Kategoria Artxiboak:Lehiaketak

Horrelakoa izango da 2010eko Vuelta

2009ko Espainiako Vueltaren ibilbideaZergatik noa Vueltaz idaztera eta ez beste edozein lasterketaren inguruan? Balioko erantzun bat emateagatik, Euskal Herrian azken aldian modako itzuli handia delako hautatu dudala esango nuke. Beste arrazoiren batek ere balio lezake. Hau horietako bat zen.

Berrikuntzekin dator Vuelta 2010ean. Nabarmenena liderraren maillota gorria izango dela. Orain arte izan diren maillot hori edo urrezkoak albo batera utzi eta gorria jarriko dute. Abraham Olano entzun dut irratian honen inguruko argibideak ematen. Bere esanetan Espainiako selekzioak kolore gorrikoak dira (futbolekoa, saskibaloikoa,…) eta identifikazio honekin jarraiki gorria erabiltzea erabaki dutela. Nire ustez Vuelta ez da beste itzuli handien ‘status’a iristen eta hori aldatzeko beste saiakeretako bat da. Funtzionatuko duen? Publizitate eta irudi ikuspuntutik beharko du izan izatekotan.

Norbaitek zalantzaren bat bazuen ere, baieztatzen dugu hurrengo urtean lasterketa ez dela Euskal Herritik pasako. Segur aski 2011ean bai (dakidala Getxok behintzat eskaria egin zion Unipublic-i etapa amaiera bat bertara eramateko). Hori, hala ere, hurrengo urteko abenduan jakingo dugu.

Ibilbideari dagokionez, aurten bezala nazioarteko lasterketa bat izango da. Ez, ez da Herbehereetatik pasako, baina bai Andorratik. Sei etapak izango dute mendatean amaiera horietatik bat aurtengo bera izango da, Xorret del Catí. Gainontzekoak Andorrako Pal eski estazioa, Peña Cabarga eta Cobadonga Lakuen igoera ezagunaz gain, Cotobello eta Bola del Mundo igoera berriak izango dira.

Erlojupekoak bi izango dira, bat lehen egunean eta beste bat 17. etapan. Lehena Sevillan jokatuko den taldekako erlojupekoa izango da. Giralda edo erakuste aldera, gauez izango da. Ordua ez dute zehaztu baina audientzia arazoak izan ditzaketela esango nuke abuztuko larunbat gaua izaki. Hau guztia itzuliaren 75. urteurrenaren aitzakiaz. Bigarren erlojupekoa 46 kilometrotako bakarkakoa izango da. Peñafieleko etapa hau erabat laua.

Ez dut ibilbidea gehiegi aztertu nahi izan oraindik asko falta baita lasterketa iritsi artean. Garbi dagoena da, beti bezala, lasterketaren erakargarritasunean ibilbideak zeresan handia duela, baina garrantzitsuena parte hartzaileak dira. Eta parte hartzaileak diodanean ez diot izenagatik bakarrik, lasterketara joango diren asmoarengatik batez ere.

Irudia: www.lavuelta.com

Espainiako Vuelta euskal errepideetan

Espainiako Vuelta 2009Dakizuen bezala, Eusko Jaurlaritzak Espainiako futbol selekzioak Euskadin jokatzeaz gain, Espainiako Vueltak irteera edo helmugaren bat Euskadin izatea eskatzen dute gaur onartutako proposamenei jarraiki. Orain bi urte t’erdi Carmelo Barriok aurkeztu zuen antzerako proposamen bat baina boto faltagatik albo batera geratu zen. Gaurkoan, ordea, gehiengoak babestu du proposamena.

Zeresana emango du erabaki honek eta dagoeneko alderdi politikoak aldeko eta kontrako iritziak eman dituzte. Txoko honetan gaia eztabaidagai jarri nahi nuke zale guztion artean.

Nire iritziari dagokionez, beste behin ere esan nuen eta orain ere berdin pentsatzen jarraitzen dut: Frantziako Tourra iparraldetik pasatzen den bezala, edo 1992 Tourra Donostiatik abiatu zenean bezala, Vuelta hemen izatea ere ontzat jotzen dut. Alde horretatik, arazorik ez nire ikuspuntutik.

Txirrindulari zale bezala, zalantzarik gabe, nahiago dut Tourra pasatzea Espainiako Vuelta baino. Urtetik urtera interesa galtzen doan lasterketa iruditzen baitzait penintsulako lasterketa hau. Alde horretatik, beraz, nahiago nuke ahaleginak Vuelta ekartzean baino Tourra gehiagotan bertatik pasatzean inbertituko balukete. Eztabaida niretzat ez da zein izeneko lasterketa pasako den hemendik, zein mailatako lasterketa baizik.

Honek guztiak Unipublic taldeari egingo dio mesederik handiena, entitate pribatu izanik gure sosak berenganatzeko aukera izango baitute.

Ez nuke amaitu nahi aurtengoan Euskal Bizikletarik izan ez dela gogora ekarri gabe. Beharbada gauzak nahasten ari naiz, baina kontuak hartzeko puntua izan daitekeela deritzot.

Evansek denboraldi amaieran urteko saria jaso du

Evans. 2009ko Munduko Txapelketako garaile errepideanMerezi zuen. Egia esan australiarrak ez zen batere ondo ibili Tourrean eta Vueltan zulatu baten ondorioz Espainiako lasterketak eskuetatik alde egin zion nahiz eta azkenean podiumean sartzea lortu zuen. Gaur, lan guztiaren emaitza eskuratu du: ostadar maillot preziatua.

Eguneko ihesaldia lehen itzulian osatu da. Bertan Greipel zen Espainiako Vueltan 4 garaipen lortu zituena. Tropeltxo honek ia 11 minututako tartea izateraino iritsi dira. Hala ere azken aurreko itzulian sartu arte ez dira faboritoak mugitzen hasi. Hauen aurretik beste tropeltxo bat ere osatu da 19 txirrindularirekin, tartean Boonen, Hoogerland, Ballan, Cobo eta Rodriguez zirelarik besteak beste.

Australiako taldeak ez zuen ordezkarik aurreko bi tropeltxoetan eta bere txirrindulariak tropel nagusiari tiraka jartzea erabaki dute ihesaldiak zapuzteko. Beraien lanari eta beranduago Juanma Garate eta beste zenbait txirrindulariei esker, ihesaldiak neutralizatzea lortu dute.

RTVEkoak, ordea, ez dira batere fin ibili. Azken aurreko itzulian sartu direnean txirrindulariak publizitateetara jo dute eta erabakigarriak izan diren mugimenduak galdu ditugu. Ohikoa zoritxarrez aspaldi honetan telebista publikoaren jokabide hau. Ez al zituzten ba anuntzioak kendu behar kate publikotik?

Azken bi itzulietan faborito nagusienak biltzen ziren tropeltxoa osatu da eta gainontzekoak garaipenetik kanpo geratu dira. Hauen artean Evans, Valverde, Samuel Sanchez, Freire, Rodriguez, Gilbert, Cunego, Cancellara eta beste zenbait txirrindulari aurkitzen ziren. Bazirudien Cancellara sasoi onean zegoela eta garaipena lortuta historia egiteko gauza izango zela, baina ez da horrela izan azkenean.

Tropeltxo honetan mugitzen lehena Kolobnev izan da eta atzetik Rodriguez atera zaio. Valverde eta Samuel Sanchez uneoro Cancellararen gurpila zaintzen ari ziren. Egoera horretaz baliatuz, Evansek aurrera jo du eta Kolobnev eta Rodriguez harrapatzeaz gain aurrera jotzea erabaki du Espainiako eta Errusiako txirrindulariak kontrol lanetan hasiak baitziren. Australiarrak jotako erasoa gogorra izan da eta zirkuituko azken aurreko igoeraz baliatuz, tarte polita ateratzea lortu du. Tarte horrek urrezko domina norentzat izango zen erabakita utzi du.

Atzean errusiarrak lan gogor egin du eta bigarren postuan sailkatzea lortu du 27 segundora atzetik Rodriguez zuela. Cancellara Valverderen tropeltxoan zegoen eta azken metroetan azken indarrak xahutzea besterik ez zitzaion geratzen baina dagoeneko podiumetik kanpo zen. Samuel Sanchez izan da azkenean laugarren, atzetik Cancellara.

Hurrengo urtean, beraz, Evansek eramango du ostadar maillota tropelean. Ez dira gustura izango espainiarrak eta italiarrak hauek baitziren faborito nagusienak gaurko lasterketarako. Datorren urtean Melbournen jokatukoda Munduko Txapelketa eta horrek seguru Evansi oraindik bereziago egingo zaiola lortu duen garaipena.

Sicard munduko txapeldun!

Sicard munduko txapeldun Zer nolako sorpresa eman digun gaur Iparraldeko txirrindulariak. Bagenekien Etorkizuneko Tourrean erakutsitakoaren arabera forma onean zetorrela Mendrisiora, baina hortik ortzadar maillota irabaztera badago aldea. Mendrisioko Munduko Txapelketan Frantziako selekzioarekin aritu den lapurtarrak iheskide guztiak atzean utzi ditu eta helmugara bakarrik iritsi da. Ondorioz, beretzat urrezko domina eta baita ortzadar maillota ere. Jonathan Castroviejoren lana ere aipatu nahi nuke, bera 13. postu on batean helmugaratu baita.

Sicard datorren urtean Euskaltel-Euskadi taldean arituko da beraz, ekipo berean elkartuko dira olinpiar jokoetako txapelduna eta 23 urtez azpiko munduko txapelduna. Ez dago batere gaizki.

Zorionak Sicard!

Argazkia: Sirotti (cyclingnews.com)

Cancellara bikoitzaren bila

Cancellara. 2009ko Munduko Txapelketako erlojuaren kontra urrezko dominaEtxean ari da eta horrek motibazio bikoitza ematen dio Cancellarari. Gaur erlojupeko ikaragarria egin du. Bagenekien irabaziko zuela, baina erakutsi duen nagusitasuna ikaragarria izan da. Bigarrena izan den Larsson-i 1’27”ko tartea atera dio eta hori azken 200 metroetan garaipena zaleekin ospatzen joan dela, esku lekutik eskuak gora jasota. 51,58 km/h bataz besteko abiadura ikaragarrian joanda ez nau harritzen areriorik ez izatea. Hirugarren Tony Martin izan da 2’30”ra.

Esan bezala bagenekien Cancellarak gaur irabazi egingo zuela. Ez da ezustekoa izan. Berak esan zuen aurtengoan historia egiteko asmotan dela eta erlojuaren kontrako urrezko domina janzteaz gain errepidekoa ere jantzi nahi duela. Iazko Beijingeko joko olinpikoak gogora ekarri nahi izan du gaurko domina eskuratu eta gero. Oroitzen bazarete, iaz azken kilometroetan ihes eginda zirenak atzetik aurrera eginda harrapatzeko gauza izan zen, baina esprintean hirugarren postua besterik ezin izan zuen lortu Samuel Sanchez eta Rebellinen atzetik. Aurtengoan bi arrazoi eman ditu igandean bigarren urrezko domina lortzeko: alde batetik etxean ari dela (gaurko erlojuaren kontrako saioan 23000 ikusle ziren, gehienak bera animatzen, noski) eta bestetik zangoak Beijinen baino hobeto dituela.

Garbi dago erabat kontzentratuta dagoela aurtengo munduko txapelketa hauetarako. Hala ere ez zait iruditzen gainontzekoek gauzak erraz jarriko dizkiotenik, baina saiatuko dela seguru naiz.

Esan bezala Larsson izan da bigarren sailkatu dena. Esanguratsua bere adierazpenak. Bere hitzetan Cancellara dagoen erlojuaren kontrako saioan zilarra lortzea urrea lortzea bezala sentitzen duela. Ez zait harritzen suitzarraren ibilbidea ikusita.

Gaurkoa irudirik kaxkarrena eman duena Wiggins izan da. Aurreko postuetan ikustea espero genuen, baina ez da gauza izan maila emateko. Larssonek berak ere aurreratu egin du eta muinora azkenekoz igotzen ari zela arazo mekanikoak izan ditu katearekin edo, eta ezinak jota, amorrazioz, bizikleta lurrera bota du. Beharbada denbora gehiegi lehiaketetatik kanpo?

Errepidekoari begira

Tropelean guztiok igandeko saio horren zain gaude. Ez da erreza 10 txirrindulari aukeratzea eta informazio oro gutxi da. Zenbait iruzkinetan Haussler-en eta Frank Schlecken inguruan galdezka aritu zarete.

Lehenaren inguruan esan, ondo zenioten bezala, egun Alemanian bizi den arren Australian jaiotakoa da. Bi naziotasunen jabe da eta Alemaniako taldeak txirrindularia Mendrision nahi bazuen ere, berak ezetz esan du alde batetik bere egutegian ez zuelako aurre ikusita eta bestaldetik ibilbide hori ez omen da egokia bera bezalako txirrindulari batentzat. Hurrengo urtean, berriz, Melbournen jokatuko da munduko txapelketa eta badirudi han izango dela. Bai, badirudi alemaniar baino australiarrago sentitzen dela Haussler.

Frank Schlecki dagokionez, Vueltako 11. etapan lasterketa uztea erabaki zuen. Dirudienez Amstel Gold Race klasikoan izan zuen erorikoak arazoren bat sortu zion belaunetako batean eta ebakuntza egitera eraman zuten. Hau horrela izanda, zail ikusten zen Mendrisioko munduko txapelketarako errekuperatuta izatea.