Belaunaldi aldaketa ziklokrosean

Larrinaga Izarran, Euskadiko Txapelketaren garaileAmaierara iristen ari da 2014-2015 ziklokros denboraldia eta urteko lehiaketarik garrantzitsuenen bezperan ere bagaude: estatu zein munduko txapelketak. Nazioartean, denboraldia 2 ausentzia esanguratsuekin hasi zen. Alde batetik, Niels Albert falta zen. Bihotzeko arazo bat tarteko, iaz bizikleta zintzilikatu zuen medikuen aginduz. Eta beste aldetik, Zdenek Stybar txekiarra. Errepideko denboraldia erorketa baten ondorioz goiz amaituta, bazirudien iaz baino gehiago ikusiko genuela lokatz artean. Iaz, hiruzpalau lasterketa garrantzitsutan besterik ez genuen ikusi; oso maila altuan, hori bai. Eta aurtengoan, bere herrialdean, Tabor hirian, ortzadar maillota defendatzen ikustea espero genuen. Baina abuztuan Eneco Tourrean bezala, erorketa baten ondorioz lesio nahiko larria izan zuen urrian Herbehereetan, oraingoan ziklokross bat lehiatzen; eta ia ezinezkotzat jo zuten, bai berak, bai bere zuzendari Patrick Lefeverek ere, Taborrerako garaiz osatzea. Lehentasuna udaberriko klasikoetara sasoi betean iristea izanik, sorpresa handia litzateke Tabor-go irteeran ikustea.

Continue reading “Belaunaldi aldaketa ziklokrosean”

Kontuak kontu, ziklokrosik onena Igorreko Munduko Kopan

Beste urte betez, lokatzgaineko txirrindularitzaren ikuskizun handiak munduko espezialistarik onenak ekarriko dizkigu Euskal Herrira, azken orduko albiste ezkorrek gure lurretan dugun ziko-kros probarik handienaren egunerokotasuna astindu badute ere.

uci-cyclo-cross-world-cup-2009-igorre-zdenek-stybar-3

Ostegunean Zdenek Stybar munduko txapeldunak zitan egongo ez zela jakinarazi zuen; gabonak arte gutxi gora behera lehiaketatik kanpo egon beharko du, belaunean azkeneko asteotan izaten ari den arazo batzuk tarteko. Hori gutxi balitz, Espainiar estatuan aire-kontrolatzaileen eskakizunek eragindako gatazkak nazioarteko hainbat txirrindulariri Igorrera heltzeko lanak zaildu dizkio.

Nolanahi ere, eta hegaldien arazoa behar bezala konponduko denaren itxaropenaz (oraindik bertan ez direnek Mediterraneo aldetik errepidea hartzeko aukera izango dute bederen), Munduko Kopako probarik ikusgarrienak (Koksijde-koarekin batera) iragarpenak bete ahal izango ditu beste behin. Azken urteotan bezalaxe arazo ekonomikoek gora egin dute, jaso dituzten laguntzek behera egin duten hein berekotsuan seguru asko, baina antolatzaileek txirrindularitzazaleontzat oparia den hau bere horretan mantentzea lortu dute beste behin.

igorre2009

Gauzak horrela, Stybar iazko garailea irteeran izango ez dela jakinda, Niels Albert (txekiarraren faltan Munduko Kopako lidertza esku-eskura izango duena) eta Sven Nys-en arteko lehia behar luke biharko probak. Igorreko belardi bigunak nekez eutsiko dio azken egunotan botatako euriari, eta Munduko Kopako lasterketaren aurretik izango diren gainerako probek guztiok espero duten lokatzdia sortaraziko dute seguru. Horrenbestez, txirrindularien arteko aldeak areagotu egingo dira, eta horrek aipatutako bi flandestarrak aurrean nabarmentzea ekarri beharko luke. Bart Wellens-ek ere izan dezakeen zirkuiturik aproposenetakoa topatuko du, oinez egiteko zati dezenterekin (aurten gainera eskaloidun malda gehitu du antolakuntzak), baina joan den astean Gieten-en izandako erorketa gogorrak oinazerik utzi dion ikusi beharko da. Hauekin batera, Klaas Vantornout eta Bart Aernouts aipatu behar dira, aurten maila ona erakutsi badute ere oraindik garaipenen zakua hutsik dutenak. Kevin Pauwels-ek azkenaldian maila hobexeagoa eta garaipen bat erdietsi ditu, baina lokatzak normalenean gauzak zaildu beharko lizkioke. Aurreneko multzo honetan Francis Mourey frantziar txapelduna ere derrigorrean aipatu behar da.

Guzti hau Flandes aldean kontuak nahasi xamar diren unean gertatzen da. Hainbat kontu izan dira hizketagai azkeneko asteotan: Stybar-ek errepidera eman lezakeen jauzia (txekiarra antza Quick Step-ekin fitxatzetik gertu egon liteke), Sunweb taldeko buruzagiak bere gizonen errendimendu eskasak izango dituen ondorioak publikoki azaltzea (Vantornout alde batera utzita, desagertu xamar izan dira gainerakoak, Sven Vanthourenhout euren artean), edota Munduko Kopako probatan belgiar selekzioan sartzeko borrokak eragindako eztabaida (Dieter Vanthourenhout-ek hautatzaileari leporatu zizkionak batez ere, Koksijde-rako kanpoan geratu ostean, Telenet-Fideakoen alde argi egiten zuela esanez). Guzti honek interesa erantsiko dio gizon jakin batzuek egingo duten lanari.

egoitz_murgoitio_ciclocross_ermua_2010_murgoitio

Geurera bueltatuz, euskal txirrindularien artean zalantzarik gabe Egoitz Murgoitioren izena aipatu behar da. Euskal eta espainiar egutegian Javier Ruiz de Larrinagarekin lehia polita mantentzen badu ere, abadiñoarrak orain arteko Munduko Kopako lasterketak korritu izanak puntu dexente eta, batez ere, irteera puntuan postu egokia eskaini dizkio. Okerrik ez bada, Hirumet etxeko bizkaitarrak hirugarren lerrotik ekingo dio lasterketari, Koksijde-n ekin zion bezalaxe, eta Flandeseko kostaldean lortu zuen 23. postua hasiera batean behintzat aurkako zitzaion ibilbide batean erdietsi zuela kontuan hartuta, Igorren, etxekoen babesak eragingo dion grinarekin, 15 onenen artean izateko aukera izan dezake. Horrexek behar luke bere erronka. Ruiz de Larrinagak, bere aldetik, irteeran atzerago aterata, aurrerantz egin eta aurreko urteetako emaitzak hobetzea izango du helburu. Daniel Ruiz, David Juarez eta Erlantz Uriarte izango dira euskal partaidetza osatuko duten txirrindulariak.

Ikuskizuna eta gozamena beraz bihar Arratiako herri txiki honek eskainiko dizkiguna. Telebista bidez jarraitzeko modua izango bada ere, Igorrera bertaratzeak zinez merezi du, txapeldun handi hauek gertutik ikusteko aukera paregabea baita. Eta bide batez, antolakuntzak egindako ahalegina saritzeko modu bat ere bada.

Honekin batera, astelehenean Asteasun UCI-ko sailkapenerako puntuagarria den proba ere ospatuko dela gogorarazi behar da, beste klasiko bat gure artean. Albert eta Nys behintzat bertan izatekoak dira.

Argazkiak: cyclephotos.co.uk / mintegui / esciclismo.es

Ziklo-krosaren katea, berriz ere bueltaka

Urteroko legez, larunbat honetan jokatu den Lonbardiako Giroak eman dio amaiera errepideko denboraldi nagusiari (artean Japongo Kopa geratuko da, eta beste lasterketaren ere, bigarren mailakoa nolanahi ere), eta horrekin batera ziklokros-ak bere ateak parez-pare irekiko dizkigu. Gilbert-ek Italiako iparraldean eginikoak beste baterako utzi eta neguko espezialitateari gainbegiratua emango diogu honenbestez.

Berez denboraldia hasia da; dena den, sailkapenei dagokienez lehiaketarik garrantzitsuenak igandean izango du bere aurreneko zita, Aigle (Suitza)-ko Munduko Kopako probarekin.

Aurtengoa gainera gertutik jarraitzeko arrazoi askorekin datorkigu. Batetik, nola ez, espezialitateko izenik handienak beste behin aurrez-aurre ikusteko aukera izango dugulako. Zentzu honetan berrikuntza gutxi aipa daitezke aldez aurretik. Zdenek Stybar munduko txapelduna iaz hasitako agintaldiari jarraipena ematen ahaleginduko da, aurkari zuzen modura Sven Nys eta Niels Albert flandestarrak izango dituelarik. Baal-eko txapeldun handia pixkanaka gainbehera etortzen hasia bada ere, oraindik klaserik handiena duen espezialista dela baliatzen ahaleginduko da. BKCP – Powerplus-eko gazteak berriz iazko bigarren zatian izandako arazoak gainditu, egindako akatsak zuzendu eta urte horretako hastapenetan erakutsitako agintea berreskuratzea izango du jomuga. Honenbestez, hiru txirrindulari hauen artean ikuskizuna ia ziurtaturik dagoela esan daiteke, bigarren mailako erakargarri bereziekin beti ere: flandestarren tronua txekiar baten mehatxupean, Nys-Albert binomioan zeinek lurraldea poltsikoratuko, belaunaldien arteko lehia, etab. Europako lurralde txiki horren kirol egunerokotasuna asetzeko adina motibo bai behintzat.

Eta Lars Boom, zer? Bada, herbeherear erraldoiak aurtengo sasoian iazkoan baino ziklo-kros proba gehiagotan parte hartzeko asmoa azaldu du, baina burua %100-ean errepidean daukala ezkutatu gabe. Horren argigarri nagusia, aurten Alemaniako St-Welden herrian izango den munduko txapelketan ez izatearen erabakia.

Aurrez aipatutako hiru erraldoi horien ostean, eta Boom oso noizean behin ikusiko dugula jakinik, beste zenbait izen azaltzen zaizkigu. Eta hein batean, urtea ezusteko txikiekin hasi zaigu. Iaz Albert-ek denboraldia gupidagabeki hasi bazuen, aurtengoan ez da halakorik gertatu, Stybarrek irabazi bai, baina gauzak estuago izan baititu. Orain bi aste Namurren jokatutako GvA txapelketako aurreneko lasterketan Klaas Vantornout azkeneko itzulirarte parean izan zuen. Joan zen igandean berriz, Rudervoorden Superprestigioari emandako hasieran, Bart Aernouts adoretsua oso lehiakor azaldu zitzaigun, azkenean txekiarraren nagusitasuna onartu besterik izan ez bazuen ere. Horrexegatik, urteko aurreneko probetan ezusteko txikiren bat edo beste ikusteko aukera egon daiteke. Maila horretan iazko gaixotasuna ahazturik duen Bart Wellens handia egongo da, betiko Kevin Pauwels eta Sven Vanthourenhout-ekin batera. Multzo honetan beste nobedade bat Tom Meeusen gazte dohatsuaren nondik norakoa ikustea izango da, iazkoan 23-z azpikoen urtean guztien buru zela erakutsi ostean. Teknika handiko txirrindularia, gorengo mailan egingo duen aurreneko urtean asko espero da bere aldetik. De Knegt, Mourey, Franzoi, Simunek, Dieter Vanthourenhout (igandean Aigle-n izango da, Meeusen bera kanpoan utziz), Chainel (argi egun errepidea eta ziko krosa hobekien ustartzen dituen frantziar honekin), Bina, Page, Heule, Walsleben (Hoogerheiden gazteen munduko txapelketa eskuratu zuen alemaniarrak aurrerapausorik ematen duen ere ikustekoa izango da),… Azken urteotako izen antzekotsuak, bakoitza bere aukerekin.

Eta azkeneko gizon horiekin nolabaiteko lotura ezarriz, euskaldunen partaidetza aipatu behar da. Izan ere, bereizgarri gisa, aurten Munduko Kopa ia bere osotasunean lehiatuko duen taldean izango baita gureetako bat, Egoitz Murgoitio hain zuzen. Abadinotarrak urrats bat aurrera emateko intentzio osoa erakutsi du, eta Hirumet taldeko buru delarik, nazioartean inoiz baino proba gehiago lehiatuko dituela iragarri du, eta esan bezala, Munduko Kopa horien artean. Munduko onenen artean bere lekutxoa egitea du helburu, bere esanen arabera 15-18 onenen artean kokatzea. Hori dela eta aurrez aipatutako gizon horiekiko zeharkako erlazioa. Oinak lurrean (kasu honetan lokatzetan) izatea komenigarria izaten da alabaina, eta kasu honetan 20 espezialistarik onenen artean izatea ahuntzaren gauerdiko eztula ez dela argi izan behar da. Lehiakortasuna handia da horren ezaguna ez den jendearen artean ere, eta bestalde Munduko Kopako probek, oro har, gure orografian aurki daitekeenarekin alderatuz zirkuitu teknikoago eta batez ere azkarragoak aurkezten dituzte. Guzti hori bere azaletan baieztatzeko aukera izan du iragan asteotan, besteak beste Namurren jokatutako GvA proban bertan izan baitzen Murgoitio. Han 24. postuan sailkatu zen, Verstraeten, Van Amerongen edo Zlamalik bezalako txirrindulariak atzetik zituela. Bada zerbait. Nolanahi ere, ilusioz ikusteko moduko ekimena Hirumet taldeak aurrera eramango duena, eta geuretzako espezialitate zoragarri honen nazioarteko lasterketak jarraitzeko beste arrazoi bat.

Urte berezia norbaitentzat izango bada, ordea, David Seco-rentzat izango da. Busturiarrak aurtengo denboraldian esango dio agur hainbesteko ospea eman dion espezialitateari. Pozez beteriko kirol jarduera baten ostean, tartean saminen bat edo beste ere izan duena, hunkigarria izango zaion programa prestatu du, berak aukeraturiko plaza bakoitzari behar den bezala agur esan nahi baitio. Bere urte onenak pasa zirela jakinik, ezin esan datorren urtetik aurrera bere emaitzak faltan botako direnik, orain urte batzuk izandako mailak itzal luzea utzi baitu dagoeneko, eta oraindik-orain hala izaten jarraitzen du.

Eta ezin aipatu gabe utzi azkeneko urteotan euskal zein espainiar zirkuitoetan busturiarraren lekua betez etorri den Javier Ruiz de Larrinaga. Mundu mailako onenekin orpoz-orpo jarduteko aukera izan duen bakoitzean maila apal xamarra eman badu ere, gainerakoan erreferente handia dugu, eta denboraldiko aurreneko bi probetan garaipena erdietsi izanak halaxe izaten jarrai dezakeela pentsarazten du. Pozgarria litzateke dena den amezagarrak bere zale fidelei nazioarteko emaitza onen bat eskaintzerik izango balu. Beste arabar batek, Unai Yus gasteiztarrak hain zuzen, aurten ere lokatzetan zipriztinduta jarraitzeko asmoa du, eta azkeneko denboralditan eman izan duen maila kontuan harturik, aipatua izatea behintzat merezi du.

Kontuak kontu, asfaltoaren amaierarekin batera txirrindularitzaz gozatzeko aukerak bere horretan darrai, neguko espezialitate klasikoa dela medio. Ikuskizun honetara hurbiltzen denari ez zaio berehalakoan damutuko.

Belaunaldi aldaketa amaitzear dagoen ziklokros denboraldian

Igandean ospatuko da Tabor (Txekian) 2010ko Munduko Ziklokros Txapelketa eta bertako herritar bat, Zdenek Stybar, izango da irabazteko hautagai nagusietako bat. Niels Albert flandriarra izango da bere aurkari handiena. Biak izan dira azken egunerarte Munduko Kopan lehian ibili direnak. Azken froga Albert-ek irabazi zuen baina ez zuen nahikoa izan sailkapen orokorra irabazteko. Stybarrek 2. postuarekin eutsi zion Munduko Kopako lidergoari. Igorren irabazle ikusi genuen Stybar abenduan eta irabazle izan zen Tabor bertan ospatu zen Txekiako txapelketan ere. Ongi ezagutzen du bada ibilbidea eta herritarren babesean, faborito nagusitzat joko nuke.

larri1Gazteak dira biak (1986koa flandriarra eta 1985koa txekiarra), baina jada nagusi dira txirrindularitzaren neguko diziplinan. Sven Nys, azken urteetan ziklokrosean goitik behera nagusitu den gizona, aurrean izan dute denboraldi osoan eta halaxe izango dute igandean. Munduko txapelketak ez dira baina bere froga kuttuna izan eta 2005an soilik jantzi zuen ortzadar maillota. Aurten izan dezake azken aukera eta argi ibili daitezela gazteak, oraindik sua baitauka 33 urteko Nysek zangoetan.

Gure artean ere, belaunaldi aldaketa ematen ari da. David Seco guztiz desagertu da aurreko postuetatik eta baita bizpahiru urtetan aurrean ibili zen Unai Yus ere. Javier Ruiz de Ruiz de Larrinaga Amezagako mutilak iazko nagusitasuna sendotu du, nahiz eta tituluei erreparatuta iaztik pixka bat jaitsi dela dirudien. Euskadiko Txapelketan huts egin zuen, gehien kostatzen zaion zirkuitu mota lokaztu eta gogor batean. Dena dela, bigarren urtez jarraian irabazi ditu Espainiako Txapelketa eta Espainiako Kopa eta denboraldiko lasterketa garrantzitsuetan karrera ikusteko eta planteatzeko erakutsi duen gaitasunak gainontzeko txirrindulariak baino puntu bat goraxeago ibili dela erakusten du. Aurtengo sorpresa Egoitz Murgoitio izan da, Larrinagari aurrea hartuz Euskadiko Txapelketa irabazi zuena Iraetan.

Biak izango dira igandean Tabor-ko irteeran. Ez daukate lan erraza, baina 30 lehenengoetan sartzea emaitza ona litzateke bientzat. Aurreikuspenen arabera hotz egingo du eta ibilbide izoztu eta azkar bat topa dezakete bertan.

Argazkia: http://ruizdelarrinaga.com/

Veni, vidi, vici

Lars Anthonious Johannes BoomMaiatzaren aurrenekoa egun seinalatua izaten da langileen artean. Euren eskubideak aldarrikatze aldera, kalera atera ohi dira asko eta asko. Txirrindulariak ordea errepide gainera pedalei eragitera irteten dira. Urteroko legez, aurtengoan ere aipatu egunean Frankfurt-eko Sari Nagusia ospatu zen, lasterketa amaiera polit baten ostean Fabian Wegmann etxeko gizonak eskuratu zuena. Proba amaitu gabe aldiz txirrindulari asko eta asko geratu ziren, eta horien artean egun huraxe bera berezia izatea eragin zuen gizona: Lars Boom. Herbeheretarrak alemaniar lasterketa aukeratu baitzuen errepidera behin betiko jauzia emateko aurreneko proba gisa.

Ikusmina sortu zuen Rabobank-eko gaztearen debutak. Ez da gutxiagorako, 24 urte bete ez dituela izandako lorpenei erreparatuz gero. Iparraldeko Kanpainaren hasieran bera ikusteko itxaropenik egon bazitekeen ere, Hoogerheide-ko munduko txapelketan porrot egin ostean ziklo-kros proba gutxi batzuk lehiatu eta atsedenaldi luze bat hartzea erabaki zuen. Esan bezala, Frankfurt-en ez zuen helmuga gainditu, bai ordea lehiatu zituen hurrengo bi probetan, Herbehereetan biak ala biak: Batavus Prorace eta Dutch Food Valley Classic (Veenendal-Veenendal zaharra). Bietan Kenny Van Hummel gailendu zen esprintean, eta gure protagonistari kilometroak pilatzeko balioko zitzaizkion seguru asko.

Halaxe aurkeztu zen Belgikako Itzuliko irteeran. Denboraldiko bere aurreneko helburutzat hartu zuen, eta hala, esprintean erabaki ziren aurreneko hiru etapetan, ezkutuan ibili beharrean, noizbehinkako agerpenak egin eta esprintetan gain sariren bat edo beste pilatzeari ekin zion. Lasterketa ordea azkeneko bi saioetan zen erabakitzekoa. Ardenetan etapa gorabeheratsua lehena, eta 16 km. pasatxoko erlojuaren aurkako saio laua hurrena.

Etapa ikusgarria suertatu zen itzuliko laugarrena. Aurreneko erdian, ibilbideak aurkezten zituen muinoak zirela medio, lasterketa apurturik geratu zen. Ordurako, Borut Bozic liderra atzean geratua zen, eta lehia 40 bat txirrindularira mugatu zen. Ezagun zaharrak zituen inguruan Boom-ek: bertan ziren Sven Nys txapeldun handia, Niels Albert Hoogerheide-ko heroia, ta baita Klaas Vantornout ere (Walsleben eta Kloucek gazteez gain). Sunweb-eko flandestarrak La Redoute-n gora, helmugara oraindik ia 60 km. falta zirela, egin zuen bere azkeneko agerraldia. Hortik aurrera ehunka mugimendu izan zen. Walloniako inguruetatik ibili arren, flandestar erara korritu zen etapa, eta esan beharrik ez da, hori ikuskizunarentzako mesedetan izan zen.

Etapako kilometro erabakigarriak iritsiak zirela, Rabobank egoera on xamarrean zen, Boom-ek Nuyens, Clement eta Moerenhout lasterketan sarturik baitzeuzkan. Hala ere, Van Avermaet, Roelandts, Dekker (hirurak Silence-Lotto-koak) edo Ivanov bezalako gizonak oraindik aurrean ziren. Lehenago aipaturiko mugimendu horietako baten ondorio zen aurreneko ihesaldi bati ez zion Lars Boom-ek heldu, eta bazirudien hortik irten zitekeela lasterketako garailea. Bertan ziren Van Avermaet, Marcato, De Waele, Cornu, Albert (ikaragarria errepide gainean erakutsitako maila) eta Moerenhout. Rabobank-ek ordea erabakia egina zuen, eta atzetik Clement-ekin lehenengo erritmoa jarri eta ondoren Nuyens-ek astindu ederra eman zion jazarpenean ziren gizonen taldeari. Harik eta Vlijmen-eko luzeak benetako erasoa jotzea erabaki zuen arte. Ivanov eta Roelandts atzean geratu ziren (beste asko ordurako jokoz kanpo ziren), eta Bakelants eta Dekker izan ziren bakarrik jarraitzeko gai. Ordurako Bakelants eta Boom bera izan ziren saiatuenetakoak. Flandestarraren inguruan hitz egin izan genuen iaz Etorkizunekoen Tourraren harira, eta aurrerantzean izan ziur zeresanik emango duenaz. Alabaina, halako batean, helmugarako 10 km. baino gutxiago faltan zirela, Boom-i jarraitzeko indarrik gabe geratu zen. Ordekan. Dekker-ek jarraitu zion, eta Moerenhout -en laguntzari esker Boom-ek azkeneko kolpea jo eta aurrekoak harrapatzera heldu ziren. Sartzen ari zirela Albert-ek eraso gogorra jo zuen, baina behin betikoa Marcato eta De Waele bakandu zituena izan zen. Flandestarrak, Pro Tourrarengandik urrun ere gauza politak egin daitezkeela baieztatzen duten kastakoa bera, garaipen handia lortu zuen txirrindularitza egun zoragarrian. Liderraren garaikur den maillot beltza ordea esan beharrik ez da zeinek jantzi zuen. Eta egun hartan erakutsikoaren ostean, inork gutxik jartzen zuen zalantzan itzuliko sailkapena bereganatuko zuenik.

Eta halaxe izan zen. Dekker eta Cornu bezalako espezialista onak sailkapenean oso gertu bazituen ere, halako distantzian benetako animalia den Sebastian Rosseler izan zen bakarrik Iparraldeko Brabante-ko izarraren gainetik sailkatzeko gai. Bigarren postua erlojupekoan eta sailkapen nagusia berarentzat, errepidean handienen artean hilabete ere bete ez zuela.

Badira Herbeheretako harrobiak goi mailan fruiturik ematen ez dituela diotenak, baita gazteegi nabarmentzeak ezertarako balio ez duela gerora hori baieztatzen ez bada. Halako erakustaldiak, ordea, hortarako jaioak direnek bakarrik eman ditzakete. Ikusgarria baita ordekan, erlojuaren aurkakoan eta muino etzanetan barnean daraman indarra transmititzen ikustea. Hori frogatzeko hurrengo aukera Suitzan izango dugu seguru asko. Hemen da, eta luzerako geratzeko asmoz. Bera da, Lars Anthonious Johannes Boom.