Cunegoren garaipena Aitanan

Cunego. 2009ko Vueltako 8. etapan garaipenaCunegok azken kilometroetan erakustaldi itzela eman du. Orain arte galduta zuen denborari esker faboritoek ez diote italiarrari jarraitu eta abiadura azkarrean egin du aurrera. Horri eskerrak Moncoutie harrapatu du azken kilometroetan eta helmugarako bidea erraz egin du garaipena eskuratuz. Moncoutie azkenean bigarren eta Gesink hirugarren helmugan.

Gaurko etaparen zain ginen. Bagenekien faboritoek nola dauden ikusteko etapa izango zela eta hala izan da.

Etaparen jarraipena telebistaz ikusten ari nintzela jaso dut lehen berri garrantzitsua: Andy Schleck-ek Vuelta utzi du (Tropelean %12,9ak aukeratutako faboritoa). Espero genuen Schlecktarrek Vuelta ez zutela lehiatuko baina ez nuen uste hain azkar utziko zuenik. Berarekin batera lasterketa Jerome eta Bernaudeuk utzi dute.

Taaramae izan da lehen ihesten saiatu den txirrindularia baina 20 segundoko tartea lortu badu ere bere abentura denbora gutxi iraun du. Benetako ihesaldia Bonnet, Voss, Hoogerland, Weening, Moncoutie eta Hinaultek osatu dute.
Tropeltxo honek bai, honek lortu du tropel nagusitik ihes egitea eta eguneko ihesaldia izan da. Tropeltxo honek lortu duen denbora tarterik handiena ia 13 minututakoa izan da eta ia-ia etapa irabazlea ere izan du.

Aitanako gaina igo aurretik, 3. mailako 4 mendate eta 2. mailako bi igo behar zituzten. Ihesaldiko txirrindularien helburu nagusia, beraz, etapa garaipena lortzen saiatzeaz gain mendiko maillota eskuratzea izan da. Moncoutie frantziarra izan zen iazko Vueltan mendiko sari nagusiko garailea eta aurten ere bide horri ekin dio. Ihesaldian bildu dituen puntu guztiei esker berak eramango du bihar maillot hori. Iheskide izan dituen Weening eta Hoogerlandek ezin izan dute behar beste puntu bildu eta 2. eta 3. postuetan aurkitzen dira une honetan.

Caisse D’Epargne izan da tropel nagusian erantzukizuna hartu duena. Bazekiten Valverdek etapa garaipena edo lehen hiru postuetan sartuko balitzateke lidergoa eskuratuko zuela eta ez zioten aukera horri muzin egin nahi. Horretarako ihesaldia bertan behera utzi behar zuten. Erritmo bizia jarri dute eta tropelean zatiketak sortu dira. Horien artean Cancellara liderra izan da geratzen hasi dena. Suitzarrak bazekien gaur hala izango zela.

Oker ez banaiz, tropel nagusia Tudonsetik behera jaisten hasi direnean Samuel Sanchezek eroriko bat izan du. Caisse D’Epargnek egoera horretaz jabetuta erritmoa bizitu du eta asturiarrak gain esfortzu bat egin behar izan du  bat egiteko. Esfortzu horri esker Aitanaren igoera hasi aurretik bat egitea lortu du Sanchezek.

Aurrealdean mugimenduak hasi dira Aitana igotzen hasi direnean. Lehena erasotzen Hoogerland izan da baina Moncoutie ez zegoen etapa garaipenaren lehia uzteko prest. Biak aurrera egin dute eta atzealdean Cuesta eta De la Fuentek tropel nagusitik aurrera egin dute. Gero Marchante bera ere saiatu da baina bi saiakera hauek alferrik ziren Caissek lasterketaren lidergoa eskuratu nahi baitzuen gaurko etapan. Tropel nagusiaren atzealdean, berriz, Vinokourov eta David Herrero ezinean ikusi ditugu. Kale egin duen faboritoetako bat gaur kazakhstandarra izan da eta sailkapen nagusiaren lehiatik kanpo geratu da.

Tropel nagusia pixkanaka pixkanaka ihesaldiko txirrindulariak irensten joan da baina aurrealdean ziren Moncoutie eta Hoogerland. Frantziarrak, ordea, erritmo aldaketa bat egin du eta Hoogerland atzean uzteko gauza izan da. Moncoutiek etapa garaipena nahi zuen eta hala izango zen Cunegok aurrera egingo ez bazuen.

Tropel nagusian eraso ezberdinak izan dira. Szmyd-ek tropelari erritmoa jarri dio gero Bassok erasoa jo zezan. Aitortu behar da italiarra saiatu saiatu dela, baina ezin izan du atzo galdutako denbora berreskuratzeko ezer egin. Erasoa jo duena eta libre joan dena Cunego izan da. Bizi-bizi egin du aurrera Lampreko italiarrak.

206 kilometroko etapa izaki eta ihesaldian egin duen esfortzuaren ondorioz, Moncoutiek etapa garaipena eskura izan badu ere, atzetik Cunego indartsu zetorren. Frantziarra azken kilometroan sartu denean garaipena eskura zuela pentsatu dugun arren, Lampreko liderrak ezarritako erritmoak Cofidiseko txirrindularia harrapatu eta pasatzerainokoa izan da. Esan bezala, beraz, Cunegok etapa garaipena.

Atzealdean eraso ezberdinak izan dira. Gesinkek bere saiakera egin eta aurrera egitea lortu du eta hirugarren helmugaratu da. Valverdek ere bere saiakera egin du, baina Evans eta Sanchezek ederki eutsi diote eta azkenean Evansek eskuratu du lidergoa.

Gori-gori dago sailkapen nagusia gaurkoaren ondoren. Evans da lider berria eta Valverde eta Sanchez 2. eta 3. dira 2 eta 8 segundotara. Lehen esan bezala, faboritoetatik asko atzeratu dena Vinokourov izan da.

Kazakhstandarraren atzerapena ikusita ez dakit Astana taldeak zein estrategia hartuko duen. Momentu honetan taldekiderik aurreratuena Haimar Zubeldia dute, 8. postuan Evansengandik 1’37”ra. Bigarrena Navarro 2’12”ra. Haimar Zubeldia izango al da taldeko lider berria? Euskaltel-Euskadi taldean izandako ibilbidea kontutan hartu beharko bagenu logikoena hala izatea deritzot. Hala ere ikusi egin behar Haimarrek nola eusten dion biharko etapari. Nire iritziz Haimar sailkapen nagusian lehen hamar postuetan sailkatzeko moduko txirrindularia da eta ahalegin horri ekin beharko lioke. Zer deritzozue?

Astanak estu hartu du Cancellara

Astana. 4. etapan garaipena0 segundo. Hori da Cancellara eta Armstrongen arteko diferentzia sailkapen nagusian gaur jokatu den 4. etaparen ondoren. Cancellarak antolakuntzak berria eman duenean bi erroskillen keinua egiten zion norbaiti “0.0”. Gaurko etapan ez ziren diferentzia handirik espero, baina ia ia lidergo aldaketa izan da.

Etapari jarraipena egiten hasi naizenean Liquigasek zuen denborarik onena helmugan. Lehiatzen ari ziren gainontzeko taldeak ikusi ditudanean, orduan jakin dut Garmin-Splistream taldea 5 txirrindularirekin bakarrik ari zela lehian gainontzeko lauak bidean utzi ondoren. Eta ez ziren kilometro gutxi falta, baina arriskatzea erabaki du taldeak. Hori ikusita marka guztiak puskatuko zituztela uste nuen, baina ez da hala izan. Hala ere, Vandevelderen taldea helmugara sartzean denborarik onena egin dute.

Cancellararen Saxo Bank taldeak maillot horia defendatu beharra zeukan. Schleck anaiei ere komeni zitzaien denbora ona egitea eta horretan saiatu dira. Indarrak mugaraino eraman dituzte eta babesean joateko ahaleginak ere bai, behin baino gehiagotan elkarren kontra jotzeraino arriskatuz. Erreferentziak ikusita, bazirudien maillota mantentzeko gai izango zirela. Helmugaratzean Garmin-Splistreamen atzetik geratu dira baina Liquigasen aurretik 22 segundo soilik galduaz. Denbora ona zen, baina Columbia-HTC eta Astanak zer egiten zuten ikusi beharra zegoen.

Cavendishen taldeak aurre ikuspenetatik oso aparte ibili da. Bazirudien blokeak atzo bezala gaur ere etekina ateratzeko gai izango zela, baina ibilbideak hain estua izateak eta hain konplikatua, gauzak asko zaildu dizkio Columbia-HTC taldeari eta Liquigasen atzetik helmugaratu da.

Astana zen azkena helmugaratzen eta tarteko helmugetan denbora oso onak markatzen ari zen. Garmin-Splistream taldeari 17 segundoko tartea ateratzen zion helmuga horietan eta garbi ikusten zen etapa garaipena poltsikoan zuela, baina maillot horiaren lehian sartu da orduan bete betean. 3. mugarrian 41 segundo ateratzen zizkion eta Armstrongek Cancellararekiko zuen atzerapena 40 segundokoa zen. Birtualki Armstrong lider zen, baina helmugan 40 segundoko atzerapena izan dutela esan dute. Hortxe hasi dira zalantzak epaileek zerbait esan artean. Azkenean mili segundoak tarteko, Cancellarak maillot horia mantentzen jarraitzen duela adierazi dute.

Ikaragarria Astana taldeak eman duen erakustaldia. Ez dago esaterik talde lanean aritu ez denik. Bi oilar ditu oilategi honek, baina gaurkoan biek lan ukondoz ukondo egin dute eta ederki egin ere. Munduko talderik onena dela argi erakutsi dute eta gure zorionerako Haimar Zubeldiaren garaipena ospatu beharko genuke, helmugaratu den taldean baitzegoen gainontzekoek besteko lana eginda. Zorionak Haimar!!!

Aipatu era berean Euskaltel-Euskadik egindako lan bikaina. Bagenekien Tourrera joan aurretik taldeak erlojupeko hau prestatzen jardun zuela eta oso ondo egin dutela esango nuke. 10. postua lortu dute Rabobank bezalako talde baten aurretik.

Faboritoei dagokienez, gaurko etapak Evans eta batez ere Menchov kaltetu dituela esango nuke. Evans 2’59”ra jarri da eta Menchov 3’52”. Errusiarrak erorikoa izan du etapa hasieran eta horrek asko baldintzatu die gaurko erlojupekoa Rabobankeko txirrindulariei.

Biharko etapa laua izanik ere itsaso bazterretik egin behar dute ibilbidea eta atzoko mozketaren bat gerta daiteke tropelean, kosta aldean beti ere haizeak indar gehiagoz jotzen baitu. Hala ere, ez dut uste atzoko gertakaria errepikatzeko moduan izan daitekeenik guztiak ere tentuz ibiliko baitira. Gauzak ondo bidean eta helmugan gain saririk ez dagoenez, Pirinioetako etapen zain geratu beharko dugu sailkapen nagusian aldaketak ikusteko.

Cancellara lokomotoraren beste erakustaldi bat

Cancellara. 1. etapan garaipenaAurre ikusi bezala, suitzarrak ez du hutsik egin eta etapa eta maillot horia eskuratu ditu. Tropela.net-eko lehiaketako %69,5a gustura izango da beraien aukeraketak ez baitie hutsik egin.

Lasterketa 16:00etan hasi da Van Hummel herbeheretarrarekin eta ordu horretan bukatu da kiniela egiteko epea. Ordurako asko zuen kinielari azken errepasoa egin eta telebistara joango zineten, izan ere Armstrong 16:17an ateratzen baitzen. Ikusmin ikaragarria estatu batuarrak eragin duena. %23,8ak ondo ibiliko dela espero du eta gaurko etapan zer egiteko gai zen ikusi nahi genuen. 18. txirrindularia zenez lasterketari ekiten, ez zuen zail denborarik onena egitea. Hala izan da nahiz eta guztiz eroso ez dugun ikusi bizikleta gainean. Bagenekien gainontzeko espezialistak denbora hori hobetuko zutela, baina zenbaterainoko ona izan den ez genekien. Momentuz amerikarra lasterketako lehen postuan zen.

33. txirrindularia irteeran Tony Martin genuen. Alemaniarra ondo zegoela bagenekien, izan ere Suitzako Itzulian etapa garaipena eskuratzeaz gain mendiko sailkapena irabazi baitzuen. Baina espero al zenuten hain erlojupeko onik egingo zuenik? Alemaniarrak Armstrongen denbora 7 segundotan hobetzea lortu du. Tropelean %25,6ak aukeratutako txirrindularia eta badirudi lehen egunetik etekina aterako diola Tropeleko laurdenak.

Erlojupekoa aurrera zioan eta espezialistak agertzen hasi dira. Hurrengo Leipheimer zen eta honek ere ez du hutsik egin. Tony Martinen denbora 3 segundotan hobetzeko gauza izan da. Orduan konturatzen hasi gara Armstrongek egindako denbora ona izan zitekeela. Momentu horretan Astanak bi txirrindulari lehen hiru postuetan zituen eta etapako sailkapenak ez du aldaketarik izan Kreuzigerrek bere lana egin arte. Txekiarrak forma onean dela erakutsi du eta 2 segundogatik ez da lehen postuan sartu. Liquigaseko txirrindulariaren denborak Armstrong podiumeko postuetatik at utzi du momentu horretan.

Astanak, ordea, gaur ederki erakutsi du talde ikaragarria duela. Klöden izan da hurrengoa lehen postuak dantzan jarri dituena. Erlojupeko bikaina alemaniarrak egin duena eta bere taldekidearen ordurako markarik onena 8 segundotan hobetu du. Helmugaratu denean Astana taldeak 3 txirrindulari zituen lehen 5 postuetan. Ikaragarria!

Lasterketako lehen postuek, beraz, horrela jarraitu dute azken 6 txirrindulariek denborak jakin ditugun arte. Wiggins britainiarrak, erlojuaren kontrako espezialista britainiarra, bidea bere ezaugarrietarako egokia izan ez arren, Klödenen denbora hobetzea zegoela erakutsi du. 3 segundotan murriztu du bere denbora eta behin behineko lider jarri da ingelesa. Baina oraindik Cancellara, Contador eta Evans falta ziren besteak beste helmugaratzeko eta denborak hobetu dituzte.

Hurrengoa helmugaratzen Cancellara, Suitzako lokomotora geldiezina eta aurtengo Suitzako Itzuliaren irabazlea izan da. Honena bai izan dela erakustaldia! Cancellarak bere aurretik zuen txirrindularia harrapatzeko gauza izan da, eta ez zen edozein txirrindulari, Menchov bera baizik, aurtengo Giroko garailea. Suitzarrak Wigginsen denbora 19 segundotan hobetu du.

Contadorrek gaur Espainiako koloreak zituen maillota estreinatu du eta esan behar ez duela batere gaizki egin. Espainiarrak taldeko liderra zein den erakutsi nahi zuen eta Amstrong, Leipheimer eta Klöden taldekideen denbora hobetu du nahiz eta Cancellararena ezin izan duen hobetu. Pintokoak bigarren postuarekin konformatu behar izan du. Hala ere, erlojupeko bikaina 2007ko Tourreko garaileak gaur egin duena.

Dagoeneko Evans eta Sastre falta ziren helmugaratzeko. Evansek, ohi bezala, denbora polita egin du eta Klödenengandik 1 segundora geratu da etapako 5. denborarik onena eginaz. Sastre, berriz, erlojupekoetan ondo moldatzen ez dela ezagun du eta faboritoen multzotik ia minutu bat galdu du.

Euskaldunei dagokionez, Mikel Astarlozaren lan bikaina aipatu nahiko nuke. Pasaiatarrak 12. postuan amaitu du gaurko etapa eta sailkapeneko faboritoenekiko 26 segundoko atzerapena besterik ez du. Ia gaurko sentsazio on honek horrela jarraitzen duen eta pozen bat ematen digun pasaiatarrak.

Gaurko etapari dagokionez, ondorengo ondorio hauek atera daitezke. Alde batetik, espero bezala, Cancellarak etapa irabazi du eta lider jarri da. Ez dakiguna da ia asteazkeneko taldeko erlojupekoaren ondoren lidergoari eusteko gauza izango den Contador 18 eta Wiggins 19 segundora izanda. Erlojupeko ona egin beharko du Saxo-Bankek asteazkenean maillotari eutsi nahi badio. Beste ondorioetako bat faboritoek gaurkoan ez dutela hutsik egin Menchov eta Kirchen izan ezik. Errusiarrak Contadorrekiko 1’13” atzeratu da eta Kirchenek 1’39”. Badirudi bi txirrindulari hauek ez diotela bide onetik ekin aurtengo Tourrari. Armstrong, berriz, faboritoen artean da Contadorrengandik 22 segundora. Ezustekoren bat emateko gai izango al da Texaseko txirrindulari mediatikoa?

Frantziako Tourra. Multzoen analisia (I): Hautagai nagusiak

Ia denok aurreikusten genuen bezala, azkenean faborito handi bat Tourretik kanpo geratu da. Azkenean CONIk Alejandro Valverde Tourretik kanpo utzi du, etapa bat kilometro batzuetan zehar Italian barneratuta ibiliko baita. Gauzak horrela, hautagai nagusien multzoa sei izenetara murriztu da. Hona hemen izen handi hauen azterketa txiki bat.

armstrongLance Armstrong : Estatubatuarra da edizio honetako izen berezia. Bere itzulerak beste edozein izen propio eklipsatu du, bai Gaztela Leonen, Giroan, eta nola ez, Tourrean. Hiru urte lehiatu gabe, baina maila txukuna erakutsi zuen Giroan, batez ere azken astean, eta ziurrenik geroztik bere prestakuntza afinatzen egongo zen, buru-belarri. Atzo bertan estreinatu zuen aurtengo palmaresa, Nevada City Classic lasterketa estatubatuarrean gailenduz. Ez da egutegiko lasterketa entzutetsuena, jakina, baina esanguratsua da dena den Lancek berriz eskuak jaso dituela jakitea. Gerra emango du, ziur, baina 37 urte ditu, eta horrek bere aurka jokatzen du. Gainera, taldeko giroa ere ez da onena izango, etsai nagusia (Contador) etxean baitu. Ez du zortzigarren Tourrik lortuko, nire aburuz.

contadorAlberto Contador: Munduko igotzaile onenak aurten inoiz baino mendiko etapa deskafeinatuagoak aurkituko ditu errepide frantziarretan, oso etapa gutxi bukatzen baitira goian. Mendate gogorrak helmugatik urruti ordea, etapa askotan aurkitu daitezke. Evansen maila ikusita, badirudi mendian jo egin beharko duela erlojupekoetara aldetxoarekin iristeko. Denboraldi hasiera ederra egin ostean (Algarve eta Euskal Herrian sailkapena eta etapak, eta Paris-Nizan 2 etapa eta podiuma), hanka jaso zuen Tourrari begira. Dauphiné-Libérén erakutsi zuen bide onetik doala bere prestakuntza. Kilometroak egitera zihoala esan zuen, eta beregan arraroa bada ere, erasorik jo gabe igaro zuen aste osoa. Dena den, aldapa gora oso maila ona eman zuen, eta sailkapen nagusian minutu eskas bat baino ez zuen galdu. Faborito nagusia da, ez da alferrik hiru handiak irabazi dituzten eliteko klubeko kidea, baina ikusi beharko da Astanak nola erantzuten duen talde bezala. Diotenez, taldea banatuta omen dago: batzuk Armstrongetzat, eta besteak madrildarrarentzat. Morboa behintzat zerbitzatuta dago.

evansCadel Evans: Australiarra pasa den Dauphiné-Libérén inoiz baino erasokorrago (eta indartsuago) agertu zen. Nire ustez, ez du berriro aurkituko aurtengoa baino ibilbide hoberik bere ezaugarrientzat (nahiz eta taldekako erlojupekoa egiteko bere taldea ez den oso indartsua), eta hori berak badaki. Motibaziorik ez zaio faltako, Tourreko azken 2 edizioak 2º postuan bukatu baititu, eta pixka bat gehiago nahiko du. Alberto Contador mendian kate motzean lotzea lortzen badu, asko izango du irabazita. Etapen perfil aldetik, Tourrak ez dirudi oso zirraragarria izango denik, baina horrek sailkapenean lehia itxiagoa egotea ahalbidetuko du. Gauzak horrela, irabazteko gehien duenetariko bat Cadel Evans da.

leipheimerLevi Leipheimer:Estatubatuarra ez du inork aipatzen, baina Tourrean izango da, eta ez gonbidatu bezala. Armstrong-Contador lehiak (edo konfliktoak) bigarren plano batera bidali du Levi, baina ezin dugu ahaztu Tourreko podiuma ezagutzen duela, eta baita Espainiako Itzulikoa ere. Gainera, Astanan askatasuna izango du, ondo bidean, eta probetxua atera dezake bere bi taldeburu nagusien artean ez baita giro izango. Evansi bezala, ibilbidea oso ondo datorkio, erlojupekoetan maisua baita. Dena den, ikusi genuen moduan, Girora dena ematera joan ostean, lasterketa luzea egin zitzaion. Hori, edo azkenean ez zuen zeukan guztia eman, Uztailera begira. Interesgarriak izan daitezke Montanako txirrindulariaren mugimenduak lasterketan zehar.

menchovDenis Menchov: Errusiar-nafarrak Giroan sekulako erakustaldia eman zuen. Erraz asko irabazi zuen, nahiz eta azken erlojupekoko azken kilometroan, nahi gabe emozio kotak zeruan jarri zituen. Dena den, Tourrean maila handiagoko aurkariak izango ditu, bera baino lasterketa egun gutxiagorekin joango direnak, eta hori erabakigarria izan daiteke. Taldean bertan, Robert Gesink gaztea ez du urruti izango, akaso aurrean ere. Lasterketa frantziarrean beti egin izan du “kale”, sailkapen nagusiari dagokionean, eta aurten beste horrenbeste gerta dakioke. Dena den, Denis etxeko lanak ondo asko eginda iritsi da Tourreko irteera lerrora, eta ez dauka galtzeko ezer. Ikusi egin behar ez ote zaion lasterketa oso luzea egingo, batez ere Mont Ventouxen bukatzen den azken aurreko etapa.

sastreCarlos Sastre: Iazko Tourreko irabazleak aurten taldearekin batera egutegia aldatzea erabaki du. Giroko sailkapena lehiatzera joan zen, baina 4º postu batekin konformatu beharra izan zuen, hori bai, mendiko etapa eder bi irabazi ostean. Orain Tourrean aurretik inoiz ez bezala arituko da, hanketan lehiaketa egun askorekin eta desgaste handia jasan ostean. Hala ere, gaztelarra txirrindulari zaildua eta “diesela” da. Ez du sekulako eraso kolperik joko, baina aurrean egongo da. Hori bai, aurten garaipeneko jokotik at ikusten dut.

Alejandro Valverde: Azkenean, aurretik esan bezala, murtziarra ez da irteeran izango. Beraz, kinielan baduzue, azkar aldatu!

Berrikuntza bezala, Tour honekin batera, Tropelako blogariok aztertutako talde bakoitzean zein txirrindulari hartu ditugun aipatuko dugu. Kasu hontan, nik neuk ez dut asko arriskatu: Evans-Contador. Gainontzeko multzoetan egin beharko da “apustu pertsonal” bat edo beste, sorpresaren bila.

Mont Ventoux-en lider berriak etapa opari

Valverde eta Szmyd Mont Ventoux-eko helmuganAtzoko etapa ikusteko aukerarik ez nuen izan. Pena, benetan, baina zenbait kronika irakurtzen aritu naiz eta harrituta utzi nau Valverderen jarrerak. Ikusteko aukera izan duzuenok zuzenduko nauzue, baina post hau idazteko modukoa iruditu zait.

Badirudi Valverdek Tourrean korritzeko aukera ez duela guztiz baztertu eta gaurko etapan zer emateko gai den erakutsi nahi zuela. 9. kilometroan jotako erasoaren ondoren Evans eta gainontzeko faboritoak utzita aurrera jo du. Szmyd izan du bidelagun murtziarrak eta aurretik ziren gainontzeko txirrindulariak gaindituz joan dira igoeran aurrera joan diren heinean. Faboritoekiko denbora tartea handitzen joan da eta helmugara heltzerako Valverde Dauphiné Libéréko lider berria zen.

Bazirudien “etapa zuretzat eta lidergoa niretzat” hitz egin beharrik gabe adosten den paktua beteko zela eta halaxe izan da. Azken 500 metroetan Szmydi “zangoak gelditu zaizkio” eta aurrera jo ezinda geratu omen da. Valverdek, indarrez sobra, zain egotea erabaki du garaipena Liquigaseko txirrindulariarentzat izan zedin. Esan bezala, murtziarrarentzat maillot horia eta etapa garaipena poloniarrarentzat.

Egin dituzten adierazpenen arabera ez omen dute ezer adostu. Izan daiteke, baina garaipenak hain garesti diren egun hauetan ezagutzen ez dugun beste arrazoiren bat egon daitekeela uste dut. Hona hemen Valverderen hitzak, zuek epaitu:  “Etapa ez da zehazki opari bat izan. Szmydek zangoak (etapa) irabazteko modukoak zituen. Nik bere lankidetza eskertu diot. Biok kirol gizonak gara”.