Mekabendixx!!

Hori pentsau zian Hausslerrek Cavendishek gurpil erdia baino gutxiagogatik garaipena eskuetatik kendu zionean: “Mekabendixx!!”. Fotofinixak erabaki behar izan zuen hain sprint estua.

Garbi dagoena da atzokoan bi sprinter hauek bereiztu zirela gainontzeko sprinterrengandik. Hausslerri Cavendishek bakarrik jarraitu ahal izan zion azken metroetan. Gainontzeko sprinterrek tropel nagusian jokatu zuten sprinta eta bertan Hushovd norbegiarra gailendu zen, Alan Davis eta Petacchiren aurretik.

Txirrindulari laranja bat ere aurrealdean izan zen une guztian. Koldo Fernandez de Larrea zelakoan nengoen eta pena eman zidan sprintean aurrerago sartu ez zelako, baina ez, Aitor Galdos ermuarrarekin nahastu nuen. Meritu handiko 7. postua eskuratu zuen euskaldunak. Bere taldekide Iñigo Landaluzek zorte txarragoa izan zuen eta Cipressa gaina jeisten ari zirela erori egin zen. Ezkerreko sorbaldan luxazio bat jasan zuen eta, beraz, udaberriko klasikak lehiatu gabe geratuko da algortarra.

Dakizuen bezala hurrengo klasika garrantzitsua bi aste barru jokatuko da Belgikan. Bertara joan nahi baduzue oraindik garaiz zarete Tropela Elkarteak antolatu duen bidaian apuntatzeko. Seguru ikaragarria izango dela!!

Liège-Bastogne-Liège lasterketaren atarian

Li�ge-Bastogne-Li�ge 2008Hemendik gutxira emango diote Liegen bildutako txirrindulariek iparraldeko azken lasterketa nagusiari, 10:15etan hain zuzen ere. 261kmko ibilbide luzeari egin beharko diote aurre. ETB1en azken kilometroak ikusteko aukera izango dugu arratsaldeko hiruretatik aurrera eta eskertzekoa izango da.

Zoritxarrez ez dugu euskaldunik ikusiko aurreko lekuetan. Ez dirudi behintzat Fl�che Wallonne eta Amsteleko lasterketak ikusi eta gero aurrean izango direnik. Aurrean izango direnak Kirchem (Fl�che Wallonne aurtengo garailea) eta Cunego (Amsteleko garailea aurreko igandean) izan dira zalantzarik gabe. Beraekin batera Dekker, Rebellin, Bettini, Schleck, Evans eta Valverde izango dira seguraski, besteak beste.

Ez dugu asteazkeneko eguraldi txarra ikusiko eguraldi bikaina baitago aurrikusita. Honek lasterketa azkarrago bat izango dela pentsatzera garamatza eta, beraz, bestelako lasterketa bat ikustera. Ia zer eskaintzen diguten txirrindulariek gaurkoan!

Klasika handien bigarren astea

Badator klasika handien bigarren astea. Flandriako Tourra, Gante-Wevelgem eta Paris-Roubaixen tropeleko gizaseme indartsuenen erakustaldiekin gozatu ostean, beste txirrindulari talde batek hartuko du protagonismoa datozen egunotan.

Lehenengo plater moduan, igande honetan Amstel Gold Race klasikoa jokatuko da.  253 km-ko ibilbidea, kotaz josita (31 guztira). Helmuga Cauberg-en, baina aurretik Keutenberg (%8 batazbeste, gehienez %20), Vrakelberg edo Eyserbosweg bezalako muinoekin. Aurten ez da egongo Michael Boogerd bigarren postuan amaitzeko. Holandarra 4 aldiz helmugaratu izan da bigarren postuan. Garaipen bakarra, 1999an lortu zuen.

Bigarren platera Belgikan izango da, Flèche-Wallone klasikoarekin. Ibilbide sigisagatsua baina ez oso selektiboa (202 km izateak badu eragina, besteak baino laburragoa), eta helmuga Huy-ko paret beldurgarrian, %25era iristen diren maldekin. Beti bezala, kokapena lortzeko orduan taldeen artean borroka polita ikusiko da.

Postrea lurralde belgiarretik irten gabe izango dugu, Liège-Bastogne-Liège klasikoarekin. 254,5 km eta 12 munio, tartean La Redoute famatua (2,3 km %7,4ra), Stockeu (1,1 km %11,6ra)  Sprimont edo helmugara bideratzen duen Saint-Nicolas bera.

Faboritoak? Ia-ia betikoak. Davide Rebellin, Damiano Cunego, Alejandro Valverde, Franck Schleck, Stefan Schumacher, Ricardo Riccó eta Kim Kirchen nabarmenduko nituzke beste guztien gainetik. Danilo Di Luca botako dugu faltan aurten, LPR ez baita irteera lerroan egongo lasterketa hauetan. Paolo Bettinik, Euskal Herrian izan zuen erorikoa dela eta, Liègerarte atzeratuko du bere agerpena. Ikusiko dugu zer nolako maila emanten duen Kilkerrak.

“Sorpresa” eman dezaketenak: Joaquim Rodriguez, Valverdek kantxa apur bat ematen badio, Yaroslav Popovych, Fabian Wegmann, Rinaldo Nocentini edo Maxime Monfort bera.

Euskaldunek ez dute erraz izango nabarmentzea. Helburua ziurrenik ihesaldiren bat harrapatzea izango da. Gero bideak jarriko du bakoitza bere tokian.

Lefevere maisuaren astea

Asko eta asko dira Iparraldeko Kanpainaren astea barrenetik bizitzen dutenak. Frantziako Tourraren aldean, egun bakarreko klasikoen goi mailako aipatutako aste honek garrantzi gehiago du txirrindularitza benetan maite dutenentzat. Baita zenbait talde, txirrindulari edo managerrentzat ere. Patrick Lefevere (Moorslede – Flandes, 1955) egun Quick Step-Innergetic taldeko managerra eredu nabarmena genuke. Azken urteetan epaitua eta gorrotatua izan den beterano belgikarrak, ondo baino hobeto ezagutzen du amaitu berri den astea. Zalantzarik gabe esan daiteke Lefevere polemikoaren denboraldiko lehen helburua Ronde Van Vlaanderen (Flandesko Itzulia) eta Paris-Roubaix klasikoen artean dagoela. Ilusio eta esfortzu gehiena. Izan ere, belgikarrak 20 bat garaipen eskuratu ditu manager gisa aste seinalatuan. Hortaz, artikulu honetan protagonista diferente bat izango dugu hizpide.4 proba handiakTxirrindulari gisa bidea egiteko balio ez zuela ikusita, Lefevere azkarrak bandoz aldatu eta zuzendari zein manager lanetara pasa zen. Honela, 90ko hamarkadan denok ondo ezagutzen dugun Mapei (1993-2002) talde arrakastatsuan erakutsi zuen bere benetako balioa kirol zuzendari bezala. Egun bakarreko lasterketetan ez zegoen talde hura bezalakorik. Musseuw, Bartoli, Ballerini, Bettini, Tafi, Bugno, Peeters, Camenzind, Bortolami, Steels handiak, Vandenbroucke, Merckx, Garzelli eta Freire gazteak (garai hartan) edota gure Abraham Olano aipa genitzake. Itzuli handietan ere zerbait lortu zuten, batez ere Rominger eta Tonkov errusiarrari esker. Lefevere aztiaren urrezko garaia izan zen. Denboraldi bakoitzean 50 garaipenetik gora lortzen zituen taldeak eta urte batean izan ezik, beste guztietan Mapei UCI rankineko lehenengoa izan zen. Nostalgikoentzat, talde honek hainbat abizen izan zituen bere kirol bizitzan: Clas, GB, Bricobi eta QuickStep. Continue reading “Lefevere maisuaren astea”

Iparraldeko Kanpainaren fase erabakiorra: 2. astea

Paris-Roubaix 2007Iparraldeko Kanpainaren aurreneko asteak historia belikoaren orriak elikatu ditu. Garaileak eta garaituak izan ziren La Pango hiru egunetan eta, batez ere, Flandesko Tourrean. Muinoetan gertatutako guduak ikustekoak izan ziren, eta azkenean Devolder Quick Step dibisioko flandestarrak bere eskutan zuen morteroa hartu eta geratzen zitzaion azkeneko lehergaia piztu zuen. Bai eta helburuan bete-betean asmatu ere. Boonen kapitainaren laguntzak ere izan zuen zerikusirik bere garaipenean.

Baina ez dago atzera begiratzeko betarik. Azkeneko bateria hotsak aste honetan entzungo dira. Asteazkenean Gent-Wevelgem lehiatuko da, eta igandean, guda klasiko guztietan ezagunena, Paris-Roubaix, Iparraldeko Infernua.

Gent-Wevelgem asteko anaia txikia da. Ez dauka beste bi monumentuen sonarik, baina edozein txirrindularik bere palmaresean nahi lukeen lasterketa da. 209 kilometroko ibilbidean, harbide eta muinoen kopurua murritzagoa da, baina haizeak izaten duen eragina dela eta (Flandeseko kosta inguruetatik iragan izan baita lasterketa), lasterketan bakanduak izaten ziren. Hala ere, aurten antza denez proba ez da kostatik pasako. Hortaz ikusi beharko da Kemmelberg-en (igoera gogorra eta jaitsiera arriskutsua duena, nahiz eta aurten antolakuntzak neuriak hartu dituen segurtasuna hobetze aldera) azkeneko pasaeraren ostean geratuko diren 37 kilometroak gehiegi ez ote diren izango bertan nabarmentzen direnak helmugara bakarrik iristeko.

Hautagaien zerrenda definitzea ez da erraza bestalde, probak nondik joko duen aurrikustea bezain zaila baita. Hasiera batean harbide eta muinoetan ongi moldatu eta abiadura punta duten txirrindulariek dezente dute irabazia, baina noski, halako asko izango dira: Hushovd, Freire, Pozzato, Steegmans, Cooke, Rojas, Weylandt, Van Avermaet, Chicchi,… Bete-beteko esprinterrak ere izango dira (Cavendish, McEwen, Greipel “gorila”,…) hortaz estrategia ezberdinak planteatuko direla esan beharrik ez da. Ez da ahaztu behar dena den Devolder eta Boonen bertan izango direla, nahiz eta ikusi beharko den zein intentziorekin aurkezten diren Ganteko irteeran. Zoritxarrez, egongo ez dena iazko garailea da, Burghardt, neguan izan duen lesioaren berreskuratze fasean baita. Gainera, euskaldunok behingoagatik esperantza txiki bat izango dugu, Koldo Fernandez de Larrea klasiko honetan izango baita. Continue reading “Iparraldeko Kanpainaren fase erabakiorra: 2. astea”