Puerto Operazioa amaitu da

Puerto OperazioaAsko hitz egin dugu “Puerto Operazioa”z eta badirudi kasu hau bere amaierara iritsi dela. Zigortu ahal zirenak zigortuak izan dira eta ez dago gehiago ezer aztertzekorik Espainiako epaitegien arabera.

Izugarrizko eskandalua izan zen Puerto Operazioa argitara eman zenean, batez ere txirrindularitzan. Ulrich, Basso, Osa anaiak, Beloki,… eta beste txirrindulari batzuk nahastuak izan ziren Eufemianoren dopin sistemaren inguruan. Dakizuen bezala operazio hartan antzemandako odol poltsa eta bestelako sustantziak Espainiako epaileen eskutan geratu ziren. UCIk eta WADA (Munduko Dopinaren Aurkako Agentzia) beste zenbait erakunderen artean, froga horiek eskatuz helegiteak jarri zituzten. Espainiako auzitegiak apirilaren 15ean lehen aldiz eta atzo behin betikoz, froga horiek beste inoren eskuetan ez uztea erabaki du. Era honetan esan daiteke “Puerto Operazioa”n antzemandako frogek ez dutela gehiagorako emango.

Ez genuen gehiago espero 200 kirolari baino gehiago nahastuak izan zitezkeen affair honen inguruan. Eta gero zenbait harritu egingo da 2016ko olinpiar jokoak Madrilen beharrean Rion jokatzea erabaki zuelako Nazioarteko Komite Olinpikoak.

“Dopinaren aurka egitea gure lema da”

Igor Gonzalez de GaldeanoIgor Gonzalez de Galdeanok Euskaltel-Euskadiko manager gisa egindako baieztapena jarri dizuet izenburuan. Egunotan talde laranja Derion da kontzentratuta eta aurkezpenean urtarrilaren 1etik aurrera dopinaren aurka abian jarriko duten barne kontrol berritua aipatu zuten.

Aurtengo udaran Iñigo Landaluzek eta Mikel Astarlozak positibo eman zuten. Horren haritik, taldearen jarraipena bermatu asmoz, eta bide batez txirrindulariak lagundu, kontrol zorrotzago batzuk ezarriko dituztela esan dute arduradunek. Xehetasunik eman ez bazuten ere, kanpoko laborategi bat taldeko txirrindulariei azterketak egiteaz arduratuko omen da sorpresarik izan ez dadin. Ez dakit orain arte zein motatako barne azterketak egingo zituzten, baina honek, itxura batean bederen, aldaketa esanguratsu bat suposatuko duela dirudi.

Euskalteleko presidente den Jose Antonio Ardanzak bere aldetik babes osoa eskaini dio txirrindulari taldeari taldearen erabakietan gardentasuna eta leialtasun absolutuak izan baitira bere esanetan. Dakizuen bezala Eusko Jaurlaritza ez da iritzi berekoa eta segur aski hori izan da neurri hau hartzearen arrazoi nagusia.

Aurtengo urtean Euskaltel-Euskadiko txirrindulariek 700 azterketa jasan bazituzten, 2010ean zenbat izango ote dira?

Zerua zainetan dutela

Laborategiko odolaBagenekien dopinari muga jartzea zail izango zela. Azken ikerketa polizialen arabera, egungo dopin kontrol guztiak saihesteko balio duen teknikaren berri bat ezagutu dugu: ozonoa zainetan sartzea. Zeinek esperoko zuen dopin teknikarik hoberena zerua zainetan sartze izango zela.

Dirudienez guztia Rebellin-en positiboaren ikerketak eman du ezagutzera teknika berri hau. Dirudienez Molleta txirrindulariari, orduan Gerolsteiner taldeko taldekidea zenari, poliziek xiringa bat aurkitu zioten hortzetako pastaren edukiontzi batean. Honek Lazzaro medikuak emana zela argitu zien poliziei.

Ikertzaileek Lazzaro mediku italiar hau ikertzeari ekin zioten eta esan dutenez 15 urteko igerilari bat teknika honen bidez nola tratatzen zuen grabatuta dute. Bai igerilaria eta bere gurasoa ere ikerketa pean daude, izan ere grabaketa horretan gurasoak tratamendua aplikatu artean bertan baitzen.

Teknika berri hau “ozono terapia” bezala eman da ezagutzera. Medikuak kirolariari 200 zentimetro kubiko inguru odol ateratzen dio eta makina baten bidez ozonoaz nahasten du (O3). Behin ozonoaz nahastuta, berriro ere kirolariari txertatzen zaio. Prozesu honetan burdina ere txertatzen zaio kirolariari globulu gehiago sor ditzan, hots, gaitasun fisikoa handi dakiokeen.

Zalantzarik gabe osasuna arriskuan jartzen du teknika honek, besteak beste enbolia bat izateko arriskuak nabarmen handitzen baitira. Kontrolei dagokienez, berriz, egungo laborategi azterketen bidez ezin da antzeman hematokrito eta hemoglobina mailak konstante mantentzen baitira.

Garbi dago zer egin behar den zerura iristeko: zainetan zerua txertatu. Inork ez zaituzte antzemango eta errendimenduak estralurtar baten parekoa izango duzue. Hori bai, osasuna arriskuan jarriaz. Hurrengoa zer izango ote da.

Bi asteren buruan Patxi Vilak zigorra beteta izango du

Patxi VilaEuskadi Irratian berriki Txetxuk Patxi Vilarekin hitz egin du. Bertan adierazi dute nola TASek testosteronaren deribatuagatik emandako positiboaren zigorra 2 urtetatik urte t’erdira jaitsi diotela. Ondorioz, zigorraren kontaketa iazko maiatzaren 5etik aurrera hasi zenez, azaroan 5etik aurrera zigorra betea izango du. Martxoan Euskadi Irratiko elkarrizketa batean errua aitortu zuen eta gaur ere hala egin du, nahiz eta “nahi gabe”ko dopina dela argudiatu zuen gaur egin duen bezala.

Argi ez dagoena da zein izan den TASek erabaki hori hartzeko arrazoia ezta ere ia Patxi Vilak UCI ProTourreko lasterketaren batean aritu daitekeen ala ez. Oraingoz Patxi Vilak esan duenez hiru kontaktu ditu eta horietatik bi ProTourrekoak omen dira. Hori bai, argi utzi du oraindik eskaintzarik ez duela eta “maillot neutroarekin” arituko dela oraingoz.

Garbi dagoena da Patxi Vilak asko sufritu duela denbora tarte honetan eta komunikabideei bere eskerrak eman dizkie berarekiko izandako jarrerarengatik. Egindakoa ordaindu du, eta orain indartsuago sentitzen omen da eta etapa berri honi ilusioz ekingo omen dio.

Dopin kasuren bat badago Eusko Jaurlaritzak dirulaguntzarik ez du emango

Miguel MadariagaHori da egungo Eusko Jaurlaritzako gobernuak plazaratu duena. Dakizuen bezala aurten amaitzen da Eusko Jaurlaritza eta Euskaltel-Euskadi taldearen artean zuten ia milioi bat eurotako hitzarmena eta berritzea tokatzen da.

Egungo gobernu berrian aurten izan diren Iñigo Landaluze eta Mikel Astarlozaren dopin auziek alarma piztu dute. Beno, gizartean bertan ere bai, eta honek diru publiko eta talde laranjaren inguruko eztabaida bizitu du Tropela.net-en ere izan den bezala. Gertaera hauen aurrean, gobernuak klausula bat gehitu nahi omen du hurrengo hitzarmenean. Klausula honen arabera Euskaltel-Euskadiko txirrindulariren batek positiboren bat emango balu automatikoki diru-laguntzak kenduko lizkioke Eusko Jaurlaritzak. Uste dut guztiok onartzen dugun ekimena dela eta beharrezkoa jazoera hauek guztiak kontutan hartzen baditugu.

Oraindik hitzak besterik ez dira, hitzarmena gauzatu aurretiko elkarrizketen inguruko adierazpenak. Ikusi beharko da azkenean zer sinatzen den, baina dagoeneko Madariagak puntu hau gehitzeko arazorik ez duela ikusten adierazi du. Bere esanetan “jendeak talde honek (Euskaltel-Euskadik) dopinaren aurka zenbat egiten duen jabetu” beharko omen luke. Hala bada, zergatik babestu du taldeak Mikel Astarloza analisi eta kontra analisiek ekaineko laginean EPO aztarnak antzeman badituzte? Kontrakoa pentsatzera eramateko frogak badituzte plazaratzeko garia badela deritzot. Gustatuko litzaidake Euskaltel-Euskadi taldeak dopinaren kontra aritzen dela sinistea, baina egun ez dut horretarako arrazoirik ikusten.

Argazkia: www.diariovasco.com