2021ean lehiaketa hauek izatea espero dugu

Badoaz egunak aurrera urte berrian eta konturatu ordurako lehen lehiaketak bertan izango ditugu. Ondo bidean, Martxoan ekingo diogu 17. denboraldiari, ohi moduan Strade Blanche klasiko ikusgarriarekin.

Ondorengo lehiaketa hauek dira denboraldi honetan izate espero ditugunak:


Martxoa (6)

  • Strade Bianche (🚺) 2021-03-06
  • Strade Bianche (🚹) 2021-03-06
  • Paris-Niza 2021-03-07 / 2021-03-14
  • Tirreno-Adriatikoa 2021-03-10 / 2021-03-16
  • Milan-Sanremo 2021-03-20
  • Kataluniako Volta 2021-03-22 / 2021-03-28

Apirila (8)

  • Flandriako Tourra (🚺) 2021-04-04
  • Flandriako Tourra (🚹) 2021-04-04
  • Euskal Herriko Itzulia 2021-04-05 / 2021-04-10
  • Paris-Roubaix (🚺) 2021-04-11
  • Paris-Roubaix (🚹) 2021-04-11
  • Ardenetako Hirukoa (🚺) 2021-04-18 / 2021-04-21 / 2021-04-25
  • Ardenetako Hirukoa (🚹) 2021-04-18 / 2021-04-21 / 2021-04-25
  • Romandiako Tourra 2021-04-27 / 2021-05-02

Maiatza (2)

  • Italiako Giroa 2021-05-08 / 2021-05-30
  • Itzulia Women 2021-05-14 / 2021-05-16
  • Vuelta a Burgos Féminas 2021-05-20 / 2021-05-23

Ekaina (3)

  • Dauphine Kriteriuma 2021-05-30 / 2021-06-06
  • Suitzako Tourra 2021-06-06 / 2021-06-13
  • La Course 2021-06-27

Uztaila (5)

  • Frantziako Tourra 2021-06-26 / 2021-07-18
  • Giro Rosa 2021-07-02 / 2021-07-11
  • Donostiako Klasikoa (🚺) 2021-07-31
  • Donostiako Klasikoa (🚹) 2021-07-31
  • Tokio 2020 errepidekoa (🚹) 2021-07-24 eta 2021-07-28
  • Tokio 2020 errepidekoa (🚺) 2021-07-25 eta 2021-07-28

Abuztua (1)

  • Espainiako Vuelta 2021-08-14 / 2021-09-05

Iraila (2)

  • Munduko Txapelketak (🚺) 2021-09-19 / 2021-09-26
  • Munduko Txapelketak (🚹) 2021-09-20 / 2021-09-25

Urria (1)

  • Lombardia 2021-10-09

Guztira, emakumezko zein gizonezkoenak batuta, 28 lehiaketa izango lirateke 2021erako aurreikusten ditugunak.

Jabetuko zineten moduan, Itzulia Women gehitua genuen gure zerrendan baina atzo bertan Julian Eraso OCETAko presidentearen esanak bildu ditu Diario Vasco egunkariak, non Itzulia Women estreinatuko ez dela ziurtatu duen. Ez hori bakarrik, Itzulia bera ere kolokan jarri du Jaurlaritzatik iaz moduan pandemia kontrolpean izateko neurri zorrotzak izango balira.

Pena, horrenbestez Itzulia Women ez dela jokatuko ikusita, batez ere antolakuntzak haren berri orain 5 hilabete eskas inguru eman ondoren baitator, uztaila amaieran hain zuzen ere. Gogoratu lasterketa hau emakumezkoen Donostiako Klasikoa ordezkatzera zetorrela, beraz, 2021ean bederen, OCETAren eskutik ez da emakumezkoen lasterketarik izango.

Edonola ere emakumezkoen lasterketen aldeko apustua Tropelatik sendoa da ikusten duzuen moduan. Hori dela eta, Vuelta a Burgos Féminas gehituko dugu egutegi itxuroso bat osatuz.

Oraindik ez dugu guztiz finkatu egutegia pandemiak eraginda aldaketak izan baitaitezke. Horretaz gain, zuen iradokizunak ere gustura hartuko ditugu, beraz, eskura dituzuen komunikatzeko bideak erabilita jo dezakezue gugana: post honen ondoren iruzkinak jarrita, sare sozialen bidez, Telegrameko kanalaren bidez nahiz email bidez.

2021eko Munduko Txapelketak Bilbon jokatuko dira [inozentada]

2020ko Vuelta San Mamesen (argazkia: El Correo)

Tropelak jakin berri duenez, hurrengo urteko Munduko Txapelketak Bilbon jokatuko dira. 1997an Donostian ospatu ondoren, 24 urte beranduago euskal errepideetara itzuliko da ekitaldia. Juan Mari Aburto gaur eguerdian agerraldia egitekotan da Julian Erasorekin batera, OCETAko presidentearekin, prentsa ohar bidez jakin dugunez.

Izan ere, txapelketen antolakuntzaren ardura OCETAk bere gain hartuko du. “UCIk badaki mundu mailako antolakuntzarik onena gurea dela, batez ere ardo eta pintxo kontuetan!” kontatzen zigun Julianek algaraka. “Serio jarrita, badakizue nola hurrengo urtean Itzulia Basque Country eta Clásica San Sebastian Regionez gain, maiatzean Itzulia Woman ere antolatzekoak garela, emakumezkoen World Tour mailako hiru eguneko lasterketa” azaltzen digu Julianek, aitortuz helduen ingeleseko klaseak hartzen ari dela lasterketen izenak egoki esateko. “Hiru ala lau lasterketa antolatu, kasik berdin kostako zaigu!” dio Julianek. “Webgunea ere laster izango dugu prest. Badakizue, bisualagoa eta informazio garrantzitsuarekin, hau da, egun ditugun webguneak bezain onak” baieztatzen digu.

Jakitun zareten moduan, Bilbok Tourraren irteera hiri izateko asmoak ez dira ezezagunak. Hori dela eta, txapelketak antolatzea bitarteko pausu moduan beharrezkoa dela aipatzen digute udaletik. “Ez dago zalantzarik esperiantzia handiko lantaldea duela OCETAk eta esku onetan uzten dugula ekitaldiaren ardura” aipatzen digu udaleko ordezkariak. “Oso present dugu Sergio Padillari gertatu zitzaiona eta horregatik rotaflexak erosteko partida berezi bat gehitu dugu aurrekontuan” ziurtatu digute.

Ibilbidearen informazio zehatzak – GPS tracking eta abarrak – gaur bertan argitaratuko duten webgunean ikusgai izango direla bermatzen digute. Hori bai, oraindik ez dago argi webgunearen izena zein izango den, zalantzan baitira “campeonatosdelmundoBilbao2021.es” edo “GreatBilbao2021RoadWorldChampionship.eus” domeinuen artean. Hau guztia gaur bertan jakingo dugu.

Tropela prest Emakumeen Birari laguntza emateko

Ez da lehen aldia Agustin Ruiz de Larringanek, egungo Emakumeen Bira itzuliaren arduradun nagusiak, lasterketaren etorkizuna kinka larrian dela plazaratzen duena. Edonola ere, badirudi oraingo hau benetako agurra izan daitekeela.

Dakizuen moduan Tropela 3 urtez Emakumeen Biraren komunikazio digitala bultzatzen aritu zen, besteak beste webgune berri bat diseinatuz eta hiru hizkuntzetan informatuz, beti euskara lehenetsiz nola ez. Eta hori guztia Tropelako kideen lan boluntarioari esker. Antolakuntzaren parte gero eta ardura gehiago hartzeko proposamena ere luzatu genien, baina iazko edizioaren aurretik jaso genuen erantzuna gehiago gure beharrik ez zutela izan zen.

Bi urterako lortu zuen World Tour lizentzia Agustinek eta badirudi behin bere nahia lortu ondoren, lasterketa mailarik gorenera eramatea, eta bi urteko konpromisoa osatuta, jada bere zikloa amaitutzat ematen duela.

Tristea iruditzen zaigu Emakumeen Biraren etorkizuna horrela ikustea eta norbait antolakuntzaren ardura hartzeko asmotan bada, esan Tropela Elkartea berriro ere komunikazio lanetan laguntzeko prest izango duela. Horretarako gurekin harremanetan jartzea besterik ez luke izango.

Oharra: gustatu zaizue azken bi urteetako lasterketaren logo eguneratua? Jakin ezazue hau izan zela Tropela elkarteak Emakumeen Birarentzat egin zuen azken lanetako bat, hau ere musu-truk.

Itzulia, logo aldaketa batera mugatu den komunikazio estrategia “berria”

Gaur aukera izan dut Itzulia bertatik bertara bizitzeko Zarautzen. Eguraldi paregabea egin du, ezin uka, eta giroa ere paregabekoa izan da. Hoberena presiorik gabe joan naizela da, izan ere, Itzuliako webgune ofizial eta sare sozialak kudeatzearen ardurak alde batera uzteak lasaitasun handia ematen du. Era horretan, gustura egin dugu sinadura bilketaren jarraipena eta nola ez, gustura agurtu antolakuntzako eta batez ere prentsa aretoko kideak, azken urte hauetan ezagutu ahal izan ditugunak genituen ardurak tarteko.

Gogoa nuen komunikazio arduradun berriak, Borja Vergarak eta bere lantaldeak, Donostiako Klasikoatik kargua hartu zutenetik, bertatik bertara eta internet bidez, Itzulia honen zabalkundea nola gauzatzen zuten ikustea. Nioen moduan lau urteko esperientzia izan dut eta esan dezaket ez dela gauza bera egun bateko lasterketa, Klasikoa kasu, edo 6 egunetakoa, Itzulia. Continue reading “Itzulia, logo aldaketa batera mugatu den komunikazio estrategia “berria””

Tropela Elkartearen eta Euskal Herriko Itzulia zein Donostiako Klasikoaren arteko elkarlana eten da

Duela 4 urte OCETA elkartearekin (Organizaciones Ciclistas Euskadi / Euskadi Txirrindularitza Antolakuntzak) hasitako elkarlanarekin ez dugula jarraituko jakinarazi nahi du Tropela Elkarteak.

Tropela Elkartea OCETArekin lanean hasi aurretik egoera hau zen:

*  Euskal Herriko Itzuliak eta Donostiako Klasikoak ez zuten webgune propiorik. Egunkari baten azpidomeinu bat erabiltzen zuten webgune ofizial gisa, komunikazioa batez ere gaztelera hutsean izanik eta apenas eguneratua

*  Lasterketek ez zituzten sare sozialik

 

Hori horrela, eta OCETArekin adostasunean, Itzulia zein Klasikoarentzat webgune propioak garatu zituen eta kudeatzen aritu da Tropela Elkartea ordutik, baita sare sozialak zabaldu ere. Gorabeherekin, tartean arlo digitalari ematen zaion garrantzi txikia eta aurrekontu eskasa (Tropela Elkarteak bere gain hartu ditu garapenaren eta kudeaketaren hainbat gastu), baina 4 urtez Itzuliaren eta 3 urtez Klasikoaren webgune zein sare sozialen atzean egon gara.

Gure kudeaketa digitalaren ezaugarri aipagarrienak honakoak izan dira:

* Eleaniztasuna. Euskara ardatz izan duen baina 3 hizkuntzetan eman den komunikazio digitala (euskara, gaztelania, ingelesa)

* Profesionaltasuna. Txirrindularitzaren eta teknologia berrien azken aurrerapenen jarraipena eta ahal zein heinean aplikazioa, World Tour mailako beste lasterketen pare

* “Itzulia” zein “Klasikoa” marka edo izenen erabilera, lasterketen identitate propioa indartu eta nazioarteko eragina handitzeko

 

Aurten baina, antolakuntza barruan izan den egitura aldaketarekin batera egoera guztiz aldatu da. Norberak bere irakurketak egingo ditu, baina gure ikuspuntutik ezin dugu esan onerako izan denik. Hasieratik konfiantza falta ikaragarria eta gure lanaren inguruko ezagutza falta handia sumatu genuen oraingo zuzendaritzaren aldetik.

Aurtengo Itzulian lanean aritu gara, OCETAk hala eskatuta, baina antolakuntzaren ikuspegia oso desberdina dela nabarmen ikusi dugu. Arestian aipatutako kontuez gain, biziki kezkatu gaitu antolakuntzak hizkuntza kudeaketaren inguruan azaltzen duen arduragabekeriak. Horren adibide argiak dira prentsa arduradun berriaren izendapena eta euskarazko domeinuen eta traolen erabileraren inguruan etengabe azaldu dizkiguten zalantzak.

Egoera deseroso honetan, Tropela Elkartearen eta OCETAren arteko lankidetza hemen amaitzen dela jakinarazi nahi dizuegu. Tropela Elkartea, beraz, ez da Euskal Herriko Itzuliko eta Donostiako Klasikoko webgune zein sare sozialen arduradun izango, nahiz eta guk horretarako gogoa adierazi eta proposamen sendo bat aurkeztu antolakuntzari.

Eta ezin uka kezkatuta gaudela. Azken urteetan egindako lana, eta euskarari, internazionalizazioari eta teknologia berriei dagokienez emandako urratsak ezerezean geratzeko arriskua hortxe baitago.

Tropelaren jarraitzaileei honen berri eman beharrean sentitu gara eta 4 urte hauetan proiektu honetan lagundu gaituzten kide, garatzaile, kazetari, argazkilari, txirrindulari, talde eta beste hainbat lagunei gure esker ona adierazteko ere aprobetxatu nahi genuke. Beraiek gabe ezinezkoa izango baitzen urte hauetan egindako lana burutzea.

Guk zabalduriko bide eta lan ildoak mantenduko diren esperoan, onena opa diegu Itzulia eta Klasikoari, gu guztion lasterketak baitira.

 

PDF Euskaraz

PDF Castellano