Kategoria Artxiboak:Txirrindularitza

Mont Ventoux-en lider berriak etapa opari

Valverde eta Szmyd Mont Ventoux-eko helmuganAtzoko etapa ikusteko aukerarik ez nuen izan. Pena, benetan, baina zenbait kronika irakurtzen aritu naiz eta harrituta utzi nau Valverderen jarrerak. Ikusteko aukera izan duzuenok zuzenduko nauzue, baina post hau idazteko modukoa iruditu zait.

Badirudi Valverdek Tourrean korritzeko aukera ez duela guztiz baztertu eta gaurko etapan zer emateko gai den erakutsi nahi zuela. 9. kilometroan jotako erasoaren ondoren Evans eta gainontzeko faboritoak utzita aurrera jo du. Szmyd izan du bidelagun murtziarrak eta aurretik ziren gainontzeko txirrindulariak gaindituz joan dira igoeran aurrera joan diren heinean. Faboritoekiko denbora tartea handitzen joan da eta helmugara heltzerako Valverde Dauphiné Libéréko lider berria zen.

Bazirudien “etapa zuretzat eta lidergoa niretzat” hitz egin beharrik gabe adosten den paktua beteko zela eta halaxe izan da. Azken 500 metroetan Szmydi “zangoak gelditu zaizkio” eta aurrera jo ezinda geratu omen da. Valverdek, indarrez sobra, zain egotea erabaki du garaipena Liquigaseko txirrindulariarentzat izan zedin. Esan bezala, murtziarrarentzat maillot horia eta etapa garaipena poloniarrarentzat.

Egin dituzten adierazpenen arabera ez omen dute ezer adostu. Izan daiteke, baina garaipenak hain garesti diren egun hauetan ezagutzen ez dugun beste arrazoiren bat egon daitekeela uste dut. Hona hemen Valverderen hitzak, zuek epaitu:  “Etapa ez da zehazki opari bat izan. Szmydek zangoak (etapa) irabazteko modukoak zituen. Nik bere lankidetza eskertu diot. Biok kirol gizonak gara”.

Astana, Livestrong ala talde txuri-urdin-horia

2009ko Giroan Astana taldea maillot hutsekinGogoan izango duzue nola Kazakhstango babesleekin Bruyneelen taldeak soldatak jasotzeko arazoak zituzten. Protesta gisara, Astana izenik gabeko maillotak eraman zituzten txirrindulari gehienek, batek izan ezik. Noski, Kazakhstandar izaki, Zeitsek ezin protestarekin bat egin.

Giroa lehiatzen ari ziren bitartean, era guztietako zurrumurruak sortu ziren. Horien artean indarrik gehiena hartu zuena Livestrong Armstrongen fundazio “multinazionalak” bere gain hartuko zuela taldea. Tourrean parte hartu nahi badu babesle eta txirrindularien arteko ordainketa guztiak normalduta izan behar dituzte eta konponketa horiek guztiak egiteko denbora gutxi dute. Kontrol lan horretan UCI aritu da. Bigarren urtez Tourrean parte hartu gabe Astana taldea?

Azken egun hauetan, ordea, bestelako informazioa iritsi zaigu komunikabideetatik. Dirudienez Kazakhstango babesleek apirila eta maiatzari dagozkien ordainketak egin dituzte eta horri eskerrak Luxenburgoko Itzulian, Dauphiné Libérén eta Tourrean parte hartzeko arazorik ez luketela izango san du McQuaid UCIko presidenteak. Badirudi, beraz, momentuko arazoak konponduta dituela Bruyneelen taldeak, baina Tourra amaitu ondoren eta Vinokourov eta Kaschekin zigorrak beteta itzultzen direnean auskalo zer gertatuko den egungo taldearekin.

Eta Tourreko lehiaketa iritsi bitartean zer?

Dauphiné Libéré eta Luxenburgo 2009Asko dira dagoeneko Tourrerako kiniela egiteko zain direnak. Giroaz gozatu dugu, laugarren urtez Tropeleko lehiaketarekin bizitzeko aukerarekin. Hori kiniela egin duzuenok, ezagutzen baititut zenbait konturatzerako Giroa hasi zaienak eta horiei Tourreko lehiaketaren itxaronaldia luzeagoa gertatzen ari zaie.

Bitartean zer? Bada txirrindularitzaren egutegiak hurrengo egunetan eskainiko dizkigun ekitaldiei jarraipena egitea geratzen zaigu. Alde batetik txirrindularitza gustatzen zaigulako eta bestetik, zergatik ez, Tourrean kiniela on bat egiteko ahalik eta informazio gehiena biltzeko.

Asteazkenean Luxenburgoko Itzulia hasi zen. Parte hartzaileen artean Euskaltel-Euskadi aurkitzen da, Giroari muzin egin ondoren lasterketa honetan bueltatzen da berriro ere lehiaketara Amets Txurruka talde buru dutelarik. Euskaltel-Euskadiko txirrindulariak izango dira lehiatzen arituko diren euskaldun bakarrak Luxenburgon.

Bost eguneko itzuli hau asteazkeneko prologoarekin hasi zen. Tourrean izaten den bezala, 2,7 kilometrotako erlojupeko motza, maillotaren jabea erabaki zuena. Prologo honetan Astana taldeak irabazi zuen Rast gaztearen lanari esker. Atzoko etapa, berriz, Mondorf-les-Bainsen amaitu zen esprintean eta Napolitano izan zen garailea. Eta gaurko etapan Andy Schleck izan da garailea Breschel eta Aitor Galdosen aurretik. Gaurko etaparen ondoren Rastek lasterketa lidergoa galdu du eta Bazayev taldekideak eskuratu. Oraingoz Astana taldea lasterketaren buru da baina oraindik bi etapetan gauzak alda daitezke. Euskaldunei dagokienez, Aitor Galdos da sailkapeneko gizonik aurreratua 6 segundora 4. postuan. Amets Txurruka 15. postuan da 22 segundotara. Igandea bitartean, beraz, Luxenburgora begira izango dugu begi bat badaezpada, txirrindulariak zein mailatan dabiltzan jakiteko, batez ere gure txirrindulariak.

Igandean esan bezala, Dauphiné Libéré hasiko da. Astebete iraungo duen lasterketa honetan Tourrean parte hartzen duten txirrindulari gehienak izaten dira. Garrantzitsuenak Evans, Contador, Valverde, Gesink,… bertan izango dira. Kasu honetan begi bakarra ez, bi begiak eta ederki irekita izango ditugu lasterketa horren nondik norakoak jakiteko. Gainera, ETB1ek ohi duen bezala, Fermin eta beste esatariekin lasterketa jarraitzeko aukera izango dugu.

Beranduago Suitzako Itzulia izango da, ekainaren 13tik 21ra hain justu. Oraindik urruti dago eta informazio gehiegirik ez dugunez gogoratu bakarrik egin nahi nuen. Aurrerago joango gara komentatzen.

Baina zerbait ahaztu zait, ez? Ez al duzue zerbait faltan botatzen? Ba bai. Orain urtebete Euskal Bizikletaz aritu zen Hibai adiskidea. Zerbait susmatzen genuen, baina ez genuen usteko 2008ko edizioa azkena izango zenik. Tropela Elkartekook Euskal Bizikleta gustora jarraitu ohi izan dugula esan dezakegu Efimkini lasterketako lider izan zenean egin genion elkarrizketa kasu. Garai horiek pasa dira eta Euskal Bizikleta ere historiaren parte bihurtu da. Hemendik aurrerako ekainak ezberdinak izango dira.

Italiako Giroa 2009, multzoen azterketa (V). Besteak

“Besteak” taldeak ez ditu inoiz ematen “Hautagai nagusiak” taldeak bezain beste puntu, hori gauza jakina da. Hala ere, normalean talde honetan txirrindulari egokia asmatzea izaten da lehiaketako garaipenaren gakoa. Beste behin, txirrindulari ezezagunek eta ez hain ezezagunek osatutako multzo hau aztertuko dugu, hizpide izan daitezkeen izen propio batzuen eskutik:

brajkovic2Janez Brajkovic: Denboraldi bat bere mailatik urruti egon ostean, badirudi “Jani” (horrela deitzen diote) bueltan dela. 2005ean debutatu ostean, mundu erdi harri eta zur utzi zuen 2006an, Suitzako Itzulian sekulako maila eman eta Espainiako bueltan egun batzuk lider pasa ostean. 2007an ere maila polita eman zuen, Georgiano Itzulia poltsikoratuz. Geroztik, galduta egon da joan den Trentinoko Itzulira arte. Bigarren bukatu zuen, Ivan Bassoren ostean, eta Girora gorputzaldi onean iritsiko da. Mendia ondo pasatzen du eta erlojuaren kontra maila oso ona dauka. Dena den, ikusi beharko da Giroko mendate gogorrak nola pasatzen dituen. Nire kinielan finkoa da.

Eros Capecchi: Iazko Euskal Bizikletan bere burua ezagutzera eman zuen, eta nola gainera. Etapa bat eta sailkapen nagusia irabazi zituen, eta aurten Fuji-Servettoko taldeburu bezala izango dugu Giroan. 22 urte eskas baina kalitatea soberan, onena egiteko gai da, baina baita 3 aste inork ikusi gabe pasatzeko ere. Denborak esango du italiar gaztea noraino heltzeko gai den.

Markus Fothen: Ez da garai batean Tourrean ikusi genuen Marcus Fothen bera. Sekulako maila eman zuen, sailkapen nagusian buruan ibiltzeko adina, baina azken urteetan ez da lehen postuetan ohikoa sailkapen nagusiari dagokionean. Dena den, ez da lasterketetatik esku hutsik ateratzen den horietakoa. Azken 2 urteetan Romandian, Suitzan eta Regioko Tourrean etapa bana irabazi du, eta hori ez dago edonoren esku. Denboraldi hasiera lasaia izan ostean, Giroan bere prestakuntza ikusteke dago.

David García Dapena: Giroan debuta egingo du, iaz Espainiako Itzulian bezala. Azken honetan debut polita izan zuen, azken sailkapenean 13º postua lortuta. Aurten Turkiako Itzulian etapa bat eta Errioxako Itzulia (orain egun bateko klasika bilakatuta) irabazita dator. Italian guztiz ezezaguna izaki, sorpresa izan daiteke “azzurri”entzat.

Philippe Gilbert: Nire kinielan beti finkoa da belgikarra. Esprint handietan muturra sartzen du, mendate ertainak ondo pasatzen ditu eta oso ausarta da. Dudarik gabe, oso txirrindulari errentagarria Tropelako lehiaketari begira.

frefrik2Fredrik Kessiakoff: Aipamen berezia suediarrarentzat. Fuji-Servetto taldea osatzeko azken unean hartutako txirrindularia da, eta taldeko mailarik onenetakoa ematen ari dena. Mendi bizikletatik dator, aurten bidera jauzia eginda, eta maila harrigarria ematen ari da, hain “berria” izateko diziplina honetan. Euskal Herriko Itzulian, Arraten 8º bukatzeko gai izan zen eta sailkapen nagusian 15º. Romandian, etapa erregina 4º bukatu zuen eta sailkapen nagusia 9º. Giroan zer? Galtzeko ez dauka ezer Fredrikek. Hiru asteko itzuli batean debuta… inolako presiorik gabe… zeresana eman lezake.

Pablo Lastras: Inoiz ez da inoren apustu, baina beti egiten du azpimarragarria den zerbait. Oso txirrindulari gutxik egindako gauza batez harro egon daiteke espainiarra: hiru itzuli handietan besoak altxatakoa izateaz, alegia. Normalean ezkutuan egoten da lasterketako bigarren erdiraino, kontrol lana zailagoa gertatzen deneraino, eta gero ihesaldietan arraina uretan bezala maneiatzen da. Kalitatea soberan dauka.

José Serpa: Kolonbiarra 29 urterekin txirrindulari zaildua da. Aurten Langkawiko Itzuli exotikoa irabazi du, exotikoa izanagatik erraza ez dena. Halaber, San Luisko Itzulian ere jaso zituen eskuak. Liège-Bastogne-Liègen azken kilometroetan bere burua erakutsi zuen, indartsu, eta ikusi beharko da zein punturainoko askatasuna ematen dioten, Gilberto Simoniren taldekidea baita. Mendate ertainez jositako etapetan oso ongi moldatzen da, eta mendi handiei ere ez die beldur. Ihesean ibili zalea, kamara asko “txupatuko” duelakoan nago. Gero ihesaldi horiek helmugara iritsiko diren edo ez ikusteke dago. Fortunato Balianiren oso itxura handiko txirrindularia da lehiatzeko moduari dagokionean.

Thomas Voeckler: Indartsu dabil frantziar txikia. Igotzaileen Saria irabazi berri du Frantzian, eta tropeleko txirrindulari lehiakorrenetako bat dela ez dit inork ukatuko. Dena den, Frantziarrek arazotxo bat dute: beraien herritik kanpora, ez dira hain ausart eta lehiakor agertzen. Zorionez, Thomas salbuespen bat da, eta ziur Giroan gerra emango duela.

Yaroslav Popovych: Giroan podiuma zapaldu duten horietako bat da. Dena den, taldean Levi Leipheimer eta Lance Armstrong izanda, sailkapeneko lehiatik at egongo dela jakina da. Hori bai, eraso kolpe ugari inork ez dizkio kenduko. Gutxien espero denean, ezerezetik agertzen da eta denak jokoz kanpo harrapatzen ditu. Ez da apustu txarra.

David López: Euskaldunon karta bakarra izango da lasterketa italiarrean. Oso igotzaile ona da bizkaitarra, eta lehen aldiz Caisse d’Epargnen dagoenetik, ez du talde buru garbi batentzat lan egin beharrik izango. Purito hor dago, eta Arroyok ere badaki Giroa top-10ean bukatzea zer den, baina nire ustez askatasuna emango diote Davidi. Narancon hirugarren izan berri da, eta sailkapen nagusian postu polit bat lortzeko gai da. Dena den, horrek ez du esan nahi lehiaketan sekulako puntu sorta lortuko duenik.

Jens Voigt: Ezin aipatu gabe utzi txirrindulari puska hau. Handienen artean sartu beharko genuke, aurten beste behin Kriterium Internazionala irabazi baitu (eta badira 5 garaipen lasterketa horretan). Doan lekura doala, bere marka uzten du, garaipen bezala, bigarren postu bezala, ihesaldi luze bezala, tarteko helmugak, mendia… Jensek denerako balio du. Eta gainontzekoak nekea sumatzen hasten direnean, alemaniarra hasi egiten da. Sekulako Giro gogorra da aurtengoa eta… baietz etapa bat irabazi!

Rebellinek ere positibo

davide_rebellin2006Davide Rebellin 37 urteko italiarrak ere positibo eman du baieztatutako analisi batean. San Bonifacion jaiotako txirrindularia iazko joku olinpiarretan lortu zuen zilarrezko domina galtzekotan da, lasterketa ostean egindako analisietan CERA motako EPOa hartu zuela baieztatzen baita. Abokatuak dagoeneko Rebellinek ezer ez duela egin esan du eta B laginaren azterketa eskatu dutela. Ohiko prozedura, alegia.

Rebellin etapa bakarreko lasterketetan espezialista dela esan daiteke. Azken garaipena La Flèche Wallonne lasterketan lortu zuen orain astebete juxtu eta hirugarrenez gainera. Hauekin batera Amstel Gold Race (2004), Liège-Bastogne-Liège (2004) eta Donostiako Klasika (1997) dira bere palmareseko garaipenik esanguratsuenak klasikei dagokienez. Etapez osatutako lasterketei dagokienez Paris-Niza (2008) eta Tirreno-Adriático (2001). Garaipenik aipagarrienak, beraz, Gerolsteiner taldean egin zituela esan daiteke. Continue reading “Rebellinek ere positibo”