Atseden eguna hausnarketa egun bihurtuta

Tropelaren protestaAsteburuak, tamalez, txirrindularitzaren alderik arriskutsuena jarri du agerian eta gaurkoan, txirrindulariek atseden hartzeaz gain, gogoetarako unea bihurtu dela ezin dezakegu uka.

Zorionez Pedro Horrilloren osasun egoerak hobera egin du. Horrek ez du erorikoaren larritasuna ezkutatzen, 60-80 metrotatik erortzeak (distantziaren zehaztasuna dagoeneko gutxienekoa da) edonori ikaragarrizko hotzikara sortzen baitio. Burmuinaren egoera ona dela adierazten dituzten emaitzak argitaratu dira eta esperantzarik onenak piztu ditu horrek bai familian baita zalegoan ere. Batek baino gehiagok hasperen egingo du hau jakinda, nik behin behin bai, nahiz eta gorputzeko ia hezur eta muskulu gehienak minduak dituen ermuarrak. Baina horiek, zorionez, konpontzeko moduko lesioak dira medikuen arabera. Animo Pedro!

Atzoko postean txirrindulariek egin zuten protestaren berri ematen nizuen. Segur aski Pedro Horrillori jazotakoa tropeleko edonori gerta ziezaiokeela jakiteak ikara sortuko zien, beraien segurtasunarekiko kezka muturreraino eramateraino. Milanotik kilometro askotara eta zirkuitua ezagutu gabe, ez naiz gai ikusten txirrindularien kexak arrazoizkoak ala gehiegizkoak ziren esateko moduan. Agerian geratu zen, ordea, txirrindulari eta antolakuntzaren arteko desadostasuna, baita txirrindularien beraien artean ere. Eta badirudi gaurko eguna atseden egun baino iritzi horiek guztiak plazaratzeko egun bihurtu dela.

Di Lucak, Giroko liderrak, “pailazoarena” egin zutela azaldu dio Gazzettari. Tropelak etapa ez lehiatzea eta Rabobank taldea aurretik zutela ibiltzea adostu zutela adierazi du Rabobankek etapa garaipena Pedro Horrillori eskaini ziezaion. Baina, beti ere bere esanetan, zenbaitzuk ados ez eta etapa lehiatzeari ekin omen zieten.

Bassoren dioenez, lehen itzulian 20 bat txirrindularik eroriko izan eta horrek izua zabaldu omen zuen tropelean. Ez zegoela polemika sortzeko asmorik eta protesta burutzearen arrazoia gailendu zen izu hori omen zen. Armstrongek ere ibilbideari buruzko iritzi negatiboa plazaratu du eta Pellizzotti, Killerra bezala, elkarrekin hartutako erabakia guztiek aurrera eraman ez izanak tristatzen du.

Dopin kasuekin gertatzen denaren antzera, atzokoan ere tropela iritzi oso ezberdinak ikusi genituen eta, ondorioz, jokamolde ezberdinak. Batzuk etapa Horrillori eskaini asmotan eta beste batzuk aukera alferrik pasatzen utzi ezinda, etapa lehiatzen. Cavendishek argi adierazi du etapa garaipena lortuta: “Giroan lauzpabost etapa bakarrik izango dira esprintean bukatuko direnak. Lehiatu nahi ez duenak ez dezala lehiatu”.

Cavendishek arantza kendu du protesta nagusitu den etapan

Tropelaren protesta 9. etapanGaurkoan bai. Milanoko gaurko etapa esprinterrentzat prestatua zegoen eta gaurkoan ingelesak ez du hutsik egin. Columbia-High Road taldeak ederki bideratu dio bere esprinterrari bidea garaipenak ihes egin ez ziezaion eta esan bezala, gaurkoan Petacchi gailentzea lortu du.

Orain arteko ediziotan gaurko etapa Giroko azkena izaten zen. 100. urteurrena dela eta, aurtengoan azken etapa Erroman amaituko denez ez zuten Milanoko zirkuitua alde batera uzterik nahi. Giroko lehen atseden egunaren bezperan, beraz, orain arte itzuliko azken etapa izan ohi zen ibilbidea egin dute.

Eguneko albiste nagusia, ordea, tropelak zirkuituaren inguruan adierazi duen arriskua izan da. Atzokoan Pedro Horrillok izan zuen ezbeharraren ondorioz, etapa hasi aurretik antolakuntzak tropeleko tentsioak baretzeko gaurko denborek sailkapen nagusian eraginik ez zuela izango adierazi dute. Ondorioz, etapa bakarrik jokatuko zen. Hala ere, tropelarentzat neurri hori ez zen nahikoa zirkuituaren arriskuaz jabetuta eta 6 itzuliren faltan gelditu egin dira. Di Lucak mikroa eskuan, ikusleei egoeraren berri eman die eta etapa ez zutela lehiatuko esan dute arriskuaz jabetuta. Orduraino zeramaten abiadura oso baxua zen eta zetorrena adierazten zuen. Ikusleei azalpenak eman ostean eta arduradunen desadostasuna agerian geratuta, txirrindulariek arauzko itzuliak emateari berrekin diote. Arduradunen zorionerako, azken itzulietan tropelaren abiadura arras handitu da eta etapa lehiatzeko prest zeuden txirrindulariak bazirela ikusi da.

Ordurako ETBk emanaldia moztu eta pilota emanaldiari lehentasuna eman dio etapak izan dituen gora beherak argudio hartuta. Eurosporten seinalea dugunok, ordea, etapa bukaeraraino ikusteko aukera izan dugu. Ez dut oso ondo ulertu ETBren portaera, eguneko partidua ez baitzen 18:00ak baino lehenago hasiko eta posible zuten etapa osoa eman estelarra jokatzen hasi aurretik. Desadostasunak desadostasun, azken itzuliak pentsatu baino ikuskizun gehiago eman du.

Helmugarako 10 kilometroren faltan Voeckler frantziarrak ihesaldi ahalegina egin du. Ordurako sailkapen nagusiko txirrindulari garrantzitsuak tropel nagusiko tentsioetatik ihesi atzeratuta geratu dira. Frantziarraren ahaleginak kilometro bateko iraupena izan du eta hortik aurrera ez da beste inor gauza izan saiakerarik egiteko.

Azken metroetara iritsi arte ez da beste ahaleginik izan. Esprinter guztiak lekua bilatzen aritu dira eta azken kilometroetan bultzadaren bat edo beste ere ikusi dugu, nahiz eta zigortzerainokoak ez izan. Aurrez esan bezala, Columbia-High Roaden laguntza osoarekin, Cavendishek betaurrekoak botatzeraino bizikleta mugituz garaipena erraz samar eskuratu duela esan daiteke. Gaurkoan Petacchi pattalago ibili da eta 5. postuan helmugaratu da. Honekin laugarren garaipena eskuratu du Columbia-High Road taldeak eta horietatik hiru azken hiru etapatan jarraian.

Zalantzarik gabe gaur tropelak hartu duen erabakiak polemika eta zeresan handia emango du. Segur aski batzuk ados egongo zarete eta beste batzuk kontra. Nik behintzat gauza bat dut garbi: ez da onargarria maila honetako txirrindularitzan horrelakoak ikustea eta alde guztiek beren esfortzua egin beharko luketela deritzot horrelako ikuskizun tamalgarririk eman ez dadin.

Italiarrak nagusi oraingoz

2009giro_etapa6_scarponiGaurkoan ihesaldia espero genuen eta hala izan da. Bonnafond, Gatto eta Klostergaardekin batera Kiryienka eta Scarponi txirrindulariak ihesaldiari ekin diote. Zalantzarik gabe azken bi hauek zerbait egingo zutela garbi zen eta ihesaldiak helmugaratzea lortuko bazuen bi hauen artean izango zela etapa garaipena. Halaxe suertatu da. Hochkrimm lehen mailako portua Scarponi eta Kiryenkak tandemak igaro du, eta azken kilometroetan, matxura eta ezintasunak jota, Scarponik etapa garaipena lortu du tropelari 32 segundoko errenta atereaz.

Dagoeneko sei etapatatik lau italiarrek irabazi dituzte: Petacchik bi, Killerrak bat eta Scarponik gaurko bestea. Menchov (atzoko erakustaldi bikainaren ondoren) eta Cavendish (lehen eguneko taldekako erlojupeko etapa garaipenaren ostean) dira italiarren artean txertatu direnak.

Atzo Euskal Herriko egunkari batean italiarrek Giroan duten protagonismoaz irakurri nuen. Ez zen, ordea, txirrindulari italiarrak laudorioztatzeko, dopinarekin erlazionatzeko baizik. Paperezko prentsa honen arabera, italiarrek erabateko askatasuna omen dute Italian eta horregatik omen dabiltza bertako txirrindulariak lasterketaren buruan. Benetan harritu egin nituen horrelakoak irakurtzea ez baitzen iritzi artikulua, bezperako etaparen kontakizuna baizik. Askorako eman dezake aipu honek, baina ez da post honen helburua. Egia dena da italiarrak ohi bezala lasterketaren lehen postuetan ikusten ari garela lehen aste honetan, baina gai izango al dira maila honi eusteko geratzen diren etapa guztietan?

Di Lucaren poza eta Armstrongen porrota

Di Luca lider 5. etapanBagenekien amerikarra Giroa lehiatzerako moduan ez genuela ikusiko, baina nik bederen ez nuen uste mendiko bigarren etapan ia 3 minutu galtzerainoko iritsiko zenik. Askok gogoan izango duzue Armstrongen harrotasuna norainokoa zen eta seguru naiz berak ere ez zuela uste hain pattal ibiliko zenik. Atzokoan ikusi zen talde buruari jarraitzeko gauza ez zela eta gaur konfirmatu egin da bere ezina. Ondorioz 6. postutik 22.era jaitsi da sailkapen nagusian.

Spoltoreko txirrindulariaz ezin gauza bera esan. Gaurkoan etapa garailea Menchov izan bada ere, atzoko esprinta eta gaur Lövkvisteri ateratako errentari esker, Killerrak kendu dio protagonismoa lasterketaren lidergoa eskuratu baitu. Lasterketa erabakigarria izan ez bada ere, oraindik goiz baita, txirrindulari bakoitzaren indarrak nola diren ikusteko baliagarria izan delakoan naiz.

Italiako Giroa 2009, multzoen azterketa (I). Hautagai nagusiak

Edizio irekia mendeurreneko Giroak dakarkiguna. Hautagairik sendoenek ibilbide orekatu bati egin beharko diote aurre, ohikoa baino mendi eramangarriagoarekin (min egiteko lain egongo den arren) eta bakarkako erlojupeko luze bakarra aurkezten duelarik. Hori bai, berau azkeneko urteotako saiorik gogorrena izango da ezbairik gabe. Guzti hau kontuan izanda, azter ditzagun, labur bada ere, lehiaketaren aurreneko multzoa osatzen duten gizonak.

bassoIvan Basso: kiniela guztietan gorenean azaltzen da, eta ez da harritzekoa. Liquigas-ekin sinatu zuenetik lasterketa hau du begiz jota, eta Maiatzaren 9a gerturatuz joan ahala bere sasoi puntua erakutsiz joan da. Lehenbizi Tirreno-Adriaticon maila ona azaldu zuen, eta berriki Trentinoko Giroa bereganatu du. Ez da seguru asko orain hiru urte aurkariak txikitu zituen txirrindulari bera izango, baina azkeneko egunean (Milanon beharrean, Erroman aurtengoan) arrosaz jantzirik egoteko dohai guztiak dauzka lonbardiarrak, bere erlojupeko saioek zalantza puntu txiki bat sortarazten badute ere. Nolanahi ere, apustu seguru xamarra.

Marzio Bruseghin: ia urteroko legez, Giroko irteerara bere burua gehiegi erakutsi gabe helduko da. Normalean honek ez du oztopo bat suposatzen bere kasuan behintzat, eta horrenbestez kontuan hartu beharko da Lampre-ko gizona. Hala ere, Continue reading “Italiako Giroa 2009, multzoen azterketa (I). Hautagai nagusiak”