Titular oker ugari irakurriko dituzue gaurtik hasi eta seguruenik hurrengo larunbatera bitartean Froomen kasuaren inguruan. Ea lerro hauek izango den titular festarako lagungarri zaizkizuen.
2005ean antolatu genuen lehen Frantziako Tourraren inguruko lehiaketa eta gaur 2014koa azkena izan dela esan beharrean aurkitzen gara, zoritxarrez.
Aste honetan Prudhommek sinatutako eskutitz bat jaso dugu eta ez juxtu Gabonak zoriontzeko. Bere esanetan Tropelak ezingo du 2015eko Tourraren inguruko lehiaketarik antolatuko, ezta La Coursena ere, baldin eta diru kantitate handi bat ordaintzen ez badugu. Kontua da Frantziako gobernuak, Hollanderen iniziatibaz dirudienez, Frantziako Tourrarekin erlazionatutako sareko edozein ekimen, bai lehiaketak bai berriak, kanon bat ordaintzera behartuak izango direla. Dakizuen moduan, eta zoritxarrez, ez gara gai maila honetako ordainketei aurre egiteko.
Ez dakigu Hollandek eta Prudhommek beraien helburuak lortuko dituzten, baina guri dagokigunez, 2015ean ez Tourra ezta La Course antolatu gabe geratuko gara hamar urteren ondoren lehen aldiz. Oraingoz bi lasterketa horiei eragingo die lege berri honek eta garapenaren baitan ikusteko dago gainontzeko lasterketei etorkizunean aplikatu ala ez.
Horrenbestez, oporrak hartuko ditugu uztailean beste aukerarik ezean. Eta ea gainontzeko lasterketetan ez duten halako neurririk hartzen etorkizunean!!
Eguneraketa: inozentada
Atzoko inozentaden eguna izanik, guk gurean hauxe argitaratzea pentsatu genuen. Zorionez gezurra da hemen azaldutakoa eta espero dugu 2015ko uztailean ere opor gutxi izatea!! Espero dugu barretxo batzuk behintzat eragin izana ;-)
Horrela izendatu zuen Frantziako Tourraren zuzendari Christian Prudhommek Ingalaterrako 'Grand Depart'. Inoizko Tourraren hasierarik handiena izan omen da. Ikusle kopuruari erreparatzen badiogu, izendapena ez da handi geratzen. 2 milioi eta erdi lagunek bete dituzte Ingalaterrako hiru etapetako errepide bazterrak. Antolatzaileen arabera 5 milioi izan dira. Edonola ere, jendetza izugarria. Nahi gabe edo, txirrindularitzaren aldeko giza-kate erraldoia osatu dute britainiarrek, Leedsetik Londresera, 546,5 kilometrotan zehar.
Beste behin ere zalaparta dugu txirrindularitza munduan. Oraingoan, “pinganillo” edo irrati emisoreen inguruko eztabaida da txirrindulari, talde, antolatzaile eta UCI bera berriro ere borrokan jarri dituena.
Eztabaida ongi uler dadin, motzean azaltzen saiatuko naiz nola erabiltzen diren irrati emisoreak txirrindulari lasterketetan. Alde batetik, lasterketa guztietan “Radio Tour” (edo “Radio Vuelta” etab.) deitu ohi zaiona izaten da. Epaileek emititzen dute eta lasterketan doazen auto guztiek (taldeek, kazetariek, antolakuntza, babesleak etab.) dituzte entzungailuak. Bertatik, lasterketaren gorabeherak eman ohi dituzte epaileek: lasterketa nola doan, buruan doazen dortsalak, azken orduko abisuak, denbora erreferentziak, txirrindulariren bat laguntza eske dagoela etab. Informazio hori ez dute zuzenean jasotzen txirrindulariek. Continue reading “Teknologia berriek ere zalaparta sortzen dute txirrindularitzan”