Kategoria Artxiboak:Lehiaketak

2009ko sari banaketa ekitaldia urriaren 2an

2009ko Frantziako Tourreko sariakGaur bukatu da 2009ko Tourra eta berarekin batera Tropela.net-eko lehiaketa. Aurtengoan dakizuen bezala 10.000 parte hartzailetik gora izan dira eta sekula baino meritu gehiago du Tropela.net-eko lehiaketa irabazteak. Aurrez esan bezala, eskerrak eman nahi dizkizuegu guztioi lehiaketa handi honetan parte hartu eta gurekin txirrindularitzaz gozatu izanagatik.

Dakizuen bezala sari dezente genituen aurtengo ekitaldian parte hartzaile guztien artean banatzeko. Tropela Elkartea hurrengo egunetan zehar saritu guztiekin  jarriko da harremanetan, baina dagoenekoz jakin arazi nahi dizuegu urriaren 2an izango dela sari emate ekitaldia. Ekitaldi honetan denboraldi guztian zehar izango diren lehiaketetako sariak banatuko dira, horien artean 2009ko Tourraren azken lehiaketa hau. Saritu guztiak gonbidatuta zaudete sari banaketa ekitaldi honetara. Ekitaldi honen inguruko informazio gehiago emango dugu hurrengo egunetan.

Lehiaketako irabazleei dagokionez, 2009ko Frantziako Tourreko irabazlea mikel10 azpeitiarra da. Berarentzat izango da Eroski Bidaiak-ek emandako Teneriferako bidaia zoragarria. Zorionak, beraz, mikel10!

Sailkapen nagusian bigarren RODILLO donostiarra izan da. Honek 7.112 puntu eskuratu ditu, mikel10-ek baino 195 puntu gutxiago. Berarentzat izango da Kiroljokoak eskainitako mendi bizikleta. Podiuma osatzen, hirugarren posturako dugun saria, Atxaspi Hoteleko relaxa asteburua, Zarautza joan da eta irabazlea ZenonJaskula izan da.

alaika bergararra podiumetik 4 puntura soilik geratu da eta berarentzat izango da Zarauzko Olatu hoteleko asteburua. Bosgarren postua zumaiko San-ek lortu du eta Rezola sagardotegirako 6 pertsonentzako otorduaz gozatzeko aukera izango dute berak eta bere 5 adiskideek. Seigarren postua Zaldibiako zaldibik irabazi du eta honentzat 4 pertsonentzako otordua izango da Rezola sagardotegian. Mendaroko j.voight-ek ere otordua izango du sagardotegian, baina kasu honetan 2 pertsonentzat.

8. postuan zestoar bat sailkatu da, Mardu, eta berarentzat Hernialdeko Ostatuan 2 pertsonentzako otordu bat izango da. 9. eta 10. postuetarako Jakion-ek eskainitako otar eder bana dugu banatzeko eta sarituak bringi zumaiarra eta maryland errenteriarra izan dira.

Sari hauetaz gain, herrietako eta eskualdeetako sariak zeuden jokoan. Irabazleak zeintzuk izan diren ikusteko Sarien atalean begira dezakezue.

Hauetaz gain, egunero etapetan irabazle izan zaretenek euskal txirrindulariek emandako maillotak irabazi dituzue. Sarituen zerrenda hurrengo egunetan zehar argitaratuko dugu.

Nahita ala nahi gabe?

Atzo askok ikusi genuen Parisko zelai eliseoetan Alberto Contador (Astana) espainiarra Frantziako Tourreko podiumeko gailurrera igotzen bere ondoan Andy Schleck (CSC) eta inoiz baino serioago egon zen Lance Armstrong (Astana) amerikarra. Eta asko eta asko jabetu ginen entzuten zen ereserkia ez zela ondo ezagutzen dugun espainiarra. Zer gertatu zen ordea?

Gaur goizean Sustatun irakurri dudanez jarri zuten ereserkia daniarra zen eta han zeuden agintarien haserrea baretzeko taldekako sailkapeneko irabazleak igo zirenean, Astana talde Kazakhastandarrekoak, orduan jarri zuten himno espainiarra. Nire susmoak plazaratu nahi ditut hemen, honelako antolakuntza izanik ez baitut uste nahi gabe egindako akatsa izan zenik. Protokolo guztia zertarako ondoren nahi duten ereserkia jotzen badute? Akats larriegia ez al da? Zuek zer diozue?

Informazio iturria: Contador Tourreko garaile, Danimarkako ereserkiarekin (sustatu.com)

Eta Tourra amaitutakoan lehiaketa gehiago!!

2009ko Espainiako VueltaGaur amaituko da denboraldiko lasterketarik garrantzitsuena eta berarekin batera Tropela.net-eko 2009ko Tourreko lehiaketa. 10000 kinielatik gora egin dira eta hori Euskal Herrian dugun zaletasunaren seinale garbia da. Aurtengoan hori gutxi balitz, zalegoaren jarraipenak euskal txirrindularien bi garaipen historikoz gozatzeko aukera izan du: Mikel Astarlozaren Alpeetako garaipena eta atzokoan Juanma Garatek Mont Ventouxen lortu zuena.

Baina ez dira Tourrarekin aurtengo lehiaketak amaitzen. Abuztuaren 29an Espainiako Vuelta hasiko da eta hori ere Tropela.net-eko lehiaketarekin goza dezakezue. Irailak 20ra bitartean Espainiako lurretan izan ezik, Holandako lurretan ere ibiliko dira txirrindulariak.

2009ko Munduko TxapelketaUrtea eta denboraldia amaitzeko, ibilbideko Munduko txapelduna erabakiko duen lasterketa ere jokoan izango dugu gure webgunean. Txapelketa hau Suitzako Mendrision jokatuko da okerrik ezean irailak 27an.

Orain arteko urteetan egin bezala, Vuelta eta Munduko txapelketa faltako lirateke jokatzeko. Baina aurtengoan aldaketatxo bat egitekotan gara eta lehiaketa hauei Donostiako Klasikoa gehitzekotan gara. Klasikoa hau hurrengo larunbatean jokatuko da, beraz, adi izan.

Urtean zehar parte hartzen dituzuen lehiaketa guztien puntuak batutako Urteko Sailkapena osatzen dugu. Horregatik da garrantzizkoa lehiaketa guztietan parte hartzea urteko lehiatzailerik onena izan nahi baduzu. Gogoan izan: Donostiako Klasikoa (abuztuak 1; ziurtatzeko), Espainiako Vuelta (abuztuak 29tik irailak 20ra) eta Munduko txapelketa (irailak 27).

Eta bigarren garaipena Juanma Garatek!!

Azken sei urteetan etapa garaipenik lortu ezinda ibili eta gero, aurtengo edizioan bi etapa garaipen lortu dituzte gure txirrindulariek. Gaurkoan Juanma Garate izan da Martin-i aurre hartuta etapa garaipen itzela lortu duena, non eta Mont Ventoux mendate mitikoan. Zorionak Juanma!

Azken aurreko etapa izaki eta Mont Ventouxen gainean bukatzen zela ikusita, sailkapen nagusiko postuen lehian dabiltzanak zalaparta sortu beharra zuten zerbait egin nahi bazuten. Lehia horrek etapa garaipena aurtengo Tourreko gizonik indartsuenen artean izango zela pentsatzen genuen, baina ez da hala izan.

Eguneko ihesaldian zen Juanma Garate, Ruben Perez, Delage, Gutierrez, Posthuma, Martin, Kuschynski, Roulston, Riblon, Geslin, Bonnet, Righi, Lemoine, Dumoulin, Timmer eta Bouet txirrindulariekin batera. Tropelak ihesaldia 5 minutu ingurura izan du Mont Ventouxeko igoerara gerturatu artean, baina behin igoerari ekiteko 5 kilometro inguru falta zirela, Astana eta Saxo Bank txandakatuz tropel nagusia luzatu dute mozketa bat eragiteraino. Orduan iheslariekiko errenta murrizten joan denez, Juanma Garatek erasoa jo du aurreko tropeltxoan eta Martin eta Riblonek aurrera egin dute. 21 kilometroko portua luzea zen eta indarrak ongi dosifikatu beharrak zeuden eta ederki egin dutelakoan naiz.

Atzealdean sailkapen nagusiaren lehian zebiltzan txirrindulariak erasoka hasi dira. Andy Schleck izan da hamaika eraso egin dituena, baina Contador erne zen erasoak baliogabetzeko. Frank ere saiatu da birritan, baina honen zaintza lanetan Armstrong ederki moldatu da. Sailkapen nagusiko lehen txirrindulariak, beraz, beraien postuak babesten edo eta hobetzeko saiakeratan ziren. Noski, erasoen ondoren atsedenaldiak izaten ziren eta hori bikain etorri zaie aurreko hiru iheslariei bestela harrapatuko baitzituzten.

Azken kilometroetan Riblonek ezin zuen beste bien erritmoarekin jarraitu eta geratu egin da. Atzetik, berriz, sailkapen nagusiko lehiatik kanpo zela aprobetxatuz, Pellizottik aurrera jo du etapa garaipenaren bila, baina ez da gauza izan aurreko biak harrapatzeko. Gauzak horrela, etapa garaipena Juanma eta Martinen artean zen. Azken kilometroan bigarren erasoa jo du. Lehenengoan Martin hurbiltzeko gauza izan bada, azken honetan nahikoa izan da egin duen ahalegina eta etapa garaipena eskuratu du Mont Ventoux handian. Honi eskerrak, Rabobankek aurten eman duen irudi kaxkarra itxura hobetzea lortu du.

Faboritoen artean Schleck anaiak gogor aritu diren arren, lortu duten gauza bakarra Franken postua aurreratzea izan da Klöden atzeratuta iritsi baita helmugara. Ezin esan Schleck anaiak saiatu ez direnik, baina bai Armstrong baita Wiggins bera ere ederki aritu diran beren postuen defentsa lanetan.

Ez zaigu ahaztuko aurtengo Tourra hain erraz. Mikel Astarlozak asteartean Alpeetan eta gaur Juanma Garatek Mont Ventouxen bi garaipen ekarri dituzte Euskal Herrira. Zorionak biei bihotz bihotzez!!

Argazkia: www.cyclingnews.com

Kontuz! Tropelean kakalardoak daude!

Gogoratuko duzuen bezala Frantziako Tourra hasi zen asteburuan Tropelean kakalardoak zirela eta sailkapenak publiko egitea atzeratu behar izan genuen. Baina zer dira kakalardoak?

kakalardoak

Tropelean dauden arauak betetzen ez dituzten erabiltzaileak, horiek dira kakalardoak. Tropela.net-eko lehiaketa guztietan parte hartzea doakoa da eta horren ondorioz, pertsona bakoitzari ez diogu nahi adina kiniela egiten uzten. Pertsona bakoitzak erabiltzaile bakarra sor dezake eta erabiltzaile bakoitzak kiniela bakarra egin dezake. Gainera irabazleentzat sariak ditugunez, horrek araudia zorrotz betetzera behartzen gaitu.

Ez da erraza araudi zehatzak ezartzea eta berauek zuzen interpretatzea eta aplikatzea baina ondoren adierazten dizkizuegun ezaugarri arbuiagarrietako bat betetzen dute gure Tropeleko kakalardoek.

1. Lehiaketa batean erabiltzaile bat baino gehiago sortu dute, hots, kiniela bat baino gehiago egin dute.

2. Erabiltzailea datu faltsuekin sortu dute.

Irizpide hauei jarraituz hainbat kakalardo topatu ditugu Tropelean. Guk oso nabarmenak direnak soilik markatu ditugu eta seguru beste askok ihes egin digutela.

Nola atzeman daitezke kakalardoak?

Kakalardoak erraz nabarituko dituzue. Sailkapenetan nahiz tropeltxoetako sailkapenetan kakalardoaren ikonotxoarekin agertuko dira. Kontuz, beraz, kakalardo horiekin, kiratsa baitarie!!

Ze ondorio izango ditu kakalardo izateak?

Kakalardo den erabiltzaile bat, sarien lehiatik at geratuko da eta ezingo du saririk jaso, urteko sailkapenean ere ez da kontuan hartuko eta hurrengo lehiaketetan ezingo du kinielarik egin.

Ez naiz kakalardo bat!

Bestalde, norbait kakalardo moduan markatu badugu eta bere ustez aurreko bi irizpideetatik kanpo badago, mesedez, bidali iezaguzue posta elektroniko bat egoera argituz. Guk ere akatsak izan ditzakegu eta komeni da akats horiek zuzentzea oker daudenean.

Saria jasotzeko zer egin beharko da? Datuak ziurtatu.

Arazo guzti hauengatik, saria egokitu zaionak bere datuak egiazkoak direla ziurtatu beharko du Tropela Elkartearen aurrean, eta horretarako emailez bere nortasuna ziurtatzen duen agiriren bat (nortasun agiria, gida-baimena, liburutegiko txartela…) bidali beharko du emailez.

Jakin ezazue kakalardo guztiok, atzemandako eta atzeman gabekook, ez zaretela Tropelaren joko arauak errespetatzen ari eta ondorioz gainontzeko parte hartzaileei iruzur egiten ari zaretela.