Kategoria Artxiboak:Lehiaketak

Ongi etorri, Pedro

barrankoGertatu zena sinistu ezinik, Sergio Levi medikua amildegian behera zihoan, Pedro Horrillo erreskatatzeko asmoz. Pedro Horrillo, edo bere gorpua, Levik ez baitzeukan ermuarra bizirik aurkitzeko inolako esperantzarik. Baina han aurkitu zuen, 80 metro beherago, lurrean etzanda, goitik behera odolez beteta, izan ere, erorikoan denetarik jo zuen Pedrok: adarrak, harriak… azken finean, bere gorputz sendoak zulorako bidean aurkitu zuen guztia. Lurrean etzanda zegoen, begiak zabalik, baina konortea galduta. Baina medikua bi metrotara inguratu zenean, txikitutako gorpu hura jaso egin zuen. “Nola deitzen zara?”-galdetu zion medikuak. “Me chiamo Pedro”, erantzun zuen ermuarrak, bere ezker oin zaurituaren gainean oreka nolabait mantenduz. Levik lasaitasuna eskatu zuen, eta lurrean etzan zuen, berriz.

Bost aste geroago, Bergamoko ospitalean hasierako egoera larriena pasatu ostean, koma farmakologikotik istripua baino 3 egun geroago bonbilla baten argipean esnatu ostean, Pedro Horrillok gurpildun aulkia Nafarroako Unibertsitateko Klinikaren konferentzia-gelaren aurrean gelditu zuen. Kuraiaz beteta, Lorenak (bere emaztea, istripuaren egunean Bergamora bidaiatu zuena, berekin egoteko) emandako bi muletak hartu eta jaiki egin zen. Pedrok komunikabideen eskaera guztiak atzeratu zituen, “egoera on batean egon arte”, eta atzo bere burua prest ikusi zuen. Gelan sartzearekin batera, isiltasuna egin zen, argazki kameren flashek apurtu zuten isiltasuna. Mirariaren kulminazioa zen. Pedrok irribarre bat egin zuen eta bi hitz ahopean aipatu: “entrada triunfal”. Sarrera garailea. Bai, atzo garailea bera izan zen. Baina bera ondo ikustearekin txirrindularitzak eta zaleok ere zertxobait irabazi genuen.

horrillo-muletasPrentsaurrekoa eman zuen mahaira arteko ibilbidea luzea eta geldoa izan zen, eta han zeuzkan tratatu duten medikuak zain. Ibilbide geldoa, baina zoragarria. “Azken asteotan lan muskulu-eskeletikoa egin dugu, eta gaur bere kabuz gela honetan sartu izanak argi eta garbi uzten du bere eboluzioa nolakoa izan den” – esan zuen Felipe Lucenak, Barne-Medikuntza Saileko medikua denak. Bide batez, ermuarraren trinkotasun fisikoa goraipatu zuen: “Oso gizon sendoa da. Sendotasun horri eta aurrera ateratzeko gogoei esker errekuperazio zoragarria izan du, denok espero genuena baino askoz hobea”. “Denok egon gaitezke oso-oso pozik Pedro gaur hemen gurekin egoteagatik” – zioen Juan Ramón Valentík, Kirurgia Ortopediko eta Traumatologiako zuzendariak. “80 metroko amildegi batetik erortzea… Oso erreskate konplikatua gainditu du, eta kirurgia serie gako bat, kolpeen ondorioz birrindutako gorputzaren zatiak birkokatzeko. Horregatik egon gaitezke denok pozik gaur Pedrok bere kabuz dena azaldu duelako. Baina esfortzu nagusia berea izan da. Gorputza ez bada behar besteko indartsua, kirolariaren egoera orokor eta borrokarako animo gabe, ezin izango genuke ezertxo ere egin”. Bi medikuekin bat zetorren Pablo Díaz de Rada, Kirurgia Ortopediko eta Traumatologiako espezialista. Honek ere Pedroren eboluzio harrigarria azpimarratu zuen, txirrindulariaren jarrera eta diziplina goraipatuz, baina optimismo neurrigabea baretzen saiatu zen. “Bizimodu normal batera itzultzea? Laster izango da bizikleta bat berriz hartzeko gai, pasiotxo bat egiteko, baina zoritxarrez, errotulako zauriak direla eta (errotulak asko sufritzen du txirrindularitzan), itxaron egin beharko dugu bere eboluzioa ikusteko. Orduan jakingo dugu zein maila har dezakeen bizikleta baten gainean. Pedroren organismoa oso gogorra da, bai, baina horri ezin zaio eperik jarri”. Continue reading “Ongi etorri, Pedro”

Frantziako Tourra. Multzoen analisia (I): Hautagai nagusiak

Ia denok aurreikusten genuen bezala, azkenean faborito handi bat Tourretik kanpo geratu da. Azkenean CONIk Alejandro Valverde Tourretik kanpo utzi du, etapa bat kilometro batzuetan zehar Italian barneratuta ibiliko baita. Gauzak horrela, hautagai nagusien multzoa sei izenetara murriztu da. Hona hemen izen handi hauen azterketa txiki bat.

armstrongLance Armstrong : Estatubatuarra da edizio honetako izen berezia. Bere itzulerak beste edozein izen propio eklipsatu du, bai Gaztela Leonen, Giroan, eta nola ez, Tourrean. Hiru urte lehiatu gabe, baina maila txukuna erakutsi zuen Giroan, batez ere azken astean, eta ziurrenik geroztik bere prestakuntza afinatzen egongo zen, buru-belarri. Atzo bertan estreinatu zuen aurtengo palmaresa, Nevada City Classic lasterketa estatubatuarrean gailenduz. Ez da egutegiko lasterketa entzutetsuena, jakina, baina esanguratsua da dena den Lancek berriz eskuak jaso dituela jakitea. Gerra emango du, ziur, baina 37 urte ditu, eta horrek bere aurka jokatzen du. Gainera, taldeko giroa ere ez da onena izango, etsai nagusia (Contador) etxean baitu. Ez du zortzigarren Tourrik lortuko, nire aburuz.

contadorAlberto Contador: Munduko igotzaile onenak aurten inoiz baino mendiko etapa deskafeinatuagoak aurkituko ditu errepide frantziarretan, oso etapa gutxi bukatzen baitira goian. Mendate gogorrak helmugatik urruti ordea, etapa askotan aurkitu daitezke. Evansen maila ikusita, badirudi mendian jo egin beharko duela erlojupekoetara aldetxoarekin iristeko. Denboraldi hasiera ederra egin ostean (Algarve eta Euskal Herrian sailkapena eta etapak, eta Paris-Nizan 2 etapa eta podiuma), hanka jaso zuen Tourrari begira. Dauphiné-Libérén erakutsi zuen bide onetik doala bere prestakuntza. Kilometroak egitera zihoala esan zuen, eta beregan arraroa bada ere, erasorik jo gabe igaro zuen aste osoa. Dena den, aldapa gora oso maila ona eman zuen, eta sailkapen nagusian minutu eskas bat baino ez zuen galdu. Faborito nagusia da, ez da alferrik hiru handiak irabazi dituzten eliteko klubeko kidea, baina ikusi beharko da Astanak nola erantzuten duen talde bezala. Diotenez, taldea banatuta omen dago: batzuk Armstrongetzat, eta besteak madrildarrarentzat. Morboa behintzat zerbitzatuta dago.

evansCadel Evans: Australiarra pasa den Dauphiné-Libérén inoiz baino erasokorrago (eta indartsuago) agertu zen. Nire ustez, ez du berriro aurkituko aurtengoa baino ibilbide hoberik bere ezaugarrientzat (nahiz eta taldekako erlojupekoa egiteko bere taldea ez den oso indartsua), eta hori berak badaki. Motibaziorik ez zaio faltako, Tourreko azken 2 edizioak 2º postuan bukatu baititu, eta pixka bat gehiago nahiko du. Alberto Contador mendian kate motzean lotzea lortzen badu, asko izango du irabazita. Etapen perfil aldetik, Tourrak ez dirudi oso zirraragarria izango denik, baina horrek sailkapenean lehia itxiagoa egotea ahalbidetuko du. Gauzak horrela, irabazteko gehien duenetariko bat Cadel Evans da.

leipheimerLevi Leipheimer:Estatubatuarra ez du inork aipatzen, baina Tourrean izango da, eta ez gonbidatu bezala. Armstrong-Contador lehiak (edo konfliktoak) bigarren plano batera bidali du Levi, baina ezin dugu ahaztu Tourreko podiuma ezagutzen duela, eta baita Espainiako Itzulikoa ere. Gainera, Astanan askatasuna izango du, ondo bidean, eta probetxua atera dezake bere bi taldeburu nagusien artean ez baita giro izango. Evansi bezala, ibilbidea oso ondo datorkio, erlojupekoetan maisua baita. Dena den, ikusi genuen moduan, Girora dena ematera joan ostean, lasterketa luzea egin zitzaion. Hori, edo azkenean ez zuen zeukan guztia eman, Uztailera begira. Interesgarriak izan daitezke Montanako txirrindulariaren mugimenduak lasterketan zehar.

menchovDenis Menchov: Errusiar-nafarrak Giroan sekulako erakustaldia eman zuen. Erraz asko irabazi zuen, nahiz eta azken erlojupekoko azken kilometroan, nahi gabe emozio kotak zeruan jarri zituen. Dena den, Tourrean maila handiagoko aurkariak izango ditu, bera baino lasterketa egun gutxiagorekin joango direnak, eta hori erabakigarria izan daiteke. Taldean bertan, Robert Gesink gaztea ez du urruti izango, akaso aurrean ere. Lasterketa frantziarrean beti egin izan du “kale”, sailkapen nagusiari dagokionean, eta aurten beste horrenbeste gerta dakioke. Dena den, Denis etxeko lanak ondo asko eginda iritsi da Tourreko irteera lerrora, eta ez dauka galtzeko ezer. Ikusi egin behar ez ote zaion lasterketa oso luzea egingo, batez ere Mont Ventouxen bukatzen den azken aurreko etapa.

sastreCarlos Sastre: Iazko Tourreko irabazleak aurten taldearekin batera egutegia aldatzea erabaki du. Giroko sailkapena lehiatzera joan zen, baina 4º postu batekin konformatu beharra izan zuen, hori bai, mendiko etapa eder bi irabazi ostean. Orain Tourrean aurretik inoiz ez bezala arituko da, hanketan lehiaketa egun askorekin eta desgaste handia jasan ostean. Hala ere, gaztelarra txirrindulari zaildua eta “diesela” da. Ez du sekulako eraso kolperik joko, baina aurrean egongo da. Hori bai, aurten garaipeneko jokotik at ikusten dut.

Alejandro Valverde: Azkenean, aurretik esan bezala, murtziarra ez da irteeran izango. Beraz, kinielan baduzue, azkar aldatu!

Berrikuntza bezala, Tour honekin batera, Tropelako blogariok aztertutako talde bakoitzean zein txirrindulari hartu ditugun aipatuko dugu. Kasu hontan, nik neuk ez dut asko arriskatu: Evans-Contador. Gainontzeko multzoetan egin beharko da “apustu pertsonal” bat edo beste, sorpresaren bila.

Irratirik gabeko bi etapa 2009ko Tourrean

2009ko Tourrean irratitxoarik gabeko etapakDirudienez aurtengo Tourreko berrikuntzetako bat irratia edo “pinganilloa” ezin erabiltzea izango da. Tourreko arduradunak ez dira ausartu lasterketa guztian zehar kentzera, baina aurten, proba gisara, bi etapetan irratirik gabe lehiatu beharko dira txirrindulariak.

UCIk ontzat eman du neurria eta 10. eta 13. etapetan aplikatuko omen da debekua. Lehenengo etapa erabat laua da Limoges eta Issoudun bitartean, baina nahiko luzea: 194,5 kmkoa. Badirudi etapa honetan neurri berriak ihesaldiak sortzeko erraztasunak emango dizkiela txirrindulariei esprinterren kaltetan, baina ikusi beharko da. Bigarrena Vittel eta Colmar arteko etapa luzean izango da. Hau 200 kmkoa izango da lehen, bigarren eta hirugarren mailako mendateak ditu bere ibilbidean. Kasu honetan lider doan taldeari egin diezaioke kalte neurriak, baina hau ere suposizio bat besterik ez da eta ikusi beharko da.

Garbi dagoena da Tourreko arduradunek berritu eta ikuskizunaren aldeko apustu egin nahi dutela. Ez dakiguna da ia asmatuko duten neurri honekin, baina hor dago ausardia. Badaezpada, ordea, bigarren asteko etapetan probatuko dute neurriaren eragina onerako naiz txarrerako gehiegi antzeman ez dadin nire iritziz.

Segur aski neurriak iritzi bat baino gehiago sortuko du bai aurretik baita egun horietan bertan ere. Gogoz naiz ikusteko ia zer eskaintzen duen aldaketak, zer eskaintzen duen “kontrolik gabeko etapak”.

2009ko Dauphiné Libéré lasterketan euskaldunak aurrean

2009-Dauphiné Libéré. Mikel Astarloza eta Haimaz ZubeldiaLasterketa igandean bukatu bazen ere, ez nuen nahi euskaldunek Dauphiné Libéré lasterketan aurtengoan izan duten protagonismoa aipatu gabe utzi nahi. Mikel Astarlozak 5.  postuan amaitu zuen eta Haimar Zubeldiak, lehen urtez Astana taldean ari dela, 8. postuan. Top ten-eko sailkapenean, beraz, bi gipuzkoarrak.

Euskaltel-Euskadi taldeko txirrindulari pasaitarrak 4. etapan jokatu zen erlojupekoan ikaragarri aritu zen eta 9. sailkatzea lortu zuen. Ondorioz egun horretan dagoeneko 10. postuan zen eta sailkapen nagusiaren lehian sartu zen. Mont Ventoux-eko etapa zetorren hurrengo egunean eta Mikelek etapa ona eginda, sailkapen nagusian postu bat aurrera egitea lortu zuen. Zerbait gehiago nahi zuen Euskaltel-Euskadiko txirrindulariak, eta hurrengo egunean faboritoen artetik ihes egin eta han joan zen aurrera denbora atera asmoz. Zalantzarik gabe gogorra egingo zitzaion ibilbidea, baina lortutako etekina ere ez zen nola nahikoa izan. Briançongo helmugan bigarren euskalduna izan zen Bingen Fernandezen atzetik eta talde nagusiari ia minutuko errenta ateratzea lortu zuen. Denbora tarte nahikoa 9. postutik 4.eraino jauzi egiteko. Lan ikaragarria pasaitarrak egindakoa. Podiumeko postuak eskura geratu zitzaizkion, baina hurrengo egunean St Frnaçois Longchampeko igoera zuten. Zoritxarrez Mikel Astarlozari aurreko eguneko gain esfortzuak ez zion barkatu eta fabortoi jarraitu ezinda geratu zen. Hala ere oso ondo egin zuen azken igoera eta postu bakarra galdu zuen. Bostgarren amaitu zuen, beraz, 2009ko Dauphine Libéréko lasterketa edizio honetako protagonistetako bat izanda.

Haimar Zubeldiak Mont Venouxeko etapan eman zuen kolpea. Szmyd eta Valverderen atzetik, 3. helmugaratu zen aurtengo Dauphine Libéré lasterketako garailea erabaki zuen etapan. Bezperako erlojupekoan ez zen lehen ibiltzen zen bezain ondo jardun, baina mendian aspaldiko ondoen ikusi genuela esan daiteke. Sailkapen nagusian 5. postura igo zen eta bere taldeburuaren ondoren, bera zen sailkapen nagusiko bigarrena. Briançongo etapan Mikel Astarlozak ez bezala, berak denbora galdu zuen 7. posturaino jaitsiz. Normala izan zela esan daiteke bere helburua Astanako taldeburuari laguntzea baitzen. Azken aurreko etapan ere, oilarren lehia zela eta, denbora gehiago galdu eta 8. postuan amaitu zuen. Usurbildarra ere, beraz, ikaragarri.

Bi euskaldun lehen hamar postuetan. Eta sailkapen nagusian pixka bat aurrerago egiten badugu Txente Garcia eta Igor Anton aurkituko ditugu 15 eta 18. hurrenez urren. Emaitza pozgarriak zalantzarik gabe euskal zalegoarentzat. Tourrean beste horrenbeste egiteko gai izango al dira gure txirrindulariak?

Tourreko kinielaren truk kamiseta opari

Tropela.net-Denda

Webgunean aurreratzen dugun bezala, 2009ko Frantziako Tourreko lehiaketako kiniela egiteko epea bihar eguerdiko 12:00etan hasiko da beranduenez. Azken prestaketa lanak egiten hari gara eta prest izan bezain laster kinielak egiteko aukera zabalduko dugu.

Aurtengo ekitaldian ekimen berezi bat martxan jartzea erabaki dugu: egunero kiniela egiteko epea amaitu artean kiniela egin duten guztien artean kamiseta bat zozketatuko dugu. Noski, horretarako erabiltzaileen datuak zuzenak izan behar dute hala izango ez balira kamiseta ez irabazteaz gain Tourreko lehiaketan parte hartu gabe geratuko bailitzateke.

Zer egin behar da parte hartzeko? Lehen baileen kiniela egin eta erabiltzailea aktibatu. Oraindik erabiltzailerik ez baduzu berria sortu eta kiniela egin. Lehendik erabiltzailea baduzu zuzenean kiniela egin besterik ez duzu. Dagoeneko erabiltzaile aktibatuta baduzu zozketan sartzeko moduan zara, baina bestela ez itxaron gehiago zure erabiltzailea aktibatzeko.Eta zergatik lehen baileen? Bada eguneroko zozketan orduraino kiniela egin duten guztiak hartuko baitute parte. Hau da, kiniela egiteko aukera eskaintzen dugun momentuan kiniela egin ezkero 22 kamiseten zozketan parte hartuko duzue. Uztailak 3an egin ezkero kiniela 2 kamiseten zozketan bakarrik hartuko duzue parte. Gainera zenbat eta lehenago egin, orduan eta probabilitate altuago kamiseta egokitzeko zakuan erabiltzaile gutxiago izango baitira.

Sarituak “Zozketa” atalean argitaratuko ditugu. Saritua izan bazara, email bat bidali [email protected] helbidera kamisetaren neurria adieraziz. Guk konfirmazioa bidaliko dizuegu eta uztailean zehar, Frantziako Tourraz gozatzen ari garen bitartean, kamiseta etxean jasoko duzue.

Eta ez ahaztu egokitzen ez bazaizu beti izango duzula Tropela Elkarteri laguntzea kamiseta bat erosiz.

Zorte on guztioi eta Tour eder batetaz gozatzeko aukera izan dezagula!!