Kategoria Artxiboak:Lehiaketak

Tropela.net-en sari banaketa ekitaldia bihar, ostirala, Zarautzen

Txirrindularitza denboraldia bukatzen ari den honetan, Tropela Elkarteak sari banaketa ekitaldia egingo du bihar, hilak 7, Zarauzko Merkatu Plazan, Torre Luzearen aurrean, 18:30ean. Martxoan abiatu zen Tropelaren denboraldia Paris-Niza lasterketarekin batera. Handik hona, Euskal Herriko Itzulia, Ardenetako Hirukotea, Italiako Giroa, Dauphine Libere, Frantziako Tourra, Donostiako Klasikoa, Espainiako Vuelta eta Munduko Txapelketan beren kinielak egin ahal izan dituzte Tropela.net-eko zaleek. Ziklismoaz gozatu ahal izan dute, euskaraz. Parte hartzaileei dagokienez, marka guztiak hautsi ditu Tropelak. Frantziako Tourrean izan dira kiniela gehien: 12.739. iPad 2a, iPod Touchak, mendi bizikletak, otarreak, kirol arropa, otorduak… Hamaika sari banatuko ditu Tropelak finen ibilitakoen artean.

Ostiralean Zarautzen, saritu guztiez gain, zenbait txirrindulari profesional izango dira, tartean, Koldo Fernandez de Larrea. Sari banaketa ekitaldiaren ostean,mokadutxoa jan ahal izango dute bertara joaten diren guztiek.

Oharra: sari banaketa ekitaldira joateko gonbidapena behar da. Norbaitek gonbidapena nahiko balu [email protected] helbidean eska dezake.

#52 Tropela.net podcastak: Kopenhageko Munduko Txapelketa 2011

Eneko Garate (@egarate), Axier Sukia eta Egoitz Lizasorek (@elizaso) Kopenhagen aste honetan jokatuko diren 2011ko Munduko Txapelketaren inguruan aritu dira. Ondorengo gai hauek jorratzen dituzte:

– Erlojuaren kontrako saioko faborito nagusiak.

– Errepideko lasterketako faborito nagusiak. Zeini datorkio egokiago ibilbidea? Herrialde ezberdinetako taldeek zein jarrera izango dute?

– Lehen euskaldunaren puntuak nola banatuko diren aipatzen dute.

– Kiniela egiterako orduan zenbait iradokizun.

Aurreko podcastak hemen dituzu.

København ’11: hamar izen, ortzadar bakarra.

Urteko zitarik handienetakoa hemen da jada. Astebete baino ez da falta datorren urtean zehar ortzadar maillota soinean zeinek eramango duen jakiteko. Honezkero gehientsuenok jakingo duzuen bezala, Kopenhage-ko ibilbideak gogortasunerako tarte gutxi eskaintzen du, Munduko Txapelketa Danimarka-ko hiriburuan jokatzearen ondorio. Hala ere, zailtasun txiki horietako bat helmugan egoteak batzuen eta besteen aukerak baldintzatuko ditu. Horrela bada, faborito argirik gabeko lehia aurkezten zaigu hasiera batean.

Igandean txirrindulari asko izango da dominiaren bat eskuratzeko moduan azalduko dena, edo bere burua horretarako gai ikusiko duena behintzat. Kinielei begira badaude aurreneko postuan egotea hein handi batean ziurtatu baina garaipenerako itxaropen gutxi daukatenak. Kasu honetan, guk podiumeko goreneko postua zapaltzeko faboritoak zeintzuk diren aukeratu eta jarraian izendatu ditugu, euren izena ortzadar kolorez janzteko hautagai nagusiak, alegia:

1. Thor Hushovd (Norvegia): egungo txapelduna, ezaugarri horregatik baino urteek aurrera egin ahala erakusten ari den dohain guztiengatik dugu aurreneko postuan batez ere: bere erresistentziak bete-beteko sprinterren abiadurari aurre egitea ahalbidetzen dio ibilbide luze eta zailetan. Kasu honetan, luzeraz gain helmugako malda txikia alde izango du. Lasterketa gogor baten ostean egon litekeen sprintean da batez ere faborito. Continue reading “København ’11: hamar izen, ortzadar bakarra.”

Euskaldunen puntu banaketa Munduko Txapelketan

Datorren astean zehar jokatuko dira aurtengo Munduko Txapelketako lasterketa ezberdinak. Hitzordua Kopenhagenen da aurten. Tropelako lehiaketan iaz bezala elite mailako erlojuaren kontrako saioa eta errepidekoa jokatuko dira. Lehena asteazkenean jokatuko da eguerdiko 12:30etatik aurrera eta bigarrena, errepidekoa, igandean goizeko 10:00etatik aurrera.

Ohi bezala bai erlojuren kontrako saioan bai errepidekoan, lehen 25 txirrindulariei banatuko zaizkie puntuak gure arauetan agertzen dugun moduan. Lehen euskaldunari dagokionez, ordea, erlojuaren kontrako saioan ez dira 50 puntuak banatuko euskaldun bakarra arituko baita, Jonathan Castroviejo.

Errepideko lasterketan bai, igandean lehen sailkatzen den euskaldunari 50 puntu emango dizkiogu. Gogoratu bi izango ditugula lehian, Imanol Erviti eta Juanma Garate.

Zorte on guztioi eta gozatu Kopenhageneko Munduko Txapelketaz!!

Badirudi ez zirela hain txarrak

Gaurko honetan utziko didazue pixka bat luzatzen eta aldez aurretik horregatik barkamena eskatzen dizuet. Baina uste dut jorratuko dudan gaiak merezi duela eta gainera zenbait gogoeta sakon egiteko parada dela iadanik errepideko txirrindularitza denboraldia ia-ia amaituta dagoenean. Gogoratu Tropela.net-en urteko azken lehiaketa datorren asteburuan jokatuko dela: Errepideko Txirrindularitzako Munduko Txapelketa, horren inguruan ere berri emango dugu, nola ez, leku honetan.

Geox taldearen inguruan gogoeta batzuk bultzatu nahi ditut. Vuelta amaitu da eta askorentzat sorpresa izan da sailkapen nagusiko irabazlea. Tropelako kinieletan faboritoen artean zeuden Wiggins, Nibali edo Igor Anton bera. Hirurek ezin izan diote aurtengo edizioaren garaileari aurre egin: Juanjo Cobo, Geox taldeko kantabriarra (Tropelako kinieletan soilik % 12,5ak aukeratu zuen txirrindulari hau).

Continue reading “Badirudi ez zirela hain txarrak”