Etiketa Artxiboak:Cavendish

Tourreko multzoen azterketa: azkarrak (IV)

Aurtengoan ez ditugu aukera asko. Eta inor ere ez da orain arte besteen oso gainetik azaldu 2010an.

Tyler Farrar

FarrarIazko denboraldian lehertu zen esprinter estatubatuarra. Tourrean garaipenik lortu ez bazuen ere, oso hurbil ibili zen eta martxoan hasi eta urrian ere garaipenak lortu zituen, oso erregularra dela erakutsiz. Horren ondoren, 2010 bere urtea izan zitekeela uste genuen askok. Dena dela, maila altuan ibili bada ere, agian ez da esprintetan dominatzaile izatera pasatzeko saltoa emateko gai izan. 4 garaipen on lortu ditu halere dagoeneko, tartean Giroko 2 etapa. Aurten bada, iaz hain hurbil izan zituen garaipenen bila joango da Frantziara, baita maillot berdeagatik borrokatzera ere. Oso erregularra izanik, ziur aurreko postuetan ikusiko dugula

CavendishMark Cavendish

Iazko dominatzailea izan genuen etapa lauetan. Sasoiko dagoenean etsairik ez duela erakutsi zuen iaz harroxko britainiarrak. Aurten baina, makal dabil eta hein batean, ez dirudi oso zentratua. Denboraldi hasieran beharrezko prestakuntza gabe aritu zen eta poliki-poliki forman jartzen joan bada ere, 3 garaipen lortuz Kalifornia, Romandia eta Kataluniako itzulietan (iaz 14 Tour aurretik), urduri ikusi dugu azkenaldian, iazko pedal kolpea berreskuratu ezinik. Suitzan Haussler-en aurka kolpatuz erorketa larria eragin zuen eta fisikoki kaltetuegia atera ez bazen ere, burutik ez zuen lasaitu handirik hartuko. Dena den, sasoian iristen bada eta duen taldearekin aurten ere Tourreko azkarrena izan daiteke.

Oscar Freire

FreireTxirrindulari handia dugu kantabriarra. Nire ustetan, Armstrong-ekin batera oraindik lehiatzen dabilen ziklistarik handiena. Gauzarik zailenak erraz egiteko gaitasuna du Rabobank-eko harribitxiak. Beharbada horregatik, maillot berdeak edo Tourreko etapa bat gehiagok ez du besteak bezainbat motibatuko Freire. Denboraldi hasera paregabea izan zuen, beste behin ere Milano-San Remo maisuki irabaziz baina ondoren ez du hain emaitza onik lortu. Hala ere, esprinterren artean bera da garaipen gehienekin aurkezten dena Tourreko irteeran. Aukera txikiena ikusten badu ez du alferrik galduko eta bizpahiru etapa irabazteko ez du gehiegi behar. Dena dela, bere aurtengo helburu handia mundiala izango da beste behin ere, eta hori buruan, ez ditu beste esprinterrek hartuko dituzten arriskuak hartuko.

Alessandro Petacchi

PetacchiBerak ere ba ote daki zenbat garaipen eskuratu dituen profesionaletan dabilen 12 urteotan? Asko, bai itzuli txikietan, bai handietan ere. Baina gainbehera ere iritsi zaio eta aurten nabarmena izaten ari da. Lehen hamarnaka lortzen bazituen garaipenak, aurten Italiako 2. mailako lasterketa batzuetan besterik ez du lortu besoak altxatzea. Etapa lortu zuen Suitzako Itzulian ere, baina azken hau Cavendishek esprinta jokatzen ari ziren gizon erdiak lurrera bota ondoren….Kostako zaio bada Tourrean irabaztea, baina ziur aurreko postutan ikusiko dugula besteek noiz huts egin zain.

Thor Hushovd

HushovdNorvegiarra, 2004an bezala, bere herrialdeko txapelketa irabazita dator Tourrera. Hori du aurtengo bere garaipen bakarra. Dena den, inoiz ez da izan oso txirrindulari garailea (ez behintzat esprinterra dela kontutan izanik). Erregulartasuna du bere dohaina eta iazko Tourrean bera izan zen maillot berdea jantzi zuena Parisen. Etapa bakarra irabaziz, Cavendishen 6 garaipenetatik urrun, bera izan zen puntukako sailkapenean nagusi. Aurten ere asmo horrekin joango da Rotterdam-era eta Parisen berriro podiumera igotzeko esprint guztietan aurrean sartzen saiatuko da.

Gauzak horrela, kinielan Cavendish eta Hushovd hartuko nituzke, aurten oso fin ez badabiltza ere, ematekotan beren onena orain emango baitut.

2010eko taldeen analisia (XIV): Team HTC Columbia, edo asetu ezineko piztia

CavendishTalde batek denboraldi batean 86 garaipen lortu dituela esanda, ez dago asko gehiagorik kontatzeko. Team HTC Columbia tropeleko munstroa da, asetu ezinezko pizti bat. Mark Cavendish buru dutela, “Pitxitxi” rolean (23 garaipen), eta André Greipel gertutik jarraituz (18 garaipen), taldeak ez du kupidarik izan. 15 herrialdetako 28 txirrindulari ditu aurten talde estatubatuarrak, eta hauen etxean ere izan da aldaketarik. Baja garrantzitsuak izan dituzte, joan direnen artean izen potoloak besterik ez daude eta: George Hincapie, Marcus Burghardt, Edvald Boasson Hagen, Thomas Lovkvist, Kim Kirchen eta Greg Henderson. Denak ala denak txirrindularitzan zerbait esandakoak, eta baten batzuk oraindik asko esateko dutenak, Boasson Hagen norbegiarra, bereziki. Taldea konpletatzera etorri direnen artean Aleksejs Saramotins, Rasmus Guldhammer, Leigh Howard, Jan Bakelants, Jan Ghyselink, Tejay Van Garderen, Patrick Getsch, Martin Velits, Peter Velits, Lars Bak eta Mathew Goss aurki ditzakegu.

Izen propioetara pasatuta, denen gainetik, nola ez, Man Irlatik datorren 24 urteko morroskoa, Mark Cavendish. 2009 harrigarria egin du, 23 garaipen lortuta, tartean Tourreko 6 etapa, Giroko 2, Milan-San Remo, Tirreno Adriaticon etapa, eta beste hainbat eta hainbat garaipen. Inork ez daki non daukan topea mutil honek, izan ere, gero eta erraztasun handiagoarekin irabazten baitu.

Cavendishen itzalean aurkitzen da taldeko beste “killer”-a, André Greipel alemaniarra, baina nagusia ez dagoenean ederki probesten du bere aukera. Son gutxiago, portada gutxiago, baina 2009an 18 garaipen, eta aurten dagoeneko 6 garaipen (Tour Down Underreko 3 etapa eta sailkapen nagusia, Mallorcako Challengean proba bat eta Algarveko Itzulian etapa bat). Erakutsi zuen iazko Vueltan zertarako gai den, eskuak lau aldiz jasota.

Gainontzekoen artean, Michael Albasini suitzarrak ere emango du zeresana. Denboraldi amaieran garaipen politak lortzen dituen txirrindularia da, ihesaldietan oso-oso ondo mugitzen dakiena, eta egoera horietan bere abiadura puntaz oso ondo baliatzen da eskuak altxatzeko. Azken 2 urteetan oso gauza interesgarriak egin ostean, Tony Martin (24 urte) aurrerapausu bat emateko prest dago. Beharbada itzuli handi bateko sailkapen nagusiaren borrokan sartzea oraindik urrun gelditzen zaio, baina daraman progresioa kontutan hartzeko modukoa da. Erlojuaren kontra aparta, eta goranzkoan ere oso maila ona erakutsi izan du. Gertutik jarraitu behar direnetako beste bat. Erlojuaren kontrako probak aipatuta, Bert Grabsch datorkigu denoi burura. Munduko txapeldun ohia izandakoak beste behin bakarkako lana aprobetxatu nahiko du bere palmaresa loditzen jarraitzeko, baina lana egitea tokatzen zaionean, ez da izkutatuko.

Gazteei begiradatxo bat botata (Martin ezik, dagoeneko aipatu dugu eta), Velits anaien fitxaketa azpimarratu behar da, bereziki Peterrek eman duen mailagatik. Eslobakiarrak garaipen bakarra lortu zuen iaz, baina makina bat ohorezko postu ere bai. Tejay van Garderen estatubatuarren esperantza berria da. Oso gaztea oraindik (21 urte), progresio handia izan dezake, eta etapa itzulietan nabarmentzen hasi behar du, oso ondo moldatzen baita aldapa gora, eta erlojuz kontra ere ez da herrena. Azkenik, azken aurkikuntza, Leigh Howard australiarra (20 urte), alegia. Omango Itzulian Tom Boonen eta Daniele Bennati bezalako izenak sprintean menperatuta eman zuen bere burua ezagutaraztera, eta gertutik jarraitu beharreko beste txirrindulari bat izango da.

Gainontzekoen artean, Marco Pinotti, Maxime Monfort, Mark Renshaw, Kanstantin Sivtsov edo Michael Rogers bezalako gizonak aipatu behar. Ez dira hain irabazleak, baina beti erakustarazten dute beraien burua, lasterketan presentzia handiarekin.

Errekorrak apurtuz jarraituko al du Team HTC Columbiak?

2010eko taldeen analisia (VI): Garmin-Transitions, aldaketa gutxiko taldea

Garmin-TransitionsTalde estatu batuarrak denboraldi txukuna egin zuen iaz. 29 garaipen lortu zituzten iaz eta gehien nabarmendu ziren txirrindulariak bi izan ziren, Farrar esprinter estatu batuarra eta Wiggins ingelesa. Lehenak Cavendish ahal guzti duna gainditzea lortu zuen Tourrean eta Wigginsek espero ez bezalako erakustaldia eman zuen 2009ko Tourrean eta sailkapen nagusian 4. amaitzea lortu zuen.

Aldaketa gutxi izango ditu talde estatu batuarrak aurtengo denboraldiari begira. Nagusiena Wigginsek Garmin utzi eta Sky talde ingeles berrian izango dela da. Honek taldean egituraketan aldaketak eragingo ditu.

Vande Velde izango da 2010ean Tourreko taldeburu izatearen ardura hartuko du eta 2008an lortu zuen 4. postu hori berdindu edo hobetzen saiatuko da. 2009an Wigginsi laguntzea egokitu zitzaion, baina aurtengoa, esan bezala, ardura guztia berak izango du.

Farrar-ek iazko 11 garaipenak hobetzen saiatuko da. Ez du lan erraza izango Cavendish iaz bezain ondo aritzen bada.

Aipatutako bi txirrindulariez gain, Garminek kalitatezko txirrindulariak dituen erakusgarri, Dean Zelanda Berriko txapelduna, Tuft Kanadako erlojuaren kontrako txapelduna, Dan Martin Irlandako txapelduna eta Meyer Australiako txapeldunak ekarri nahiko nituzke gogora. Zalantzarik ez dut aurtengoan aipatutako txirrindulari hauek Zabriskie eta Millarrekin batera, zeresan handia emango duen taldea izango dela.

Cavendish geldi ezina

Cavendish. 11. etapan garaipena1, 2, 3 eta gaurkoarekin 4. garaipena lortu du Cavendish esprinterrak aurtengo Tourrean. Bazirudien azken metroetako aldapatxoak bere ohiko abiadurarentzat oztopo izango zela eta Hushovd edo Freire bezalako txirrindulariei mesede egingo ziela, baina ez da hala izan. Honenbestez 4. etapa garaipena eta iazko marka berdintzea lortu du Tourraren ekuadorrera aurkitzen garen honetan.

Gaurko etapak ez du bere bizikorik eskaini. Espero bezala ihesalditxo bat osatu da, baina bikotea izaki, garaipenetik urrun geratzera kondenatuak zeuden. VanSummeren eta Sapak osatutako tandemak etapa hasieratik egin du aurrera. Tropelarekiko tarterik handiena Côte de Perreusen izan dute eta 4’35”ekoa izan da. Beraz, esan daiteke tropela kezka handirik gabe eta lan handirik egin beharrik gabe aritu dela gaurkoan ihesaldia kontrolpean izateko. Azken 6 kilometroetara iristean, ihesaldiak esprinterrei utzi die lekua. Columbia-HTCko kideek ohi bezala lagunduta, Cavendishek aldapatxoari ere aurre egin ahal izan dio garaipenaren bidean. Atzetik Farrar, Hutarovich, Freire eta Hushovd izan ditu. Gaurko garaipenarekin bai, eta ez atzo nahastu nintzen bezala (eskerrik asko zuzenketarengatik), Cavendishek maillot berdea berreskuratu du.

Maillot zuri-gorria

Zerbait gehiago kontatzeko gaurko etaparen inguruan, mendiko maillota eskuratzeko pankarta puntuagarrietan izan den lehia plazaratu nahiko nuke, Côte de Perreusen izan dena hain justu. Dakizuen bezala Egoi Martinez Euskaltel-Euskaldiko txirrindularia Pirinioetako ihesaldiari esker maillot zuri-gorriaren jabe da eta badirudi Pariseraino eramateko jokabidearekin dela talde laranja. Aipatutako mendate puntuagarri honetan, 3. postua zegoen jokoan eta Egoi Martinez, Pellizoti eta Moncoutiek esprinta jokatu dute puntu bat jasotze aldera. Azkenean italiarra gailendu da esprint horretan. Ez dakit puntu batek zenbateraino merezi duen jokatzea, baina argi dagoena da Egoi Martinezek eta bere taldeak lan latz egin beharko dutela Pariseko etapan mendiko maillotarekin izatea nahi badute, batez ere Pelizzotti bezalako batek maillot horren interesa era honetan ager arazi badu.

Irratirik gabe ere Cavendish nagusi. Sorpresarik ez, beraz

Cavendish. 10. etapan garaipenaASOk aurtengo Tourrean esperimentua egin nahi zuen eta txirrindulari profesionalak irrati bidezko komunikazioak galarazita lehiatzera behartuta zeuden. Zenbait txirrindulariren protesta artean, gaurko etapa aurre ikusitako gidoiari jarraiki jokatu da nahiz eta irratirik gabe izan.

Garbi zegoen esperimentatzen hasita ezin zela Pirinioetako edo Alpeetako etapa erabakigarriren bat aukeratu eta aurtengo edizioko lehena gaurkoa izan da. Aurrez esan genizuen bezala, hurrengoa ostiralean jokatuko dena izango da, eta han bai, beharbada, zer esan gehiago emango du irratiak. Gaurkoan ez bahintzat, eta ederki ezagutzen genuen gidoia beta da azken une arte garbi ez bazegoen ere.

Etapa hasieratik Vaugrenard, Dumoulin, Hupond eta Ignatiev-ek eguneko ihesaldia osatu dute. Tropela, aldiz, lasai zen eta momentu oro ihesaldia kontrolpean izan dute Voeckler-en eman zuen ezustekoaren oroitzapena gogoan. Ez da zalapartarik izan tropelean eta egia esan tentsio unerik ere ez. Atseden eguna atzokoa bazen ere, gaurkoa jarraipena izan dela esan daiteke. Antolatzaileen aurre ikusten zuten denborarik luzeenean ibili da tropela gaurko lasaitasunaren erakusgarri.

Azken kilometroetan zirela minutu t’erdiko aldea zuten iheslariek. Atzean esprinterren taldeak antolatu dira tropelari abiadura emateko eta orduan laukoteak ere erritmoa bizitu du. Bazirudien ezustekoa emateko moduan izango zela laukotea, baina ez da hala izan. 2 kilometro eskasen faltan iheslariak tropelak irentsi ditu eta Martin, Hincapie eta Columbia-HTC taldeko txirrindulariek ederki bideratu diote esprinta Cavendishi. Honek, ohikoa duen bezala, ez du hutsik egin eta aurtengo edizioko hirugarrena poltsikoratu du. Hushovd eta Farrar izan dira ingelesari gehien hurbildu zaizkien esprinterrak. Garaipen honi esker, beraz, Cavendishek maillot berdea berreskuratzetik 6ra geratu da.