Etiketa Artxiboak:Samuel Sánchez

Euskaltel-Euskadik 2011ko Giroan parte hartuko du

Hiru urte eta gero, Euskaltel-Euskadi Italiako Giroan izango da. UCI Pro Tourrean onartua izanarekin batera, hauxe da talde laranjaren inguruan azken asteetako albiste nagusia. Igor González de Galdeanoren esanetan, gaur egungo taldeak ez dauka zerikusirik 2007an azken Giro hartan parte hartu zuenarekin. Taldea askoz helduago ikusten du, bere aukeretaz konfiantza gehiagorekin, Giroan zeresana emateko moduan, azken finean.

Eta albiste honen barrIgor Anton Vueltako podiumeanuan beste albistea, titular handiagoa akaso,  Igor Antonek Giroan parte hartuko duela da. 2005ean, bere debut urtean, joan zen Igor Girora lehenengoz, eta azkenekoz. Urte hartan Giroa ez zegoen bere planetan, baina Alberto López de Munainek lepauztaia hautsi zuen lasterketa baino egun batzuk lehenago, eta arabarraren lekua Antonek bete zuen. Eta nola bete gainera. Lehen astean etapa amaieran zegoen malda labur baina tente baten Paolo Bettini, Damiano Cunego eta Davide Rebellin bezalako txirrindularie gangortu egin zitzaien, eraso kolpe bikain bat jota. Gero atzetik atrapatu egin zuten, baina han gelditu zen txirrindulari txiki eta ezezagun baten agerraldi hura. Gero, normala den moduan, lasterketa luzea eta gogorra egin zitzaion, baina azken astean, etapa erregina ahaztezin hartan, Finestre beldurgarrian lehen 10 kilometroak taldeko buruan egin zituen, Savoldelli, Simoni, Di Luca, Rujano, etabarrekin. Azkenean sailkapena 83º postuan bukatu zuen, eta leher eginda. Taldetik bigarren astean lasterketa uztea proposatu zioten, hain gaztea izanik luzea egingo zitzaiola argudiatuz, baina galdakoztarrak burugogor amaiera arte jarraitu zuen.

Datorren urtean, ordea, beste helburu batekin joango da Girora Igor. Azken Vueltan erakutsi du zenbat hasi den, tropeleko igotzailerik onenetariko bat izatera iristeraino gaur egun. Eta Giroan faboritoa izango da, ezinbestean. Gainera datorren urteko Giroa, antolatzaileen estiloari jarraiki, oso gogorra izango da. Akaso aurtengoa baino gogorragoa. Bada zerbait. Guzti hori gutxi balitz, Mikel Nieve galdakoztarrarekin izango da Torinoko irteeran. Ikusteke dago zein txirrindularirekin osatuko duen taldea Galdeanok, baina bi izen horiekin nire ilusioa piztuta dago dagoeneko. Koldo Fernández eta Urtasun ziurrenik Giroan izango dira. Nire ustez Daniel Sesma edo Miguel Mínguez, Cazaux, Alan Pérez eta Aramendiak irteeran izateko aukera asko dituzte. Oroz nora joango den ikusteke dago, joko asko ematen baitio taldeari parte hartzen duen lasterketa guztietan. Izan ere, Samuel Tourrera joanda, honekin batera Amets, Egoi Martínez, Ruben Pérez eta Gorka Verdugo ziur joango dira Frantziar errepideetara. Romain Sicardi ere ordua iritsi zaiola deritzot. Girora itzulita, Igor Antonen aurkari nagusiei gainbegirada bat emanda, Ivan Basso aipatzea ezinbestekoa da. Azken Giroko irabazlea Liquigas talde indartsu bat atzetik duela joango da. Sylvester Szmyd, Robert Kiserlovski, Valerio Agnoli… talde gizon onak dira duda gabe. Dena den, Nibali ziurrenik ez da joango, aurtengo Vuelta irabazita ziurrenik Tourrean konzentratuko baita, bere txirrindulari karreran beste pausu bat emateko. Dena den, Scarponi, Evans, Vinokourov edo Cunego bezalako txirrindulariak ere irteeran izango dira, ondo bidean.

Euskaltel-Euskadiren datorren urteko denboraldiari gainbegiratu orokor bat emanda, ilusioa izateko arrazoiak badauzkagu. Laburpen azkar bat eginda: Giroan Igor Anton eta Mikel Nieve. Tourrean Samuel Sánchez, Romain Sicard eta Amets Txurruka. Vueltan Igor Antón, Mikel Nieve eta Amets Txurruka. Aurtengo denboraldi aparta hobetuko al du Euskaltel-Euskadik? Igor Antonek Giroan podiuma zapalduko al du? Hala bada, irabazteko moduan ikusten al duzue? Galdera guzti hauen erantzuna, datorren urteko Maiatzean.

2010ari errepasoa (II): Contador jaun eta jabe Paris-Nicen

Contador, Paris-Nice irabazi zuen eguneanParis-Nice espainiarren jabego pribatua bilakatzen hasi da. 2007an Contadorrek eta 2009an Luis León Sánchezek irabazi ostean, aurtengo ekitaldian berriro Contador gailendu zen, podiumean beste bi espainiar zituelarik alde banatan: Alejandro Valverde eta Luis León Sánchez bera.

Urtero bezala denboraldiko etapetako lehen itzuli handia izango zen hartan, ibilbide klasiko xamarra diseinatu zuten antolatzaileek. Beharbada, Mont Faron faltan botako zuen bakarren batek, baina Col de Mende ere han zegoen, lasterketa hankaz gora jarri nahi zuenari deiadarka. Lehenengo etapa ohiko prologoa izan zen, eta han Lars Boom erraldoia izan zen azkarrena, Jens Voigt beteranoaren aurretik. Hurrengo bi etapak esprintean erabaki ziren. Lehenengoan, Greg Hendersonek altxatu zituen eskuak, SKYri beregan jarritako konfidantza itzuliz. Beste esprintean William Bonnet frantziarra nagusitu zen, Peter Saganen aurretik. Elastiko horiak oraindik Boomen bizkarrean jarraitzen zuen…

Hirugarren etapan gauzak serio jartzen hasi ziren. Aurillac-en bukatu zen hartan, igotzaileek eta txirrindulari esplosiboek esprinterrei erreleboa hartu zieten. Etapa 2º mailako mendatean bukatzen zen, eta Peter Sagan harrigarriak, itzulia hasi arte ezezaguna izanagatik, protagonismo handia hartu zuen, garaipena lortuta. Protagonismo handia, bai, baina ez guztia. Eguneko beste albistea, Jens Voigt beteranoak maillot horia jantzi zuela izan zen. 39 urte betetzeko bidean, eta oraindik ere maila harrigarrian! Laugarren etapan Alberto Contador agertu zen. Etapa Col de Menden amaituta, denak berari begira zeuden, eta ez zuen hutsik egin: etapa eta lidergoa. Bostgarren etapak Aix-en-Provencera bideratu zuen tropela. Ibilbide gorabeheratsu hartan, tropela majo bakandu zen, eta talde ez oso handi bateko esprinta Peter Saganek irabazi zuen. Bigarren etapa beretzat, eta denak ahozabalik, hain ondo zebillen 20 urteko gazte eslobakiarra nor ote zen galdezka. Izan ere, irabazitako 2 etapez gain, beste guztietan ere punta-puntan ibilia baitzen (2º, 5º…). Contador, lasai. Gutxik uste zuten dagoeneko itzuliak ihes egingo zionik Pintokoari.

Azken bi etapak tranpaz josiak zeuden. Seigarrenean, Col de Vence helmugatik oso gertu zegoen, eta Xavi Tondo kataluniarrak probestu zuen tropelean elkarrenganako zegoen errespetua. Bakarrik iritsi zen helmugara, garaipen handi bat lortuta.

Itzulia bukatzeko, etaparik gogorrena, Col de la Porte, La Turbie eta Col d’Eze igoten baitziren, hirurak lehen mailakoak. Frantziarrek gerra gogoa zeukaten, aste guztian Bonnetek lortutako altxorra baino ez baitzuten bereganatu, atzerritarren nagusitasunaren aurrean ezinean. Gauzak horrela, tropeleko bi gudarik aurrea hartu zuten eta beraien artean disputatu zuten etapa. Amaël Moinardek Cofidisi garaipen eder bat eman zion, Thomas Voecklerri bien arteko esprinta irabazita.

Laburbilduz, Contador garaile, Col de Menden lortutako segunduei ezker. Podiumean berarekin, Valverde (beti ala beti aurrean edozein lasterketatan) eta Paris-Nice hain gustuko duen Luis León Sánchez. Baina nire ustez, inolako duda gabe, itzuliko izen berezia Peter Sagan izan zen. Aurrerago erakutsi zuen Paris-Nicen emandako kalitate distirak ez zirela kasualitatea izan, Romandian etapa bat eta Kalifornian beste 2 irabazita. Eta hori dena 20 urterekin. Non dago mutiko honen sabaia?

Denboraldiko asterik biribilena itxi du Euskaltel-Euskadik

samuAbuztuaren hasiera ezin hobea izan da talde laranjarentzat, benetan. Denboraldi honetan izan du taldeak une pozgarririk, hala nola Beñat Intxaustiren hirugarren postuarekin Euskal Herriko Itzulian, Gorka Izagirreren garaipenarekin Luxenburgoko Itzulian, Samuel Sanchezek eginiko Tour onarekin… Baina Burgosko Itzulia benetan bikaina izan da.

Koldo Fernandez de Larreak irabazi zuen lehen etapa; Samuel Sanchez nagusitu zen bigarrenean eta asturiarrak azken etapa eta sailkapen nagusia etxeratu ditu. Lagunas de Neilako gainean bukatu da azken etapa eta itzulia erabaki. Euskaltelek oso erritmo gogorra jarri du Caruso liderra itotzeko, eta baita lortu ere. Igor Antonek aurrera egin du aurrena, eta min handia egin du, taldea asko murriztu delako. Azken kilometroko pankartapetik, hiru ziklista pasatu dira elkarrekin: Samuel Sanchez, Ezequiel Mosquera eta Vincenzo Nibali. Italiarra baina, atzean geratu egin da azken aldapatzarran, eta azkenean Samu eta Mosquera lehiatu dira etapa eta itzulia irabazteko –berdinduta zeuden biak sailkapen nagusian-. Asturiarra azkarragoa izan da eta besoak altxatu ditu helmugan. Mosquera bigarren iritsi da eta Nibali, hirugarren. Samuel ez da Espainiko Itzulian egongo, baina hasiera batean behintzat, Mosquerak eta Nibalik parte hartuko dute. Itzulia hasteko hiru asteren faltan, sasoian daudela erakutsi dute espainiarrak eta italiarrak. Burgosen etapak eta sailkapen nagusia bakarrik ez; Samuel Sanchez datozen bi denboraldietarako lotu du Euskaltel Euskadik. Esandakoa, denboraldiko aste onena.

Aurtengo Tourraren balantzea: Fair Play-az kokoteraino!

Tourreko podiuma 2010Tourraren ajea oraindik pasa gabe dutela, bero-beroan aritu zaizkigu gure solaskideak. Gaurkoan, saio berezia izaki, Iosu Garate (@iosugarate) elkartu zaie Egoitz Lizaso (@elizaso) eta Oihan Odriozolari (@oodriozola). Hiruren artean errepaso bikaina eman diote hiru aste hauetan gertatuko ekintza aipagarrienei eta ahotan izan duten Tour osoan zehar entzun dugun Fair Play edo kiroltasuna. Idatzi gabeko arau horietaz kokoteraino daudela ere komentatu dute eta Tour honetako bi indartsuenen (Contador eta A.Schleck) laguntasuna ez dela oso naturala izan iruditu zaie.

Saioa luze joan da eta bertan, Tour honetan loreak merezi dituztenak zein izan diren (Cavendish, Petacchi, Cancellara, Purito, Hesjedal) eta huts egin dutenak zein izan diren (Armstrong, Basso, Wiggins, Evans, Freire eta euskaldunak oro har) banan-banan aztertu dituzte. Tropelako multzoak ere jorratzeko astia hartu dute eta azkenean umore puntu batez amaiera biribila eman diote saioari. Ea zeuen gustukoa den.

Podcasta entzuteko sakatu hurrengo botoitxoan.

[audio:http://bloga.tropela.eus/wp-content/uploads/2010/07/tropelanet_tourra2010_berezia.mp3|titles=Berezia]

MP3a deskargatu

Aurreko podcastak (Bertan aurkituko dituzu aurreko etapetako podcastak ere):
– Tourreko 20. etapa

Argazkia: ciclismo2005.blogspot.com

Datorren urtean…

mentxovBukatu da Tourra, eta azken egunean, txirrindulariek Parisen birak ematen dituzten bitartean –Mark Cavendishek irabazi du azken etapa; bejondeiola!-, eta helmugaratutakoan ere, zaleok tertuliatan murgiltzen dira. Nahi gabe burua datorren urteko Tourrean jartzen dugu jada. “Datorren urtean ikusiko dugu zer gertatuko den. Schleck urtebete helduago izango da 2011n”, aditu diot zale bati gaur arratsaldean.

Ika-mika ez da falta izan. Dela lehen asteko geldialdia, dela Andy Schlecken matxura mekanikoa Balesen gora, Samuel Sanchezen erorikoaren aurrean Carlos Sastrek erakutsitako jarrera… Eta azkenean, Alberto Contador garaile hirugarrenez. Gaur bertan egunkari batean bost Tour irabazteko bidean dela irakurri dut. Egia da, hori baititu jada poltsikoan, baina aurten argi geratu da ez duela Lance Armstrongen nagusitasuna, nahiz eta txirrindulari puska denik ezin ukatu.
Ia ez da alderik izan espainiarra eta Andy Schlecken artean. Luxenburgoko txirrindulariak penatuta behar du egon. Egia da gaztea dela eta datozen urteetan gauzak ondo, gora egingo duela, baina nekez egingo ditu gauzak aurten baino hobeto; mendian gora ez du inor gainetik izan, eta erlojuz kontra ere ohi baino hobeto aritu da. Minutu erdiagatik joan zaio Tourra Schlecki.

Denis Mentxovek ere pozik bukatu du. Errusiarrak podiuma zapaldu du eta hori ez da gutxi. Hori bai, 32 urte ditu eta beraz, zail izango du gaur zapaldutako koskatik gora egitea. Goia jo duela ematen du. Txirrindulari oso ona da, baina Contador eta Schleck gainetik ditu. Mentxov horren jakitun da eta horixe onartu zuen denboraldi hasieran egin zioten elkarrizketa batean. Mugak muga, haren garaipen zerrenda txapela kentzeko modukoa da. Mentxoven pare jarriko nuke Cadel Evans. Ziklista puska da, baina Tourra…

Euskaltel Euskadiko Samuel Sanchezi kendu dio Mentxovek podiumera igotzeko aukera. Egiari zor, ez nuen pentsatzen asturiarra horren aurrean ibiliko zenik.

Eta gainerakoei buruz zer? Bada Armstrongi agur esan behar diogu. Ez du Tourrean berriz ere parte hartuko. Ikusi beharko bere taldeak, RadioShackek, nola ekingo dion datorren denboraldiari; lider bat fitxatuta, hala gaur egun taldean duten txirrindulariren baten bizkar taldeburu izateko ardura (Brajkovitx?) jarrita. Lepheimer, Kloden eta Horner onenak emanda daude.

Datorren urtean, beraz, berriz ere Contador eta Schleck nor baino nor? Gauzak ondo badoaz, hala izango da, baina nik behintzat bikote hori estu har dezaketen ziklista batzuen izenak emango ditut. Roman Kreuziger txekiarrak erregulartasuna erakutsi du; iaz bezala bederatzigarrena sailkatu da. Saltoa eman beharko du 2011. Ezin ahaztu Vicenzo Nibali. Italiarra hirugarren sailkatu zen Giroan, Bassoren mesedetan morrontza lana egin eta gero, eta datorren urtean kate motzean lotu beharko dute. Toni Martin alemaniarrak aurten utzitako zalantzak uxatu beharko ditu. Erlojuzkontra Contador eta Schlecken aurretik ibili da, baina mendian pott egin du. Robert Gesinkek beste koskaren bat igotzeko moduan dagoelakoan nago. Igor Anton eta Beñat Intxausti borrokan ikusi nahi nituzke, bestalde.

Esan bezala, analisiak eta burua datorren urtean jartzeko unea da, eta nik horixe bera egin dut. Baina arestian aipatutako guztia hori baino ez da. Iritzi soil bat, alegia. Nork berea izango duzue, ziur.