2010ari errepasoa (X) Ivan Basso: bizitzak arrosa kolorea hartzen duenean

ivan_basso_giro_italia_et15_2010_sirottiGiroan, Tourrean ez bezala , ustekabean edozein txokotan izan ohi dira. Aurten ezustekoak lasterketa hasi aurretik iritsi ziren; Pellizotti jokoz kanpo utzi zuten, bere pasaporte biologikoaren emaitzak ez ohikoak zirelakoan. Hori ikusirik, Liquigaseko nagusiek Vincenzo Nibali eraman zuten Girora, nahiz eta italiar gaztea oporretan zegoen –edo hori esan zuten behintzat bere taldekoek-.

Bradley Wigginsek jantzi zuen aurreneko maglia arrosa, baina nabarmendu behar da Alexander Vinokourovek oso gogotsu ekin ziola Giroari, eta amorru biziz ikusi genuen taldekako erlojupekoan maglia arrosak ihes egingo ziola jakitun. Lehen astea bukatu aurretik, itzuliko etapa ikusgarrienaren txanda izan zen. Strada Bianchen etapa alegia. Hau da, asfaltatu gabeko errepideetan aritu ziren txirrindulariak. Hori bakarrik ez; euria egin zuen, eta horrek are gehiago gaiztotu zuen etapa; Basso eta Nibali erori egin ziren eta lokatzez betetako errepideetara iritsi zirenerako Evans, Vinokourov eta Arroyo, besteak beste, aurretik zituzten. Borroka ikusgarria izan zen –aldapa tenterik ere bazegoen bide haietan-, eta azkenean, Evansek etapa eraman zuen eta Vinokourovek jantzi zuen ostera ere maglia arrosa.

Handik etapa gutxira, beste ezusteko galanta. L`Aquila bidean, tropelaren erdiak egin zuen aurrera eta faborito guztiak atzean geratu ziren. Emaitza? Richie Porte Saxobank taldeko australiar gazteak maglia arrosa jantzi zuen. David Arroyo espainiarra ere aurreko taldean helmugaratu zen. Bi txirrindulari horiek protagonista bilakatuko ziren probaren azken txanpara arte. Giroa gaizki hasitako Carlos Sastre espainiarrak lehen postuetara jauzi egin zuen etapa harrigarri hartan. Evans, Basso, Scarponi eta abar ia hamar minutura zeuden sailkapen nagusian etapa hura eta gero.
Horiek horrela, Liquigas taldeak lasterketaren lema hartu eta Monte Grappa eta Zoncolaneko etapetan erakutsi zuen talde indartsuena zela. Lehenengo etapan, Nibalik irabazi zuen –bakarrik helmugaratu zen-, eta hurrengo egunean, Zoncolan itogarrian, Bassok. Richie Portek maglia arrosa galdu zuen, baina haren oinordekoak, David Arroyok kuraia sobera erakutsi zuen handik Giroaren bukaera bitartean.

Ivan Bassok eta Nibalik gogotik egin behar izan zuten lan Apricara bidean, itzuliko etapa gogorrenean; Mortirolon atzean utzi zuten Arroyo, baina jaitsieran espainiarrak ia-ia bat egin zuen Liquigaseko bi txirrindulariekin eta haiekin zihoan Scarponirekin. Ia-ia, baina ez ziren elkartu eta Apricarako bidean lortu zuen Bassok Arroyoren abantaila ezer ezean uztea.

Hortaz, Vareseko igotzaileak bigarrenez irabazi zuen Giroa –lehena 2006an- eta Nibalik erakutsi zuen txirrindulari puska dela, lehen aldiz hiru asteko itzuli bateko podiumera igo baitzen. Arroyo espainiarra bi italiarren ondoan izan zen Veronako Coliseum ikusgarrian jarritako podiumean. Ezin laburpentxo hau amaitu Richie Porte aipatu gabe. Julenek Peter Sagan Paris Nizako ustekabeko nagusia izan zela gogora ekarri zigun duela aste gutxi. Bada Giroan, 25 urteko Richie Portek zur eta lur utzi zituen zale guztiak, egiazki. 2011n berretsi beharko du aurten erakutsitakoa.

Kontuak kontu, ziklokrosik onena Igorreko Munduko Kopan

Beste urte betez, lokatzgaineko txirrindularitzaren ikuskizun handiak munduko espezialistarik onenak ekarriko dizkigu Euskal Herrira, azken orduko albiste ezkorrek gure lurretan dugun ziko-kros probarik handienaren egunerokotasuna astindu badute ere.

uci-cyclo-cross-world-cup-2009-igorre-zdenek-stybar-3

Ostegunean Zdenek Stybar munduko txapeldunak zitan egongo ez zela jakinarazi zuen; gabonak arte gutxi gora behera lehiaketatik kanpo egon beharko du, belaunean azkeneko asteotan izaten ari den arazo batzuk tarteko. Hori gutxi balitz, Espainiar estatuan aire-kontrolatzaileen eskakizunek eragindako gatazkak nazioarteko hainbat txirrindulariri Igorrera heltzeko lanak zaildu dizkio.

Nolanahi ere, eta hegaldien arazoa behar bezala konponduko denaren itxaropenaz (oraindik bertan ez direnek Mediterraneo aldetik errepidea hartzeko aukera izango dute bederen), Munduko Kopako probarik ikusgarrienak (Koksijde-koarekin batera) iragarpenak bete ahal izango ditu beste behin. Azken urteotan bezalaxe arazo ekonomikoek gora egin dute, jaso dituzten laguntzek behera egin duten hein berekotsuan seguru asko, baina antolatzaileek txirrindularitzazaleontzat oparia den hau bere horretan mantentzea lortu dute beste behin.

igorre2009

Gauzak horrela, Stybar iazko garailea irteeran izango ez dela jakinda, Niels Albert (txekiarraren faltan Munduko Kopako lidertza esku-eskura izango duena) eta Sven Nys-en arteko lehia behar luke biharko probak. Igorreko belardi bigunak nekez eutsiko dio azken egunotan botatako euriari, eta Munduko Kopako lasterketaren aurretik izango diren gainerako probek guztiok espero duten lokatzdia sortaraziko dute seguru. Horrenbestez, txirrindularien arteko aldeak areagotu egingo dira, eta horrek aipatutako bi flandestarrak aurrean nabarmentzea ekarri beharko luke. Bart Wellens-ek ere izan dezakeen zirkuiturik aproposenetakoa topatuko du, oinez egiteko zati dezenterekin (aurten gainera eskaloidun malda gehitu du antolakuntzak), baina joan den astean Gieten-en izandako erorketa gogorrak oinazerik utzi dion ikusi beharko da. Hauekin batera, Klaas Vantornout eta Bart Aernouts aipatu behar dira, aurten maila ona erakutsi badute ere oraindik garaipenen zakua hutsik dutenak. Kevin Pauwels-ek azkenaldian maila hobexeagoa eta garaipen bat erdietsi ditu, baina lokatzak normalenean gauzak zaildu beharko lizkioke. Aurreneko multzo honetan Francis Mourey frantziar txapelduna ere derrigorrean aipatu behar da.

Guzti hau Flandes aldean kontuak nahasi xamar diren unean gertatzen da. Hainbat kontu izan dira hizketagai azkeneko asteotan: Stybar-ek errepidera eman lezakeen jauzia (txekiarra antza Quick Step-ekin fitxatzetik gertu egon liteke), Sunweb taldeko buruzagiak bere gizonen errendimendu eskasak izango dituen ondorioak publikoki azaltzea (Vantornout alde batera utzita, desagertu xamar izan dira gainerakoak, Sven Vanthourenhout euren artean), edota Munduko Kopako probatan belgiar selekzioan sartzeko borrokak eragindako eztabaida (Dieter Vanthourenhout-ek hautatzaileari leporatu zizkionak batez ere, Koksijde-rako kanpoan geratu ostean, Telenet-Fideakoen alde argi egiten zuela esanez). Guzti honek interesa erantsiko dio gizon jakin batzuek egingo duten lanari.

egoitz_murgoitio_ciclocross_ermua_2010_murgoitio

Geurera bueltatuz, euskal txirrindularien artean zalantzarik gabe Egoitz Murgoitioren izena aipatu behar da. Euskal eta espainiar egutegian Javier Ruiz de Larrinagarekin lehia polita mantentzen badu ere, abadiñoarrak orain arteko Munduko Kopako lasterketak korritu izanak puntu dexente eta, batez ere, irteera puntuan postu egokia eskaini dizkio. Okerrik ez bada, Hirumet etxeko bizkaitarrak hirugarren lerrotik ekingo dio lasterketari, Koksijde-n ekin zion bezalaxe, eta Flandeseko kostaldean lortu zuen 23. postua hasiera batean behintzat aurkako zitzaion ibilbide batean erdietsi zuela kontuan hartuta, Igorren, etxekoen babesak eragingo dion grinarekin, 15 onenen artean izateko aukera izan dezake. Horrexek behar luke bere erronka. Ruiz de Larrinagak, bere aldetik, irteeran atzerago aterata, aurrerantz egin eta aurreko urteetako emaitzak hobetzea izango du helburu. Daniel Ruiz, David Juarez eta Erlantz Uriarte izango dira euskal partaidetza osatuko duten txirrindulariak.

Ikuskizuna eta gozamena beraz bihar Arratiako herri txiki honek eskainiko dizkiguna. Telebista bidez jarraitzeko modua izango bada ere, Igorrera bertaratzeak zinez merezi du, txapeldun handi hauek gertutik ikusteko aukera paregabea baita. Eta bide batez, antolakuntzak egindako ahalegina saritzeko modu bat ere bada.

Honekin batera, astelehenean Asteasun UCI-ko sailkapenerako puntuagarria den proba ere ospatuko dela gogorarazi behar da, beste klasiko bat gure artean. Albert eta Nys behintzat bertan izatekoak dira.

Argazkiak: cyclephotos.co.uk / mintegui / esciclismo.es

“Praktika egokiak gutxitutako hizkuntzen eta IKTetan sustatzeko” biltzarreko aurkezpen bideoa

Dagoeneko jarri dituzte biltzarreko bideoak ikusgai Leizaola Elkargokoek. Hemen gehitzen dizuegu gu izan ginen mahaiko bideoa. Egoitzen parte hartzea 18. minutu inguruan aurkitzen da eta hitz egin zuen guztiaren lehen zatia soilik aurkitzen da.

Bideoan guztia agertzen ez denez, hemen dituzue gure aurkezpena. Biltzarraren inguruko informazio gehiago nahiko bazenute aurreko post batean irakur dezakezue.

2010ari errepasoa (IX): Spilak, edo Romandiako Tourrean maillot horirik jantzi ez zuen garailea.

Spilak, Romandian etapa irabazi zuen egunean2010eko Romandiako Tourra lehen postuan bukatu zuena palmaresean ez agertzeagatik pasatu da historiara. Izan ere, etapa guztiak burutzen denbora gutxien Alejandro Valverdek eman zuen, itzuliko garaile bilakatuz, baina denok dakigun moduan gero zigortua izan zen, lortutako garaipenak modu hartan galduta. Gauzak honela, Simon Spilak pasatu zen Itzuliko garailea izatera.

Itzulia aitzin etapa batekin hasi zen. Bertan, Marco Pinotti izan zen azkarrena, Peter Sagan harrigarriak (denboraldi ikaragarria zeraman ordurako eslobakiarrak) baino segundu bakar bat gutxiago eginda. Dena den, hurrengo egunean Saganek garaipena eta lidergoa lortu zituen, mendate gogorrak (lehen mailako bi eta bigarren mailako bat) zituen etapa talde ertain baten esprintean irabazi baitzuen, Gavazzi eta Rocheren aurretik.

Hurrengo etapa ere esprintean erabaki zen, baina aurreko egunean ez bezala, tropela bete-beteta iritsi zen, gizonik azkarrenak bertan zirela. Logika izan zen etapako irabazleetako bat. Bestea, Mark Cavendish, erraz. Danilo Hondo eta Robert Hunterrek ez zuten aukera txikienik ere izan Man Irlako mutilaren kontra. Esan beharra dago helmugan keinu itsusi bat egin zuela Cavendishek, bere denboraldi kaxkarra kritikatzen zutenei dedikatua. Liderra, oraindik ere Sagan, noski. Aipatu beharra dago High Road taldeak Cavendish lasterketatik bota egin zuela, eta lasterketako zuzendaritzak 4.000 eurotik gorako isuna jarri ziola.

Hirugarren etapa bitxia izan zen. 23,4 km-ko erlojupeko bat izan zen, eta Richie Porte nagusitu zen, Valverderen aurretik. Etapa bitxia diot, izan ere, lan erditan Porte minutu bat galduta zen, eta helmugan erraz xamar nagusitu zen, 26 segunduko aldearekin. Haize aldaketa handiren bat edo egongo zen, nonbait. Egia esan, inork ez zuen lortu azalpen logiko bat ematea kontu honi. Dena den, etapa Porterentzat eta lider berria Michael Rogers, bere aspaldiko denboraldi onenari jarraipena emanez. Laugarren etapa gorabeheratsua izan zen, Suitzatik irten eta Frantzian kilometro mordoxka eginda. Etapa Spilakek irabazi zuen azken kilometroetan ihes eginda, eta Rogersek maillot horia segundu bakar batengatik eustea lortu zuen. Valverderen mehatxua gero eta handiagoa zen…

Bosgarren eta azken etapa laburra izan zen oso, 121,8 km besterik ez. Hori bai, tartean lehen mailako hiru mendate. Azken mendatean lasterketako lau gizon indartsuenek aldegin zuten: Valverde, Igor Anton, Spilak eta Menchov. Etapa lau hauen arteko esprintean erabaki zen eta han, nola ez, Valverde izan zen azkarrena, nahiz eta Antonen eraso batek gauzak uste baino zailago jarri zizkion. Esanda bezala, Valverde zigortua izan zen geroago emandako positibo bat tarteko eta etapako garaipena galdakoztarrarentzat izan zen. Palmareserako polita, eta Romandian lortutako bigarrena, bere profesional palmaresa han estreinatu baitzuen, Thomas Dekker eta Chris Horner esprintean gaindituta mendate batean.

Beraz, Simon Spilakek bere kirol biziko garaipenik handiena lortu zuen lasterketa bukatu eta hilabete batzuk geroago, eta podiuma berarekin osatuz, Denis Menchov eta Michael Rogers agertuko dira hemendik aurrera. Igor Anton azkenean 9º izan zen, erlojupeko kaxkarra egin izana garesti ordainduz

Euskaltel-Euskadik 2011ko Giroan parte hartuko du

Hiru urte eta gero, Euskaltel-Euskadi Italiako Giroan izango da. UCI Pro Tourrean onartua izanarekin batera, hauxe da talde laranjaren inguruan azken asteetako albiste nagusia. Igor González de Galdeanoren esanetan, gaur egungo taldeak ez dauka zerikusirik 2007an azken Giro hartan parte hartu zuenarekin. Taldea askoz helduago ikusten du, bere aukeretaz konfiantza gehiagorekin, Giroan zeresana emateko moduan, azken finean.

Eta albiste honen barrIgor Anton Vueltako podiumeanuan beste albistea, titular handiagoa akaso,  Igor Antonek Giroan parte hartuko duela da. 2005ean, bere debut urtean, joan zen Igor Girora lehenengoz, eta azkenekoz. Urte hartan Giroa ez zegoen bere planetan, baina Alberto López de Munainek lepauztaia hautsi zuen lasterketa baino egun batzuk lehenago, eta arabarraren lekua Antonek bete zuen. Eta nola bete gainera. Lehen astean etapa amaieran zegoen malda labur baina tente baten Paolo Bettini, Damiano Cunego eta Davide Rebellin bezalako txirrindularie gangortu egin zitzaien, eraso kolpe bikain bat jota. Gero atzetik atrapatu egin zuten, baina han gelditu zen txirrindulari txiki eta ezezagun baten agerraldi hura. Gero, normala den moduan, lasterketa luzea eta gogorra egin zitzaion, baina azken astean, etapa erregina ahaztezin hartan, Finestre beldurgarrian lehen 10 kilometroak taldeko buruan egin zituen, Savoldelli, Simoni, Di Luca, Rujano, etabarrekin. Azkenean sailkapena 83º postuan bukatu zuen, eta leher eginda. Taldetik bigarren astean lasterketa uztea proposatu zioten, hain gaztea izanik luzea egingo zitzaiola argudiatuz, baina galdakoztarrak burugogor amaiera arte jarraitu zuen.

Datorren urtean, ordea, beste helburu batekin joango da Girora Igor. Azken Vueltan erakutsi du zenbat hasi den, tropeleko igotzailerik onenetariko bat izatera iristeraino gaur egun. Eta Giroan faboritoa izango da, ezinbestean. Gainera datorren urteko Giroa, antolatzaileen estiloari jarraiki, oso gogorra izango da. Akaso aurtengoa baino gogorragoa. Bada zerbait. Guzti hori gutxi balitz, Mikel Nieve galdakoztarrarekin izango da Torinoko irteeran. Ikusteke dago zein txirrindularirekin osatuko duen taldea Galdeanok, baina bi izen horiekin nire ilusioa piztuta dago dagoeneko. Koldo Fernández eta Urtasun ziurrenik Giroan izango dira. Nire ustez Daniel Sesma edo Miguel Mínguez, Cazaux, Alan Pérez eta Aramendiak irteeran izateko aukera asko dituzte. Oroz nora joango den ikusteke dago, joko asko ematen baitio taldeari parte hartzen duen lasterketa guztietan. Izan ere, Samuel Tourrera joanda, honekin batera Amets, Egoi Martínez, Ruben Pérez eta Gorka Verdugo ziur joango dira Frantziar errepideetara. Romain Sicardi ere ordua iritsi zaiola deritzot. Girora itzulita, Igor Antonen aurkari nagusiei gainbegirada bat emanda, Ivan Basso aipatzea ezinbestekoa da. Azken Giroko irabazlea Liquigas talde indartsu bat atzetik duela joango da. Sylvester Szmyd, Robert Kiserlovski, Valerio Agnoli… talde gizon onak dira duda gabe. Dena den, Nibali ziurrenik ez da joango, aurtengo Vuelta irabazita ziurrenik Tourrean konzentratuko baita, bere txirrindulari karreran beste pausu bat emateko. Dena den, Scarponi, Evans, Vinokourov edo Cunego bezalako txirrindulariak ere irteeran izango dira, ondo bidean.

Euskaltel-Euskadiren datorren urteko denboraldiari gainbegiratu orokor bat emanda, ilusioa izateko arrazoiak badauzkagu. Laburpen azkar bat eginda: Giroan Igor Anton eta Mikel Nieve. Tourrean Samuel Sánchez, Romain Sicard eta Amets Txurruka. Vueltan Igor Antón, Mikel Nieve eta Amets Txurruka. Aurtengo denboraldi aparta hobetuko al du Euskaltel-Euskadik? Igor Antonek Giroan podiuma zapalduko al du? Hala bada, irabazteko moduan ikusten al duzue? Galdera guzti hauen erantzuna, datorren urteko Maiatzean.