Euskara, teknologia eta txirrindularitza
Gazteak indartsu datozela kontatzen digu Egoitz Lizaso (@elizaso) 2020ko Frantziako Tourreko 9. etapa honetan. Etapa garailea Pogacar (UAD) izan bada ere, urte berekoa den Hirschi (SUN) gazteak ere indartsu dela erakutsita 90km bakarrean egin ditu eta hirugarren sailkatu da. Mikel Landa (TBM) bikain indartsuenen alboan eta Adam Yatesek (MTS) denbora galduta, lider jarri da Roglic (TJV) Jumboko taldeburua.
Iritsi da lehen mendiko testa. 2020ko Frantziako Tourreko 4. etapa lehen mailako mendatean amaitzen zen eta gidoia erdizka bete dela esan daiteke. Ihesaldi bat osatu da, baina garaipena sailkapen nagusiaren lehian diren txirrindularien artean erabaki da. Hori bai, erasorik ez eta esprint itxura hartu du amaierak. Tropeleko hautagai nagusietako batek eraman du garaipena, Roglicek (TJV), baina Alaphilippek (DQT) ondo eutsi dio lidergoari bosgarren sailkatuz. Mikel Landa (TBM) izan da lehen euskalduna eta ondo murgiarra. Hau eta 5. etaparen inguruko aurreikuspena Egoitz Lizasoren (@elizaso) eskutik entzungai duzue podcast berri honetan.
Denbora asko pasa da azken itzuli handia amaitu zenetik, iazko Espainiako Vuelta amaitu zenetik. Iritsi da ordua, azkenean, lehen itzuli garrantzitsua jokatzeko: 2020ko Frantziako Tourra.
Egoerak eskatzen duen moduan, ibilbidea, COVID-19tik babesteko antolakuntzak kaleratu duen protokoloa, eta nola ez, kiniela bera errepasatzen dute lau solaskideek. Eneko Garate (@egarate), Iban Perez (@piban), Lander Garro (@landergarro) eta Egoitz Lizaso (@elizaso) arduratu dira solasaldi honetan aurtengo Tourrerako beharrezko informazio eta eztabaida gaiak podcast honetan biltzen.
Dakizuen moduan, lehiaketa bakoitzerako multzoak prestatzen ditugu. Hauek erabakitzerako orduan, gehienbat lasterketa mota – klasikoa, itzulia, ibilbide mota,… – eta izan daitezkeen txirrindularien baitan osatzen ditugu. Normalean 8-10 egun lehenago irekitzen ditugu kinielak, baina itzuli handien kasuan – Tour, Giro eta Vueltan – 14 egun lehenago ere izaten da informazioa fidagarriagoa lehenago izaten baita.
Aurtengo urtea, ordea, desberdina izaten ari da. Guztiok ondo dakigun moduan, COVID-19ak gure bizitzak guztiz baldintzatu ditu eta baita txirrindularitza bera ere. UCIk egutegi berria argitaratu zuenean, jada Giroa ez zen lehen lasterketa izango eta horren ordez Tourra jarri zuten. Horretaz gain, lasterketen itzulera Tourra baina hilabete lehenago izan da non urte arrunt batean hilabetez aritzen diren txirrindulariak lasterketa desberdinetan lehian.
Kontuak kontu, guk nahiko argi genuen aurtengo hautagai nagusiak Bernal (INS) Dumoulin (TJV) eta Roglic (TJV) izango zitezkeela, baina hauekin batera beste multzo bat ere sortu genuen Froome (INS) – 4 Tourren garailea) -, Kruijswijk (TJV) – iaz podiumean izan zena Bernal eta Thomasen atzetik – eta Thomas (INS) bera – iaz bigarren, eta 2018ko garailea-.
2020ko Tourreko kiniela abuztuaren 13 gauean ireki genuen, Dauphine Kriteriumeko bigarren etapa amaitu ostean. Egia da INEOS taldeko biak ez genituela mailarik egokienean ikusi eta zalantzak zeudela batez ere Froomekin – sasoiaz gain, hurrengo urtean Israel Start-up Nation taldean izango baita-. Herbeheretarraren kasuan, aldiz, Dauphineren 4. etapan, jada kinielak egiteko epea irekita, eroriko bat izan eta lasterketa utzi beharrean izan zen. Ez zen larria izan eta errekuperatuko zela pentsa zitekeen, baina atzo jakin genuen moduan ez da horrela izan. Ez ahaztu eroriko asko izan zirela etapa horretan eta txirrindulariek ere protesta egin zutela segurtasuna aldarrikatuz.
Egoera honetan, asteazken honetan, INEOS taldeak ez Froome ezta Thomas ere aurtengo Tourrera ez eramatea erabaki du. Batari Vuelta irabazteko helburua jarri diote eta besteari Giroa – akaso Evenepoelen lesioak erabakian zerikusia izan dezake? -. Horrenbestez, Kruijswijk soilik geratzen zen multzoan. Bada atzo, berak eta taldeak jakinarazi zuten moduan, erorikoa espero baino larriagoa izan zen eta Tourrean ez da izango. Horrenbestez, “Hautagai nagusiak 2” multzo hori umezurtz geratu zaigu.
Dakizuen moduan, Tropelak 15 urte daramatza sarean eta aurtengo Tour hau 16. Tourra izango da. Ez da lehen aldia horrelakoren bat gertatzen zaiguna.
2006ko Tourrean “Hautagai Nagusiak” multzoan bi txirrindulari genituen: Basso (CSC) eta Ullrich (TMO). Biak ziren faborito eta bietako bat aukeratu beharra zegoen. Tourra abiatu aurretik, ordea, Operación Puertoren berri eman zen eta bi txirrindulariak Tourretik kanpo geratu ziren. Multzoa, beraz, ezerezean geratu zen baina bat aukeratu behar zen, orain gertatu zaigun moduan. Joan ala ez joan, bat aukeratu beharra dugu.
2006an izan zen moduan, oraingoan ere ezer gutxi aldatzen da jolasari dagokionez. 26 txirrindulari izango ditugu guztiok kinielan, baina 25 izango dira puntuak emateko aukera izango dutenak. Horiek izango dira ondo aukeratu beharrekoak.
Zorte on guztioi eta ea Tour on bat ikusteko moduan izaten garen!
Denbora tarte batez geldirik izan ondoren, denboraldiari berrekiteko moduan gaudela ikusita, Iban Hernandez (@piban) eta Egoitz Lizaso (@elizaso) mikrofonoen aurrean jarri dira. Egutegi berriari errepasoa egiteaz gain, azken egunetako zenbait berri ekarri dituzte audio berri honetara. Bagatoz bueltan!