Egoitz

Abraham Olano erantzuteko prest!!

Patxi Vilari egindako elkarrizketaren antzera, Agin Rezola adiskideak oraingoan Abraham Olano izango du ostegun honetan bere eta gure galderak erantzuteko prest. Dakizuen bezala Abrahamek txirrindularitza profesionala aritu zen eta garaipen handiak lortu zituen, eta talde zuzendari izan ondoren, egun Espainiako Vueltaren zuzendari teknikoa da 2004az geroztik. Bere arduretako bat lasterketaren ibilbidea aukeratzea da. Atzo ezagutu genuen berriarekin parean datorkigun elkarrizketa izango da zalantzarik gabe.

Elkarrizketa hau ostegun honetan izango da arratsaldeko 5etatik aurrera Info7 irratiko 5etako diligentzia saioan. Zuek egin nahi dizkiozuen galderak post honen ondoren gehitzen joan zaitezkete eta Aginek esan digunez, bera arduratuko da Abrahami helarazten (galdera guztiak egiteko denbora ematen badio behintzat).

Espainiako Vuelta euskal errepideetan

Espainiako Vuelta 2009 Dakizuen bezala, Eusko Jaurlaritzak Espainiako futbol selekzioak Euskadin jokatzeaz gain, Espainiako Vueltak irteera edo helmugaren bat Euskadin izatea eskatzen dute gaur onartutako proposamenei jarraiki. Orain bi urte t’erdi Carmelo Barriok aurkeztu zuen antzerako proposamen bat baina boto faltagatik albo batera geratu zen. Gaurkoan, ordea, gehiengoak babestu du proposamena.

Zeresana emango du erabaki honek eta dagoeneko alderdi politikoak aldeko eta kontrako iritziak eman dituzte. Txoko honetan gaia eztabaidagai jarri nahi nuke zale guztion artean.

Nire iritziari dagokionez, beste behin ere esan nuen eta orain ere berdin pentsatzen jarraitzen dut: Frantziako Tourra iparraldetik pasatzen den bezala, edo 1992 Tourra Donostiatik abiatu zenean bezala, Vuelta hemen izatea ere ontzat jotzen dut. Alde horretatik, arazorik ez nire ikuspuntutik.

Txirrindulari zale bezala, zalantzarik gabe, nahiago dut Tourra pasatzea Espainiako Vuelta baino. Urtetik urtera interesa galtzen doan lasterketa iruditzen baitzait penintsulako lasterketa hau. Alde horretatik, beraz, nahiago nuke ahaleginak Vuelta ekartzean baino Tourra gehiagotan bertatik pasatzean inbertituko balukete. Eztabaida niretzat ez da zein izeneko lasterketa pasako den hemendik, zein mailatako lasterketa baizik.

Honek guztiak Unipublic taldeari egingo dio mesederik handiena, entitate pribatu izanik gure sosak berenganatzeko aukera izango baitute.

Ez nuke amaitu nahi aurtengoan Euskal Bizikletarik izan ez dela gogora ekarri gabe. Beharbada gauzak nahasten ari naiz, baina kontuak hartzeko puntua izan daitekeela deritzot.

Heriotzaren mamua txirrindularitzan

Agustin Sagasti Hilabeteren buruan hiru txirrindulariren heriotzaren berri izan dugu. Beldurtzekoa. Lehena Vandenbroucke izan zen, Senegaleko hotel batean hilik aurkitu zutena, bigarrena orain astebete inguru edo, De Fauw pistako txirrindulari belgikarra izan zen, eta azkena urrutira joan gabe aste honetan bertan ezagutzera eman dena: Agustin Sagasti, Euskadi Fundazioan 1994eko Euskal Herriko Itzulian talde euskaldunari lehen garaipena eman zion txirrindulariarena. Agustin 2008ko Euskaltel Euskadi taldearen aurkezpenean garaipen harengatik omendua izan zen Jose Alberto Praderarekin batera.

Beharbada kasu guztiak ezberdinak dira, baina guztiak bi gauza dituzte komunean: hirurak txirrindulari profesionalak ziren (edo izandakoak) eta hirurak hilik aurkituak izan dira. Vandenbroucke kasuan ez dago argi bere buruaz beste egin zuen ala ez, baina beste bietan badirudi hala izan dela. Azken bi kasuetan istripu larri bat izan daiteke arrazoi nahiz eta oso ezberdinak izan: De Fauw-ren kasuan beste txirrindulari baten heriotza eragin zuen lehiatzen ari zirela eta Agustin Sagastiren kasuan txirrindularitza profesionala uztera eraman zuen lesio larri bat.

Arrazoiak bat ala beste izan, zer pentsatua ematen du hain denbora gutxian hiru txirrindulari profesional gazteren heriotzaren berri jakiteak. Bestela gogora ditzagun adinak: Vandenbroucke 34 urte zituen, De Fauw-k 28 eta Agustin Sagastik 39.

Gure doluminak senitarteko guztiei, bereziki Agustin Sagastirenei.

“Gizon askea naiz”

Hori da Patxi Vilari birritan entzun dioguna azken egunetan. Atzo amaitzen zitzaion testosterona sintetiko kontsumitu izangatik jarri zioten zigorra eta orain talde bila dabil.

Azken berrien arabera, Patxi Vila Lampre taldeaz gain (2003az geroztik partaide izan den taldea) Astana taldearekin ere bideak ireki omen ditu. Hauek ProTourreko taldeei dagokionez, baina Kontinentalak ez ditu baztertzen. Horien artean Xacobeo-Galicia, Andalucia-Cajasur eta Carmioro – A Style, egun Sellaren taldea dena. Talde galiziarrean ez zait iruditzen lekurik egingo diotenik besteak beste Iban Mayoz eta David Herrero ere taldetik baztertu baitituzte 2010era begira. Ez dakit ondorioz donostiarrak eta bilbotarrak txirrindularitza profesionalean jarraitzerik izango al duten.

Ezezkoa eman dioten taldeak Caisse D’Epargne eta Euskaltel-Euskadi omen dira. Hauek dagoeneko hurrengo urterako taldea osatua dutela esan baitiote. Ikusiko dugu zein taldetan amaitzen duen Berako txirrindulariak gauzak ondo bidean.

Zerua zainetan dutela

Laborategiko odola Bagenekien dopinari muga jartzea zail izango zela. Azken ikerketa polizialen arabera, egungo dopin kontrol guztiak saihesteko balio duen teknikaren berri bat ezagutu dugu: ozonoa zainetan sartzea. Zeinek esperoko zuen dopin teknikarik hoberena zerua zainetan sartze izango zela.

Dirudienez guztia Rebellin-en positiboaren ikerketak eman du ezagutzera teknika berri hau. Dirudienez Molleta txirrindulariari, orduan Gerolsteiner taldeko taldekidea zenari, poliziek xiringa bat aurkitu zioten hortzetako pastaren edukiontzi batean. Honek Lazzaro medikuak emana zela argitu zien poliziei.

Ikertzaileek Lazzaro mediku italiar hau ikertzeari ekin zioten eta esan dutenez 15 urteko igerilari bat teknika honen bidez nola tratatzen zuen grabatuta dute. Bai igerilaria eta bere gurasoa ere ikerketa pean daude, izan ere grabaketa horretan gurasoak tratamendua aplikatu artean bertan baitzen.

Teknika berri hau “ozono terapia” bezala eman da ezagutzera. Medikuak kirolariari 200 zentimetro kubiko inguru odol ateratzen dio eta makina baten bidez ozonoaz nahasten du (O3). Behin ozonoaz nahastuta, berriro ere kirolariari txertatzen zaio. Prozesu honetan burdina ere txertatzen zaio kirolariari globulu gehiago sor ditzan, hots, gaitasun fisikoa handi dakiokeen.

Zalantzarik gabe osasuna arriskuan jartzen du teknika honek, besteak beste enbolia bat izateko arriskuak nabarmen handitzen baitira. Kontrolei dagokienez, berriz, egungo laborategi azterketen bidez ezin da antzeman hematokrito eta hemoglobina mailak konstante mantentzen baitira.

Garbi dago zer egin behar den zerura iristeko: zainetan zerua txertatu. Inork ez zaituzte antzemango eta errendimenduak estralurtar baten parekoa izango duzue. Hori bai, osasuna arriskuan jarriaz. Hurrengoa zer izango ote da.