Kategoria Artxiboak:Espainiako Vuelta

Mendien osteko esprintean Greipel nagusi

Greipel. 2009ko Vueltako 16. etapan garaipenaSentitzen dut gaur arte Vueltaren inguruko berririk ez idatzi izana. Beharbada espero baino ikuskizun gutxiago eman zuten mendietako etapek eta horrek Vueltaren inguruan idazteko gogoa kendu zidan. Egia esan gustura idatzi nuen Romain Sicarden garaipenaz eta espero dut askok nahiago zenutela horren berri izan.

Gaurkoan iheslarien etapa izan zitekeela pentsatzen bagenuen ere, esprinta jokatu da Puertollanon eta Columbia-HTCko azkarrenak ez du barkatu.

Gaur sofan jarri eta telebistari begira jartzea pentsatu dut. Etxera iristerako irratian entzun dut nola Rosendo ihes eginda zioan 8 minutu inguruko tartearekin, beraz, loak ez hartzea izango nuela helburu.

Bide zabalak, tropeleko esprinterrak denbora jateko lanetan eta Andalucia CajaSurreko txirrindularia ihesaldian ahalik eta gehien irauteko lehian. Hain txirrindulari zalea ez banintz bataz-besteko abiadura zein zen entzun, erlojuari begiratu eta beste zerbait egitera joango nintzateke arratsaldeko 6ak arte.

Eztabaidagai jar genezake tropelak eta ordutegi ofizialaren arteko desfase ikaragarria. Ez dakit zeinek duen errua, tropelak ala antolatzaileek, baina eskerrak irailean udara den bestela ilunpetan iritsiko balirateke txirrindulariak helmugara.

Tropelak helmugarako 18 kilometro ingururen faltan harrapatu du Rosendo. Sevillarrak 140 kilometro egin omen ditu bakarrik ihes eginda eta ez da marka makala.

Guztiak ziren prest esprinterako batez ere Farrar eta Boonen falta zirela kontutan izanda aukerak handitzen baitzitzaizkien lasterketan diharduten esprinterrei. Abiadura bizian ziren azken 4 kilometro inguruan Puertollanoko kaleetan eta eroriko ikusgarria izan da. Lau txirrindulari izan dira erori direnak eta hauetatik bi esprinter, Dean eta Weylandt. Deanek jaiki eta helmugaraino iristea lortu du bere taldekide baten laguntzaz eta Weylandtek, zauri larriagoz, beranduago lortu du helmugaratzea. Quick Stepeko belgikarrak mikro austura bat duela jakin araziko dute eta bihar erabakiko dute irteera hartu ala ez.

Esan bezala nabarmen lanean Columbia-HTC taldea ari zen eta Greipelek nagusitasun handiz lortu du garaipena. Atzetik Bonnet eta Bennati izan ditu. Honenbestez Greipelek 3. garaipena du 2009ko Vueltan. Liège eta Vinaroseko garaipenen ostean, gaur Puertollanon. Horretaz gain, puntuetako sailkapenean ere lider jarri da taldean zalaparta sortu duen erabaki batek puntuak kendu arazi baitzizkion Valverderen mesedetan.

Farrarrek esprintean garaipena

Farrar. 2009ko Vueltako 11. etapan garaipena

Egunean zehar espero bezala ihesaldia eta gero, esprintean erabaki da gaurko etapa. Hala ere ez zeuden esprinter guztiak Boonen kasuan bezala. Hauen artean azkarren, eta lehen garaipena lortuaz, Farrar estatu batuarra izan da.

Gaur ere saiakerak izan dira ihesaldia ostatzeko, baina azkenean aurrera egitea lortu dutenak Amets Txurruka, Moncoutie (Aitanan amaitu zen etapako protagonistetako bat), De la Fuente eta Hoogerland izan dira. Garbi zegoen Moncoutiek mendiko maillota berreskuratu nahi zuela eta De la Fuentek nola edo ahala defendatzen saiatu beharko zuela. Markaketa hori zela eta, Amets Txurruka eta Hoogerlandek aurrera egin dute Collado Bermejo gainera igotzerakoan. Moncoutiek, ordea, argi zuen gaur zer egin behar zuen eta De la Fuente atzean utzi eta aurrera jo du aurreko bi txirrindulariekin bat eginez. De la Fuentek ezin izan dio jarraitu eta bertan geratu da. Collado Bermejo gainean azkenean Moncoutie izan da pasatzen lehena.

Eguneko ihesaldia, beraz, Amets Txurruka, Moncoutie eta Hoogerlandek osatu dute. Hirukoteak ia 9 minutuko tartea atera ahal izan dio tropelari eta horrek faboritoen taldeak urduritu ditu. Izan ere Hoogerland sailkapen nagusian 4’41”ra zen eta lasterketako lider jartzeko arriskua zegoen. Faboritoen talde guztiak (Rabobank, Liquigas, Caisse D’Epargne,…) tiraka hasi dira tarteak murrizteko eta Campo de San Juan 2. mailako gaina pasa ostean ihesaldia zapuztea lortu dute. Hori bai, Moncoutie gustura, gaurko bi mendateetan puntuak jasota mendiko sailkapenean lidergoa sendotzea lortu baitu 86 punturekin.

Tropela bat eginik eta Caravaca de la Cruzeko helmugara jaisten ari zirela Di Gregoriok saiakera egin du. 30”ko tartea ere atera du, baina tropelak, Liquigas buruan, frantziarraren ahalegin guztiak ezerezean utzi ditu. Ondoren Gerdemann ere saiatu da, baina honek ere ez du ezer lortu. Behintzat atzoko erorikoak ondorio larririk ez ziola utzi ikusi ahal izan dugu.

Tropelak abiadura bizia hartu du helmugara bidean eta ezustean aurrera egiten saiatu dena Cancellara izan da. Ez da lehen aldia horrela garaipena lortzen duena, baina gaurkoan ez du posible izan. Bukaeran, Farrar nagusitu da guztien aurretik. Atzetik Gilbert eta Marcato izan ditu. Aipagarria Iñaki Isasiren esprinta 4. sartu baita. Sailkapen nagusiari dagokionez aldaketarik ez.

Bihar atseden eguna izan dugu eta etzitik aurrera Vuelta erabakiko dituen hiru etapa ikusgarri. Oraindik guztia erabakitzeko dagoela esan daiteke.

Velosok garaipena Xorret del Catin

Veloso. 2009ko Vueltako 9. etapan garaipenaEtapa jarraitzeko aukera izan duzuenok ados izango zarete aspergarria izan dela diodanean Xorret del Cati igotzen hasi diren arte. Ihesaldia aurretik eta atzetik 6 minututik gorako atzerapenarekin tropela. Eskerrak Xorret del Catin sua piztu eta faboritoen arteko lehia ikusi dugun. Etapa garaipena Velosorentzat izan da eta faboritoen artean nagusi Valverde, Vueltako lider berria.

Hasiera hasieratik izan dira mugimenduak tropelean ihesaldia sortzeko eta lortu dutenak Veloso, Taaramae, De la Fuente, Ramirez Abeja, Marzano, Devolder eta Sanchez Pimienta izan dira. Esan bezala tarte handiak izan dituzte tropelarekiko eta Xorret del Cati igotzen hasi arte eutsi ahal izan diote.

Azken 8 kilometroetan Taaramae, Marzano, Veloso eta De la Fuente mugitu dira. Gainontzeko iheskideek jada ezin zioten erritmoari jarraitu 180 kilometro egin eta gero. Laukote honetan indartsuen Taaramae izan da. Hasieran Marzano eta De la Fuentek jarraitzeko saiakera egin dute baina ezin. Cofidiseko estoniarrak hasieran tartea irekitzea zuen helburu eta gero eustea, baina Xorret del Catiko ia %20ko maldek ia aurrera egin ezinda utzi dute. Momenturen batean bazirudien hanka lurrean jarri beharrean izango zela. Atzetik, tarte batera baina erritmo egokiagoan, Marzano eta Veloso zetozkion eta Taaramae harrapatzeko gauza izan dira. Xacobeko galiziarra, ordea, italiarra baino indartsuago zen eta aurrera egitea lortu du helmugaratu den arte. Merezitako garaipena Velosok lortu duena. Taaramaek txakalaldi galanta izan du eta azkenean 8’47”ra helmugaratu da.

Atzean faboritoak ez zeuden lo hartzeko. Kiriyenka eta gainontzeko Caisse D’Epargneko talde kideak lanerako zituen Valverdek. Rodriguezek aurrera egin du tropel nagusitik beranduago Valverdek erasoa jo eta hurrengo metroetan laguntzeko. Halaxe egin du murtziarrak, baina liderraren maillota eskuratzeko ahaleginean, Evans eta Bassok ederki erantzun diote eta uneoro Silence-Lotoko eta Liquigaseko liderrak bere gurpilean izan ditu. Bitartean Samuel Sanchez ez zen faboritoen artean ikusten.

Dakizuen bezala lehen 3 postuentzako gain-sariak daude eta horiek behar zituen Valverdek Evansi 2 segundoko tartea kendu ahal izateko gurpiletik atera ezin zuela ikusita. Dagoeneko Veloso helmugaratua zen, baita Marzano ere. Hirugarren postua behar zuen murtziarrak. Helmuga Xorret del Cati gainetik 3 kilometrora izanik, jaitsiera azkarra egin du Valverdek eta helmugaratzerako orduan De la Fuente harrapatzeko gauza izan da gainontzeko faboritoan gurpilean zituela. Nahi duzuena esango duzue, baina garbi garbi, De la Fuentek Valverde esprinta egiten ari zela ikusi duenean hanka jaso du 8 segundoko gain-saria, eta beraz, lidergoa jaso zezan. Eztabaidarako gaia zalantzarik gabe.

Gaurko etaparen ostean Valverde da lider berria, 2. Evans 7 segundora eta 3. Gesink 37ra. Samuel Sanchezek gaurko atzeraldiaren ondorioz, 6 posturaino atzeratu da.

Lehen euskaldunari dagokionez, Haimar Zubeldiak jarraitzen du 9. postuan, atzo baino postu bat atzerago.

Guztiek Valverde lider nahi dute

Gaurkoan bi gauza ikusi ditut eztabaida gai jarri nahiko nituzkeenak. Alde batetik De la Fuentek hanka jaso izana Valverdek gain saria jaso zezan (nik hori ikusi dut behintzat). Ulertzekoa alde batetik Matxinen txirrindulariak egin duena, baina bestaldetik, Evansi dagokionez, itsusi samarra. Adi izango naiz australiarrak gaiaren inguruan esaten dituenez, ziur bainaiz esango dituela.

Bigarrenik helmugan antolatzaileek Valverde eta De la Fuenteren artean segundo bat izan dela jarri dute. Evansi De la Fuenteren denbora bera eman diote. Zuek horrela ikusi al duzue? Nire ustez zalantzarik gabe Valverde eta De la Fuenteren artean segundo bat egon bada (nik ez dut ikusi segundo hori) beste horrenbeste beharko zukeen De la Fuente eta Evansen tropeltxoaren artean. Sailkapenak ikusterakoan, zinez, honek harrituta utzi nauela. Garbi da, bai, Murtziara sartzerako Valverdek bai ala bai urrezko maillota izan zezan interes asko daudela, nire iritzi apalean behintzat.

Cunegoren garaipena Aitanan

Cunego. 2009ko Vueltako 8. etapan garaipenaCunegok azken kilometroetan erakustaldi itzela eman du. Orain arte galduta zuen denborari esker faboritoek ez diote italiarrari jarraitu eta abiadura azkarrean egin du aurrera. Horri eskerrak Moncoutie harrapatu du azken kilometroetan eta helmugarako bidea erraz egin du garaipena eskuratuz. Moncoutie azkenean bigarren eta Gesink hirugarren helmugan.

Gaurko etaparen zain ginen. Bagenekien faboritoek nola dauden ikusteko etapa izango zela eta hala izan da.

Etaparen jarraipena telebistaz ikusten ari nintzela jaso dut lehen berri garrantzitsua: Andy Schleck-ek Vuelta utzi du (Tropelean %12,9ak aukeratutako faboritoa). Espero genuen Schlecktarrek Vuelta ez zutela lehiatuko baina ez nuen uste hain azkar utziko zuenik. Berarekin batera lasterketa Jerome eta Bernaudeuk utzi dute.

Taaramae izan da lehen ihesten saiatu den txirrindularia baina 20 segundoko tartea lortu badu ere bere abentura denbora gutxi iraun du. Benetako ihesaldia Bonnet, Voss, Hoogerland, Weening, Moncoutie eta Hinaultek osatu dute.
Tropeltxo honek bai, honek lortu du tropel nagusitik ihes egitea eta eguneko ihesaldia izan da. Tropeltxo honek lortu duen denbora tarterik handiena ia 13 minututakoa izan da eta ia-ia etapa irabazlea ere izan du.

Aitanako gaina igo aurretik, 3. mailako 4 mendate eta 2. mailako bi igo behar zituzten. Ihesaldiko txirrindularien helburu nagusia, beraz, etapa garaipena lortzen saiatzeaz gain mendiko maillota eskuratzea izan da. Moncoutie frantziarra izan zen iazko Vueltan mendiko sari nagusiko garailea eta aurten ere bide horri ekin dio. Ihesaldian bildu dituen puntu guztiei esker berak eramango du bihar maillot hori. Iheskide izan dituen Weening eta Hoogerlandek ezin izan dute behar beste puntu bildu eta 2. eta 3. postuetan aurkitzen dira une honetan.

Caisse D’Epargne izan da tropel nagusian erantzukizuna hartu duena. Bazekiten Valverdek etapa garaipena edo lehen hiru postuetan sartuko balitzateke lidergoa eskuratuko zuela eta ez zioten aukera horri muzin egin nahi. Horretarako ihesaldia bertan behera utzi behar zuten. Erritmo bizia jarri dute eta tropelean zatiketak sortu dira. Horien artean Cancellara liderra izan da geratzen hasi dena. Suitzarrak bazekien gaur hala izango zela.

Oker ez banaiz, tropel nagusia Tudonsetik behera jaisten hasi direnean Samuel Sanchezek eroriko bat izan du. Caisse D’Epargnek egoera horretaz jabetuta erritmoa bizitu du eta asturiarrak gain esfortzu bat egin behar izan du  bat egiteko. Esfortzu horri esker Aitanaren igoera hasi aurretik bat egitea lortu du Sanchezek.

Aurrealdean mugimenduak hasi dira Aitana igotzen hasi direnean. Lehena erasotzen Hoogerland izan da baina Moncoutie ez zegoen etapa garaipenaren lehia uzteko prest. Biak aurrera egin dute eta atzealdean Cuesta eta De la Fuentek tropel nagusitik aurrera egin dute. Gero Marchante bera ere saiatu da baina bi saiakera hauek alferrik ziren Caissek lasterketaren lidergoa eskuratu nahi baitzuen gaurko etapan. Tropel nagusiaren atzealdean, berriz, Vinokourov eta David Herrero ezinean ikusi ditugu. Kale egin duen faboritoetako bat gaur kazakhstandarra izan da eta sailkapen nagusiaren lehiatik kanpo geratu da.

Tropel nagusia pixkanaka pixkanaka ihesaldiko txirrindulariak irensten joan da baina aurrealdean ziren Moncoutie eta Hoogerland. Frantziarrak, ordea, erritmo aldaketa bat egin du eta Hoogerland atzean uzteko gauza izan da. Moncoutiek etapa garaipena nahi zuen eta hala izango zen Cunegok aurrera egingo ez bazuen.

Tropel nagusian eraso ezberdinak izan dira. Szmyd-ek tropelari erritmoa jarri dio gero Bassok erasoa jo zezan. Aitortu behar da italiarra saiatu saiatu dela, baina ezin izan du atzo galdutako denbora berreskuratzeko ezer egin. Erasoa jo duena eta libre joan dena Cunego izan da. Bizi-bizi egin du aurrera Lampreko italiarrak.

206 kilometroko etapa izaki eta ihesaldian egin duen esfortzuaren ondorioz, Moncoutiek etapa garaipena eskura izan badu ere, atzetik Cunego indartsu zetorren. Frantziarra azken kilometroan sartu denean garaipena eskura zuela pentsatu dugun arren, Lampreko liderrak ezarritako erritmoak Cofidiseko txirrindularia harrapatu eta pasatzerainokoa izan da. Esan bezala, beraz, Cunegok etapa garaipena.

Atzealdean eraso ezberdinak izan dira. Gesinkek bere saiakera egin eta aurrera egitea lortu du eta hirugarren helmugaratu da. Valverdek ere bere saiakera egin du, baina Evans eta Sanchezek ederki eutsi diote eta azkenean Evansek eskuratu du lidergoa.

Gori-gori dago sailkapen nagusia gaurkoaren ondoren. Evans da lider berria eta Valverde eta Sanchez 2. eta 3. dira 2 eta 8 segundotara. Lehen esan bezala, faboritoetatik asko atzeratu dena Vinokourov izan da.

Kazakhstandarraren atzerapena ikusita ez dakit Astana taldeak zein estrategia hartuko duen. Momentu honetan taldekiderik aurreratuena Haimar Zubeldia dute, 8. postuan Evansengandik 1’37”ra. Bigarrena Navarro 2’12”ra. Haimar Zubeldia izango al da taldeko lider berria? Euskaltel-Euskadi taldean izandako ibilbidea kontutan hartu beharko bagenu logikoena hala izatea deritzot. Hala ere ikusi egin behar Haimarrek nola eusten dion biharko etapari. Nire iritziz Haimar sailkapen nagusian lehen hamar postuetan sailkatzeko moduko txirrindularia da eta ahalegin horri ekin beharko lioke. Zer deritzozue?

Cancellarak ez du hutsik egin

Cancellara. 2009ko Vueltako 7. etapan garaipenaAssenen motoen zirkuitu batean irabazi zuen Cancellarak eta motoekin konparatze nuen. Gaurkoan F1eko autoak ibiltzen diren Valentziako kaleetatik aritu dira txirrindulariak erlojuaren kontra eta oraingoan ere Cancellarak ez du areriorik izan. 49 km/h inguruko bataz besteko abiaduraz gailendu zaie gainontzeko txirrindulariei eta maillot horia berreskuratu du. Millar eta Grabsch 32 eta 36 segundotara sailkatu dira hurrenez hurren espero bezala.

Gaurko etaparen nondik norakoak espero bezala joan dira. Beharbada eguraldiak batzuri kalte gehiago egin badie ere, orokorrean ez da ezusteko nabarmenik izan. Millar eskoziarrak denbora oso ona jarri du eta denborarik onena izan da Cancellarak bere lanak burutu dituen arte. Bazirudien Grabschek Millarren denbora gaindi zezakeela, baina azkenean 2 segundora sailkatu da alemaniarra.

Faboritoetan lanei ekiten lehena Vinokourov izan da. Kazakhstandarrak zerbait egitekotan gaurko erlojuaren kontrako saioan egingo zukeela pentsatzen nuen, baina ez da hala izan. Berak egin ohi izan dituen saioetatik urruti izan da eta Millarren denbora baino 41 segundo gehiago behar izan ditu.

Mosquera Samuel Sanchezen aurretik ekin dio saioari, baina galiziarra pattal zebilen erlojuaren kontrako espezialista ez baita, eta asturiarrak gainditu egin du. Bazirudien oso ondo ari zela Euskaltel-Euskadiko txirrindularia eta helmugan ere hala izan da. Millar gainditzeko gai izan ez bada ere, 15 segundora helmugaratu da eta faboritoen artean denborarik onena egitea lortu du gaurkoan.

Danielsonek tarteko mugarrietan denbora kaxkarragoak egiten joan den arren, bukaeran Samuel Sanchez baino 3 segundo gehiago behar izan ditu ibilbidea egiteko.

Haimar Zubeldia izan da hurrengoa helmugaratzen eta denbora bikaina egin du usurbildarrak. Aspaldian erlojuaren kontrako saioetan ez dut ikusi hain ondo eta sailkapen probisionalean 10. sailkatzea lortu du Millarrengandik 46 segundora.

Dagoeneko Valverde, Evans eta Bassok zer egingo zutenaren zain ginen. Lehen mugarrian murtziarrak 20 segundo galtzen zituen, 10 australiarrak eta 29 italiarrak. Bigarren mugarrian 23, 23 eta 49 ziren hurrenez hurren. Gaizki, beraz, italiarra. Helmugan azkenean, 33, 30 eta 1’11”. Evansen denbora ez da espero bezain ona izan kontutan izanda bera erlojuaren kontra espezialista dela. Valverde ohiko moduan, eta Basso espero baino askoz okerrago.

Faborito nagusien atzetik, Kiriyenka eta David Herrero bilbotarrak egindako denborak benetan aipagarriak. Errusiarra 14 Millarrek baino 14 segundo gehiago besterik ez ditu behar izan eta bilbotarrak 10 besterik ez. Ikaragarria David Herrerok egindako erlojuaren kontrako saioa eta ondorioz sailkapen nagusian 3. postuan aurkitzen da.

Cancellarak lehen mugarrian ez du denborarik onena egin, baina kilometroak aurrera zihoazen heinean, abiadura handitzen joan da. Esan bezala azkenean helmugan lehen postuan sailkatu da eta Millarri 30 segundo jan dizkio.

Aipatzekoa Bennati eta Boonek egin duten saioa. Bennatik lehen mugarrian denborarik onena egin du Millarrena 4 segundoz hobetuz. Ez genuen espero erritmo horri eusteko gai izango zenik. Ezin jakingo dugu hori zehazki, izan ere zulatua izan du italiarrak eta azkenean Cancellararengandik 1’12”ra sailkatu da. Antzeko zerbait izan da Booneni gertatutakoa eta azkenean 1’02”ko denbora egin du. Denbora bikain honi esker sailkapen nagusiko bigarren postuari eusten dio.

Honenbestez esan Cancellarak ez duela areriorik. Biharko etapan liderraren maillota eramango du baina etzi ez. Vueltan egin behar zituen lan guztiak, beraz, egin dutela dirudi eta ez harritu laster erretiratzen bada. Ez dio axola, bere espezialitatean onena dela erakutsi baitigu berriro ere.

Faborito nagusiei dagokienez, Samuel Sanchezek egin du gaurko saiorik onena eta Bassok txarrena. Sailkapen nagusiari begirada bat ematen badiogu, faboritoetan lehena Evans dela ikusten dugu eta atzeratuena Basso australiarrarengandik 40 segundora. Beste faboritoei begiratuta, berriz, atzeratuena Mosquera dugu 1’40”ra. Ahaztu gabe beharbada kontutan hartu beharko genuke Kiriyenka mendian ondo moldatzen den txirrindularia baita. Hau 5. aurkitzen da sailkapenean, Evansen aurretik 4 segundo gutxiagoz.

Euskaldunetan esperantza pizten dizkiguten bi txirrindulari aipatu nahi nituzke. Alde batetik David Herrero. Gaur egin duen erlojupeko bikainaren ostean sailkapen nagusian 3. postuan baitago. Ez dakit bihartik aurrerako lanetan nola moldatuko den, baina oraingoz bikain dabil. Bestea Haimar Zubeldia dugu. Horner-ek lasterketa utzi ostean eta Vinokourov %100ean ez dagoela ikusita, Astana taldearen lider bihurtu daiteke usurbildarra bere mendiko ezaugarriak kontutan hartzen baditugu. Hala ere kazakhstandarraren baimena beharko du, baina seguru aurrealdean ikusiko dugula.

Bihartik aurrera benetako lasterketa hasiko da. Aitana gainak lehen filtro lana egingo du. Gaurko erlojuaren kontrako saioak sailkapena pixka bat nahastu badu ere (batez ere esprinterrak lehen postuetatik atzeratuz), biharkoan lehen hamabost postuetan beharko du izan Vuelta irabazi nahi duenak. Adi izango gara, zalantzarik ez.