Egoitz

ASO-k Paris-Niza. UCI-k mehatxuak

Paris-Niza 2008 Igande honetan emango zaio hasiera zortzi egun iraungo duen Paris-Niza lasterketa ezagunari. Dirudienez azkenean bai, izan ere 20 taldek ASO-ren proban parte hartuko zutela adostu zuten, nahiz eta kontratuko klausularen batekin desadostasunak plazaratu ziren.

ASO eta UCIren arteko liskarrak berean dirau, nahiz eta frantziarrek oraingo honetan dagoen liskarra txirrindulari eta UCIren artekoa dela esan. Oraingoan Paris-Niza lasterketaren inguruan izan da ikamika.

ASOk frantziar legediaren araberako arau propioak ditu eta arau hauek UCIren arabera ez baitira araudiarekin bateragarriak. Continue reading “ASO-k Paris-Niza. UCI-k mehatxuak”

UCIk ez du lasterketak kontrolatzerik nahi

Hori da 23z azpiko mailatan UCIk hartu duen erabakia. Teknologiak aurrera egiten duen bitartean (GPSa, irratia,…), UCIk txirrindularitzaren ikuskizunari kalte egiten diola irizten dio eta proba modura, 23 urtez azpiko mailatan zuzendari eta txirrindularien arteko irrati bidezko komunikazioa debekatzea erabaki du. Pinganilloa
Erabakia berria da, baina eztabaida ez. Lasterketa askotan taldeek lasterketak nola kontrolatzen dituen ikustera ohitu egin gara. Hala, etapa lauak direnean, sprinterren taldeak buru belarri jarduten dute lanean ihesaldiak ekidin eta lasterketa sprintean amai dadin. Noski, zaletuok azken 5 kmak iritsi arte etapa hauei kasurik ez diegu egiten. Kasu hauetan txirrindularitzan aldaketaren bat egitearen beharra aipatu ohi izan da (talde txikiagoak izatea, irratia kentzea,…) kontrol hori indargabetu nahian. Hortik etor liteke UCIren neurria.

Bestalde, liderren arteko denborak momentu oro jakinarazteko ere balio du irratiak, batez ere mendiko etapetan. Baina kasu honetan kaltegarria al da irratia? Nire ustez ez. Eta ez litzateke serioa izango etaparen arabera irratia erabiltzen uztea ala ez, nire ustez bederen.

Oraingoz 23 urtez azpikoentzat martxan jarriko den neurria izango da, etorkizunean beste mailaren batetan ikusiko dugunaren susmo garbiak dauden arren. Txirrindularitzaren hoberako?

(A)SO Contador-i

Contador Astanan ASO enpresak, Tourraren antolatzaileak, hankak moztu dizkio Contador-i, edo hobeki esanda, pedalak. Ez zuzenean, baina ondorio hori atera genezake bere taldeari ez baitiote 2008ko Tourrean parte hartzen utziko.

Aurrekoan otsailean gehiago izango genuela aurreratzen nizuen. Hemen adibide horietako bat eta hurrengoa Mayorena izango da. Hau otsailean aurreikusten bazen ere, badirudi berriak martxoa hasieran izango ditugula. Baina hori aurreragorako utziko dugu.

Astanak ezingo du ez Giroa ez eta Tourra korritu. Tourraren prentsa oharraren arabera, iazko gertakariek lasterketaren irudiari egindako kaltean oinarritzen da. Horretaz gain ez omen dute Astana taldean aldaketarik somatu eta neurri hau hartzea erabaki dute. Hori bai, 2008an Tourrean izan dadin “ahaleginak egingo” omen dituzte. Baina erabaki hauetan non dago UCIren iritzia?

Aspaldidanik somatu zen hiru handien eta UCIren arteko desadostasunak. Berez Astana UCI Protourreko taldea izanik, UCIko lasterketa guztietan parte hartu beharra du, baina egungo txirrindularitzaren mundu nahastu honetan, handiek beraien nahia UCIren gainetik jartzea erabaki dute. Badirudi UCIren azken egunetara iristen egon gaitezkeela.

Txirrindulariren bat edo beste irratian entzuteko parada izan dut, eta hauen esanetan txirrindularien etorkizuna kolokan jartzen du egoera honek gisa honetako babesleak txirrindularitzatik urruntzea baitakar. Noski, egun gero eta enpresa gutxiago dago interesatuta kirol honetan dagoen anabasa dela eta. Bestalde, eta jarraitzaile ikuspuntutik, seguru zenbaitek Contador Tourretik kenduta faborito nagusienetako bat alboratzeko helburuaz egin dutela pentsatzen duela, beste txirrindulariei (frantziarrei beharbada?) aurtengo Tourra irabazteko aukera eman asmotan.

Ez dakigu Astana enpresak zein jarrera hartuko duen berri honen aurrean. Beharbada taldeak babesten jarraitzea erabakiko du, baina zail xamar ikusten dut duen aurrekontua kontutan izanda. Nola eman errentagarritasuna inbertsioari urteko bi lasterketa garrantzitsuenetakoetan parte hartzeko aukerarik izan gabe? Bruyneel-ek zer pentsatua izango du hurrengo egunetan.

Eta otsailean gehiago

Orain astebete eskas izan nuen Aketza PeÃ±aren auziaren berri irratian. Egia esan ez du oihartzun handirik izan eta aitortu behar dut juxtu juxtu jakin nuela.

Iaz askotan galdetzen nuen ia norbaitek PeÃ±aren inguruko berririk bazuen harritu egiten baininduen beste auziekin alderatuta zegoen informazio ezak. 8 hilabete beranduago eman dute kontraanalisiaren berri eta baieztatu egin da Trentoko Giroko positiboa. Dagoeneko taldetik baztertua zegoen Zallako txirrindularia eta bi urterako inhabilitazioari aurre egin beharrean aurkituko delakoan nago. Zergatik ez dugu orain arte auziaren inguruko berririk izan? Non dira PeÃ±aren adierazpenak? Onartzen al du ebazpena? Euskaltel-Euskadik zer ardura du auzi honetan?

Eta otsailean gehiago. Bai, Mayoren auziaren inguruan berri gehiago espero dira hilabete honetan zehar. Hoberako ala txarrerako, Mayoren berriek presentzia gehiago dute komunikabideetan. Beharbada normaltzat jo beharko litzateke.

Urtea hasi besterik ez da egin. Pasaporte biologikoa ere hor dago, iazko eskandaluei aurre egiteko lixto. Hori diote behintzat. Ikusiko dugu, izan ere, mesfidantzak leku gehiegi hartu du txirrindularitzan.

FICOBA.08.01.10

Hori izan zen lekua eta ordua Euskaltel-Euskadi taldeak aurtengorako dituen 26 txirrindulariak, zuzendaritza, mekanikoak, masaialariak eta medikuak aurkezteko. Iaz ez ginen Deriokoan izan, baina bai orain bi urte Gasteizen izan zen hartan, eta egia esan oso berdintsua izan zen nahiz eta zenbait komunikabideetan azken aurkezpenak honek laudoriak jaso zituen. Txurruka Peña

Oreka TX-en eskutik musika; pantailan irudiak, iazkoak eta azken 15 urtetakoak; aurkezten ETBko aurkezle diren Estitxu Fernandez eta Maite Esparza; Euskaltelen presidentearen hitzalditxoa (bai, 7 minutu eskasekoa orain bi urte ez bezala); Euskaltel-Euskadiko kideak modelo gisa pasarelan… Nire gusturako mekaniko, mediku eta masaialariak bigarren maila batean geratu ziren eta hori ez zitzaidan gehiegi gustatu; taldeak denak dira nire iritziz. Omenduak ere izan ziren, Jose Alberto Pradera, Bizkaiako diputatu hoia eta Euskadi taldearen sorreran zerikusi zuzena izan zuena, eta Agustin Sagasti, taldeari lehen garaipena eman zion txirrindularia. Txurruka Peñako Lehendakaria eta Estitxu Fernandez

Ekitaldia berandu hasi zen eta 45 minutu inguru iraun zuen. Sorpresa ere izan genuen ekitaldi bukaeran: Oreka TXen musikarekin batera, eszenatokian zenbait su piztu ziren ikuskisun gisa. Beharbada desegokia leku itxi baterako eta ke pixka bat irentsi behar izan genuen.

Hala ere, eta zalantzarik gabe, eman ziguten luntxa izan zen FICOBAn gehien gozatue genuena. Ez, ez diot jatea gustuko dugulako bakarrik, Amets Txurrukaren peñakoak ezagutzeko aukera izan genuelako baizik. Izan ere luntxak barietate gutxi eskaini zituen. Zerbitzariak hor ibili ziren ilar-krema eta hirugihar pintxoak zituzten bandejekin aurrera eta atzera, amaitu ezinik. Hori bai, pintxoek algarak sortarazi zituen gure artean.

Goiko argazkian agertzen dira Miguel Madariagarekin batera peñako zenbait kide, beraien artean peñako lehendakaria, bigarren argazkian Estitxu Fernandez aurkezlearekin batera agertzen dena. Egia esan peñaren kideen presentziak bere arrastoa utzi zuen FICOBAn, batez ere ekitaldian Amets eszenatokira igo zenean esku zarta eta txistu hots ugari izan baitzen. Hemendik agur bero bat Txurruka Peñakoei!

Txirrindularitzan arloari dagokionez, esan Euskaltel-Euskadik talde interesgarria aurkeztu zuela. Nabarmentzeko fitxaketetatik Egoi Martinez nabarmenduko nuke. Hala ere, urtea hasi besterik ez da egin. Ia zer ematen digun aurtengo urteak! Urte berri on denoi!