14. etapa: Agde – AX 3 Domaines

Hemen ditugu Pirinioak!!!! Eta horrekin batera bi etapa oso gogor eta erabakigarriak. Euskaldunez osaturiko mendateetan, kamixeta laranjak nagusi direlarik (Tropela.net-ko kamixeta pistatxoak ere bat baino gehiago ikustea espero dugu, salgai ere izango ditugu bertan) Tourra irabazi nahi dutenek hanketan dituzten indar guztiak bertan utzi beharra dauzkate. Hemen bai ez dagoela hurrengo egunen zain hasterik.

2003 urtean Carlos Sastrek ihes eginda irabazi zuen etaparen oso antzekoa dugu, bertan Armstrong-ek azken urteetan erakutsi duen ahulaldietako bat (ahulaldia baldin bada behintzat segundutxo batzuk atzeratzea!!!) ikusi ahal izan genuelarik.

Aurtengo Tourrean ez dira urrundik erasoa jotzeko prestatuta dauden etapa asko baina gutxietako bat gaurko hau dugu. Pirinioetan igotzen den mendaterik gogorrenetakoa (gogorrena ez esateagatik) dute, Pailheres, 15 km bataz beste 8,1%ko maldekin. Mendate hau jaitsi orduko azken igoera hasten da, beraz, aproposa urrunetik erasoa jotzeko, hala ere, azken urteetako jendearen portaera ikusirik beldur naiz sailkapenean aurrean daudenen arteko borroka azken 5 km-etara mugatzea.

Pailheres mendatean sailkapenean atzeraxeago dauden Vinokourov, Botero, Evans, Kashechkin bezalako txirrindularien erasoak espero ditut, agian Rasmussenena ere bai hala ere aurten oraindik garaipenik ez duen eta horretarako irrikaz beteta dagoen Lance Armstrong izango da hautagai nagusi AX-3-Domaines gainean. Gainera, Courchevel-en gertatu zitzaiona errepikatzea, hau da, esprintean norbaitek irabaztea, oso zaila ikusten dut, Valverderen faltan, amaieran beraren adinako abiadarik duenik ez baita Tourreko tropelean.

13. etapa: Miramas – Montpellier

Etapa benetan laua Miramas eta Montpellier lotzen dituena. Etaparen profilari begiratu ezkero esprinterrentzat aproposa dela pentsarazi diezaguke, eta logika jarraitu ezkero hala izan beharko luke, hala ere badaude 2 arrazoi esprinta ekidingo duen ihesaldi bat helmugara iritsi daitekeela esaten dizkigutenak, alde batetik tropela osatzen duten txirrindularien indarrak xahutzen hasiak daudela eta batez ere, Tom Boonen belgikarrak Tourra utzi duenez, Quick Step taldearen lanik ez dela izango tropel buruan. Honek Davitamon-Lotto taldea bakarrik utzi dezake lan horretan, Credit Agricole taldekoei helmugan zenbat eta puntu gutxiago jokoan egotea komeni baitzaie, Thor Hushovd-ek soinean duen maillot berdea Paris artean mantendu ahal izateko. Quick Step ezezik, lagungarria izan zitezkeen Ag2R eta Domina Vacanzeren laguntzarik ere ez dute jasoko, bai Jean Patrick Nazon, bai Angelo Furlan ere Tourretik joanak baitira.

Saiatu daiteke Davitamon-Lotto taldea txirrindulari gutxiz osaturiko ihesaldi bat baimentzen, 5-6 txirrindularitik gorako ihesaldia behera botatzeko lan ikaragarria suposatu baitakioke. Borroka polita ikus genezake etapa hasieran, ihesaldia sortu nahi dutenen eta Davitamon-Lotto taldearen artean. Azkar antzemango zaio ia ihesaldia helmugara iristeko moduan den edo ez, ihesaldian nor sartu diren eta batez ere zenbat sartu diren ikusi orduko.

Beraz, etapa laua eta esprinterrentzat aproposa bai, baina horretarako egin behar den lanerako talde gutxi. Zenbat txirrindulariko ihesaldia sortzen den jakitean dago gakoa.

Azkenean esprinta izan ezkero hautagai bakarra egon daiteke, Robbie McEwen australiarra, inguruan Hushovd, O”Grady eta Eisel izan ditzakelarik. Tour hasieran Tom Boonenek larri hartu zuen, nahiz eta pertsonalki australiarra azkarragoa dela kontsideratu. Orain, belgikarraren faltan bere nagusitasuna nabarmen geldituko denaren susmoa daukat.

ESAITen jaialdia Piriniotan

Tropela euskal selekzioaren alde.

Azken urteetan bezala, aurten ere uztailak 16-17 Tourrean izango gara.

Larunbat arratsaldean euskal festa antolatuko dugu Saint-Laryn (Pla d’Adet, helmuga inguruan jarriko dugun gunean.

Igande goizean, 10:00etan hasita, Saint-Lary Soulan-Pla d’Adet bizikleta igoera.

Informazio gehiago telefono hauetan: 656711275 – 635727202.

12. etapa: Besancon – Digne Les Bains

Alpeetako etapak amaitu dira eta jadanik hautagai nagusiak Pirinioetara begira jarriak dira. Hala ere, larunbata iritsi aurretik 2 etapa izango dituzte, aurrena gaurkoa, bertan denbora galera lelorik ez izateko asmo bakarrarekin.

Etapa garaipena lortzeko aurreikuspena emateko etaparik zailenetakoa da gaurko hau. Ia segurutzat jo daiteke etaparen hasieran ihesaldiren bat sortuko dela eta ziurrenik helmugan tropelari aurre hartuta ikusiko ditugula. Atzo ez bezala, gaurkoan ez da derrigorrezkoa aldapan gora oso ondo ibiltzea, beste tankera bateko txirrindularientzat aproposagoa da gaurko hau, Gilbert, Flecha, Landaluze, Txente, Brochard, Dekker, Boogerd, Kessler, Halgand, Merckx… hau da, ibilbide gora-beheratsuetan ondo ibiltzen diren txirrindulariak. 7-8 txirrindulariz osatutako taldetxoa izango litzateke aproposena helmugara iristeko helburua lortzeko garaian, aurrean lan egiteko txirrindulari nahikoa eta elkarren artean haserretzeko gehiegi izan gabe, kopuru horretatik aurrera beti izaten baita lan gutxiago eginaz besteen lanagatik aprobetxatu nahi duenik, ihesaldiari kalte besterik egiten ez diolarik.

Esprinterren taldeek jai izango dute, tropeleko esprint nagusia lortu nahi baldin badute behintzat. Gaurko esprinterren aukerarik nagusiena ihesaldian sartzea izango litzateke, hala ere, ibilbidea ikusita, O’Grady bakarrik ikusten dut hori egiteko kapaz, McEwen, Boonen edo Hushovd-ek biharko indarrak gorde nahi izango dituztelarik.

Frantziako egunean frantziarra nagusi

Gaur izan da Frantziako Errepublika eguna eta 13.etapa honetan David Moncoutie frantziarra izan da nagusi. Normala izate omen da Frantziako Errepublika egunean frantziarrek protagonismoa izan nahi izatea, eta hala gertatu da gaurkoan ere.

Gure lehiaketari dagokionean, J.A. Garridok eskainitako maillot eder hori rlarrea o?atiarrak bereganatu du. Sailkapen orokorrean ere aldaketak izan dira eta lider berria dugu: jexux usurbildarra 2677 punturekin.

Alpeak amaitu dira

Orain Pirinioak iritsi zain da Tropela.

Gaur amaitu dira Alpeetako etapak, eta Armstrongek erakutsitako nagusitasunaren ondoren, Pirinioen zain geratzen gara.

Gaur izan den 11. etapan Saunier Duvaleko Juanma Garatek eskainitako maillota izan dugu sari moduan. Espainiako txapelketako irabazlearen maillota burrun erabiltzaile azkoitiarrarentzat izango da. Sailkapen orokorrean Ordiziako lander casadok jarraitzen du.

11. etapa: Courchevel РBrian̤on

Atzo aurreko 6 urtetako egoera berdina ikusteko moduan izan ginen. Mendiko aurreneko etapa eta bertan Armstrong estatubatuarrak aurrez hautagai nagusi ziren gehienak atzean utzi zituen, aipatzekoak batez ere Ullrich eta Vinokourov-en denbora galerak.

Atzoko etapa goian bukatu izaki normala zen talde buruen arteko buruz-buruko indar neurketa izatea. Goian bukatzen diren etapa gehienak halaxe izaten baitira, gaurko aldiz ihesalditxoren bat helmugara iristea ez litzateke harritzekoa izango. Ez hala ere edozein ihesaldi, Madeleine, Telegraphe eta Galibier mendateak azaltzen dituen etapa batek ezin du espero edonork irabaztea. Mendian ondo ibili baino sailkapenean atzean dabiltzan txirrindularien ihesaldi bat sortu daiteke eta tropelak aldeak lortzeko baimena ematen badie zergatik ez, etapa garaipenaren borrokan sartu. Ihesaldi honetan Moncoutie, Cioni, Garate (belauneko mina dauka baina), Kirchen, Contador, Pellizotti, Serrano, Vinokourov, Menchov, Frigo… bezalako txirrindulariak sar daitezke, hau da, tropelean izena eta fama dutenak. Aurreneko mendatean sor daitekeen ihesaldi honek hala ere beti moduan tropelak hartzen duen jarreraren zain egon beharko du etapa garaipena lortzeko modurik duten ikusteko.

Sailkapen nagusian ondo kokatuta dauden artean ez dut pentsatzen ezusteko handirik izango dugunik, nahiz eta aurtengo Tourreko mendaterik gogorrena igo beharrean izan, Galibier (Telegraphe aldetik). Atzo aurrean ikusi genituenak gaur ere hor ikusiko ditugula uste dut, agian errekuperatu baldin bada.

Helmuga non izango duten ere kontutan hartu beharrekoa da etapa irabazlea nor izango den jakiteko. Hain ezaguna den Briançon-eko harbidean gora egin beharko dituzte azken metroak eta hautagaiak berriro ere batera iritsi ezkero, Valverde murtziarra hautagai nagusi ematea beste aukerarik ez zaigu gelditzen.

Armstrong: “… paquete de cojones”

Horiexek izan ziren estatu batuarraren hitzak etapa amaitu ostean.

Gaizki ulertzera eraman bagaitzake ere, estatubatuarra Illes Balears taldeari buruz ari zen. Valverde 10. etapan Armstrongi gailendu zitzaion sprintean eta etapa bukatu ostean, laudorioak izan zituen Tourreko liderrak murtziarra eta bere taldearentzat. Euskal txirrindularientzat, berriz, ez zen egun oso ona izan.

10. etapa honetarako 5 maillot zoragarri izan ditugu lehen postuentzat, Dioni Galparsoro (Kaiku), Aitor Osa (Illes Balears), Iban Mayoz (Relax), Joseba Zubeldia (Euskaltel-Euskadi) eta Imanol Ervitik (Illes Balears) eskainitako maillotak. Garaileak IZURDE andoaindarra, mikelmani durangarra, Pass irundarra, arsu zarauztarra eta kontsejutxiki usurbildarra izan dira urrenez urren. Sailkapen orokorrean lider berria Ordiziako lander casado da.

Zorionak guztiei!

Somarriba bigarren aurtengo Giroan

Bizkaia-Panda Software-Durango taldeko txirrindulariak bigarren postuarekin konformatu beharko du Nicole Brandli suitzarra gailendu baitzaio. Joanek 1999ko eta 2000ko giroak irabazita, aurtengo Giroa zuen helburu, baina ez da posible izan.

Hala ere, ez da nolanahiko palmaresa Somarribarena: bi Giro (1999 eta 2000), hiru Tour (2000, 2001 eta 2002) eta 2003ko Kanadako mundialean erlojupekoan urrezko domina besteak beste.