Etiketa Artxiboak:Leipheimer

Estatu Batuetako hurrengo harribitxia

Badirudi yankeen lurraldean Lance Armstrong baino ez dela existitzen. Levi Leipheimer, Christian Vandevelde, David Zabriskie eta beste hainbat txirrindularik gauza on asko egin dituzte, baina estatubatuarren unibertsoan Lance da Eguzkia, Ilargia, planetak eta asteroide guztiak. Dena eklipsatzen du Texasko txirrindulariak, baina, jakiek bezala, iraungipen data bat dauka. Idazten ari naizen bitartean konturatu naiz aipatu ditudan beste hirurek ere badituztela urte batzuk.

Ez dezagun ahaztu txirrindularitza Estatu Batuetan gorakada handia jasaten ari dela, bai txirrinduzale edo telebisten jarraipenari dagokionean, hala sponsorren inplikazioari dagokionean ere. Labur esanda, eta denboran atzera asko egin gabe  utopia bat zirudienean, Estatu Batuak txirrindularitzaren makuluetako bat bilakatu dira. California edo Georgiako itzuliek maila polita hartu dute, eta Gila bezalako beste batzuk gero eta talde eta txirrindulari hobeagoak dakartzate kontinente zaharretik.

Gauzak honela, nor izango ote da Estatu Batuetan txirrindularitzaren jarraipena bermatzeko merituak egingo dituen txirrindularia? Hornerrek ere ez du luzaro iraungo tropelean. Tom Danielson, antzera. Zer esanik ez George Hincapieren inguruan… Estatubatuar gehienak “kirol zahartzaroan” sartuta daude, eta errelebu generazional bat beharrezkoa izango da laister. Eta errelebu horrek izena eta abizena dauzka. Izena, Taylor, eta abizena, Phinney. Ez da izango Tourreko garaile, baina eskuak asko altxatuko dituela begiak itxita jokatuko nuke.

Taylor Phinney: Dudarik gabe berea da etorkizuna. Oraindik 20 urte bete ez dituenean, pistatik datorren txirrindulari hau zeresan handia ematen ari da Europako errepideetan. Pistan daudenak eta ez daudenak irabazi ditu jada (tartean jarraipen proba absolutua 2009 eta 2010ean), eta errepidean pilatu ditu makina bat garaipen. Azkenengoak, Olympia’s Tour izeneko lasterketa holandar batean. Atera kontuak: 7 etapatik 4 irabazi zituen (2 erlojupekoak eta 2 sprint), beste bi aldiz bigarren postuan amaitu zuen (beste 2 sprint), eta Itzuliko etaparik gogorrena 7. postuan bukatu zuen. Eta itzuli hau Stef Clement, Thomas Dekker edo Joost Posthuma bezalako jendeak irabazi izan du gaztaroan. Hori gutxi balitz, “nagusiekin” ere estreinatu da, aurrez aipatu dugun Gilako Itzulian etapa bat irabazita. Baina hor ez da dena amaitzen. 23 urtez azpiko Paris-Roubaix ere irabazi du aurten. Beraz, Taylor Phinney sprinter-erlojupeko espezialista-klasikomano nahaste interesagarri bat dela esan daiteke.

Gertutik jarraitu beharko dugu bere eboluzioa. “Eta huts egingo balu?” – galdetuko du norbaitek. Hori horrela izanda, Tejay van Garderen eta Peter Stetina aipatuko nituzke. Stetinarengan ez daukat aparteko ilusio edo esperantzarik, baina van Garderen ere urruti iristeko moduan dagoelakoan nago.

Beti gazte

Chris Horner38 urterekin erdietsi du Chris Hornerrek bere kirol ibilbideko garaipenik garrantzitsuena: Euskal Herriko Itzulia. Duela urte batzuk esan ohi zen 32-33 urterekin hasten zela txirrindularien gainbehera. Adin horretan nekez jarrai zezakeela txirrindulari batek, salbuespenak salbuespen, lasterketaren burua. Zenbait txirrindulariren emaitzek baieztapen hori ezeztatu dute azken aldian. Chris Hornerrek orain lortu du egunkari, irrati, telebista eta webgune askotan azaltzea Euskal Herriko errepideetan eginiko balentriagatik. Duela hiru urte, 2007an, Tourrean txukun aritu zen: 15. postuan sailkatu zen Alberto Contadorrek irabazitako lehen Tourrean; 35 urte zituen ordurako.

Hornerren adin bera du bere nagusiak, Lance Armstrongek. Ondo bidean, Hornerrek Armstrongi lagunduko dio Tourrean. Baita Levi Leipheimerrek ere. 36 urte ditu Leipheimerrek. Hure ere, 30 urteak ondo beteak dituela, sasoi betean dagoela erakusten ari da. Duela bi urte Espainiako Vueltan bigarren bukatu zuen… Alberto Contador taldekidearen atzetik, eta espainiarraren mesedetan jardun ostean.

Eta zer esan Stefano Garzelliri edo Jens Voigti buruz? Italiarrak, Leipheimerrek bezala, 36 urte ditu eta duela aste gutxi Tirreno-Adriatico lasterketa irabazi zuen. Eta joan den urtean, Giroan bertan, harrigarri aritu zen; ia-ia onenen pare egon zen eta erlojupeko handia irabaztetik ez zen oso aparte ibili. Voigt alemaniarrak -38 urte-, urteak joan urteak etorri, garaipenen zakua betetzen jarraitzen du.30 urteren bueltan dabiltzanek badute beren burua non begiratu, zalantzarik gabe. Ez dute erretiroan zertan pentsatu.

Argazkia: www.cyclingnews.com

2010eko taldeen analisia (XVI): RadioShack, Armstrongen taldea

RadioShack

Iazko Tourra oraindik jokoan zela, Armstrongen talde berriaren berri eman zuen prentsa aurrean. Bazekien Contadorren aurrean ezingo zuela Tourra irabazi eta berak hori zuen amets. Gainera gogoan ditugu talde berean zirelako izan ziren liskarrak, komunikabideetan behintzat. Kontuak kontu RadioShack Armstrongen desiratik sortutako taldea dela.

Astana taldea urte hasieran gorabehera ekonomikoak izan ziren. Horrek lagunduta edo, Armstrongek iazko Astana taldeko Tourreko txirrindulari guztiak, Contador izan ezik, berekin joan dira RadioShack taldera. Horien artean Haimar Zubeldia bera. nahiz eta honek ere espainiar komunikabideengandik kritikaren bat edo beste jaso. Ez da euskaldun bakarra usurbildarra talde amerikarrean: Markel Irizar ere gehitu zaie.

Leipheimer, Klöden, Popovych eta Paulinho bezalako txirrindulariekin Armstrongen, Bruyneelen gidaritzapean, 2010eko Tourrerako talderik sendoena osatu nahi zuten. Baina ez da Tourrerako espresuki sortutako taldea bakarrik. Gainontzeko lasterketetan ere ondo aritzea dute helburu eta horretarako Steegmans edo Rosseler txirrindulariak aipatuko nituzke.

Lance Armstrong Rides — ek eskainia

Talde erakargarria eta ikusmina eragin duena da. Zalantzarik gabe Tourrean begi guztiak talde honetan eta batez ere Armstrongi begira izango dira. Nahiz eta iaz baina prestatuago aurkitzen dela adierazi duen, ez dakit Tourra irabazten txirrindularirik edadetuena izateko gauza izango den Texaseko txirrindulari ezaguna.

Cancellara lokomotoraren beste erakustaldi bat

Cancellara. 1. etapan garaipenaAurre ikusi bezala, suitzarrak ez du hutsik egin eta etapa eta maillot horia eskuratu ditu. Tropela.net-eko lehiaketako %69,5a gustura izango da beraien aukeraketak ez baitie hutsik egin.

Lasterketa 16:00etan hasi da Van Hummel herbeheretarrarekin eta ordu horretan bukatu da kiniela egiteko epea. Ordurako asko zuen kinielari azken errepasoa egin eta telebistara joango zineten, izan ere Armstrong 16:17an ateratzen baitzen. Ikusmin ikaragarria estatu batuarrak eragin duena. %23,8ak ondo ibiliko dela espero du eta gaurko etapan zer egiteko gai zen ikusi nahi genuen. 18. txirrindularia zenez lasterketari ekiten, ez zuen zail denborarik onena egitea. Hala izan da nahiz eta guztiz eroso ez dugun ikusi bizikleta gainean. Bagenekien gainontzeko espezialistak denbora hori hobetuko zutela, baina zenbaterainoko ona izan den ez genekien. Momentuz amerikarra lasterketako lehen postuan zen.

33. txirrindularia irteeran Tony Martin genuen. Alemaniarra ondo zegoela bagenekien, izan ere Suitzako Itzulian etapa garaipena eskuratzeaz gain mendiko sailkapena irabazi baitzuen. Baina espero al zenuten hain erlojupeko onik egingo zuenik? Alemaniarrak Armstrongen denbora 7 segundotan hobetzea lortu du. Tropelean %25,6ak aukeratutako txirrindularia eta badirudi lehen egunetik etekina aterako diola Tropeleko laurdenak.

Erlojupekoa aurrera zioan eta espezialistak agertzen hasi dira. Hurrengo Leipheimer zen eta honek ere ez du hutsik egin. Tony Martinen denbora 3 segundotan hobetzeko gauza izan da. Orduan konturatzen hasi gara Armstrongek egindako denbora ona izan zitekeela. Momentu horretan Astanak bi txirrindulari lehen hiru postuetan zituen eta etapako sailkapenak ez du aldaketarik izan Kreuzigerrek bere lana egin arte. Txekiarrak forma onean dela erakutsi du eta 2 segundogatik ez da lehen postuan sartu. Liquigaseko txirrindulariaren denborak Armstrong podiumeko postuetatik at utzi du momentu horretan.

Astanak, ordea, gaur ederki erakutsi du talde ikaragarria duela. Klöden izan da hurrengoa lehen postuak dantzan jarri dituena. Erlojupeko bikaina alemaniarrak egin duena eta bere taldekidearen ordurako markarik onena 8 segundotan hobetu du. Helmugaratu denean Astana taldeak 3 txirrindulari zituen lehen 5 postuetan. Ikaragarria!

Lasterketako lehen postuek, beraz, horrela jarraitu dute azken 6 txirrindulariek denborak jakin ditugun arte. Wiggins britainiarrak, erlojuaren kontrako espezialista britainiarra, bidea bere ezaugarrietarako egokia izan ez arren, Klödenen denbora hobetzea zegoela erakutsi du. 3 segundotan murriztu du bere denbora eta behin behineko lider jarri da ingelesa. Baina oraindik Cancellara, Contador eta Evans falta ziren besteak beste helmugaratzeko eta denborak hobetu dituzte.

Hurrengoa helmugaratzen Cancellara, Suitzako lokomotora geldiezina eta aurtengo Suitzako Itzuliaren irabazlea izan da. Honena bai izan dela erakustaldia! Cancellarak bere aurretik zuen txirrindularia harrapatzeko gauza izan da, eta ez zen edozein txirrindulari, Menchov bera baizik, aurtengo Giroko garailea. Suitzarrak Wigginsen denbora 19 segundotan hobetu du.

Contadorrek gaur Espainiako koloreak zituen maillota estreinatu du eta esan behar ez duela batere gaizki egin. Espainiarrak taldeko liderra zein den erakutsi nahi zuen eta Amstrong, Leipheimer eta Klöden taldekideen denbora hobetu du nahiz eta Cancellararena ezin izan duen hobetu. Pintokoak bigarren postuarekin konformatu behar izan du. Hala ere, erlojupeko bikaina 2007ko Tourreko garaileak gaur egin duena.

Dagoeneko Evans eta Sastre falta ziren helmugaratzeko. Evansek, ohi bezala, denbora polita egin du eta Klödenengandik 1 segundora geratu da etapako 5. denborarik onena eginaz. Sastre, berriz, erlojupekoetan ondo moldatzen ez dela ezagun du eta faboritoen multzotik ia minutu bat galdu du.

Euskaldunei dagokionez, Mikel Astarlozaren lan bikaina aipatu nahiko nuke. Pasaiatarrak 12. postuan amaitu du gaurko etapa eta sailkapeneko faboritoenekiko 26 segundoko atzerapena besterik ez du. Ia gaurko sentsazio on honek horrela jarraitzen duen eta pozen bat ematen digun pasaiatarrak.

Gaurko etapari dagokionez, ondorengo ondorio hauek atera daitezke. Alde batetik, espero bezala, Cancellarak etapa irabazi du eta lider jarri da. Ez dakiguna da ia asteazkeneko taldeko erlojupekoaren ondoren lidergoari eusteko gauza izango den Contador 18 eta Wiggins 19 segundora izanda. Erlojupeko ona egin beharko du Saxo-Bankek asteazkenean maillotari eutsi nahi badio. Beste ondorioetako bat faboritoek gaurkoan ez dutela hutsik egin Menchov eta Kirchen izan ezik. Errusiarrak Contadorrekiko 1’13” atzeratu da eta Kirchenek 1’39”. Badirudi bi txirrindulari hauek ez diotela bide onetik ekin aurtengo Tourrari. Armstrong, berriz, faboritoen artean da Contadorrengandik 22 segundora. Ezustekoren bat emateko gai izango al da Texaseko txirrindulari mediatikoa?

Frantziako Tourra. Multzoen analisia (I): Hautagai nagusiak

Ia denok aurreikusten genuen bezala, azkenean faborito handi bat Tourretik kanpo geratu da. Azkenean CONIk Alejandro Valverde Tourretik kanpo utzi du, etapa bat kilometro batzuetan zehar Italian barneratuta ibiliko baita. Gauzak horrela, hautagai nagusien multzoa sei izenetara murriztu da. Hona hemen izen handi hauen azterketa txiki bat.

armstrongLance Armstrong : Estatubatuarra da edizio honetako izen berezia. Bere itzulerak beste edozein izen propio eklipsatu du, bai Gaztela Leonen, Giroan, eta nola ez, Tourrean. Hiru urte lehiatu gabe, baina maila txukuna erakutsi zuen Giroan, batez ere azken astean, eta ziurrenik geroztik bere prestakuntza afinatzen egongo zen, buru-belarri. Atzo bertan estreinatu zuen aurtengo palmaresa, Nevada City Classic lasterketa estatubatuarrean gailenduz. Ez da egutegiko lasterketa entzutetsuena, jakina, baina esanguratsua da dena den Lancek berriz eskuak jaso dituela jakitea. Gerra emango du, ziur, baina 37 urte ditu, eta horrek bere aurka jokatzen du. Gainera, taldeko giroa ere ez da onena izango, etsai nagusia (Contador) etxean baitu. Ez du zortzigarren Tourrik lortuko, nire aburuz.

contadorAlberto Contador: Munduko igotzaile onenak aurten inoiz baino mendiko etapa deskafeinatuagoak aurkituko ditu errepide frantziarretan, oso etapa gutxi bukatzen baitira goian. Mendate gogorrak helmugatik urruti ordea, etapa askotan aurkitu daitezke. Evansen maila ikusita, badirudi mendian jo egin beharko duela erlojupekoetara aldetxoarekin iristeko. Denboraldi hasiera ederra egin ostean (Algarve eta Euskal Herrian sailkapena eta etapak, eta Paris-Nizan 2 etapa eta podiuma), hanka jaso zuen Tourrari begira. Dauphiné-Libérén erakutsi zuen bide onetik doala bere prestakuntza. Kilometroak egitera zihoala esan zuen, eta beregan arraroa bada ere, erasorik jo gabe igaro zuen aste osoa. Dena den, aldapa gora oso maila ona eman zuen, eta sailkapen nagusian minutu eskas bat baino ez zuen galdu. Faborito nagusia da, ez da alferrik hiru handiak irabazi dituzten eliteko klubeko kidea, baina ikusi beharko da Astanak nola erantzuten duen talde bezala. Diotenez, taldea banatuta omen dago: batzuk Armstrongetzat, eta besteak madrildarrarentzat. Morboa behintzat zerbitzatuta dago.

evansCadel Evans: Australiarra pasa den Dauphiné-Libérén inoiz baino erasokorrago (eta indartsuago) agertu zen. Nire ustez, ez du berriro aurkituko aurtengoa baino ibilbide hoberik bere ezaugarrientzat (nahiz eta taldekako erlojupekoa egiteko bere taldea ez den oso indartsua), eta hori berak badaki. Motibaziorik ez zaio faltako, Tourreko azken 2 edizioak 2º postuan bukatu baititu, eta pixka bat gehiago nahiko du. Alberto Contador mendian kate motzean lotzea lortzen badu, asko izango du irabazita. Etapen perfil aldetik, Tourrak ez dirudi oso zirraragarria izango denik, baina horrek sailkapenean lehia itxiagoa egotea ahalbidetuko du. Gauzak horrela, irabazteko gehien duenetariko bat Cadel Evans da.

leipheimerLevi Leipheimer:Estatubatuarra ez du inork aipatzen, baina Tourrean izango da, eta ez gonbidatu bezala. Armstrong-Contador lehiak (edo konfliktoak) bigarren plano batera bidali du Levi, baina ezin dugu ahaztu Tourreko podiuma ezagutzen duela, eta baita Espainiako Itzulikoa ere. Gainera, Astanan askatasuna izango du, ondo bidean, eta probetxua atera dezake bere bi taldeburu nagusien artean ez baita giro izango. Evansi bezala, ibilbidea oso ondo datorkio, erlojupekoetan maisua baita. Dena den, ikusi genuen moduan, Girora dena ematera joan ostean, lasterketa luzea egin zitzaion. Hori, edo azkenean ez zuen zeukan guztia eman, Uztailera begira. Interesgarriak izan daitezke Montanako txirrindulariaren mugimenduak lasterketan zehar.

menchovDenis Menchov: Errusiar-nafarrak Giroan sekulako erakustaldia eman zuen. Erraz asko irabazi zuen, nahiz eta azken erlojupekoko azken kilometroan, nahi gabe emozio kotak zeruan jarri zituen. Dena den, Tourrean maila handiagoko aurkariak izango ditu, bera baino lasterketa egun gutxiagorekin joango direnak, eta hori erabakigarria izan daiteke. Taldean bertan, Robert Gesink gaztea ez du urruti izango, akaso aurrean ere. Lasterketa frantziarrean beti egin izan du “kale”, sailkapen nagusiari dagokionean, eta aurten beste horrenbeste gerta dakioke. Dena den, Denis etxeko lanak ondo asko eginda iritsi da Tourreko irteera lerrora, eta ez dauka galtzeko ezer. Ikusi egin behar ez ote zaion lasterketa oso luzea egingo, batez ere Mont Ventouxen bukatzen den azken aurreko etapa.

sastreCarlos Sastre: Iazko Tourreko irabazleak aurten taldearekin batera egutegia aldatzea erabaki du. Giroko sailkapena lehiatzera joan zen, baina 4º postu batekin konformatu beharra izan zuen, hori bai, mendiko etapa eder bi irabazi ostean. Orain Tourrean aurretik inoiz ez bezala arituko da, hanketan lehiaketa egun askorekin eta desgaste handia jasan ostean. Hala ere, gaztelarra txirrindulari zaildua eta “diesela” da. Ez du sekulako eraso kolperik joko, baina aurrean egongo da. Hori bai, aurten garaipeneko jokotik at ikusten dut.

Alejandro Valverde: Azkenean, aurretik esan bezala, murtziarra ez da irteeran izango. Beraz, kinielan baduzue, azkar aldatu!

Berrikuntza bezala, Tour honekin batera, Tropelako blogariok aztertutako talde bakoitzean zein txirrindulari hartu ditugun aipatuko dugu. Kasu hontan, nik neuk ez dut asko arriskatu: Evans-Contador. Gainontzeko multzoetan egin beharko da “apustu pertsonal” bat edo beste, sorpresaren bila.