Boom – 3 orrialdea – Tropela.eus bloga

Erorketa ikusgarriak Greipeli garaipena erraztu dio

LiÃ¨ge-Bastogne-LiÃ¨ge klasiko ezaguna izaten den parajeetan ibili da gaur tropela, baina ez da espero zen ikuskizuna izan. Eguraldiak protagonismo handia hartu du eta ikuskizuna bestelakoa izan da. Helmugarako kilometro t’erdira izan den eroriko itzelak eman du. Biribilgune bat igarotzen ari zirela, tropelaren aurre aldean zihoanetako txirrindulari bat erori egin da eta atzetik zituen guztiak lurrera bidali ditu. Aurrekoak, Greipel tartean, ez du zailtasun gehiegirik izan Weylandti esprintean irabazteko.

TVEk gaurko etapatik espero zuena ez du jaso. Guk ere ez, noski. Hauen ustetan gaurko etapan ikuskizuna bermatua zegoen eta horren erakusgarri eguerdiko 13:30etatik Teledeporteko seinaletik etaparen jarraipena egiten hasi dira. Zorionez lana nuen eta ez naiz jarri arratsaldeko 16:30ak arte lasterketa ikusten, eta eskerrak! Klasikorik onenen pareko etapa espero zen, baina esprintean amaitu den horietako bat izan da, atzokoaren antzekoa euriagatik izan ez balitz.

Boom eta Roels (gaur ere bai), Ramirez Abeja eta Lagutinek osatu dute gaurko ihesaldia. Boomek helburu garbia zuen, hiru mendateetatik lehen postuan igaro eta mendiko maillota eskuratzea eta bere helburua lortu du. Tropelak, une oro, lasterketa kontrolpean. Hori bai, euria ari zuen eta arriskua aurre ikusten zen.

LiÃ¨geko helmugatik lehen aldiz bezain laster ihesaldian ziren kide guztiak harrapatu dituzte eta esprintean pentsatzen hasiak ziren txirrindulariak. Hala ere Kirchen edo Gasparotto bezalako txirrindulariak saiatu dira lasterketa puskatzen, baina ez dute posible izan.

Esan bezala gaurko etapa erabaki duen unea helmugatik kilometro t’erdira izan den erorikoak markatu du. Ikaragarria izan da erorikoa eta 50 txirrindulari inguru lurrean ziren beren zauriei begira. Aurre aldean, Columbia-HTCko eta Quick Stepeko hiruna txirrindularik helmugara bidea hartu dute, eta erraztasun handiz, Greipelek garaipena lortu du. Atzetik Weylandt eta Grabsch taldekidea izan ditu. Honenbestez, eta nahiz eta Cavendish ez den Vuelta lehiatzen ari, bigarren garaipena lortu du Columbia-HTCek eta biak esprintean.

3 kilometro barruan izan da eroriko ikusgarria eta horregatik Cancellarak lidergoari eusten jarraitzen du. Hala ere ezin esan zorteko dabilenik, erorikoan min hartu duela ikusi baitugu. Biharkoa atseden eguna dela kontutan izanda, zauritutako txirrindulariek beren egoera aztertuko dute eta etzi Tarragonako irteeran izaten saiatuko dira, baina ez harritu norbait erretiratzen bada min hartuta. Hori da adibidez Horner-en kasua. Dagoeneko taldeak jakitera eman du Horner-ek Vuelta utziko duela erorikoan eskumuturra autsi baitu.

Gaurko esprintean beste esprinter bat garaile: Henderson

Henderson. Vueltako 3. etapan garaipena

Ez da izan Cavendish. Ohituak gaude Columbia-HTCko esprinterren batek irabazten duenean Cavendish dela pentsatzen, argazkia jarri izan ditugun askoren antzekoa baita, baina ingelesa ez da Vueltan. Hori bai, Columbia-HTCk gaurkoan argi utzi du esprinter on bat baino gehiago dituela taldean.

Espero bezala gaurko etapako irabazlea ere esprintean erabaki da. Askok Boonen, Farrar, Ciolek edo Bennatiren urrezko maillotaren goseak garaipena hauen artean izango zela pentsatu dugu, baina ezustekoa emanda, Hendersonek eskuratu du garaipena.

Etapa hasieran hirukote batek osatu du gaurko ihesaldia: Rosendo, Hoogerland eta Boomek. Bi holandar eta espainiarrek kilometro askotan ihes eginda izan dira, baina gaur ere tropela ez zegoen ihesaldirik onartzeko. 30 km-ren faltan begi bistan izan du tropelak hirukotea eta horretaz ohartuta, Boomek amore ematea erabaki du. Rosendok, berriz, ez zuen amore emateko asmorik eta hasieran Hoogerland berarekin zuela eta beranduago bakarrik, 15 km inguru egin ditu tropelaren aurretik. Ahalegindu da Anducia CajaSur-eko txirrindularia, baina alferrik zen.

Gaurkoan ere abiadura handia hartu du tropelak, baina atzokoan ez bezala, txirrindulariek zuhurtzia gehiagoz hartu dutelako edo, ez da erorikorik izan. Azken metroetan bazirudien Vacansoleil taldeak Bozic-i garaipena eskura jarri diola, baina ez da gauza izan abiadura mantentzeko eta Hendersonek aurre hartuaz etapa garaipena eskuratu du. Gaurkoan Freire hobeto ibili da eta hirugarren sailkatu da.

Garbi dago esprintetan ez dagoela faborito garbirik (Cavendish falta delako behar bada?). Zalantzarik gabe, egoera honek mesede gehien Cancellarari berari egiten dio, helmugan diren gain-sariak txirrindulari ezberdinen artean banatzen ari baitira eta horrela ez dira gauza lidergoa kentzeko. Horrenbestez, hirugarren egunez jarraian Cancellarak lasterketako lider jarraitzen du pronostiko askoren kontra.

Biharko etapan lasterketa Holandatik Belgikara pasako da. Bi herrialde hauetan zehar egin behar duten ibilbidean 4. mailako hiru mendate igaro beharko dituzte. Horrek etapa ehiztariei txanda etor dakiekeela pentsa arazten digu. Hala eta guztiz ere, ikusi beharko da esprinterren taldeek zein jarrera hartzen duten.

Veni, vidi, vici

Lars Anthonious Johannes Boom Maiatzaren aurrenekoa egun seinalatua izaten da langileen artean. Euren eskubideak aldarrikatze aldera, kalera atera ohi dira asko eta asko. Txirrindulariak ordea errepide gainera pedalei eragitera irteten dira. Urteroko legez, aurtengoan ere aipatu egunean Frankfurt-eko Sari Nagusia ospatu zen, lasterketa amaiera polit baten ostean Fabian Wegmann etxeko gizonak eskuratu zuena. Proba amaitu gabe aldiz txirrindulari asko eta asko geratu ziren, eta horien artean egun huraxe bera berezia izatea eragin zuen gizona: Lars Boom. Herbeheretarrak alemaniar lasterketa aukeratu baitzuen errepidera behin betiko jauzia emateko aurreneko proba gisa.

Ikusmina sortu zuen Rabobank-eko gaztearen debutak. Ez da gutxiagorako, 24 urte bete ez dituela izandako lorpenei erreparatuz gero. Iparraldeko Kanpainaren hasieran bera ikusteko itxaropenik egon bazitekeen ere, Hoogerheide-ko munduko txapelketan porrot egin ostean ziklo-kros proba gutxi batzuk lehiatu eta atsedenaldi luze bat hartzea erabaki zuen. Esan bezala, Frankfurt-en ez zuen helmuga gainditu, bai ordea lehiatu zituen hurrengo bi probetan, Herbehereetan biak ala biak: Batavus Prorace eta Dutch Food Valley Classic (Veenendal-Veenendal zaharra). Bietan Kenny Van Hummel gailendu zen esprintean, eta gure protagonistari kilometroak pilatzeko balioko zitzaizkion seguru asko.

Halaxe aurkeztu zen Belgikako Itzuliko irteeran. Denboraldiko bere aurreneko helburutzat hartu zuen, eta hala, esprintean erabaki ziren aurreneko hiru etapetan, ezkutuan ibili beharrean, noizbehinkako agerpenak egin eta esprintetan gain sariren bat edo beste pilatzeari ekin zion. Lasterketa ordea azkeneko bi saioetan zen erabakitzekoa. Ardenetan etapa gorabeheratsua lehena, eta 16 km. pasatxoko erlojuaren aurkako saio laua hurrena.

Etapa ikusgarria suertatu zen itzuliko laugarrena. Aurreneko erdian, ibilbideak aurkezten zituen muinoak zirela medio, lasterketa apurturik geratu zen. Ordurako, Borut Bozic liderra atzean geratua zen, eta lehia 40 bat txirrindularira mugatu zen. Ezagun zaharrak zituen inguruan Boom-ek: bertan ziren Sven Nys txapeldun handia, Niels Albert Hoogerheide-ko heroia, ta baita Klaas Vantornout ere (Walsleben eta Kloucek gazteez gain). Sunweb-eko flandestarrak La Redoute-n gora, helmugara oraindik ia 60 km. falta zirela, egin zuen bere azkeneko agerraldia. Hortik aurrera ehunka mugimendu izan zen. Walloniako inguruetatik ibili arren, flandestar erara korritu zen etapa, eta esan beharrik ez da, hori ikuskizunarentzako mesedetan izan zen.

Etapako kilometro erabakigarriak iritsiak zirela, Rabobank egoera on xamarrean zen, Boom-ek Nuyens, Clement eta Moerenhout lasterketan sarturik baitzeuzkan. Hala ere, Van Avermaet, Roelandts, Dekker (hirurak Silence-Lotto-koak) edo Ivanov bezalako gizonak oraindik aurrean ziren. Lehenago aipaturiko mugimendu horietako baten ondorio zen aurreneko ihesaldi bati ez zion Lars Boom-ek heldu, eta bazirudien hortik irten zitekeela lasterketako garailea. Bertan ziren Van Avermaet, Marcato, De Waele, Cornu, Albert (ikaragarria errepide gainean erakutsitako maila) eta Moerenhout. Rabobank-ek ordea erabakia egina zuen, eta atzetik Clement-ekin lehenengo erritmoa jarri eta ondoren Nuyens-ek astindu ederra eman zion jazarpenean ziren gizonen taldeari. Harik eta Vlijmen-eko luzeak benetako erasoa jotzea erabaki zuen arte. Ivanov eta Roelandts atzean geratu ziren (beste asko ordurako jokoz kanpo ziren), eta Bakelants eta Dekker izan ziren bakarrik jarraitzeko gai. Ordurako Bakelants eta Boom bera izan ziren saiatuenetakoak. Flandestarraren inguruan hitz egin izan genuen iaz Etorkizunekoen Tourraren harira, eta aurrerantzean izan ziur zeresanik emango duenaz. Alabaina, halako batean, helmugarako 10 km. baino gutxiago faltan zirela, Boom-i jarraitzeko indarrik gabe geratu zen. Ordekan. Dekker-ek jarraitu zion, eta Moerenhout -en laguntzari esker Boom-ek azkeneko kolpea jo eta aurrekoak harrapatzera heldu ziren. Sartzen ari zirela Albert-ek eraso gogorra jo zuen, baina behin betikoa Marcato eta De Waele bakandu zituena izan zen. Flandestarrak, Pro Tourrarengandik urrun ere gauza politak egin daitezkeela baieztatzen duten kastakoa bera, garaipen handia lortu zuen txirrindularitza egun zoragarrian. Liderraren garaikur den maillot beltza ordea esan beharrik ez da zeinek jantzi zuen. Eta egun hartan erakutsikoaren ostean, inork gutxik jartzen zuen zalantzan itzuliko sailkapena bereganatuko zuenik.

Eta halaxe izan zen. Dekker eta Cornu bezalako espezialista onak sailkapenean oso gertu bazituen ere, halako distantzian benetako animalia den Sebastian Rosseler izan zen bakarrik Iparraldeko Brabante-ko izarraren gainetik sailkatzeko gai. Bigarren postua erlojupekoan eta sailkapen nagusia berarentzat, errepidean handienen artean hilabete ere bete ez zuela.

Badira Herbeheretako harrobiak goi mailan fruiturik ematen ez dituela diotenak, baita gazteegi nabarmentzeak ezertarako balio ez duela gerora hori baieztatzen ez bada. Halako erakustaldiak, ordea, hortarako jaioak direnek bakarrik eman ditzakete. Ikusgarria baita ordekan, erlojuaren aurkakoan eta muino etzanetan barnean daraman indarra transmititzen ikustea. Hori frogatzeko hurrengo aukera Suitzan izango dugu seguru asko. Hemen da, eta luzerako geratzeko asmoz. Bera da, Lars Anthonious Johannes Boom.

Iparraldeko ortzadarraren bila

Errepide gaineko denboraldiaren hasiera lau haizetara zabaldu den honetan (Lance Armstrong-en itzulerak eraginda berez lasterketek duten garrantziak baino), ziko-krossarena bere amaierara ari da iristen, isilean, ohi bezala. Espezialitatearen puntu gorena heltzeke da oraindik ordea, asteburu honetan jokatuko baitira Herbeeretako Hoogerheide-n Munduko Txapelketak. Urteroko legez, proba nagusia gizonezkoen elite mailakoa izango da.

Lars Boom txapeldun Trevison (2008) Iaz Trevison txapeldun izan ostean, Lars Boom titulua berresten ahaleginduko da. Etxean finkatu ditu 2009rako helburuak herbeherearrak: bere Iparraldeko Brabanten bertan ospatuko den munduko txapelketa, eta goraxeago hasiko den Espainiako Itzuliaren atarikoa. Errepidera eman lezakeen behin betiko urratsak ordea iganderako grina piztuko dio seguru asko.

Hasiera batean biren arteko lehia behar luke igandeko lasterketak. Esan beharrik ez da, Boom-en arerio nagusia Sven Nys handia izango dela. Flandestarrrak ez dauka urteko zitarik garrantzitsuenarekin erlazio onegirik (behin baino ez da izan txapeldun), baina parte hartzen duen lasterketa orotan da faborito.

Continue reading “Iparraldeko ortzadarraren bila”

Ziklokros denboraldia

Igandean ziklokross-ean momentuan diren munduko espezialista handi ia guztiak izango ditugu Euskal Herrian, Igorreko Munduko Kopako proban. Niels Albert gaztearen baja ezagunari seguru asko Lars Boom-ena gehitu beharko zaio, munduko txapelduna Kanarietan egotekoa baita asteburu honetan, 2009a hobeto prestatzeko asmoz.

Pena handia da horren lehia estuan ibili diren egungo hiru txirrindulari handienak elkarren aurka ikusterik ez izatea, are gehiago herbeherearrak agian lokatz gainean egingo duen azkeneko denboraldia hau izango dela jakinda. Iazko garaile eta oraindik orain espezialitatearen erregetzat har daitekeen Sven Nys behintzat hantxe izango da. Zeresanik gabe bera izango da faborito.

Fideako txirrindulariak Koksijdeko Munduko Kopako lasterketan

Flandestarraren areriorik handiena Fidea taldeak behar luke, bere osotasunean. Iragan larunbatean Koksijde-ko hondartza inguruetan jokatutako Munduko Kopako laugarren saioan halaxe izan zen, eta Wellens, Stybar, Pauwels eta Vervecken-ek egindako talde-lanari azken honek atera zion etekina. Lauretan indartsuena bera izan zela ere esan beharra dago. Nolanahi ere, Fidea-k lidertza norbaitengan jarri beharko balu, behetik gora nabarmen datorren Bart Wellens-engan egin beharko luke.

Maila bat beheraxeago Klaas Vantornout eta Francis Mourey azaltzen dira. Frantziar Estatuko txapeldunak goi mailako lasterketa gutxi lehiatzen ditu bere aurkariekin alderatuz, baina hortzak erakusten dituen horietakoa da. Sunweb taldeko flandestarra, berriz, moralez gainezka izango da Superprestigio-ko azkeneko proba irabazita. Koxka honetan Albert-en hutsuneak Palmans taldearen lidertzan jarri duen Radomir Simunek txekiarra ere jar liteke.

Lasterketan italiarrik izango ez dela kontuan hartuz, gainerako izenak (garaipenetik gertu behar ez luketen arren ohorezko postuak beteko baitituzte) Aernouts, Al, Bina, De Knegt, Sven Vanthourenhout gora beheratsua eta Peeters gaztea dira. Euskal txirrindulariei dagokionez, nahiko lan izango dute munduko izarren handienen aurrean. Azkeneko lerroetatik atera beharko dira gainera. Edonola ere, Javier Ruiz de Larrinaga, Unai Yus, Egoitz Murgoitio eta David Juarez izango dira irteeran.

Atsedenerako denborarik gabe, astelehenean Asteasuko Ziklokrossa ospatuko da. Egutegiak eskaintzen duen abantaila probestuz, antolatzaileek Arratiako lasterketaren ostean jartzea erabaki dute. Erabaki zuzen horri esker, gizon handi gehientsuenak Asteasun izango dira. Eurez gain, David Seco ere Gipuzkoan izango da, eta Igorrerako aukeratua izan ez dela kontuan hartuz, joan den asteburuan Aizarnazabal-en eman omen zuen erakustaldiaz gain, busturiarraren aldetik jarrera ausarta espero liteke.

Euskal asteburuaren ostean, oraindik ikuskizunez betetako bi hilabete geratuko dira. Munduko Kopak lan erdiak pasata izango ditu ordurako, eta Nys-ek lidertza nekez ikusiko du arriskuan. Lehiaketa horrek eskaintzen dituen zirkuituengandik urrun ordea, nazioartean GvA (Gazet van Antwerpen) txapelketak eskaintzen du espezialitateko aurpegirik gogorrena, lokazdiari dagokionez batez ere, baina baita gora beheren aldetik. Horren lekukorik garbiena, txapelketaren irekiera izan zen Koppenbergcross proba. Azken boladako ikuskizunik handiena ordea Superprestigioak eskaini zuen, irudian ikus daitekeen moduan. Hitzak soberan daude. Hori bai, esan beharra dago bi lehiaketa hauetan ere Sven Nys bera dela lider. Albert-en lesioak eta Boom-ek lasterketa guztietan parte hartu ez izanak mesede egin badiote ere, bere indarraren erakusgarri den datua.

Urtarrilan jada begi guztiak Hoogerheide-ko Munduko Txapelketari begira egongo dira. Baita gu ere. Pena da ordea Euskal Telebistak errepidearekin egiten duen apustuarekin alderatuz horren urrun geratzea ziklokross-arekin egiten duena. Halako modalitate ikusgarriak eta geurean tradiziodunak bestelakorik merezi du.

Argazkiak: www.uci.ch / jef (neo.superprestigecyclocross.com)