Etiketa Artxiboak:Vinokourov

Montalcinoko lokatza

Evansen garaipena Giroko 7. etapanGaurkoan etapa ehiztarien lehia ikuste espero genuen, baina azkenean sailkapen nagusiko txirrindulari indartsuenek eman digute ikuskizuna. Bukaeran faboritoen artean sortu diren denbora tarteak itzelak izan dira; esate baterako, Sastre 5 minutu beranduago sartu da helmugara, Basso 2 minutu ingurura Nibalirekin batera eta lidergoa galdu du…

Eguraldia eta izan duten ibilbideak lasterketa apurtu du. Guztia baldintzatu duena Liquigas talde osoaren erorikoa izan da lokatz bidetatik sartu aurretik. Basso eta Nibali bete-betean harrapatu ditu erorketak, baita Sastre bera ere. Gainontzeko faboritoek egoera ederki probestu dute eta aurrera egin dute tarteak irekiaz. Eguraldiak zailtasuna gehitu die atzetik aurrera egiteko eta gainera gaurko etapako hainbat kilometro  lokatz bidea izanik, gogortasuna areagotu da.

Evans, Vinokourov, Cunego, Gadret, Pinotti eta Arroyo aurrean izan dira eraso baten ostean. Tropel nagusian Gerdemann, Millar eta Porte ziren besteak beste. Atzean, denbora tartea txikitu nahirik Nibali eta Basso. Azkenean Aurreko boskotea iritsi da helmugara eta Evansek eraso bikain bat jo ostean, etapa garaipena eta 20 segundoko gain saria eskuratu ditu.

Atzeko taldean Scarponi izan da aurrena helmugaratzen. Aipatzekoa italiarraren lana Liquigasekoekin batera baitzen eta atzetik aurrera sendo joan ondoren tropel nagusiarekin bat egitea lortu baitu. Esan bezala, Nibali eta Basso 2 minutu ingurura. Gainontzeko txirrindulariak ere banaka iritsi dira helmugara eta 5 minututara Sastre eta Tondo.

Montalcionoko etapan galtzaile Nibali izan da maglia galdu duelako, baina bera baino gehiago Basso esango nuke. Nire iritzian Basso da taldeko liderra eta gaur ezinean aritu da. Beharbada azken asterako prestaketa egin duelako? Ez dakit. Beste galtzaile nabarmena Sastre izan da. Leganesekoa buru altsa ezinda dabil aste honetan; Holandako erorikoen ondorioz 2 minututik gora galduak zituen. Gaur 5 minutura helmugaratu da. Oker ez banaiz 7 minutuko atzerapena izango du gaurko etaparen ondoren. Sailkapen nagusiari agur esango al dio Cervelokoak? Errekuperatzeko aukerarik ba al du?

Evans indartsu dabil eta gaurkoan argi erakutsi du. Talde kaxkar xamarrarekin ari da Italian, baina garbi dago australiarra indartsuena dela eta Giroa irabazteko hautagai nagusia dela. Tropelako erabiltzaile gehienak ez geunden oker; %83,7ak aukeratu dugu eta asmatu dugulakoan naiz. Vinokourov ere bikain lehen aste honetan, baina ez dut uste azken asteraino sasoi honekin iristeko gauza izango den. Ikusiko dugu.

Esan bezala, gaurko etapak sailkapen nagusian aldaketa ikaragarriak eragin ditu. Zenbaitek kritikatu egin du hiru asteko lasterketa batean horrelako ibilbiderik ezin dela jarri esanez. Nik, txirrindulari zale moduan, gustura ikusi dut ba. Aspaldian gainera horrelako denbora tarteak ikusi gabe nintzen 3 astetako lasterketa batean eta guztia posible dela gogora arazi dit honek. Nik txalo egiten diet lasterketa antolatzaileei. Beharbada txirrindulari eta taldeak haserre izan daitezke, baina ikuskizuna saritu nahi bada, horrelako etapak jartzearen aldekoa naiz.

Aurtengo Giroa aspergarria eta monotonoa izatetik oso urruti dagoela iruditzen zait, eta oraindik beste bi aste falta dira!

Vinokourovek maglia taldekidearen erruz galdu du

Vinokourov taldekideari begira

Astana hemugara iristean Vinokourovek egindako keinuek hori pentsa arazi digute. Kazakhstandarraren haserrea agerikoa izan da. Bazekien maillot arrosari eusteko ezin zuela segundorik ere galdu eta 5. kideak berarekin iritsi behar zuela. Baina honek ezin eta denbora galdu dute taldeko liderraren kaltetan. Zein zen 5. txirrindulari hori? Seguru ez duela afari goxorik izan.

Ikaragarrizko erlojupekoa egin duena Sky izan da. Wiggins eta bereak talderik konpaktoena dela argi utzi dute berriro ere. 37 minutu azpitik behar izan dute lana burutzeko. Niretzat ere faborito garbiak ziren, baina azkenean ez da hala izan.

Eguraldiak etxekoei mesede egin die gaurkoan. Liquigasen ordua zenean, errepidea lehorrago zegoen eta horri eskerrak Skyren denbora hobetu dute. Ondorioz Nibali jarri da lider gaurkoan, atzetik Basso duelarik. Emaitza bikaina zalantzarik gabe talde berdearentzat.

Aurtengo Giroan ohiko bihurtzen ari da lider aldaketa etapa bakoitzean. 4 etapa jokatu dira eta 4. liderra izango da Nibali. Biharkoan ere lider aldaketa izango al dugu?

Vino: amore eman beharrean, egurra!

Vinokourov Liejan

Alexandre Vinokourovek ez daki zer den amore ematea. Zenbat eta zaplasteko handiagoa hartu, orduan eta grinatsuago borrokatu. Tourreko etapa batean hamar minutu galduz gero, hurrengoan egurra, eta etapa garaile. Odol transfusio batengantik bi urterako zigorra jaso eta gero ez zuen txirrindularitza utzi. Kontrakoa. Gogotsu itzuli zen joan den denboraldiaren bukaeran; Espainiako Vuelta eta guzti lehiatu zen. Eta aurtengo denboraldian gogotsu ez ezik, indartsu ere badabil. Trentinoko Giroa irabaztearekin nahikoa ez eta Lieja-Bastogne-Liejan nagusitu da. Vino ez dago amore emateko prest. Tropela.net-eko iruzkinetan bazegoen Vinokouroven alde egin zuen zale finik.

Julenek lasterketaren prebian ohartarazi bezala, faboritoen zerrenda oso-oso luzea zen. Ohi bezala, Ardenetako Hirukotearen azken proban sua La Redoute muinoan piztu zen. Barredo eta Tankink, Tony Martin, Masciarelli eta Garzelli izan ziren erritmoa aldatzen lehenak, baina tropela ez zen hautsi. Ondorengo aldapan, Roche aux Fauconsen, ordea, mugimenduak izan ziren. Franck Schleckek, Valverdek, Evansek, Contadorrek eta Andy Schleckek agerian utzi zuten zangoak aurrera egiteko pronto zituztela. Zorionez, Igor Anton ez zebilen aparte. Baina hara non aldapa hori pasatu eta aurrera jo zuten Alexandre Vinokourovek eta Alexandr Kolobnevek. Gilbertek ere erasora jo zuen, eta Valverdek eta Evansek kate motzean lotu zuten belgikarra. Gainerakoak, tartean Contador, Schleck eta Anton atzean geratu ziren.

Ekinaren ekinez, Vinokourovek eta Kolobnevek zulotxoa ireki zuten. Saint Nicolasen, azken aurreko aldapan, helmugara iristeko 11 kilometro falta zirela, atzeko hirukotetik, Gilbertek aurrera jo zuen. Belgikarra indartsu dabil, eta Valverde eta Evans atzean utzi zituen. Baina ETBko esatari Xabier Usabiagak bete-betean asmatu zuen. Aurrera jo bai, baina gero itoz gero, akabo. Gilbertek ezin izan zuen aurrekoen aldea murriztu eta helmuga aurreko aldapatxoan, Valverdek eta Evansek harrapatu zuten.

Ordurako, lasterketa irabazteko lehia Vinokourov eta Kolobneven artean zegoen. Eta iraganean bezala, Astanako txirrindulariak erraiak bota zituen eta Kolobnev makurrarazi zuen –hori erakusten du argazkiak, hain zuzen ere-. Esandakoa, Vinok ez daki amore ematen. Hurrengo erakustaldia? Edozein egunetan…

Argazkia: www.cyclingnews.com (Elmer Kring)

2010eko taldeen analisia (II): Astana, lider nagusiaren taldea

Contador eta ValverdeContadorrek esan zuen bezala, Astana taldea zerotik hasiko den talde bat bezalakoa izango da 2010ean. Ez da harritzekoa Armstrongen bere talde berrirako 2009ko Tourrean izan ziren gainontzeko txirrindulariak Radio Shack taldera eraman baititu berarekin. Segurua dan bakarra egungo Frantziako Tourreko garaileak bertan izango dela 2010ean eta taldeko liderra Tourrean, aurtengoan zalantzarik gabe, Contador izango dela.

Joan diren txirrindulari kopurua ikusita, zuzendariak ahaztu gabe, fitxaketa ugari egin behar izan ditu talde kazakhstandarrak. Hauetako bat, eta gehien harritu nauena, Pereiroren fitxaketa izan da. Galiziarrak azken bi urteak pattal eman ditu: iaz Tourrean erorketa eta aurtengoan forma ezin hartu. Ez dakit Contadorrek eskatutako fitxaketa izan den ala zer, baina ia ia ez zen gauzatu gogoratuko duzuen bezala. Azkenean, ordea, talde urdinean izango da aurtengoan Pereiro.

PereiroFitxaketekin jarraituz, bi txirrindulari espainiar etorri dira Fuji Servetto taldetik: De la Fuente eta Jufré beteranoa. Segur asko fitxaketa hauek Contadorrek eskatutakoak izango dira. De la Fuente laguntza bikaina izango da mendian.

Italia aldetik bi txirrindulari gehitu zaizkie, biak Lampreti taldetik etorriak. Biak ezagunak egingo zaizkizue, Tiralongo eta Gasparotto. Lehena beteranoa izan arren ere igotzaile bikaina da.

Asiako 2009ko txapelduna ere Astana taldean izango da 2010ean. Fofonov beteranoak, Cofidis taldeak ez jarraitzea erabaki eta gero, talde kazakhstandarra aukeratu du bere ibilbide profesionalarekin jarraitzeko. Hala ere ez da taldeko beteranoena bera izango. Oker ez banaiz titulu hori Stangelj esloveniarrak izango du talde urdinean. Stangelj Liquigas-etik datorren txirrindularia izango da.

Txapeldunez ari garela, Ukrainiako erlojuaren kontrako txapeldunaren fitxaketa aipatu behar. Grivko ISD taldetik dator eta 2009an espero baino maila baxuagoa eman bazuen ere, progresioari jarraitzen badio, erlojuaren kontrako saioren bat edo beste irabazteko gai ikusten dut.

Oraindik aipatu ez dudan fitxaketa interesgarria Alan Davis eta bere anaia Scott dira. Davis anai zaharrak Quick Step taldea utzita dator eta Scott Fly V Australia taldetik. 2009an urte hasiera bikaina izan zuen Tour Down Under irabaziz eta zenbait esprintetan aurrean ibili zen. Beharbada aurtengoan esprintetan maila hobea emateko gai izan daiteke. Lehen aldia izango da bi anaiak talde berean arituko direna profesionaletan.

VinokourovEta ezin ahaztu “etxeko” txirrindulariak. Vinokourovek iazko urte amaieran zenbait lasterketa korritu zituen, horien artean 2009ko Mendrisioko Munduko Txapelketa. Itzulera hau oso kritikatua izan den arren, aurtengorako urtea prestatzen lagunduko zion iaz lehiatzen hasteak. Ez dakit Tourrean izango den ala ez, baina seguru lasterketaren baten edo besten zeresana emango duela Kazakhstango txirrindulariak.

Itzuliko den beste kazakhstandarra Gourov da. Ez dakit zein arrazoirengatik, baina iaz A-Style talde kontinentalean aritu zen, baina aurtengoan berriro itzuli da Astana taldera. Beharbada talde politikak exijitutako fitxaketa?

Oraingoz dakigula taldea aurreko fitxaketa hauek eta Iglinskiy eta Salvaggik osatuko dute.

Pentsatzen dut Astanaren helburu nagusia Contadorrekin hirugarren Tourra irabaztea dela, baina aurrez aipatu bezala, ez zait iruditzen behar besteko taldea duenik, batez ere gainontzeko taldeekin alderatuz. Schleckek berriki egin dituen adierazpenarekin bat nator: “Contador ez da garaiezina, bere ahuleziak ditu”.

Cunegoren garaipena Aitanan

Cunego. 2009ko Vueltako 8. etapan garaipenaCunegok azken kilometroetan erakustaldi itzela eman du. Orain arte galduta zuen denborari esker faboritoek ez diote italiarrari jarraitu eta abiadura azkarrean egin du aurrera. Horri eskerrak Moncoutie harrapatu du azken kilometroetan eta helmugarako bidea erraz egin du garaipena eskuratuz. Moncoutie azkenean bigarren eta Gesink hirugarren helmugan.

Gaurko etaparen zain ginen. Bagenekien faboritoek nola dauden ikusteko etapa izango zela eta hala izan da.

Etaparen jarraipena telebistaz ikusten ari nintzela jaso dut lehen berri garrantzitsua: Andy Schleck-ek Vuelta utzi du (Tropelean %12,9ak aukeratutako faboritoa). Espero genuen Schlecktarrek Vuelta ez zutela lehiatuko baina ez nuen uste hain azkar utziko zuenik. Berarekin batera lasterketa Jerome eta Bernaudeuk utzi dute.

Taaramae izan da lehen ihesten saiatu den txirrindularia baina 20 segundoko tartea lortu badu ere bere abentura denbora gutxi iraun du. Benetako ihesaldia Bonnet, Voss, Hoogerland, Weening, Moncoutie eta Hinaultek osatu dute.
Tropeltxo honek bai, honek lortu du tropel nagusitik ihes egitea eta eguneko ihesaldia izan da. Tropeltxo honek lortu duen denbora tarterik handiena ia 13 minututakoa izan da eta ia-ia etapa irabazlea ere izan du.

Aitanako gaina igo aurretik, 3. mailako 4 mendate eta 2. mailako bi igo behar zituzten. Ihesaldiko txirrindularien helburu nagusia, beraz, etapa garaipena lortzen saiatzeaz gain mendiko maillota eskuratzea izan da. Moncoutie frantziarra izan zen iazko Vueltan mendiko sari nagusiko garailea eta aurten ere bide horri ekin dio. Ihesaldian bildu dituen puntu guztiei esker berak eramango du bihar maillot hori. Iheskide izan dituen Weening eta Hoogerlandek ezin izan dute behar beste puntu bildu eta 2. eta 3. postuetan aurkitzen dira une honetan.

Caisse D’Epargne izan da tropel nagusian erantzukizuna hartu duena. Bazekiten Valverdek etapa garaipena edo lehen hiru postuetan sartuko balitzateke lidergoa eskuratuko zuela eta ez zioten aukera horri muzin egin nahi. Horretarako ihesaldia bertan behera utzi behar zuten. Erritmo bizia jarri dute eta tropelean zatiketak sortu dira. Horien artean Cancellara liderra izan da geratzen hasi dena. Suitzarrak bazekien gaur hala izango zela.

Oker ez banaiz, tropel nagusia Tudonsetik behera jaisten hasi direnean Samuel Sanchezek eroriko bat izan du. Caisse D’Epargnek egoera horretaz jabetuta erritmoa bizitu du eta asturiarrak gain esfortzu bat egin behar izan du  bat egiteko. Esfortzu horri esker Aitanaren igoera hasi aurretik bat egitea lortu du Sanchezek.

Aurrealdean mugimenduak hasi dira Aitana igotzen hasi direnean. Lehena erasotzen Hoogerland izan da baina Moncoutie ez zegoen etapa garaipenaren lehia uzteko prest. Biak aurrera egin dute eta atzealdean Cuesta eta De la Fuentek tropel nagusitik aurrera egin dute. Gero Marchante bera ere saiatu da baina bi saiakera hauek alferrik ziren Caissek lasterketaren lidergoa eskuratu nahi baitzuen gaurko etapan. Tropel nagusiaren atzealdean, berriz, Vinokourov eta David Herrero ezinean ikusi ditugu. Kale egin duen faboritoetako bat gaur kazakhstandarra izan da eta sailkapen nagusiaren lehiatik kanpo geratu da.

Tropel nagusia pixkanaka pixkanaka ihesaldiko txirrindulariak irensten joan da baina aurrealdean ziren Moncoutie eta Hoogerland. Frantziarrak, ordea, erritmo aldaketa bat egin du eta Hoogerland atzean uzteko gauza izan da. Moncoutiek etapa garaipena nahi zuen eta hala izango zen Cunegok aurrera egingo ez bazuen.

Tropel nagusian eraso ezberdinak izan dira. Szmyd-ek tropelari erritmoa jarri dio gero Bassok erasoa jo zezan. Aitortu behar da italiarra saiatu saiatu dela, baina ezin izan du atzo galdutako denbora berreskuratzeko ezer egin. Erasoa jo duena eta libre joan dena Cunego izan da. Bizi-bizi egin du aurrera Lampreko italiarrak.

206 kilometroko etapa izaki eta ihesaldian egin duen esfortzuaren ondorioz, Moncoutiek etapa garaipena eskura izan badu ere, atzetik Cunego indartsu zetorren. Frantziarra azken kilometroan sartu denean garaipena eskura zuela pentsatu dugun arren, Lampreko liderrak ezarritako erritmoak Cofidiseko txirrindularia harrapatu eta pasatzerainokoa izan da. Esan bezala, beraz, Cunegok etapa garaipena.

Atzealdean eraso ezberdinak izan dira. Gesinkek bere saiakera egin eta aurrera egitea lortu du eta hirugarren helmugaratu da. Valverdek ere bere saiakera egin du, baina Evans eta Sanchezek ederki eutsi diote eta azkenean Evansek eskuratu du lidergoa.

Gori-gori dago sailkapen nagusia gaurkoaren ondoren. Evans da lider berria eta Valverde eta Sanchez 2. eta 3. dira 2 eta 8 segundotara. Lehen esan bezala, faboritoetatik asko atzeratu dena Vinokourov izan da.

Kazakhstandarraren atzerapena ikusita ez dakit Astana taldeak zein estrategia hartuko duen. Momentu honetan taldekiderik aurreratuena Haimar Zubeldia dute, 8. postuan Evansengandik 1’37”ra. Bigarrena Navarro 2’12”ra. Haimar Zubeldia izango al da taldeko lider berria? Euskaltel-Euskadi taldean izandako ibilbidea kontutan hartu beharko bagenu logikoena hala izatea deritzot. Hala ere ikusi egin behar Haimarrek nola eusten dion biharko etapari. Nire iritziz Haimar sailkapen nagusian lehen hamar postuetan sailkatzeko moduko txirrindularia da eta ahalegin horri ekin beharko lioke. Zer deritzozue?