Egile Artxiboak:Egoitz

Cancellara bikoitzaren bila

Cancellara. 2009ko Munduko Txapelketako erlojuaren kontra urrezko dominaEtxean ari da eta horrek motibazio bikoitza ematen dio Cancellarari. Gaur erlojupeko ikaragarria egin du. Bagenekien irabaziko zuela, baina erakutsi duen nagusitasuna ikaragarria izan da. Bigarrena izan den Larsson-i 1’27”ko tartea atera dio eta hori azken 200 metroetan garaipena zaleekin ospatzen joan dela, esku lekutik eskuak gora jasota. 51,58 km/h bataz besteko abiadura ikaragarrian joanda ez nau harritzen areriorik ez izatea. Hirugarren Tony Martin izan da 2’30”ra.

Esan bezala bagenekien Cancellarak gaur irabazi egingo zuela. Ez da ezustekoa izan. Berak esan zuen aurtengoan historia egiteko asmotan dela eta erlojuaren kontrako urrezko domina janzteaz gain errepidekoa ere jantzi nahi duela. Iazko Beijingeko joko olinpikoak gogora ekarri nahi izan du gaurko domina eskuratu eta gero. Oroitzen bazarete, iaz azken kilometroetan ihes eginda zirenak atzetik aurrera eginda harrapatzeko gauza izan zen, baina esprintean hirugarren postua besterik ezin izan zuen lortu Samuel Sanchez eta Rebellinen atzetik. Aurtengoan bi arrazoi eman ditu igandean bigarren urrezko domina lortzeko: alde batetik etxean ari dela (gaurko erlojuaren kontrako saioan 23000 ikusle ziren, gehienak bera animatzen, noski) eta bestetik zangoak Beijinen baino hobeto dituela.

Garbi dago erabat kontzentratuta dagoela aurtengo munduko txapelketa hauetarako. Hala ere ez zait iruditzen gainontzekoek gauzak erraz jarriko dizkiotenik, baina saiatuko dela seguru naiz.

Esan bezala Larsson izan da bigarren sailkatu dena. Esanguratsua bere adierazpenak. Bere hitzetan Cancellara dagoen erlojuaren kontrako saioan zilarra lortzea urrea lortzea bezala sentitzen duela. Ez zait harritzen suitzarraren ibilbidea ikusita.

Gaurkoa irudirik kaxkarrena eman duena Wiggins izan da. Aurreko postuetan ikustea espero genuen, baina ez da gauza izan maila emateko. Larssonek berak ere aurreratu egin du eta muinora azkenekoz igotzen ari zela arazo mekanikoak izan ditu katearekin edo, eta ezinak jota, amorrazioz, bizikleta lurrera bota du. Beharbada denbora gehiegi lehiaketetatik kanpo?

Errepidekoari begira

Tropelean guztiok igandeko saio horren zain gaude. Ez da erreza 10 txirrindulari aukeratzea eta informazio oro gutxi da. Zenbait iruzkinetan Haussler-en eta Frank Schlecken inguruan galdezka aritu zarete.

Lehenaren inguruan esan, ondo zenioten bezala, egun Alemanian bizi den arren Australian jaiotakoa da. Bi naziotasunen jabe da eta Alemaniako taldeak txirrindularia Mendrision nahi bazuen ere, berak ezetz esan du alde batetik bere egutegian ez zuelako aurre ikusita eta bestaldetik ibilbide hori ez omen da egokia bera bezalako txirrindulari batentzat. Hurrengo urtean, berriz, Melbournen jokatuko da munduko txapelketa eta badirudi han izango dela. Bai, badirudi alemaniar baino australiarrago sentitzen dela Haussler.

Frank Schlecki dagokionez, Vueltako 11. etapan lasterketa uztea erabaki zuen. Dirudienez Amstel Gold Race klasikoan izan zuen erorikoak arazoren bat sortu zion belaunetako batean eta ebakuntza egitera eraman zuten. Hau horrela izanda, zail ikusten zen Mendrisioko munduko txapelketarako errekuperatuta izatea.

2009ko Munduko Txapelketa Mendrision (eta Tropelan, noski!)

2009ko Munduko Txapelketa Mendrision

Urteko txirrindulari denboraldia amaitzera doa eta berarekin 2009ko Tropelan.net-eko lehiaketak. Zehazki igande honetan Mendrision (Suitzan) jokatuko den elite gizonezkoen txapelketak emango dio amaiera, eta aldi berean atseden, txirrindulariei.

Mendrision 262 kilometroko ibilbidea egin beharko dute. Ibilbide hau 13,8 kilometroko zirkuitu bati 19 itzuli emanda osatuko dute. Ibildidea esteka honetan dagoen bideoan ikus dezakezue, benetan gomendagarria. Ikusi ahal duzuen bezala, ibilbideko errepideak ez dira oso zabalak eta horrek ortzadar maillotaren lehian sartu nahiko duten txirrindulariak adi izatera behartuko ditu edozein ihesaldik lasterketa erabaki bailezake. Esaten dutenez, aspaldiko urteetako ibilbiderik gogorrenetakoa da aurtengoan prestatu dutena. Klasikomanorik gogorrenen batentzat beharbada?

Tropela.net-eko lehiaketa ere egin daiteke dagoenekoz. Oraingoan bi multzotan banatu dira. alde batetik “hautagai nagusiak” eta bestetik “besteak”. Guztira 10 txirrindulari hartu beharko dira. Ez da erraza aukeraketa. Oraingoz erabiltzaileen arabera Valverde, Cunego eta Cancellara dira faborito nagusi. Oraindik askok azken errepasoa egingo duzuenez, beharbada ez da daturik esanguratsuena momentu honetan.

Urteko azken lehiaketa izanik eta kontutan izanda zenbat puntu banatuko diren, urteko sailkapenean posturen bat edo beste aurrera emateko asmotan bazabiltzate, ezinbestekoa zaizue lehiaketa honetan parte hartzea.

Euskaldun gutxi Mendrision

Dakizuen bezala, gizonezkoen artean Juanma Garate (Espainiako txapeldun ohia) bakarrik izango da euskal ordezkaria igandeko lasterketan. Baina ez da izango bera euskal ordezkari bakarra elite mailan. Emakumezkoetan Eneritz Iturriaga izango da gaur jokatuko den emakumezkoen erlojuaren kontrako saioan eta bere esanetan lehen 20 postuetakoren bat lortzea du helburu; ea 20.etik baino 1.etik gertuago izaten den Abadiñoko txirrindularia.

Valverdek irabazi du 2009ko Vuelta

Valverde. 2009ko Vueltako garailea izango daBai, badakit ez dela Vuelta oraindik bukatu baina guztia erabakita dago. Segur aski izenburu hau astelehenean jarri izan banuen ere zuzena zatekeen.

Blogeko iruzkin batean nioen gidoi bati jarraiki joan dela Vuelta orokorrean. Argudio hori gaurko erlojupekora estrapolatuta baliozkoa da. Millarrek irabazi du etapa, Samuel Sanchezek guztia eman du etapa garaipenaren lehian sartzeko (Euskaltel-Euskadik ez baitu etaparik irabazi), baina bigarren izan da, eta ez sailkapen nagusian aurrera egiteko ezinezkoa baitzuen (beno, bai, Valverdek eroriko bat izanda edo?). Evansek (beharbada espero baino erlojupeko pattalagoa eginda) sailkapen nagusiko 3. postua eskuratzea lortu du Bassoren kaltetan. Ez baduzue ikusi ez duzue ezer galdu. Eskerrak ez duen eguraldi onik egin amorrazioak hartuko baininduke etapa aspergarri hau ikusteagatik etxean geratu izanak.

Konparazioak gaiztoak omen dira, baina etapa ikusten ari nintzela euria falta bota dut. Bai, Italiako Giroako azken etapa zenbaterainoko ona izan zen ohartu naiz Toledoko parajeak ikusiaz erreferentziak ematen ari ziren bitartean. Vueltak ez dauka beste lasterketa handien erakargarritasunaren erdirik ere nire ustez. Ez dakit ziur zergatik kendu nahi duten urre koloreko maillota eta kolore gorrikoa jarri; beharbada Espainiako Vueltan jaitsiera postuetan dagoelako, larrialdi egoeran?

Deignan izan da ihesaldiari etekina atera dion txirrindularia gaurkoan

Ez nuen ezer idazteko asmorik, baina gaurko amaiera ikusi dudanean idaztea pentsatu dut. Ikusi baduzue jakingo duzue Deignan eta Kreuziger elkarrekin iritsi direla helmugara. Azken metroetan Irlandako txirrindularia gailendu da. Ez al dizue ezer gogora arazten? Niri bai eta hori izan da post hau idaztearen arrazoietako bat.

Gaurkoan ihesaldia. Espero bezala 1., 2. eta 3. mailako mendateak izanik. Ihesaldia txirrindulari garrantzitsuek osatu dute bertan baitziren Kreuziger, Fuglsang, Gilbert, Valjavec, Moncoutie, Taaramae, Di Gregorio, Del Nero, Hernandez Blazquez, Breschel, Cherel eta hiru euskal ordezkari, Igor Anton, David Herrero eta txirrindularitza profesionalari agur esan aurretik etapa garaipenaren bila dabilen Bingen Fernandez.

Atzean tropel nagusian Euskaltel-Euskadi eta Caisse D’Epargne izan dira tiraka, baina alferrik. Gehienez 6 minutura jaistea lortu dute tartea murriztea eta helmugan ikusi dugu tropelak amore nola eman duen, izan ere 9’41”ra ailegatu dira.

Ihesaldian saiakerarik nabarmenetan lehena Gilbertek egindakoa izan da Alto de Boqueronen gora. Tartea egitea lortu du baina gaina egin aurretik pott egin du. Tropeltxo horretan etapa garaipena lortzeko interes handia zegoen.

Tropeltxoko 10 kide inguruk bat egin dute eta beste zenbait atzean geratu dira. Hamarreko horretan David Herrero eta Igor Anton aurkitzen zen. Hala ere erasoak ez dira geratu eta Kreuziger eta Deignanen aurrera egitea lortu dute. Atzetik Fuglsang eta David Herrero saiatu dira, baina azken bi hauek dirudienez ez dute elkar ondo ulertu eta David Herrerok amore ematea erabaki du.

Azken metroetan Deignan eta Kreuzigerrek etapa garaipena jokatu beharra zuten. Orduan gazte txekiarrari Donostiako Klasikoko mamua sartu zaiola esango nuke eta berriro ere kale egin du. Deignanek egoera ondo baliatu eta etapa garaipena lortu du. Eta ez hori bakarrik, gaur lortutako errentari esker eta Danielsonek lasterketa uztea erabaki duenez, sailkapen nagusiko 8. postuan sartu da. Hori bai ihesaldiari etekina ateratzea!!

Gure euskal ordezkariei dagokionez, azkenean Igor Anton 5. sailkatu da, David Herrero 12. eta Bingen Fernandez 14. Moncoutirekin batera.

Mendien osteko esprintean Greipel nagusi

Greipel. 2009ko Vueltako 16. etapan garaipenaSentitzen dut gaur arte Vueltaren inguruko berririk ez idatzi izana. Beharbada espero baino ikuskizun gutxiago eman zuten mendietako etapek eta horrek Vueltaren inguruan idazteko gogoa kendu zidan. Egia esan gustura idatzi nuen Romain Sicarden garaipenaz eta espero dut askok nahiago zenutela horren berri izan.

Gaurkoan iheslarien etapa izan zitekeela pentsatzen bagenuen ere, esprinta jokatu da Puertollanon eta Columbia-HTCko azkarrenak ez du barkatu.

Gaur sofan jarri eta telebistari begira jartzea pentsatu dut. Etxera iristerako irratian entzun dut nola Rosendo ihes eginda zioan 8 minutu inguruko tartearekin, beraz, loak ez hartzea izango nuela helburu.

Bide zabalak, tropeleko esprinterrak denbora jateko lanetan eta Andalucia CajaSurreko txirrindularia ihesaldian ahalik eta gehien irauteko lehian. Hain txirrindulari zalea ez banintz bataz-besteko abiadura zein zen entzun, erlojuari begiratu eta beste zerbait egitera joango nintzateke arratsaldeko 6ak arte.

Eztabaidagai jar genezake tropelak eta ordutegi ofizialaren arteko desfase ikaragarria. Ez dakit zeinek duen errua, tropelak ala antolatzaileek, baina eskerrak irailean udara den bestela ilunpetan iritsiko balirateke txirrindulariak helmugara.

Tropelak helmugarako 18 kilometro ingururen faltan harrapatu du Rosendo. Sevillarrak 140 kilometro egin omen ditu bakarrik ihes eginda eta ez da marka makala.

Guztiak ziren prest esprinterako batez ere Farrar eta Boonen falta zirela kontutan izanda aukerak handitzen baitzitzaizkien lasterketan diharduten esprinterrei. Abiadura bizian ziren azken 4 kilometro inguruan Puertollanoko kaleetan eta eroriko ikusgarria izan da. Lau txirrindulari izan dira erori direnak eta hauetatik bi esprinter, Dean eta Weylandt. Deanek jaiki eta helmugaraino iristea lortu du bere taldekide baten laguntzaz eta Weylandtek, zauri larriagoz, beranduago lortu du helmugaratzea. Quick Stepeko belgikarrak mikro austura bat duela jakin araziko dute eta bihar erabakiko dute irteera hartu ala ez.

Esan bezala nabarmen lanean Columbia-HTC taldea ari zen eta Greipelek nagusitasun handiz lortu du garaipena. Atzetik Bonnet eta Bennati izan ditu. Honenbestez Greipelek 3. garaipena du 2009ko Vueltan. Liège eta Vinaroseko garaipenen ostean, gaur Puertollanon. Horretaz gain, puntuetako sailkapenean ere lider jarri da taldean zalaparta sortu duen erabaki batek puntuak kendu arazi baitzizkion Valverderen mesedetan.