Suitzako Tourra martxan da eta bertan hemendik aste gutxira hasiko den Frantziako Tourrerako hautagaiak diren txirrindulari dexente daude. Horien artean, atzo nabarmendu zena orain dela aste gutxi Italiako Giroan hain ongi ibili zen Andy Schlecken Franck anai zaharra izan zen. Benetan aldapa gogor batean izan zuen amaiera atzoko etapak eta bertan jaun eta jabe berau. Aldiz, askoren ahotan dauden Sastre eta Klodenek denbora dexente galduta sartu ziren.
Nahiz eta betidanik entzun izan gaztea hobea izango zela, Francken maila ere benetan altua da. Orain arte ez da oso irabazlea izan, gehiago nabarmendu da lasterketa garrantzitsuetan postu onak egitearekin, hala ere, ezin dira ahaztu iazko Amstel Gold Race eta Tourreko Alpe d’Huezko etapetan garaile izan genuela.
Eta nabarmena da Tropelako jarraitzeileek Suitza aldera jarrita dituztela begiak. Denbora gutxian gora egin du Franck Schleck aukeratu dutenen kopurua. Bestalde, ziur nago Kloden eta Sastre aukeratu dutenenen kopuruak behera egin duela.
Ongi dago itzuli handien aurreko probei jarraipen bat egitea baina ez da hori beti arrakastan bihurtzen. Gogoratu besterik ez Euskal Herriko Itzulian zenbat eta zenbatek aukeratu zuten Alberto Contador heuren kinielan, edo urrutira joan gabe zenbat ziren Damiano Cunegoren gain esperantzak jarri zituztenak Italiako Girorako. Oso ongi dago proba desberdinak jarraitzea baina kontuz, askotan txirrindulari asko pasatuta iristen baitira Tourrera, edo momentu horretan korritzen ari ez den bere taldekide bati lan egitera… mila detaile txiki kontutan hartu beharrekoak izaten dira.
Egun batzuk besterik ez da falta lagun askoren urteko hitzordu garrantzitsuenerako: 205 kilometro aurretik, eta lau mendate.
Azkenean iritsi da eguna. Gaurko egunerako jarri zen hitzordua. Ez nago ziur gaur gauzak behingoz argituko diren ala gehiago nahastuko diren baina gutxienez elkartu eta erabaki batzuk hartzen saiatuko dira. Bilera garrantzitsua izan daiteke, baina nire ustez bilera pisutsuak ezkutuan egiten dira eta ez oraingo hau bezala. Halere, UCIko lehendakari den Pat McQuaid irlandarrak (argazkikoa) jo eta ke jarraitzen du egoskor, txirrindularitzaren irudia garbitu nahian. Prentsan irakurritakoaren arabera UCI, ziklista taldeak eta hauen medikuak elkartuko dira eta iazko ekainean Puerto auzian zikinduta geratu ziren izenekin erabaki bat hartuko da. Badirudi zerrenda beltz bat egiten saiatuko direla. Baina nola iritsiko dira adostasun batera? Uff… a ze saltsa egon daitekeen, ezta? 
Iaz Puerto Operazioan bere izena azaldu zen. CONIk, behar besteko frogarik ez zela eta, kasua artxibatzea erabaki zuen baina datu gehiago baleudeke, berriro ere kasuarekin jarraitzeko aukera gorde zuen. Eta halaxe izan da.
Gaur jarri dugu martxan Frantziako Tourreko lehiaketa handia, gauerdian. Urteko lehiaketa nagusia dela esan daiteke bai lasterketa partaidetzari dagokionez baita Tropeleko kiniela eta sariei dagokienez ere. Txirrindulariak Londresetik abiatu aurretik 3 aste izango ditugu gure aukeraketa egin, tropeltxoak antolatu eta gure kinielari azken ukituak emateko. Hiru aste hauetan batzuk azken lasterketak mimo handiz jarraituko dituzte txirrindularien forma zein den ezagutzeko eta urteko proba garrantzitsura nola eta ze asmorekin joango diren jakiteko.