Menchov – 7 orrialdea – Tropela.eus bloga

Multzoak aztertuz (I): Hautagai nagusiak

ALEJANDRO VALVERDE

Aurtengo emaitzak

Emaitza onekin eta sasoiko iritsiko da: Murtziako itzulia irabazi zuen martxoan, Paris-Camembert eta Liege-Bastogne-Liege klasikoak apirilean eta baita Dauphine Liberé ere azken txanpan. Inoiz baino lasaiago dirudi. Batzuen ustez indartsuegi irits daiteke hasierara, Dauphinen sendoen agertu izan direnetako batzuk pott egin baitute azken urteetan Tourreko 3. astean.

Tourrean esperientzia

Contador eta Rasmussen iaz Kelme-tik fitxatu zutenetik Tourrera begira jarri zuen Unzuek. Iaz besterik ez du amaitzea lortu ordea, 6. postuan. Aurretik, denok gogoratuko dugu, adibidez, Armstrong-i irabazi zion etapa Courchevel-en 2005an, edo 2006an eroriko bat medio nola joan zen etxera. Dena dela, Espainiako Itzulian erakutsi du badakiela 3 astetan topera egotea zer den: 2006an 2. postuan amaitu zuen eta 4. postuan 2004an.

Bere alde

Berezko kalitate ukaezina eta irabazle sena. Prestakuntza inolako Continue reading “Multzoak aztertuz (I): Hautagai nagusiak”

Sella Dolomitetako errege

Emanuele Sella Tropelean %4,6ak egin du italiar honen alde, beraz, inor gutxik espero zuen asteburu honetan egin dituenak egiteko gai izango zenik. Ikaragarrai Alpe Di Pampeagon amaitzen zen etapan emandako erakustaldia: Passo mendiaren gora erasoa jo eta Alpe Di Pampeagon gora atzetik zituenei denbora atereaz. Egia da azken bi kilometroetan asko sufritu zuela, baina garaipen itzela lortu zuen bere herkide zen Pantaniren antzera.

Lortu zuen hainbeste desira zuen garaipena, bere emaztegairi eskaini nahi zion garaipena, eta nola gainera? Baina ez ziren hor geratu Emanuelen erakustaldiak. Larunbatekoarekin nahikoa ez eta atzokoan ere beste ihesaldi batean sartu eta beste garaipen epiko bat lortu zuen, Dolomitetako jaun eta jabe eginez. Ikaragarria!

Navigare taldeak oroar onenen pare ibili ziren. Atzokoan bigarren sailkatu zen Pozzovivo, taldekidea, eta etapa guztian zehar aurrean ibili ziren. Gaizki pentsatzen hasi behar la dugu? Larunbateakoaren ostean ez nuen usteko hain azkar errekuperatu eta bigarren egunean horrelako garaipenik lortzerik posible izango zuenik 27 urteko txirrindulariak. Dakizuen bezala Navigare ez da ProTourreko taldea, eta dirudienez dopingaren aurkako kontrol xamurragoak dituzte ProTourretik kanpo dauden taldeek. Bai, eztabaita sortu nahi dut, ez dut ezer baieztatzen, baina zer pentsatua ez al dizuete ematen?

Faboritoen artean alde txikiak izan ziren Kloden alemaniarraz gain, honek faboritoengandik ia 6 minutura helmugaratu baitzen. Espero bezela lider aldaketa izan zen atzokoan eta faboritoetako batek jantzi zuen, Contadorrek hain juxtu. Gaurko erlojuperako faborito da, eta beraz, badirudi aldeak handi ditzazkeela bere aurkariekin. Oraingoz, astebete falta denena 2008ko Giroa amaitzeko, 1:26 segundutan daude gainontzeko faboritoak: Riccò, Di Luca, Bruseghin, Menchov eta Simoni.

Tropeleko lehiaketari dagokionez, bulder azkoitiarra da nagusi ia lehen egunetik. Azken bost etapata bera da liderra eta momentuz Kanariar edo Balear irletarako bidaia irabazteko hautagai nagusia. 3364 puntu ditu, bigarrengoari ia 80 puntuko aldea ateratzen dio, baina sailkapen idealaz urruti da txirrindulariei dagokion atalean ikusi dezakezuen bezala. Kiniela idealaren jabeak 4261 puntu izango lituzke.

Oraindik astebete falta da aurtengo Giroa bukatzeko eta denetik gerta daiteke.

Argazkia: csfgroupnavigare.com

Emozio gutxiko Vuelta

Halaxe da bada! ez dut Romingerren garaitik hain emozio gutxiko Vueltarik gogoratzen. Gainera, suitzarrak irabazten zuenean sekulako egurra emanaz izaten zen baina aurtengo kasuan Menchovek Zaragozako erlojupekoan lortutako aldea mantentzea bakarrik nahiko izan du. Merezimendu osoz Menchov, Sastre eta Samuelek bete dute aurtengo podiuma. Gehien merezi izan duten txirrindulariak direla uste dut.

Vuelta honetako beste izen batzuk aipatzean ez nuke Freire, Bennati, Bettini eta Petacchiz ahaztu nahi. Sprintetan borroka polita ikusteko moduan izan gara eta ez dut uste maila handieneko borroka hortxe ikusi dugula esaten baldin badut.

Errebelazioen atalean, Mosquera, Efimkin eta Dani Morenoren izenak etortzen zaizkit burura. Beste maila batean niretzat Cadel Evansena ere “errebelazioa” izan da, ez bait nuen uste, inondik inora ere, podiumeko borrokan izango zenik. Vuelta hasi aurretik bere web orrian sailkapen nagusirako ilusiorik gabe zetorrela eta entrenamentu gisa hartu behar zuela esan ondoren azken egunerarte podiumeko postuetan izan dugu, sekula arpegia gehiegi erakutsi gabe, hori ere egia da.

Azken asteetan hainbeste aldiz errepikatu dudan ibilbideen gabeziek ere bere zeresana eman dute. Ibilbide negargarri honek ez du txirrindularien arteko borroka ikusten lagundu, nahiz eta egia izan, ibilbidea aproposagoa zenean ere txirrindulari gutxi izan borrokarako gogoz. Hala ere, derrigorrezkoa iruditzen zait datozen urtetarako ibilbidean aldaketak izatea, eta ez naiz ari Anglirugatik hitzegiten. Askotan mendiko etapa gogorra azken mendate gogorrarekin parekatzeko errua egiten dugu baina Espainian sekulako mendiko etapak presta daitezke azken aldapa hain gogorra izan gabe, ikuskizun politagoa ikusteko moduan izango ginatekelarik. Hala ere, aurtengo kritiken ondoren, datorren urtean Angliru itzuliko dela ematen du eta antolatzaileak horrek jendaurrean ondo jar ditzake baina ez dut uste horrek ezer asko aldatzen duenik ibilbideari buruz egon beharko lukeen filosofia aldaketaren aurrean.

Denboraldia amaitzera doa baina oraindik zita garrantzitsuak ditugu, Munduko Txapelketan urrutira joan gabe eta ondoren Paris-Tours eta batez ere Lombardiako Giroa.

Eguraldia erabakigarri?

Aurtengo Vuelta Españako ibilbideak ez du Menchov aurreneko postutik kentzeko aukerarik eman. Eta Madridera iristeko bidean ere ez dira zailtasun asko geratzen, biharko Abantosko igoera bikoitza eta larunbateko erlojupeko motxa bakarrik.

Hala ere, bada erabakigarria sorta daitekeen baldintza bat, eguraldia. Biharko euriak eta txingorrak espero dira Madrid inguruan eta hor egon daiteke Vuelta honetako kakoa. Itzuli osoan Menchov indartsuen agertu baldin bazaigu ere biharkoan euriak asko alda dezake lasterketaren norabidea. Gogoratu Herasek Pajaresen behera Menchov atzean utzi zuenean euria mara-mara ari zuela (Heras zeharo dopatuta zioala frogatu zela ere ez dut ahazten, eh?) eta errusiarra ez da jeitsieretan oso ona, euriarekin are gutxiago. Hor egon daiteke errusiarra aurreneko postutik kentzeko aukera, zaila iruditzen baitzat errepidea gora begira jartzen denean atzean uztea. Eta nor izan daiteke kondizio horietan onuraduna? uste dut denek Samuel Sanchezen izena izango dutela buruan. Ez agian Vuelta irabazteko, baina ziur euria baldin bada Abantoseko jeitsieran saiatzen dela erasotzen eta bere helburua den podiuma agian lor dezake. Sastre lagun ona izan zitekeen ihesaldirako baina hau ere ez da bada batere iaioa jeitsieretan.

Ez diet txirrindulariei ezer txarrik opa baina ea biharkoan sekulako euria egiten duen, ibilbideak laguntzen ez duenez, eman diezaiola eguraldiak emozio pixkat aurtengo ekitaldi honi.

Vuelta erabakita?

Hor nonbait. Egia da egun asko geratzen direla oraindik eta edozein ezusteko izan dezakegula (kirol arlokoa edo ez) baina Vueltan izan diren 3 etapa garrantzitsuenetan, Lagos, erlojupekoa eta Cerler, nahiko izan dira Menchovek besteengan duen nagusitasun osoa erakusteko. Gauzak asko okertu beharko zaizkio Madriden urrezko maillotarekin ez ikusteko.

Izan ere, egun asko geratu izanagatik ez dago inongo gogortasunik denborarik sartzeko. Arcalisko etapa, Monachil igo behar duteneko etapa eta Abantos etortzen zaizkik burura, berauek ere inongo gogortasun berezirik ez dutenak. Vuelta hasieran nioen bezalaxe aurtengo ibilbidea lotsagarria dela esaten jarraitzen dut. Vueltako bi etapa garrantzitsuenetako errepide baztarretan ikusi den jende kopuru urriak proba hau aldapa behera doala frogatu besterik ez dute egiten. Niri lotsagarria iruditzen zait, benetan. Egia da ibilbide gogorragoa izan balitz errusiarrak oraindik denbora tarte handiagoak izango lituzkeela, hala ere, beste txirrindulariek denbora tarte horiek errekuperatzeko aukerak eman behar zaizkie eta aurtengo Vuelta honetan ez dituzte aukera horiek soberan izango.