Contador, Froome, Purito, Aru eta besteen lehia biziak itzaletan utzi du Espainiako Vueltan euskal herritar bat egiten ari den lana: Romain Sicard. Hazparneko txirrindularia etapa nagusian ihesaldian sartu da eta tropelak azken mendatean harrapatu du, La Farraponan. Ez da izan Sicard itzuli honetan etaparen ehizan izandako lehen eguna. Hala, urrutira joan gabe, herenegun, La Camperonako hormara ere lasterketa buruan iritsi zen, nahiz eta ezin izan zuen Hesjedalen joari aurre egin. Horrez gain, laugarren etapan ere, koska bat aprobetxatuz, Valverde eta Yatesekin tropelari iskin egiten saiatu zen. Ez du kieto egon nahi… Continue reading “Hazparneko azeria gose da”
Egile Artxiboak:Raul Perez
Ezta amets gozoenetan ere
Txirrindularitza lasterketa bateko antolatzaileak proban inolako ezbehar larririk ez izatea, eta nola ez, izarrez betetako tropela aritzea izaten ditu helburu nagusiak. Eta izar horiek ikuskizuna eman dezaten, bide batez. Bada Espainiako Vueltako zuzendari Javier Guillenek nekez amestuko zuen apirilean edo maiatzean lehen astearen ondoren Espainiako Vuelta dagoen bezala egotea. Pil-pilean. Itzulia hasi aurretik bost izen nagusiak zirenak, Quintana, Valverde, Contador, Rodriguez eta Froome minutu erdiaren bueltan dira.
Bigarren astean egongo da gakoa
Tropela.net-eko Vueltako kiniela egitear bazabiltzate, hementxe dituzue ibilbideari buruzko zenbait ohartxo, lagungarriak izango zaizkizuelakoan. Hitz gutxitan, aurreko urteetan baino lasaixeago abiatuko da lasterketa. Izan ere, duela pare bat urte hasi eta gutxira Arrate eta Valdezcarayko etapak jokatu ziren eta joan den urtean, bigarren egunerako mendate batean bukatu zen lasterketa. Aurten, gauzak ondo, esprinterrek beren burua erakutsi ahal izango dute lehen etapetan. Continue reading “Bigarren astean egongo da gakoa”
Etorkizuna ikusten ari gara
Majkak erakustaldia eman du Poloniako itzulian; bi etapa eta sailkapen nagusia irabazi ditu, Ion Izagirre eta Beñat Intxaustiren aurretik. Poloniarrak sekulakoa lortu du pare bat hilabeteren buruan: Italiako Giroa seigarren postuan amaitzea, Tourrean bi etapa eta mendiko sailkapena eta bere herrialdeko itzulian nagusitu da. Hori guztia 24 urterekin. Bera da biharko txirrindularitzako kimu bat, baina ez bakarra. Continue reading “Etorkizuna ikusten ari gara”
10. etapa. Mulhouse > La Planche Des Belles Filles (161km). Profila eta aurre analisia
IBILBIDEA
Lehen goi mendiko etapatzat jo daiteke. Izan ere, lehen mailako lau mendate igo beharko dituzte txirridulariek. Ez hori bakarrik; bigarren mailako bi mendate eta hirugarren mailako bat aurkituko dituzte ibilbidean. Hori guztia 161 kilometroetan. Kasik ez da kilometro bakar bat bera ere egongo ordekan. Ziklistak gora eta behera ariko dira etapa guztian.
Azken mendateak, La Planche des Belles Filles-ek sei kilometro ditu, batez besteko penditza %8 da eta %14ko zatiren bat ere badauka. 2012an deskubritu zuen Tourrak igoera hau eta Froome nagusitu zen.
FABORITOAK
Harbidean atzean geratu eta gero, Contadorrek (TCS, %62,3) erasora jo behar du nahitaez. Espainiarra erasokor dabil denboraldi honetan, erakustaldiak eman baititu, batez ere Euskal Herriko Itzulian eta Tirreno-Adriatico lasterketan, eta izaera hori erakutsi beharko du sailkapen nagusian haren aurretik daudenengana hurbiltzeko. Contadorrekin batera, besteak beste, Van Den Broeck (LTB, %46,8) kate motzean lotu beharko du liderraren taldeak, belgikarra igotzaile polita delako eta lehen postuetan da eta harbidea hainbestean igaro zuen. Etaparen ibilbidea ikusita, ez litzateke harritzekoa izango ihesaldia helmugaraino iristea. Hala balitz, erne, besteak beste, Bardet (ALM, %54,8), Peraud (ALM, %4,7) eta Pinot (FDJ, %13,4) eta Rolland (EUC, %61,7) igotzaile frantziarrekin. Eta baita Mikel Nieve (SKY, %57,9) nafarrarekin ere, noski. Dauphineko etapa irabazi baitu aurten eta agian Froome gabe mugitzeko aukera izango du.
*** Contador (TCS, %62,3)
** Van Den Broeck (LTB, %46,8) / Bardet (ALM, %54,8)
* Peraud (ALM, %4,7) / Pinot (FDJ, %13,4) / Rolland (EUC, %61,7) / Mikel Nieve (SKY, %57,9)