Etiketa Artxiboak:Boonen

Gilbert denboraldi amaieran jaun eta jabe

Gilbert. 2009ko Lombardiako Giroan garaipenaTxirrindulari denboraldia aurtengoz atzoko Lombardiako Giroarekin amaitutzat ematen da. Tropela.net-en Munduko Txapelketarekin amaitu ziren lehiaketak, baina tartean behin zerbait argitaratzeko behar besteko informazioa izango denez, horri ekin nahi diot post honekin hurrengo lehiaketa iritsi artean.

Gaurkoan Gilbertez hitz egingo dizuet. Ikaragarria izan dira Belgikarrak azken hilabete honetan lortu dituen garaipenak: Coppa Sabatini, aurreko igandean Paris-Tours, ostegunean Piemonteko Giroa eta atzokoan Lombardiako Giroa. Zalantzarik gabe argi geratu da egun bateko lasterketatan Gilbertek zer esan asko ematen duela. Bere esanetan argalago iritsi omen da denboraldi amaierara eta horrek lanak asko erraztu omen dizkio. Taldekideen lanak ere, zalantzarik gabe, bere zerikusia izan du atzoko kasuan bezala (Lloyd eta Evansek ederki lagundu zioten). Argi geratu da horrelako lasterketatan txirrindulari gutxirekin helmugara iristen denean (atzokoan Samuel Sanchez-ekin, aurreko igandean Bozic eta Boonen-ekin) Silence-Lottoko klasikomanoak ez duela hutsik egiten.

Urte osoari begirada bat emanda, azken asteotan lortutako garaipenez gain, Giroko 20. etapan lortu zuen garaipena eta Ster Electrotoer 5 eguneko itzulia (4. etapan garaipena lortu zuen) irabazi dituela jabetuko gara.

Hurrengo denboraldiari begira jarrita, Gilbertek lehen jomuga Liège-Bastogne-Liège lasterketan omen du. Gogoan izango ditugu udaberria iristen denean Belgikarrak esandakoak.

Greipelen bigarrena esprintean

Greipel. 2009ko Vueltako 5. etapa garaileAurreratu bezala, gaur Vinarosen amaitu den etapa ere esprintean amaitu da. Bigarrengo aldiz, eta oraingo honetan esprinter nagusiak etapa garaipenaren esprintean sartuta, Greipelek bere Vueltako bigarren garaipena lortu du jarraian Boonen eta Bennatiren aurretik. Honenbestez, bi garaipenek emandako gain sariei esker, Vueltako lider jarri da Columbia-HTCko txirrindularia. Taldearentzat, berriz, hirugarren garaipena.

Gaurko etapak esperotako gidoia jarraitu du. Beno, esperotakoa baino motelagoa. Izan ere antolatzaileen aurre ikuspenik motelenak ere azkar geratu dira gaurko etapan, eta Greipelek helmuga zeharkatu duenean 18:00ak gertu ziren. Beharbada jasan behar izan duten beroak bere eragina utzi du tropelean.

Lehen kilometroetan eguneko ihesaldia sortu da. Tropeltxoan Aitor Hernandez txirrindulariaz gain Lopez Gil, El Fares, Sanchez Pimienta, Pronk eta Serafín Martinez bildu dira. Hauek azken 20 kilometroetara iritsi arte ihesaldian jarraitu dute, baina une oro tropelak kontrolpean izan du aurreko tropeltxoa. Hori bai, Aitor Hernandez ermuarrak etekina atera dio ihesaldiari eta Boom-i mendiko maillota kendu dio lortutako puntuei esker. Gai izango al da maillot horri eusteko? Beharbada igandera arte bai, baina hortik aurrera…

Vinarosera iritsi aurretik, antolatzaileek helmugatik 8 kilometrotara gaintxo bat zuten prestatua. Bigarren mailako bide batetik joan dira Ermitako gaina igotzeko eta hor De la Fuentek lehenik eta gero Gilbertek erasoa jo dute. Espainiarraren saiakera ez da behar besteko gogorra izan, baina bai belgikarrarena.

Silence-Lottoko txirrindularia tropelari tartea 20 segundoko tartea ateratzen zion 4 kilometroren faltan. Etapa garaipena eskuratzen bazuen lasterketako lider ere jarriko zen Greipelek egin duen bezala. Bazirudien ondo zihoala, baina atzetik tropelak ez du barkatu eta Gilbertek, ustu-ustu eginda, amore eman behar izan du. Esprinta jokatu behar zen.

Gaurkoan esprinter faborito guztiak aurrean ziren baina azken bihurgunean Ciolek erori egin da. Ez dirudi ezer larririk izan duenik baina etapa garaipenaren lehiatik kanpo geratu da. Azkenean, esan bezala, nagusitasunez lortu du garaipena Greipelek Boonen eta Bennatiren aurretik.

Aitor Hernandez bidoi eramailea

Ez dakit etapa ikusteko aukera izan duzuen, baina ikustekoa izan da. Tropelean ohiko “gregarioek” beren taldeetatik ur bidoiak hartzen aritu dira gainontzeko taldekideei emateko, esan bezala bero baitzen Tarragona aldean. Helmugarako 40 kilometro inguru falta zirela, eguneko ihesaldia aurretik zela, tropeltxoak minutu bateko errenta zuen. Euskaltel-Euskadiko zuzendariak ihesaldiaren amaiera iristen ari zela edo pentsatuko zuen (besterik ez zait bururatzen), eta Aitor Hernandezi banatu beharreko bidoi guztiak eman dizkie! Barkatu, baina nik ez dut oso ondo ulertu. Gizajoak gutxienez 8 bidoi izango zituen soinean. Delgado eta De Andresek arrazoi ezberdinak eman dituzte gertaera ulertzeko, baina bukaeran txiste eta guzti egiten aritu dira. Eta ez zen gutxirako! Mandoa baino kargatuago (zer, 2-3kgr soinean?) hor ari zen erreleboak ematen.

Noski, tropelak ez zuen nahi ihesaldia oraindik amaitzerik (ohikoa den bezala) eta ihesaldiak beste 20 kilometrotako bizia izan du. Ordurako Aitorrek zituen bidoi guztiak gainontzeko ihes-kideen artean banatu ditu. Seguru adiskide gehiago egin dituela keinu honekin. Ikustekoa, benetan.

Cancellara motoen pare

Cancellara. Vueltako 1. etapan garaipenaBai, egia da. Beharbada gehiegizko konparazioa izan da, baina suitzarrak 4,8 km-tako motoak aritzen diren zirkuituan azkarrena bera dela erakutsi du 54km/h bataz-besteko abiadurarekin. Motoen zirkuituan bihurguneak ere etzan-etzan eginda eman ditu. Zalantzarik gabe erlojuaren aurkako espezialista bikaina da Cancellara eta gaur ere hala erakutsi du.

Bazirudien protagonista euriak izan behar zuela. Erlojupekoa 15:30ak inguruan hasi da eta lehen irten direnei lur lehorra egokitu zaie eta horien artean denborarik onena markatzen Kreuziger izan da 5’37”ko markarekin.

Euria hasi du eta lurzorua asko busti da eta TVEkoek transmisioari ekin diotenean nabarmen ikusten zen txirrindulariak ez zeudela arriskatzeko. Horren adibide Barredok irteerako maldan izan duen erorikoa. Hala ere, faborito nagusiak irten aurretik, eguraldiak hobera egin du eta lasterketarako prestatutako zirkuitua izaki, azkar lehortu da beranduago irten diren txirrindularien mesedetan.

Lur lehor horretaz aprobetxatzen lehena Mouris izan da. Vacansoleil taldeko txirrindulariak ezustekoa eman eta 3 segundoz hobetu du txekiarraren marka. Kontuan hartzekoa lehen etapa honetan Vacansoleil taldeko kideak egin duena, izan ere taldea holandarra Vueltak gonbidatutakoa baita. Hasiera ona hauentzat.

Eguraldia hobera zioan eta faboritoak zirkuituari ekiten hasi dira. Erlojupeko laburra izanik begik esprinterretan jarriak nituen, hauek gaitasuna baitute denbora gutxian esfortzu handiak egiteko. Horren adibide Bennati izan da, Mouris eta Kreuzigerren artean sailkatu baita. Beranduago zen, ordea, Boonen flandestarra lanak bukatzekoa eta bikain aritu da Quick Step-ekoa. Denborarik onena markatzera iritsi da, 5’29”. Ez nuen uste Boonen hain ondo ibiliko zenik, baina gaurko etapari gogotsu ekin dio zalantzarik gabe.

Farrar zen hurrengoa iristen. Estatu Batuarrak garaipen aunitz eskuratu ditu azken egunetan eta oso motibatuta zetorren. Bere helburuetako bat gaur urre koloreko maillota janztea zen, baina Boonengandik 3 segundora helmugaratu da. Sailkapen nagusikok txirrindulariek denbora onak egin dituzte, baina ez etapa irabazteko modukoak espero zen bezala. Aipatutako txirrindulariak helmugaratuak zirela, Cancellara jotzen zen denbora hobetzeko hautagai.

Esan bezala, kilometro gutxiko erlojuaren kontrako lana izaki, garaipena esprinterren artean izango zela uste handiagoa nuen Cancellara berarengan baino. Baina argi dago oker nintzela. Cancellarak izugarrizko erlojupekoa egin eta 9 segundotan hobetu du Boonenen denbora. Merezimendu osoz beretzat etapa garaipena eta lasterketako lidergoa.

Sailkapen nagusiko faboritoei dagokienez, gaurkoa trantsizio egun bat besterik ez da izan eta postuetan alde handiak egon badaitezke ere, denborei dagokienez tarteak ez dira nabarmenak. Beraz, esan daiteke, aurrerago ala atzerago, guztiak espero bezala aritu direla. Hori bai, nabarmentzekoa Liquigasek emandako erakustaldia, lehen 10 postuetan lau txirrindulari sailkatu baitira.

Euskaldunei dagokionez, Imanol Erviti, David Herrero eta Markel Irizarren lanak gogoratu nahiko nituzke, 16, 17 eta 23. postuetan sailkatu baitira.

Bartzelonako kaleetako erorketak protagonista

6. etapa. Erorketak protagonistaGaurko etapak ezaugarri nagusi bat izan badu, Bartzelonako kaleetan izan diren erorketa kopurua izan da. Uztailean euri oso gutxi egiten omen du Bartzelonan, baina gaurkoan estatistiketako daturik okerrenak bete dira eta euriak protagonismoa hartu du.

Ihesaldia sortu da gaurkoan ere. Protagonistak Millar, Auge eta Chavanel ziren hasieran, baina Amets Txurrukak gaur bere doaiak erakusteko irrikaz zen eta hala egin du. Zoragarri ibili da Etxabarriko txirrindularia eta aurreko hirukotearekin bat egitea lortu du tropeletik ihes eginda. Laukotea genuen, beraz, etaparen garaipenaren bila. Esprinterren taldeek, ordea, atzokoan Voecklerrek lortu zuen bezalako ezusteko garaipenik ez zuten nahi, eta kontrolpean izan dute ihesaldia. Gainera gaurko etapan Columbia-HTC taldeaz gain Rabobank, Cèrvelo, Quick Step eta Milram taldeak ere interesa zuten gaurkoan Montjuic-eko maldan baitzen helmuga eta holako iritsieratan, ikusi dugun bezala, Cavendish ez da hain azkarra.

Cote de Corneira igotzen ari zirela, Bartzelonara iritsi aurreko portua, Millarrek aurrera egin du eta tropeltxoari tartea atera dio. Txurrukak atzetik jarraitu dio eta tropeltxoa banatu egin da. Chavanelek eta Augek (mendiko maillota eskuratzeko beharrezko puntuak pilatuta) amore eman du atzetik Astanako txirrindulariek lasterketa buruan zirela sendo baitzetozen. Malda hauetan Pauriolek aurrera egitea lortu du eta Amets Txurrukarekin bat egin du Bartzelonako kaleetara iritsi aurretik. Atzean, berriz, tropelean taldeak antolatzen hasi dira ihesaldiko azken txirrindulariak harrapatzeko eta Millar, bien bitartean, erlojupeko bailitzan, ondo ari zen tartea mantendu nahian.

10 kilometroko pankartan Amets Txurruka eta Pauriolen ahaleginak bertan behera geratu dira, baina aipatzekoa, berriro ere gaurkoan Euskaltel-Euskadiko txirrindulariak egindako ahalegina, benetan txalotzeko izan baita saririk lortu ez duen arren.

Boonen helmugan erorketaren zauriekinTropela abiadura hartzen zihoan heinean eta lur bustiari bihurguneak gehitu zaizkienean erorketak. Lehen erorketan Rogers eta Haussler (hau gaurko etapan faborito nagusienean nuen) izan dira tartean, beranduago Euskaltel-Euskadiko txirrindulari bat eta beste zenbait erori dira, beste batean Boonen bera izan da erori dena eta etaparen lehiatik kanpo geratu dena… Erorketa ugari eta tropelean zatiketa handiak izan dira.

Azken metroetan bazirudien Freirek irabazi behar zuela, motibazio eta kokapenak hala pentsatzera eraman baikaitu, baina azkenean Hushovd norvegiarrak aurre hartu dio kantabriarrari eta etapa bereganatu du.

Aurrez aipatutako erorketen ondorioz kaltetuenen artean Rogers izan daiteke. Dakizuen bezala atzo Gesinkek erorketa izan zuen eta azterketa egin ondoren esku muturra hautsia zuela esan eta aurtengo Tourrari agur esan beharrean izan da. Rogers ere egoera berean aurki dezakegu bihar. Bihar ikusiko dugu, beraz, gaurko etapan zenbat baja eragingo dituen.

Tropela, esan bezala, zatituta iritsi da eta horrek sailkapen nagusian aldaketa eragin ditu. Euskaldunen artean nabarmenena Haimar Zubeldia eta Mikel Astarloza izan dira, lehena 15. posturaino eta Pasaiatarra 47. posturaino liderrarengandik 4’04”ra.

Bihar Pirinioetako lehen etapa. Ikusmin ikaragarria eta faboritoak nola dauden erakutsiko digutena. Armstrong, Contador, Evans, Leipheimer, Sastre, Menchov,… hauek ezingo dute hutsik egin garaipenaren lehian jarraitu nahi badute, batez ere gazte ugari baitago biharko etaparen zain eta ezustekoren bat emateko prest!

Argazkiak: cyclingnews.com

Boonen eta Astana hizpide bezperatan

Tom BoonenAzken unera arte Frantziako Tourrean denetarik gertatu daiteke. Orain bi urte zenbaitek gogoratuko duzue zer nolako nahastea eragin zuen Puerto Operazioak. Nahastea baino txikizioa hitza bera egokiagoa izan daiteke 2006ko Tour atari hura definitzeko.

Gaur ez noa dopina aipatzera (Dekkeren kasua adibidez), baina bai Booneni jazo zaiona. Dakizuen bezala orain aste batzuk kokainarekin positibo eman zuen berriro ere belgikarrak. Bai, iaz gizajoa Tourretik kanpo geratu zen beste kontrol batean positibo eman zuelako (festa zalea izango da eta ezin ekidin!). Hala ere, aurtengoan ez dute zigortu eta atzo, Monacon zegoela, dudako txirrindularia bazen, gaur lehiatzen utziko diotela konfirmatu dute. Iritzi bat ematekotan, Belgikako txapeldunak 2009ko Tourra lehiatzea merezi duela esango nuke ASO kontra azaldu bada ere. Honek gure kinielan aldaketak egitera bultza al gaitzake? Ez dakit, baina kontutan hartzeko txirrindularia behintzat badelakoan naiz.

2009ko Tour bezperako prentsaurrekoa: Bruyneel eta ContadorIkusmin ikaragarria eragin duena, berriz, Astana taldea izan da. Atzo non edo non irakurri nuen Contador eta Armstrong ez zirela prentsa aurrera batera agertuko eta hala izan da. Bruyneel eta Contador bakarrik agertu dira, eta oraindik ongi ulertzen ez dudan arrazoiengatik, guztioi taldeko liderra Contador dela adierazi digute. Contadorrek aste honetan adierazi du presio gehiago sentitzen duela aurten orain dela 2 urte baino eta egia esan, ez dut uste horrek onik egingo dionik. Dagoeneko mundu guztiak Tourreko faborito nagusi bezala jo izanak espainiarra urduri jarri badu, zergatik atera bezperan prentsa aurrera talde burua bera dela esanaz? Ez dakit ez ote den Bruyneelen amarruren bat gainontzeko taldeak nahasteko.

Armstrong eta Bono 2009 Tour bezperan zerbait hartzenArmstrong–Contador binomioaz hitz egiterakoan, eztabaida Contador–Leipheimer-en aldera pasa nahi izan du gogora ekarriz 2007ko Tourrean bi taldekideen arteko aldea minutua baino txikiagoa izan zela. Zein da Bruyneelen asmoa? Armstrongek egin dezakeenari garrantzia kendu eta gainontzeko taldekideen artean banatu presio hori? Badirudi Armstrongek aurten batzuk espero duguna baino gehiago egin dezakeela, eta taldeko zuzendariak ere hala pentsatzen duela. Hori da nik jaso dudan inpresioa.

Armstrong bitartean gaur lasai ibili da Bono U2ko adiskidearekin. Ez zaio presiorik nabari honi, ez?