Italiako Giroko bigarren garaipena.

Sailkapen nagusiko txirrindulari nagusiak biharko etapan kontzentratzeko baliatuko ziren gaurko etapaz, nahiz eta liderraren inguruan kontzentrazioa kentzeko moduko berriak argitaratu diren. Ez al dute nahi italiarrek Menchovek irabazterik, ala?

Blockhausen Pellizotti jaun eta jabe

Pellizotti. 17. etapan garaipenaIkaragarria Pellizottik egin duen erakustaldia gaurkoan. Merezi zuen, bai, Liquigaseko txirrindulari italiarrak garaipena eskuratzea. Blockhauseko igoeran erasoa jo eta bakar bakarrik bere helburua lortzeko bidea egin du: etapa garaipena eta podiumeko 3. postura igotzea.

Lasterketa hasi bezain laster Voeckler frantziarrak tropela uztea erabaki du. Atzetik Marzoli, Palumbo, Cardenas ,Visconti, Bono, Chiarini, Rabuñal, Facci eta Delio Fernández gehitu zaizkie. Tropeltxo honek aurrera jo du 3 minutu inguruko mugarainoko tartea lortuaz, baina atzean, LPReko txirrindulariak buruan, kontrolpean eduki dute ihesaldia.

Helmugarako 30 bat kilometro faltan, aldaketa izan da tropel nagusian eta Cervélok hartu du taldeari abiadura emateko erantzukizuna. Abiadura handiaren seinale Deignanek tropel buruan tiraka ari zela izan duen erorikoa irrist egin ondoren, ondorio larririk gabe. Abiadura honek emaitzak eman ditu etapako 66. kilometro inguruan. Aurreko tropeltxoan erasoak izan dira tropelarekiko tartea mantendu asmoz, baina azkenean tropelak ihesaldiko kide guztiak harrapatzea lortu du.

Pellizotti izan da erasoa jotzen lehen, atzetik Armstrong. Bitartean gainontzeko faboritoak elkarrekin. Pellizottik ondo egin du aurrera, bere egin beharra hori baitzen sailkapen nagusian aurrea egin nahi bazuen. Atzealdean, 10 kilometroren faltan, Killerrak erasoa jo du. Menchovek, Bassok eta Garzellik jarraitu ahal izan diote eta Sastrek ezin izan dio erritmo aldaketari eutsi.

Armstrongen pedal kolpea indarra galtzen joan da eta atzetik ziren Di Luca, Menchov, Basso eta Garzellik harrapatu dute. Hala ere ezin hauen erritmoari ere eutsi. Atzetik Sastrek bere ohiko jokabidean, beranduago azkartu du erritmoa. Berarekin Simoni eta Szmyd izan ditu gurpilean Armstrongekin bat egin arte. Egoera ona Menchoventzat lasterketa kontrolpean baitzuen eta Sastrerentzat txarra, podiumetik kanpora baitzen zenbait momentutan.

Pellizottik tarte polita atera du eta garaipena eskura geratu zaio ezustekorik ezean. 2 kilometroren faltan, Killerrak beste eraso bat jo du. Atzetik bere amesgaiztoko itzalak erantzun dio, Menchov errusiarrak. Basso eta Garzelli jarraitu ezinik geratu dira, baina beranduko Garzellik aurreko biekin bat egiteko gai izan da. Basso atzean distantzia mantentzen

Etapa garaipena Pellizottik eskuratu du, bigarren Garzelli eta hirugarren Di Luca 43 segundora, 5 segundoko atzerapenaz Menchov maillot arrosa eta 56 segundora Basso. Sastre, beste zenbait txirrindularirekin batera, ia bi minutura sartu da eta podiumetik kanpo geratu da.

Beraz, gaurko etaparen ostean, Menchovek maillot arrosarekin jarraitzen du, bigarren, tartea jaitsiz, Di Luca 26 eta hirugarren 2 minutura gaurko etapa garailea, Pellizotti. Ez da ordea gaur Liquigas taldeak lortu dituen garaipen bakarrak, Bassok ere aurre hartu baitio Sastreri eta 4. postuan da italiarra. Leganeseko txirrindulariak, gaurko indar gabeziaren ondorioz galdutako denborak 5. postura itzuli da eta astelehenean irabazitako errenta galdu du.

Sastrek etapa garaipena eta podiumeko postua

Sastre. 16. etapan garaipenaSastrek egin du egin beharrekoa bere helburua lortzeko. Monte Petranon hasieran erasoa jo eta etapa garaipeneraino igoera bikaina egin du. Eta bigarren saria: sailkapen nagusiko hirugarren postura pasa da Leganeseko txirrindularia. Mendiko etapak sortu du bai espero zen zalaparta.

2. kilometrorako eguneko ihesaldia osatu da, larunbateko eta igandeko etapetan gertatu zen bezala, baina gaurkoan amaiera ezberdinarekin. Txirrindularien artean Dion, Popovych, Bellotti, Sprick, Jeannesson, Angel Gómez, Danielson, Wiggins, Visconti, Cunego, Carlström, Bosisio, Cataldo, Ardila, Tjallingii, Scarponi, De Bonis, Brutt, Voigt, Delio Fernández eta David Lopez euskalduna. Aurretik Monte delle Cesane (2. mailakoa), Monte Nerone (1. mailakoa), Monte Catria (1. mailakoa) eta helmuga zuen Monte Petrano mendiak zituzten eta 235 kilometro egiteko. Tropeltxoak tarte handia hartu du tropel nagusiarekiko, baina ibilbidean aurrera zihoazen heinean, txirrindulari askori ezinak jo die eta tropeltxoa utzi beharrean izan dira.

Mugimendurik garrantzitsuena Cantianoko igoeratxoan izan da, Monte Catriara iritsi aurreko igoeratxoan. Bertan Scarponik taldetxoa astindu du eraso batekin. Tropeltxotik jarraitu dioten bakarrak Cunego, Bosisio eta Popovych izan dira. Laukoteak aurrera egin du eta tropel nagusiarekiko tartea 5’30”eko zen Monte Catria igoera gogorrari aurre egin aurretik. Atzealdean, berriz, Menchov eroso xamar taldekidez inguratuta.

Monte Catria igotzen ari zirela, Scarponik ikaragarrizko txakalaldia izan du eta ez da gauza izan gainontzeko taldekideei jarraitzeko. Bitartean Cunego, Bosisio eta Popovychek aurrera egin dute. Cunegok beste eraso bat ere jo du eta Bosisiok bakarrik jarraitu ahal izan dio. Popovych, justu xamar, metro batzuetara baina distantzia mantenduz igoera osoan jarraitzen izan da. Atzeko tropeltxo nagusian beharbada oilarren arteko lehia igoera honetan espero zen, baina azkenean ez da hala izan igoera honetan.

Behin Monte Catria igota, Popovychek bere jaisteko abileziez baliatuta, aurreko bikotea harrapatu eta ihestea lortu du. Ukraniarra sendo ikusi da eta azken 15 kilometroetako pankartan Cunegori 35 segundo inguruko tartea ateratzen zion. Bosisio, berriz, matxuragatik edo beharbada Killerrari laguntzeko, geratu egin da tropel nagusiarekin bat egiteko.

Espektakulua Monte Catria igoeran hasi da. Igoera 11 kilometrokoa zen eta malda gogorrekin. 225 kilometro egin ostean, egiten zuen beroa eta igotako gainontzeko mendiak igota, indarrak behar ziren azken mendia igotzeko. Popovych erritmo onean ari zen igotzen. Atzetik Cunego apalago. Tropel nagusian, lehen malda igotzearekin batera, erasoak hasi dira. Basso izan da aurrena erasotzen. Faborito gehienek eutsi egin diote Leipheimer eta Pellizottik izan ezik. Bassok birritan ere saiatu da, baina alferrik. Orduan Sastrek jotzea erabaki du. Lehenengoan ez da izan, baina bigarrenean bai. Menchov Di Luca markatzen ari zen eta Bassok aurretik egindako saiakeretan ez da ihesteko gauza izan; nolabaiteko zalantzak sortu dira txirrindularien artean eta Sastrek ederki aprobetxatu du.

Leganeseko txirrindulariak metroak ateratzen joan da eta Bassok atzetik jarraitu beharra zuen sailkapen nagusian arerio zuzena baitzuen. Atzean Menchov eta Di Luca elkar kontrolatzen zirela. Sastre aurrerantz sendo joan da eta Cunego erraz pasa du. Berdin egin du Popovychekin ere helmugarako 2 kilometro falta zirela (egin duen ezintasun keinua adierazgarria). Menchov eta Di Lucak Sastrek atera zitzakeen segundoak ekiditeko aurrera egin dute Bassorekin bat egiteraino. Azkenean helmugan Sastre maisuki garaile, Menchov bigarren eta Di Luca hirugarren.

Sailkapen nagusian, beraz, aldaketak: Sastre 3. postura pasa da 2’19”ra eta Leipheimer 6.era 3’21”ra. Gazteen sailkapenean era Lovkvistek denbora asko galduta Seeldrayers da lider berria.

Bihar atseden eguna izango dute. Askok eskertuko dute. Sastrek, behintzat, lasai deskantsatuko du bere helburuetako bat lortzeko zorian baita: Giroko podiumean izatea.

Bertagnollik Diquigiovannirentzat bigarren garaipena

Bertagnolli. 15. etapan garaipenaGaurkoan, atzokoan gertatu bezala, eguneko ihesaldiko kide batek bereganatu du etapa. Hori Bertagnolli italiarrak gauzatu du, Simoniren taldekide eta lagunak. Horrenbestez, Diquigiovannik aurtengo Giroan bigarren garaipena gehitu du Scarponirenaren ostean.

27. kilometroan 14ko taldetxo batek tropeletik ihestea lortu du eguneko ihesaldia gauzatuz. Ihesaldi hau Navarro, Lastras, Pauwels, Grivko, Stangelj, Marzano, Montaguti, Facci, Bertagnolli, Serpa, Bak, Eskov, Pinotti eta Vorganov txirrindulariak osatu dute. Kilometro batzuk aurrerago Donati eta González Baezak tropeletik alde egin eta aurrekoekin bat egitea lortu dute. Hamaseikoa, beraz, osatu dute. Tropeltxoak 5’26”ko tartea izatera iritsi dira tropel nagusiarekiko.

Etapa nahiko aspergarri joan dela esan daiteke Monte Casalera arrimatzen hasi diren arte. 40 kilometro helmugarako tropela hautsi egin da Liquigas gogor tropel buruan tiraka hasi denean. Faborito guztiak aurreko multzo nagusian mantentzea lortu dute Simonik izan ezik. Liquigasek garbi zituen bere lana, gogor tira egin Bassok erasoa jo zezan Monte Casale portuaren igoeran. Gallarateko txirrindulariak sailkapen aurrera egin nahi badu arriskatzea tokatzen zaio maillot arrosa 3 minutu eta 3 segundotara baitu.

Bassok eraso gogorra jo du eta faboritoen taldea atzean uztea lortu du. Jarraitzeko gauza izan den bakarra Garzelli izan da. Orduan hasi da lasterketa interesgarri jartzen. Armstrong, berriz, tropel nagusiaren atzealdean sufritzen ari zela ikusi dugu. Bi italiarrek minutu inguruko tartea ere izan dute maillot arrosarekiko eta eguneko ihesaldian ziren txirrindulari batzuk ere harrapatu dituzte bidean.

Aurrealdean, Pauwels, Pinotti, Bertagnolli eta Marzano txirrindulariak izan dira Monte Trebbioren igoera hasierako hamasei laguneko taldetik geratu direnak. Indarrak ez zeuden sobran, eta Marzano lehenik eta Pinotti gero geratu egin dira portuaren igoeran. Bertagnolli eta Pauwels bikoteak osatu dute, beraz, lasterketa burua. Hauek Monte Trebbio elkarrekin pasa dute baina beherakoan, oraindik ezagutzen ez diren arrazoiak medio, Pauwels geratu egin da eta Bertagnollik bakarrik egin du aurrera, helmugara iritsi arte. Taldearen erabakia? Auskalo! Ez zait iruditzen Gerransen atzoko garaipenarekin Cervélo garaipenez ase geratuko zenik.

Sailkapen nagusiko lehia, berriz, atzealdean zen. Esan bezala, Basso eta Garzellik tartea atera nahi zioten Menchovi, baina azkenean esfortzu handiaren ondoren Monte Trebbio jaisterakoan tarteak txikitzen joan direla ikusita, amore eman dute bi italiarrek. Pena. Ikuskizuna eman dute behintzat, baina horretan geratu da.

Etapa garaipena Bertagnollirentzat, bigarren Pauwels atzeko taldetxoan esprinta irabaziz (oraindik ulertzen ez dugun jokabidearen ondoren) eta hirugarren Pinotti italiarra. Sailkapen nagusiari dagokionez aldaketa nabarmenik ez Simonirena izan ezik. Honek sailkapen nagusiko 8. postutik 26.eraino egin baitu atzera gaurko etapan ia 18 minutuko atzerapenarekin heldu ostean.

Iban Mayozen erorikoa

Gaurko etapan Iban Mayozek erorikoa izan du. Berrien arabera jaitsiera batean izan da eta ez dirudi larria denik, ea horrela den. Gure animorik beroenak Ibanentzat.

Aurreko asteburuan Pedro Horrillok erorketa larria izan zuen. Honenbestez bi euskaldun geratzen dira aurtengo Italiako Giroan, David Lopez eta Iker Camaño.

Gerrans Bolognan nagusi

Gerrans. 14. etapan garaipenaBazirudien gaurko etapak sailkapen nagusian zalaparta eragingo zuela, baina LRP taldea 12. kilometroan osatutako ihesaldiak jokoz kanpo harrapatu du. Ihesaldi horretan zen australiarra eta Bolognako 2,1 kilometrotako igoeran ihesaldiak zuen errenta eta gordeta zituen indarrak nahikoa izan ditu Cervélo taldeko txirrindulariak etapa garaipena eskuratzeko.

Eguneko ihesaldia 12. kilometroan osatu da. Montaguti, Gavazzi, Petrov, Vorganov, Reda, Bertogliati, Gerrans,Grivko, Visconti, Deignan, Cheula, Froome, Kiryenka eta Bonnafond txirrindulariek osatu dute LPRri horrenbesteko buruhaustea sortu dieten taldea. Taldeak izan duen errentarik handiena 4’38”koa izan da. Atzetik, tropelean LPR taldeak hartu du erantzukizuna eta bukaeraraino iheslariak harrapatzeko saiakeran izan dira. Beharbada taldea juxtu samar ibili da Di Lucak bi taldekideren laguntza bakarrik izan baitu, Spezialetti eta Bosisiorenak. Emaitza, beraz, egindako ahaleginaren parekoak izan direla deritzot. Di Lucak segundoak eta maillot arrosa berreskuratzeko zituen gaurko asmoak Bolognako kaleetara iristean erabat zapuztuta geratu zaizkie.

11 txirrindulari ziren ihesaldiko tropeltxoan Bolognara iristean. Oraindik maldak hasteko zirela, Grivkok bere saiakera egin du baina maldak igotzen hasi denean ezinak gailendu du ukraniarra. Ondoren Gerransek, zalantzarik gabe biziago eta pedal kolpe iraunkorragoz, aurrera egitea lortu du Froomen baimenarekin (ikustekoak 1kmko pankartapean egin dituen zig-zag mugimenduak). Helmugan Gerrans, Bertogliati eta Gavazzi izan dira urrenez urren.

Etapa garaipena erabakita zegoenean faboritoen mugimenduak hasi dira atzealdean. Killerrak aurrez pentsatutako erasoa jo du baina alferrik izan zaio Menchov, Pellizotti eta Garzelli atzetik izan baititu. Hala ere gain saririk gabe geratu da Di Luca eta faboritoen artean ez da nabarmentzeko denbora tarterik izan.

Di Lucak sailkapen nagusian aurrera egiteko egun bat alferrik galdu duela esan daiteke. Bestalde, Basso, Sastre eta Leipheimer justu samar ikusi ditugu. Menchov, berriz, maillotaren defentsan bikain aritu da.

Gaurko bajak

Giok bere iruzkinean aipatzen zigun bezala, gaurkoan bi txirrindulari garrantzitsuk lasterketan uztea erabaki dute. Bat Pozzato izan da belauneko minez zela eta. Bestea, berriz, hiru garaipen eskuratu dituen esprinter ingelesa, Cavendish. Esaten genuen bere asmoa Tourra prestatzea zela eta segur aski ez zuela Giroa bukatuko. Egin beharrekoak egin dituela esan daiteke.