Kategoria Artxiboak:Lehiaketak

Valverdek, bitik bi

Valverde garaile ViananEuskal Herriko Itzuliko lehen bi etapak jokatu dira eta Alejandro Valverde da orain arteko izen nagusia. Asteleheneko etapan bigarren helmugaratu zen, Freireren atzetik, baina epaileek erabaki zuten garaipena eta maillot horia Caisse D’Epargneko txirrindulariari ematea, Freirek enbarazu egin ziolakoan.

Bigarren etapan murtziarra nagusitu da, eta haren atzetik Oscar Freire sailkatu da. Zierbena eta Viana artekoa izan da bigarren etapa. Eraso festari etapa hasi eta berehala ekin diote txirrindulariek eta hiruk egin dute aurrera: Euskaltel-Euskadiko Amets Txurruka, HTC-Columbiako Michael Rogers australiarra eta Footon-Servettoko Alberto Benitez. Zazpi minututik gorako aldea ere izan dute, baina tropelak ibilian ibilian hirurak harrapatu ditu, banan bana: Benitez aurrena, Txurruka ondoren eta Rogers azkenik. Bukaera gertu ikusita, Gomez Marchante saiatu da eta kilometro eskasera Wigginsek egin du aurrera, tropela ustekabean harrapatu nahian. Ez du lortu, ordea. Aldapatxoan zegoen helmuga eta bertan Valverde izan da indartsuena.

Asteazkeneko etapan nekez geratuko da atzean faboritoren bat. Beraz, ostegunean, Arratera bidean argitzen hasiko da sailkapen nagusia. Schleck anaien, Gesinken, ‘Purito’ Rodriguez edota Cunegoren gurpilak gertutik zaindu beharko ditu Alejandro Valverdek.

Argazkia: Susi Goetze (www.cyclinginside.com)

1.etapa: Freire sinetsi ezinik

Freire sinetsi ezinik

Hauxe izan zen Euskal Herriko Itzuliko lehen etapako irudia. Oscar Freire kantabriarrak helmuga lehen postuan eta besoak goian zituela pasa arren, epaileek bere esprinta ez zuten ontzat eman eta garaipena kendu zioten. Nire ustez, Freireren esprinta zuzena izan zen ala ez eztabaidagarria da eta ondorioz, epaileentzat erabaki errazena sailkapena zegoen bezala uztea zela deritzot. Baina ez. Epaileek garaipena bigarren sailkatuari, Alejandro Valverderi, eman zioten eta irabazlea, normalean egin ohi den bezala multzoaren azken postura (24. postura) atzeratu beharrean bigarren postua “oparitu” zioten. Nire ustez erabaki hori ulertezina eta interesatua da eta epaileek hanka sartu zutelakoan nago.

Freire irudian ikus dezakezue, gertatutako sinetsi ezinik. Badirudi gaur beste aukera bat izan dezakeela, bai etapa irabazteko eta baita lidergoa “berreskuratzeko” ere. (Horretarako utzi dute epaileek bigarren postuan ezta?)

Argazkia: Susi Goetze (www.cyclinginside.com)

2010eko Euskal Herriko Itzulia aurkeztu da

2010eko Euskal Herriko Itzulia

Gaur aurkeztu dute ofizialki 2010eko Euskal Herriko Itzulia. Euskal Telebistan, aurkezpenaren ondoren, Fermin Aramendik Jaime Ugarte lasterketaren presidentea zuzenean elkarrizketatu du ETB2an.

Egunotan Contador izango ez denaren eta ibilbidearen inguruan eztabaida sortu da gure webgunean. Ugarteri egindako elkarrizketan justu gai horiek aipatu dira eta beraien postura argi azaldu du. Bere esanetan Contador ez izatea errespetagarria da eta onartzen du bere helburu nagusia Tourra izaki egutegia horren arabera moldatu izana. Horrek txirrindulari gehiagori aukerak irekitzen dizkiela aitortu, baina Contador ez izateak ez duela lasterketaren maila jaisten. Tropela.net-en aipatutako zenbait izen propio aipatu ditu horren adierazgarri gisa:  Samuel Sanchez,  Valverde, Cunego, Schleck anaiak, Freire (Milan-San Remo berriki irabazita),… eta Cobo. Cobo aipatzearen arrazoia behin Itzulia irabazi zuela izan da. Presidenteak, ordea, akats txiki bat izan du izan ere berak 2006an irabazi zuela esan baitu. Ez zen 2006an izan, ordea, 2007an baizik.

Lapsusak lapsus, erlojupekoak lasterketan duen gehiegizko pisuaz galdetu dio Aramendik. Ugartek aitortu du prologo bat jartzea eskatu izan dietela, baina hori ez egitearen arrazoitzat azken eguna iritsi arte lehiaketa ez erabakita izatea eguneroko lehia sustatzen duela esan du. Gainera horrek azken eguna iritsi arte, lasterketaren azken helmugatik pasa arte irabazlea zein izango den ez dela jakingo esan du eta horrek interesgarriagoa egiten omen du lasterketa.

Azkenik nork irabaztea nahiko lukeen galdetu zaionean, Ugartek “etxeko” batek irabaztea nahiko lukeela aitortu du.

Urrezko ezteiak betetzen ditu Euskal Herriko Itzuliak aurtengoan eta hori dela eta, Linares txirrindulari ohia, lau aldiz lasterketa irabazi duen txirrindulari bakarra omenduko da.

Garbi dago antolatzaileek beraien iritzia garbi adierazi dutela eta askoren iritziarekin talka egiten duela. Ados izan ala ez, hori norberaren eskuetan geratzen da.

2010eko Euskal Herriko Itzuliari begira

Samuel SanchezAurtengo EH Itzulian faltan izango denaren inguruan Gure Adituak jakinaren gainean jarri gintuen. Egia da Contadorrek izan duen egutegi aldaketak ez diola mesede askorik egiten lasterketari. Egia da UCIko lasterketa izanik ez duela larritzeko motiborik oraingoz, baina ez da denbora asko pasa Euskal Bizikleta desagertu zela. Gogoratzea baino ez nuen nahi.

Interes gehien dutenen artean Euskaltel-Euskadi taldea izango da. Galdeanok etxeko lasterketak eta Tourra jarri zituen helburu bezala eta Contador izango ez dela kontutan izanda, Samuel Sanchezekin ahalegin berezia egingo dutelakoan naiz.

Ez dakit Caisse D’Epargnetik zein izango diren lasterketan, baina Paris-Nizako podiumeko bikotea, Luis Leon Sanchez eta Valverde izango direla dirudi. Irabazteko lehian izango dira. Cobo ere ez ahaztu Caisse D’Epargnen dela eta 2007an lasterketa bereganatu zuela ezustean.

Blog honetan Liquigaseko talde buruez ere aritu zarete. Kreuziger izango da taldeburu nagusia zalantzarik gabe, baina Nibali ere sasoiko dago Milano-San Remon ikusi genuen bezala. Biak ere lasterketaren garaipenaren lehian arituko diren txirrindulariak iruditzen zaizkit.

Ez nuke zerrenda gehiegi luzatzerik nahi, baina aipatutakoez gain Evans, Schleck anaiak eta Cunego gehituko nituzke. Izen gehiago bere baditut buruan bueltaka, baina oraindik dortsalen zerrenda izan gabe hauekin geratuko nintzateke.

Contador helburuak aldatuz

contadorBukatu berri da aurten Alberto Contadorrek korritu duen bigarren lasterketa. Bietan nagusi izan dugu Pintoko txirrindularia, Algarven aurrena, Paris-Nizan ondoren.

Astebeteko eta itzuli haundietako txirrindularirik onena dugu inongo zalantzarik gabe. Jendeari gehiago edo gutxiago gustatuko zaio baina hori momentu honetan behintzat ukaezina dela dirudi.

Urte hasieran egin zuen egutegiaren arabera, Kataluniako Volta eta Euskal Herriko Itzualik zituen hurrengoak baina egun hauetan aditzera eman duenez, bi proba horiei uko egin eta Kriterium internazionala eta Gaztela Leongo itzulian ikusteko aukera izango dugu, horien ondoren Fleche Wallone eta Liege-Bastogne-Liegen izango delarik.

Oso gustura hartu dut berri hau. Ez Voltari edo Itzuliari inongo kalterik opa dietelako (izan ere, horixe da, kaltea, suposatuko diena bi proba hauei bere faltak), baina bai helburuak lortu ahala, urteetan zehar helburu horiek aldatzen joaten diren txirrindulariak gustatzen zaizkidalako. Garbi dago, orain momentuan duen Tourrak duen indarrarekin, proba hori beti izango duela bere helburuen artean, baina oso normala iruditzen zait, lehendik bi aldiz irabazia duen Euskal Herriko Itzuliari uko egitea. Modu honetan gainera, ikusleontzat ere itzuli erakargarriako bat gerta daiteke, askoz irekiago izango baita.

Badakit Contadorren aukeraketa hau errutzat jo eta klasikoetan ezer egingo ez duela pentsatuko duen jendea egongo dela. Ez nago ni hain ziur horretaz. Fleche Wallonen, azken urteetan korritu den bezala korrituta behintzat, aukerak ikusten dizkiot, eta Liege-Bastogne-Liegen, aukerak izan nahi baldin baditu lasterketa asko gogortu beharko bada ere, bere aukeratxoak izan daitezke.

Gustatzen zait egin duen aukeraketa hau, eta zuei?