Contadorrek ezin Brajkovic utzi

Contador eta Brajkovic Alpe d´Huez igotzenIkaragarria gaur ikusi dugun etapa. Argi genuen faboritoen arteko lehia ikusiko genuela Alpe d’Huez-eko igoeran eta hala gertatu da.

Bi talde ziren protagonista, Radioshack eta Astana. Talde estatubatuarrak Brajkovic-i laguntzeko bi txirrindulari zituen eta Contadorrek lau. Garbi zegoen Contadorrek gaurko etaparako taldekideak lanean jarriko zituela berriro ere liderraren maillota berreskuratzeko.

Alpe d’Huez-en gora hasi direnean faboritoen tropeltxoan txirrindulariak Astanaren erritmoa jarraitu ezinik geratu dira. 8km-ren faltan espero bezala Contadorrek erasoa jo du. Atzetik, Pintokoaren ezusterako, Brajkovic-ek ederki jarraitu dio eta ibilbide guztian egindako eraso saiakeratan (bost bat edo izango ziren) esloveniarra indarrez bikain dabilela agerian geratu da.

Metro batzuk atzerago Szmyd, Coppel eta Van Den Broeck izan dira. Poloniarrak birritan egin du bat aurreko bi indartsuenekin eta makina bat eraso jo ditu etapa garaipena lortzeko asmotan, baina gaurkoan oilarren aurka ezinezko izan zaio.

Azkenean Contadorrek etapa garaipenarekin eta sailkapen nagusian 2. postura aurreratzearekin konformatu beharrean izan da. Brajkovic inoiz baino lider sendoagoa.

Radioshacken abisua?

Nire ustez gaur Armstrongek moral kolpe bat eman dio Contadorri Tourrari begira. Badirudi Astana taldea aurrez pentsatu baino indartsuago dagoela, baina Radioshack-ek Tourrean gerta daitekeenaren aurrerapen bat egin digula uste dut. Bihar Contadorrek zail izango du Brajkovic mendean hartzea eta hola gertatzen bada Tourrari begira Pintokoa urduri jartzeko moduko gertaera izan daitekeela uste dut.

2009ko Dauphiné Libéré lasterketan euskaldunak aurrean

2009-Dauphiné Libéré. Mikel Astarloza eta Haimaz ZubeldiaLasterketa igandean bukatu bazen ere, ez nuen nahi euskaldunek Dauphiné Libéré lasterketan aurtengoan izan duten protagonismoa aipatu gabe utzi nahi. Mikel Astarlozak 5.  postuan amaitu zuen eta Haimar Zubeldiak, lehen urtez Astana taldean ari dela, 8. postuan. Top ten-eko sailkapenean, beraz, bi gipuzkoarrak.

Euskaltel-Euskadi taldeko txirrindulari pasaitarrak 4. etapan jokatu zen erlojupekoan ikaragarri aritu zen eta 9. sailkatzea lortu zuen. Ondorioz egun horretan dagoeneko 10. postuan zen eta sailkapen nagusiaren lehian sartu zen. Mont Ventoux-eko etapa zetorren hurrengo egunean eta Mikelek etapa ona eginda, sailkapen nagusian postu bat aurrera egitea lortu zuen. Zerbait gehiago nahi zuen Euskaltel-Euskadiko txirrindulariak, eta hurrengo egunean faboritoen artetik ihes egin eta han joan zen aurrera denbora atera asmoz. Zalantzarik gabe gogorra egingo zitzaion ibilbidea, baina lortutako etekina ere ez zen nola nahikoa izan. Briançongo helmugan bigarren euskalduna izan zen Bingen Fernandezen atzetik eta talde nagusiari ia minutuko errenta ateratzea lortu zuen. Denbora tarte nahikoa 9. postutik 4.eraino jauzi egiteko. Lan ikaragarria pasaitarrak egindakoa. Podiumeko postuak eskura geratu zitzaizkion, baina hurrengo egunean St Frnaçois Longchampeko igoera zuten. Zoritxarrez Mikel Astarlozari aurreko eguneko gain esfortzuak ez zion barkatu eta fabortoi jarraitu ezinda geratu zen. Hala ere oso ondo egin zuen azken igoera eta postu bakarra galdu zuen. Bostgarren amaitu zuen, beraz, 2009ko Dauphine Libéréko lasterketa edizio honetako protagonistetako bat izanda.

Haimar Zubeldiak Mont Venouxeko etapan eman zuen kolpea. Szmyd eta Valverderen atzetik, 3. helmugaratu zen aurtengo Dauphine Libéré lasterketako garailea erabaki zuen etapan. Bezperako erlojupekoan ez zen lehen ibiltzen zen bezain ondo jardun, baina mendian aspaldiko ondoen ikusi genuela esan daiteke. Sailkapen nagusian 5. postura igo zen eta bere taldeburuaren ondoren, bera zen sailkapen nagusiko bigarrena. Briançongo etapan Mikel Astarlozak ez bezala, berak denbora galdu zuen 7. posturaino jaitsiz. Normala izan zela esan daiteke bere helburua Astanako taldeburuari laguntzea baitzen. Azken aurreko etapan ere, oilarren lehia zela eta, denbora gehiago galdu eta 8. postuan amaitu zuen. Usurbildarra ere, beraz, ikaragarri.

Bi euskaldun lehen hamar postuetan. Eta sailkapen nagusian pixka bat aurrerago egiten badugu Txente Garcia eta Igor Anton aurkituko ditugu 15 eta 18. hurrenez urren. Emaitza pozgarriak zalantzarik gabe euskal zalegoarentzat. Tourrean beste horrenbeste egiteko gai izango al dira gure txirrindulariak?

Eta Tourreko lehiaketa iritsi bitartean zer?

Dauphiné Libéré eta Luxenburgo 2009Asko dira dagoeneko Tourrerako kiniela egiteko zain direnak. Giroaz gozatu dugu, laugarren urtez Tropeleko lehiaketarekin bizitzeko aukerarekin. Hori kiniela egin duzuenok, ezagutzen baititut zenbait konturatzerako Giroa hasi zaienak eta horiei Tourreko lehiaketaren itxaronaldia luzeagoa gertatzen ari zaie.

Bitartean zer? Bada txirrindularitzaren egutegiak hurrengo egunetan eskainiko dizkigun ekitaldiei jarraipena egitea geratzen zaigu. Alde batetik txirrindularitza gustatzen zaigulako eta bestetik, zergatik ez, Tourrean kiniela on bat egiteko ahalik eta informazio gehiena biltzeko.

Asteazkenean Luxenburgoko Itzulia hasi zen. Parte hartzaileen artean Euskaltel-Euskadi aurkitzen da, Giroari muzin egin ondoren lasterketa honetan bueltatzen da berriro ere lehiaketara Amets Txurruka talde buru dutelarik. Euskaltel-Euskadiko txirrindulariak izango dira lehiatzen arituko diren euskaldun bakarrak Luxenburgon.

Bost eguneko itzuli hau asteazkeneko prologoarekin hasi zen. Tourrean izaten den bezala, 2,7 kilometrotako erlojupeko motza, maillotaren jabea erabaki zuena. Prologo honetan Astana taldeak irabazi zuen Rast gaztearen lanari esker. Atzoko etapa, berriz, Mondorf-les-Bainsen amaitu zen esprintean eta Napolitano izan zen garailea. Eta gaurko etapan Andy Schleck izan da garailea Breschel eta Aitor Galdosen aurretik. Gaurko etaparen ondoren Rastek lasterketa lidergoa galdu du eta Bazayev taldekideak eskuratu. Oraingoz Astana taldea lasterketaren buru da baina oraindik bi etapetan gauzak alda daitezke. Euskaldunei dagokienez, Aitor Galdos da sailkapeneko gizonik aurreratua 6 segundora 4. postuan. Amets Txurruka 15. postuan da 22 segundotara. Igandea bitartean, beraz, Luxenburgora begira izango dugu begi bat badaezpada, txirrindulariak zein mailatan dabiltzan jakiteko, batez ere gure txirrindulariak.

Igandean esan bezala, Dauphiné Libéré hasiko da. Astebete iraungo duen lasterketa honetan Tourrean parte hartzen duten txirrindulari gehienak izaten dira. Garrantzitsuenak Evans, Contador, Valverde, Gesink,… bertan izango dira. Kasu honetan begi bakarra ez, bi begiak eta ederki irekita izango ditugu lasterketa horren nondik norakoak jakiteko. Gainera, ETB1ek ohi duen bezala, Fermin eta beste esatariekin lasterketa jarraitzeko aukera izango dugu.

Beranduago Suitzako Itzulia izango da, ekainaren 13tik 21ra hain justu. Oraindik urruti dago eta informazio gehiegirik ez dugunez gogoratu bakarrik egin nahi nuen. Aurrerago joango gara komentatzen.

Baina zerbait ahaztu zait, ez? Ez al duzue zerbait faltan botatzen? Ba bai. Orain urtebete Euskal Bizikletaz aritu zen Hibai adiskidea. Zerbait susmatzen genuen, baina ez genuen usteko 2008ko edizioa azkena izango zenik. Tropela Elkartekook Euskal Bizikleta gustora jarraitu ohi izan dugula esan dezakegu Efimkini lasterketako lider izan zenean egin genion elkarrizketa kasu. Garai horiek pasa dira eta Euskal Bizikleta ere historiaren parte bihurtu da. Hemendik aurrerako ekainak ezberdinak izango dira.

Tourreko lehiaketa prestatzen

Nire KinielaZiurrenik asko izango dira Tourreko lehiaketaren zain daudenak. Nire belarrietara iritsi den informazioagatik, berau asteburu honetan martxan izango omen da. Eta ziurrenik, asko izango dira baita ere, bertan bere lagun kuadrilari edo famili artekoei irabazteko Tourraren aurretik korritzen diren probak buru-belarri jarraitzen dutenak ere. Eta urtero garai honetan, Tourrera begira zale askok jarraitzen dituzten bi itzuli dira Dauphine Libere eta Suitzako Tourra. Bertan ikusten diren txirrindularien sasoi-puntuak ziurrenik jende askoren kinielak baldintzatuko ditu.

Horrelakoa al zara zu ere edo emaitza hauetaz ahaztu eta kiniela susmo hutsetan oinarrituta egiten dutenetakoa zara? aitortu beharra daukat ni neu saiatzen naizela bi proba hauetako emaitzetatik ahalik eta urrunen ibiltzen baina azkenean, zas, beti amaitzen dut Dauphinen edo Suitzan ikusitakoaren arabera neure kiniela egiten.

Azken urteotan bi proba hauetan ikusi ditugun txirrindularien sasoi puntuak ez dira handik aste batzuetara Tourrean eman zuten mailaren islada egokia izan. Onera edo txarrera, proba hauetako eta Tourreko sasoi maila oso desberdinak ikusi izan ditugu txirrindulariengan eta aurten ere horixe bera gerta daiteke, eta seguru kiniela mordo bat apurtuko direla bi aste hauetan nabarmentzen diren txirrindulariak gero huts egiteagatik.

Ez dut artikulu hau datuz osatzeko denborarik baina gogoan ditut Dauphinen Rijs, Basso edo Landisek erakutsitako maila eskasa eta ondoren Tourrean erakutsitako nagusitasuna, eta urrutira joan gabe, azken bi urteetako Dauphineko irabazleek Tourrean izan duten sailkapen nagusiko emaitza ere deigarria.

Zein taktika jarraitzeko asmoa duzue kiniela egiterako orduan?

Dauphine, Tourrari begira

Dauphine 2007Izan ere, Tourra datorren sinonimo dira Dauphine eta Suitzako Itzulia. Gaur hasiko da, 5,6 kilometroko prologoarekin. Gero, bi etapa erraztxo, eta asteazkenean 31 km-ko erlojupekoa. Azken lau etapak, berriz, oso izen eta mendate ezagunekin: Chatillon, Joux-Plane (Morzinen amaitu), Croix de Fer (La Toussuire mendatean amaitu), eta Grenobleko etapa.

Izen handiak irteeran: Evans-Popobitx, Valverde-Pereiro, Zubeldia-Astarloza-Sanchez, Sastre, Leipheimer eta abar, eta abar. Ikusi besterik ez dago Girora talde batzuek ze ziklista eraman zituzten eta Dauphinera ze daramaten. Antzik ez!

Azken urteotan Dauphineren ezaugarri izan diren izen bi faltako dira aurtengoan: bata, Mont Ventoux mendatea; eta bestea? ‘Star list’ ikusi eta berehala asmatuko duzue…