Etiketa Artxiboak:Gesink

Euskaltel-Euskadi mendiko maillota galtzear?

Amets Txurruka Aiako maldak igotzen erorikoa izan eta geroAtzoko etapan ikaragarrizko erakustaldia emanda Joaquim “Purito” Rodriguez-ek etapa garaipena eskuratu zuen. Aiako maldak hasterako erasoaldia jo eta aurrean zuen Kolobnev-en laguntzarekin, tropelari eta gainontzeko faboritoei behar besteko errenta atera zien atzokoan etapa garaipena lortzeko.

Beharbada, bestela gerta zitekeen Amets Txurrukak erorikoa izan ez bazuen. Aiako %28ko malda igo aurretiko jaitsieran aurreko gurpilak irrist egin zion eta lurrera jauzi zen. Lepauztaia minduta zuela kexatu zen, baina hala eta guztiz ere etapa amaitzeko gauza izan zen. Ikaragarria Ametsek eman zuen erakustaldia atzokoan ere, aste honetan hirugarren aldiz sartu baita ihesaldi batean eta mendiko maillota ziurtatzeaz gain, etapa garaipenaren lehian sartzeko moduan izan zen. Pena ikaragarria genuen Aiako maldetan geunden zaleok, goitik ikusi baikenuen nola Amets aurretik zen ihes eginda errenta politarekin.

Dakizuen bezala Amets Poliklinikara eman zuten. Ez dugu jakin ahal izan azkenean lepauztaia hautsia edo zartatua duen eta oraindik duda da gaur erlojuaren aurkako saioan parte hartuko duen ala ez. Nahikoa luke etapa amaitzea mendiko maillota irabazteko orain bi urte Egoi Martinezek egin zuen bezala. Hala ere, badakigu zauri larriak baditu ez zaiola horrelako esfortzurik egitea komeniko. Duda izango da, beraz, Etxebarriako igotzailea gaurkoan azken unea iritsi arte orain bi urte David Herrerorekin gertatu zen bezala. Gure animorik beroenak Amets Txurrukari, gaur irteten ez bada ere, ikaragarrizko itzulia egin baitu eta hori inork ez baitio kenduko.

Valverde Vs Horner

Faboritoen artean atzo Gesinkek huts egin zuela entzun dugu. Egia da, huts egin zuen, baina arrazoia ez zen izan indarrik gabe geratu izana. Aian geundenok ederki ikusi genuen nola Gesinkek gorputzaren eskuin aldean zauri eta odol arrastoak zituen. Garbi zegoen erori egin zela eta horrek lasterketaren lehiatik kanpo utzi du holandarra.

Gesink kanporatuta, Euskal Herriko Itzulia Valverde eta Hornerren artean erabakiko dela dirudi. Bi hauen artean segundo bakarreko tartea dago murtziarraren alde. Gainontzekoak 34 segundotik gorako atzerapenak dituzte, beraz, ezustekorik ezean, hauetakoren bat izango da gaur Euskal Herriko Itzuliaren garailea. Eta norbaiten alde egitekotan, faborito Valverde hartzen badute ere, nik Horner gailenduko delakoan naiz.

Argazkia: www.cyclingnews.com

Samuel Sanchezek arantza kendu du

Lehendabiziko etapan minutu eta erdi luzea galdu eta gero, gainerakoetan beste helburu batzuk lortzeko lanean ariko zela esan zuen Samuel Sanchezek. Etapa bat irabaztea zuen buruan Euskaltel Euskadiko asturiarrak, eta Arrateko gainean erdietsi du.

Samuel Sanchez Arrateko helmugan

Espero zitekeen bezala, etapa azken aldapan erabaki da. Caisse D’Epargnek jarri du hasieran erritmoa eta Andy Schlecken eraso bortitzak hautsi du tropela. Luxenburgoko igotzaile finak aurrera egin du, eta oso txirrindulari gutxi izan dira gai haren pare jartzeko: Gesink (Rabobank), Horner (RadioShack), Peraud (Lotto), Valverde (Caisse D’Epargne) eta Samuel Sanchez (Euskaltel-Euskadi). Chris Horner izan da erritmoa aldatzen hurrena, eta bidea egin du. Samuel Sanchezek, ordea, harrapatu du mendiko pankarta pean, eta pixka bat aurrerago bat egin dute bikote horrekin Valverdek eta Gesinkek. Azken metroak maldan behera zirela baliatuta, tartea ireki du Samuel Sanchezek eta etapa irabazi du. Valverde, Gesink eta Horner orpoz orpo iritsi dira. Sailkapen nagusirako Euskaltel Euskadiren apustu nagusiak, Beñat Intxaustik, nagusitu den taldekidearengatik minutu erdira iritsi da. Aurreneko erasoa jo duen Andy Schleck eta Cunego 40 segundora helmugaratu dira, eta Arraten irabazteko askoren ahotan zegoen Purito Rodríguez, 49 segundora. Amets Txurrukak ihesaldian egin ditu kilometro asko eta saritxoa jaso du: mendiko maillota.

Azken bi etapetan, Orioko aldapek epaile lana egingo dute eta ezustekorik ezean, Valverdek, Hornerrek edo Gesinkek irabaziko dute aurtengo Euskal Herriko Itzulia. Izan ere, segundo bakarraren bueltan daude hirurak sailkapen nagusian. Haietako batek huts egin lezake, baina hirurek, nekez.

Argazkia: Susi Goetze (www.cyclinginside.com)

2010eko taldeen analisia (XI): Rabobank, finantza krisiak ere hondora ezin dezakeen talde klasikoa

freireAldaketa gutxirekin dator aurten Rabobank talde herbeheretarra. Steven Kruijswijk eta Dennis Van Winden igo dituzte talde filial kontinentaletik. Eta fitxaketen faltan, Pedro Horrillo izan da aurre denboraldian zeresana eman duen txirrindularia. Jarraitzeko eskaintza mahai gainean zuen, baina profesionaletan aritzeko maila berreskuratu ezingo duela jabeturik, lasterketak albo batera uztea erabaki zuen ermuarrak. Ez du baina bizikleta zintzilikatzeko asmorik erakutsi eta ziur inoiz ez bezala gozatuko dituela hemendik aurrera patxadaz eta lasterketen presio barik egiten dituen km horiek.

Gainontzean, Menchov eta Gesink ditugu taldeko liderrak itzuli handietarako. Menchov-ek erregulartasun handia erakutsi du beti eta iaz Giroan nagusitu arren, badirudi aurten Frantziako Tourrean egingo duela saialdia. Robert Gesink gaztea, aldiz, Herbehereetako zaleen esperantza berria da. Urteak dira herrialde horretako txirrindularirik ez dugula ikusten itzuli handietan eta erorketa eta lesioekin zortea badu, 2010 erreleboaren urtea izan daiteke taldearen buruzagitzan.

Etapa ehiztarien artean, Oscar Freire aipatu beharra dago. Azken denboraldia izango zuela zirudien, baina oraindik beste urtebete jarraituko duela adierazi zuen denboraldi hasieran. Eta jadanik besoak jaso ditu Mallorcako etapa batean eta Andaluziako beste bitan. Abiadura agian pixka bat galduko zuen urteekin, baina kantabriarrak duen etapa ehiztari senak hor darrai. Magia duen txirrindulari bat dugu, berezia, bakarra. Eta nola, ez munduko txapelketa du buruan. Bestela erretiratua legoke. Aurtengo mundiala, gainera, egokia izan daiteke bere ezaugarrientzat, diotenez ez baita gogorregia, eta 4 aldiz munduko txapela irabazten duen lehen txirrindularia bilakatu nahi du.

Talde honetan jarraitzen du Juanma Garate euskaldunak ere. Irundar beteranoak ederki daki zein den bere papera taldean eta horregatik da hain baloratua. 3 asteko lasterketetan duen eskarmentua edozein liderri eskaintzeko prest, dela Gesink dela Menchov, eta era berean etaparen bat irabazteko gai. Eta ez edonolakoa gainera, iazko Tourrean Mont Ventoux gainean lortu zuena bezalakoa.

Flecha-ren hutsunea betetzeko, aldiz, ez dute kanpora jo. Etxean dituztenengan konfiantza osoa dute. Batik bat ondorengo izenengan: lehenik eta behin, Lars Boom konfirmazioaren urtea izan baitaiteke aurtengo urtea berarentzat. Iaz polito ibili zen (etapa bana Espainiako eta Belgikako itzulietan) eta ziklo-krosa 2. planoan utzi duenetik oso goian ibil daitekeela erakutsi du. Nick Nuyens-ek espero baino denboraldi eskasagoa egin zuen iaz (garaipen bakarra), baina belgikarrak goian behar luke. Stef Clement, Posthuma eta Pieter Weening hirukotea ere izan daiteke edozein lasterketetan holandarren garaipen zakua betetzeko gai.

Velosok garaipena Xorret del Catin

Veloso. 2009ko Vueltako 9. etapan garaipenaEtapa jarraitzeko aukera izan duzuenok ados izango zarete aspergarria izan dela diodanean Xorret del Cati igotzen hasi diren arte. Ihesaldia aurretik eta atzetik 6 minututik gorako atzerapenarekin tropela. Eskerrak Xorret del Catin sua piztu eta faboritoen arteko lehia ikusi dugun. Etapa garaipena Velosorentzat izan da eta faboritoen artean nagusi Valverde, Vueltako lider berria.

Hasiera hasieratik izan dira mugimenduak tropelean ihesaldia sortzeko eta lortu dutenak Veloso, Taaramae, De la Fuente, Ramirez Abeja, Marzano, Devolder eta Sanchez Pimienta izan dira. Esan bezala tarte handiak izan dituzte tropelarekiko eta Xorret del Cati igotzen hasi arte eutsi ahal izan diote.

Azken 8 kilometroetan Taaramae, Marzano, Veloso eta De la Fuente mugitu dira. Gainontzeko iheskideek jada ezin zioten erritmoari jarraitu 180 kilometro egin eta gero. Laukote honetan indartsuen Taaramae izan da. Hasieran Marzano eta De la Fuentek jarraitzeko saiakera egin dute baina ezin. Cofidiseko estoniarrak hasieran tartea irekitzea zuen helburu eta gero eustea, baina Xorret del Catiko ia %20ko maldek ia aurrera egin ezinda utzi dute. Momenturen batean bazirudien hanka lurrean jarri beharrean izango zela. Atzetik, tarte batera baina erritmo egokiagoan, Marzano eta Veloso zetozkion eta Taaramae harrapatzeko gauza izan dira. Xacobeko galiziarra, ordea, italiarra baino indartsuago zen eta aurrera egitea lortu du helmugaratu den arte. Merezitako garaipena Velosok lortu duena. Taaramaek txakalaldi galanta izan du eta azkenean 8’47”ra helmugaratu da.

Atzean faboritoak ez zeuden lo hartzeko. Kiriyenka eta gainontzeko Caisse D’Epargneko talde kideak lanerako zituen Valverdek. Rodriguezek aurrera egin du tropel nagusitik beranduago Valverdek erasoa jo eta hurrengo metroetan laguntzeko. Halaxe egin du murtziarrak, baina liderraren maillota eskuratzeko ahaleginean, Evans eta Bassok ederki erantzun diote eta uneoro Silence-Lotoko eta Liquigaseko liderrak bere gurpilean izan ditu. Bitartean Samuel Sanchez ez zen faboritoen artean ikusten.

Dakizuen bezala lehen 3 postuentzako gain-sariak daude eta horiek behar zituen Valverdek Evansi 2 segundoko tartea kendu ahal izateko gurpiletik atera ezin zuela ikusita. Dagoeneko Veloso helmugaratua zen, baita Marzano ere. Hirugarren postua behar zuen murtziarrak. Helmuga Xorret del Cati gainetik 3 kilometrora izanik, jaitsiera azkarra egin du Valverdek eta helmugaratzerako orduan De la Fuente harrapatzeko gauza izan da gainontzeko faboritoan gurpilean zituela. Nahi duzuena esango duzue, baina garbi garbi, De la Fuentek Valverde esprinta egiten ari zela ikusi duenean hanka jaso du 8 segundoko gain-saria, eta beraz, lidergoa jaso zezan. Eztabaidarako gaia zalantzarik gabe.

Gaurko etaparen ostean Valverde da lider berria, 2. Evans 7 segundora eta 3. Gesink 37ra. Samuel Sanchezek gaurko atzeraldiaren ondorioz, 6 posturaino atzeratu da.

Lehen euskaldunari dagokionez, Haimar Zubeldiak jarraitzen du 9. postuan, atzo baino postu bat atzerago.

Guztiek Valverde lider nahi dute

Gaurkoan bi gauza ikusi ditut eztabaida gai jarri nahiko nituzkeenak. Alde batetik De la Fuentek hanka jaso izana Valverdek gain saria jaso zezan (nik hori ikusi dut behintzat). Ulertzekoa alde batetik Matxinen txirrindulariak egin duena, baina bestaldetik, Evansi dagokionez, itsusi samarra. Adi izango naiz australiarrak gaiaren inguruan esaten dituenez, ziur bainaiz esango dituela.

Bigarrenik helmugan antolatzaileek Valverde eta De la Fuenteren artean segundo bat izan dela jarri dute. Evansi De la Fuenteren denbora bera eman diote. Zuek horrela ikusi al duzue? Nire ustez zalantzarik gabe Valverde eta De la Fuenteren artean segundo bat egon bada (nik ez dut ikusi segundo hori) beste horrenbeste beharko zukeen De la Fuente eta Evansen tropeltxoaren artean. Sailkapenak ikusterakoan, zinez, honek harrituta utzi nauela. Garbi da, bai, Murtziara sartzerako Valverdek bai ala bai urrezko maillota izan zezan interes asko daudela, nire iritzi apalean behintzat.

Amstel Gold Race. Garagardoa eta bizikleta

amstel_2009Asko izan dira Gasteizen alkohol tasa altuarekin bizikletaz ibiltzeagatik multa jarri dietenak. Badirudi bateragarriak ez direla bizikleta eta alkohola, baina Holanda aldean zentzua hartuko du binomio honek bihar jokatuko baita Amstel Gold Race klasiko ospetsua.

258,6 kmtako ibilbidea bete beharko dute txirrindulariek, Maastricht-etik Valkenburg-era. Ibilbidea zirkuitu ezberdinetan banatua da eta zenbait lekutatik hirutan ere pasa beharko dute. 31 igoera egin beharko dituzte, zenbait estu xamarrak, eta kontuan hartzeko izango da helmuga maldan amaitzen dela. Zalantzarik ez jarraitzaile ugari bilduko dela bide bazterrean garagardoa eskuan txirrindulariak animatzera. Guk ere ETB1-etik jarraitzeko aukera izango dugu 15:50tatik aurrera. Continue reading “Amstel Gold Race. Garagardoa eta bizikleta”