Etiketa Artxiboak:Amets Txurruka

Mikel Nievek etapa garaipen itzela talde lan bikain bati esker

Mikel NieveEuskaltel-Euskadi taldeari aurtengo Espainiako Vueltak eskuetatik ihes egin zion larunbatean, baina gaur talde lan bikaina egin du talde laranjak eta Mikel Nievek etapa garaipena lortu ahal izan du.

Gorka Verdugo, Pablo Urtasun, Koldo Fernandez, Juanjo Oroz, Amets Txurruka eta Mikel Nieve geratzen zaizkio Euskaltel-Euskadi taldeari lasterketa. Esan bezala, larunbateko eroriko larri hartan Igor Anton gorriz zela galdakarra eta Egoi Martinez galdu zituen. Atzokoan Beñat Intxaustik utzi zuen lasterketa. Hiru lagun gutxiagorekin eta Vuelta eskuetatik alde egin eta gero, gaurkoan egoerei aurre egiteko gai direla erakutsi dute Euskaltel- Euskadiko txirrindulariek.

Ihesaldian Juanjo Oroz, Amets Txurruka eta Mikel Nieve bera sartu dira. Azken bi igoerak falta zirela talde laranjak Mikel Nieveren aldeko apustua egin du Juanjo Oroz aurreko tropeltxoan tiraka jarriaz. Bigarrengo igoeraren lehen kilometroak egin arte Amets Txurrukari tokatu zaio tropeltxoan aukeraketa egitea.

Tropeltxo horretan Luis Leon Sanchez txirrindulari arriskutsua zuten. Cotobelloko igoeran, ordea, Mikel Nievek igoera hasi eta gutxira erasoa jo du eta gainontzeko tropeltxoko kideak atzean utzi ditu, tartean Sanchez. Erritmoari bikain eutsi dio eta faboritoek beraien arteko lehia zutenez, ez da garaipena kenduko zion mugimendu beldurgarririk izan. Helmugan Mikel Nieve tarte handiarekin iritsi da, bigarren Frank Schleck izan baita minututik gorako tartearekin.

Gaurkoarekin 3. etapa garaipena da Euskaltel-Euskadi taldearentzat eta Vuelta honetan 5. euskal garaipena. Txalotzekoa gaur Euskaltel-Euskadik egin duen lana. Eta txalotzekoa Mikel beraren lana, gaurko etapan garaipena lortzeaz gain erorikoa izan aurretik Igor Antoni laguntzeko lanetan bikain aritu baita. Zorionak Mikel!!

Tourreko multzoen azterketa: euskaldunak (VI)

euskaldunakSailkapen nagusia lehiatzeko euskal txirrindularirik ez dago, baina etapa gehienetako ihesaldietan etxeko ziklistaren bat ikusiko dugu ziur aski. Batzuentzat lehenengo Tourra izango da. Goza eta era berean asko ikas dezatela opa diegu!

Juanma Garate
Rabobankeko igotzaileak galtzak bete lan izango ditu, bai Menchovek bai Gesinkek sailkapen nagusia izango dutelako begiz jota. Hala ere, irundarra etapa ehiztari aparta da; Vueltan eta Giroan etapak irabazi eta gero, oso handia egin zuen iaz, Mont Ventouxen nagusitu baitzen. Mendiko etapetan ihesaldietan sartuko da ziurrenik eta beraz, puntuak eman eman ditzake.

Amets Txurruka
Adorea barra barra du txirrindulari bizkaitarrak. 2007an oso-oso gertu izan zuen etapa garaipena Tourrean eta iaz, Bartzelonan bukatu zen etapan ere jo eta ke ibili zen. Tropelean ez da geldirik egongo, eta gauzak ondo, egun batean baino gehiagotan iritsiko da tropel nagusiaren aurretik. Aurrena iristea beste kontu bat da. Ametsen ametsa.

Egoi Martinez
Joan den urteko Tourrean mendiko maillota eskuratzeko borrokan ibili zen Franco Pellizotti italiarrarekin, eta Juanma Garateren adina eskarmentu du. Garate eta Txurruka bezala, Etaparen bat irabazteko borrokan egongo da, ziur.

Iban Mayoz
Donostiarra Giro bikaina egina iritsiko da Frantziara. 27 urteko txirrindularia eztitan dagoela ematen du. Tourrean baina, ez du esperientziarik, eta hori eta Italian pilatutako nekea izan ditzake oztopo nahi bezain gerlari aritzeko.

Aitor Perez Arrieta
Caisse d’Epargne, Extremadura, Contempolis… Talde askotan egona da zegamarra. Aurten Footon-Serveton dago, Matxinen esanetara, eta azken orduko aldaketa bati esker debuta egingo du Tourrean.

Arkaitz Duran
Aitor Perezen taldekideak ere aurreneko Tourra du. 24 urteko gasteiztarrak ikastea izango du egiteko nagusia.

Imanol Erviti
Caisse d’Epargneko 26 urteko iruindarra ere lehenengo aldiz izango da Tourrean. Giroa eta Espainiako Itzuli, aldiz, ezagutzen ditu.

Gorka Verdugo
Etxarri Aranatzeko ziklistak 31 urte ditu eta Samuel Sanchezen mesedetan lan garrantzitsua egin dezake, esperientzia bai baitu: azken lau Tourretan parte hartu du eta laurak bukatu ditu.

Iñaki Isasi
33 urteko arabarrak, Gorka Verdugok bezala, eskarmentua badu itzuli handietan. Euskalteleko ziklistak lau aldiz bukatu du Tourra eta hiru Espainiako Vuelta. 2006ko Tourreko etapa batean bosgarren sailkatu zen.

Juanjo Oroz
Nafarrak iaz lehen aldiz parte hartu zuen Tourrean. Hortaz, aurten joan den urtekoan ikasitakoa langungarri izatea espero du Euskalteko txirrindulariak.

Ruben Perez
Zaldibiko 28 urteko ziklistak zenbait Tour ditu zakuan, eta 2007an bestei nork baino kilometro gehiago eman zituen ihesean. Borrokarako grina eramango du Euskaltelekoak, ziur.

Ivan Velasco
Euskalteleko 30 urteko arrasatearrarentzat Tourrean egotea bada garaipen handia, estreinako aldiz ariko baita proban.

Alan Perez

28 urteko nafarrari buruz beste horrenbeste esan daiteke. Irteeran egotea ametsa betetzea izango da berarentzat, aurreneko aldiz lehiatuko baita. Honek ere mailot laranja eramango du soinean.

Zeinen alde egin? Nik Juanma Garate eta Amets Txurruka aukeratuko nituzte.

Txirrindularitza esker onekoa ez denean…

Sentsazio gazia daukat, Ametsengatik pena sentsazioa, alegia. Txirrindularitza ez da batere justua izaten ari Etxebarriako mutil ausart honekin, izan ere, gutxi izango baitira Ametsek bezainbeste garaipen bat merezi dutenak. Urteak dira lanean zintzo ari dela, behin eta berriro zutoina joaz, ausardia erakustaldi handiekin, taldegizon lan ilun baina garrantzitsuarekin, eta parte hartzen duen lasterketa gehienetako animatzaile nagusia izaten.

Aurtengo Euskal Herriko edizioa bere lasterketa izaten ari zen. Itzuli hau ikusi dudan Ametsik onena nabarmentzen ari zen, Tourreko konbatibitatea irabazi zuena baino hobea oraindik. Ihesaldietan ematen zuen indar sentsazioak, Arrateko maldetan emandako kasta erakustaldiak, nahiz eta jakin faboritoek irentsi egingo zutela, eta antzerako ñabardurak ez dira zale eta lagunentzat alperrikakoak balira bezala ondotik pasatzen.

Gogoratzen dut bere afizionatu garaian era zortea ez zuela oso lagun. Olarran ari zenean auto batek aurretik eramanda femurra hautsi zion eta haustura hartatik errekuperatzea asko kostatu zitzaion. Entrenatu eta entrenatu, baina ibili ez. Txirrindularitza utzi eta ikasketetan buru-belarri sartzea ere pasatu zitzaion burutik (garai hartan biak zeramatzan paraleloan). Baina ez zuen amore eman, eta Debabarrena taldeak emandako aukera esker eta Italian pasatako garai hari esker profesionaltasunerako atea irekitzea lortu zuen. Urtebete behar izan zuen Madariagak konturatzeko Ametsek zerbait zeukala. Beste urtebete Ametsek, Tourrera joan eta lasterketa bikain batekin Euskaltel lehen aldiz Pariseko podiumean sartzeko.

Esan bezala, makina bat jaurtiketa bota ditu zutoinera, eta hainbat eroriko mingarri, bai planu fisikoan hala psikologikoan. Gogoratzen dut Euskaltelen debutatu zuen urtean Romandiako Tourrean lurrera joan zela ihes eginda zihoala, etapa euritsu batean. Euskal Bizikletan ere mokorra mindu zuen eroriko latz batekin, gorputzaldi apartean zegoenean. Iazko Tourrean ere Parisera iristeko egun bi falta zirela lurra dastatu zuen berriro. Baina hor darrai, gutxi bezala gerra ematen.

Uste dut afizionatu guztiek baloratzen dutela txirrindulari honek lasterketan duen jarrera. Beti dena ematen du, hanketatik bururarteko profesionala dela erakutsiz. Baina horrez gain esker oneko mutila da, atsegina, irrifartsua eta gertua. Atzo ez zen atera, lepauztaia hautsita Aiako aldapan behera. Berriro ere zorteak bizkarra eman dio.

Guzti hau dela eta, txirrindularitzak Ametsi garaipen handi bat zor diola uste dut. Espero dezagun aurten errepide frantziarretan etortzea.

Euskaltel-Euskadi mendiko maillota galtzear?

Amets Txurruka Aiako maldak igotzen erorikoa izan eta geroAtzoko etapan ikaragarrizko erakustaldia emanda Joaquim “Purito” Rodriguez-ek etapa garaipena eskuratu zuen. Aiako maldak hasterako erasoaldia jo eta aurrean zuen Kolobnev-en laguntzarekin, tropelari eta gainontzeko faboritoei behar besteko errenta atera zien atzokoan etapa garaipena lortzeko.

Beharbada, bestela gerta zitekeen Amets Txurrukak erorikoa izan ez bazuen. Aiako %28ko malda igo aurretiko jaitsieran aurreko gurpilak irrist egin zion eta lurrera jauzi zen. Lepauztaia minduta zuela kexatu zen, baina hala eta guztiz ere etapa amaitzeko gauza izan zen. Ikaragarria Ametsek eman zuen erakustaldia atzokoan ere, aste honetan hirugarren aldiz sartu baita ihesaldi batean eta mendiko maillota ziurtatzeaz gain, etapa garaipenaren lehian sartzeko moduan izan zen. Pena ikaragarria genuen Aiako maldetan geunden zaleok, goitik ikusi baikenuen nola Amets aurretik zen ihes eginda errenta politarekin.

Dakizuen bezala Amets Poliklinikara eman zuten. Ez dugu jakin ahal izan azkenean lepauztaia hautsia edo zartatua duen eta oraindik duda da gaur erlojuaren aurkako saioan parte hartuko duen ala ez. Nahikoa luke etapa amaitzea mendiko maillota irabazteko orain bi urte Egoi Martinezek egin zuen bezala. Hala ere, badakigu zauri larriak baditu ez zaiola horrelako esfortzurik egitea komeniko. Duda izango da, beraz, Etxebarriako igotzailea gaurkoan azken unea iritsi arte orain bi urte David Herrerorekin gertatu zen bezala. Gure animorik beroenak Amets Txurrukari, gaur irteten ez bada ere, ikaragarrizko itzulia egin baitu eta hori inork ez baitio kenduko.

Valverde Vs Horner

Faboritoen artean atzo Gesinkek huts egin zuela entzun dugu. Egia da, huts egin zuen, baina arrazoia ez zen izan indarrik gabe geratu izana. Aian geundenok ederki ikusi genuen nola Gesinkek gorputzaren eskuin aldean zauri eta odol arrastoak zituen. Garbi zegoen erori egin zela eta horrek lasterketaren lehiatik kanpo utzi du holandarra.

Gesink kanporatuta, Euskal Herriko Itzulia Valverde eta Hornerren artean erabakiko dela dirudi. Bi hauen artean segundo bakarreko tartea dago murtziarraren alde. Gainontzekoak 34 segundotik gorako atzerapenak dituzte, beraz, ezustekorik ezean, hauetakoren bat izango da gaur Euskal Herriko Itzuliaren garailea. Eta norbaiten alde egitekotan, faborito Valverde hartzen badute ere, nik Horner gailenduko delakoan naiz.

Argazkia: www.cyclingnews.com

Samuel Sanchezek arantza kendu du

Lehendabiziko etapan minutu eta erdi luzea galdu eta gero, gainerakoetan beste helburu batzuk lortzeko lanean ariko zela esan zuen Samuel Sanchezek. Etapa bat irabaztea zuen buruan Euskaltel Euskadiko asturiarrak, eta Arrateko gainean erdietsi du.

Samuel Sanchez Arrateko helmugan

Espero zitekeen bezala, etapa azken aldapan erabaki da. Caisse D’Epargnek jarri du hasieran erritmoa eta Andy Schlecken eraso bortitzak hautsi du tropela. Luxenburgoko igotzaile finak aurrera egin du, eta oso txirrindulari gutxi izan dira gai haren pare jartzeko: Gesink (Rabobank), Horner (RadioShack), Peraud (Lotto), Valverde (Caisse D’Epargne) eta Samuel Sanchez (Euskaltel-Euskadi). Chris Horner izan da erritmoa aldatzen hurrena, eta bidea egin du. Samuel Sanchezek, ordea, harrapatu du mendiko pankarta pean, eta pixka bat aurrerago bat egin dute bikote horrekin Valverdek eta Gesinkek. Azken metroak maldan behera zirela baliatuta, tartea ireki du Samuel Sanchezek eta etapa irabazi du. Valverde, Gesink eta Horner orpoz orpo iritsi dira. Sailkapen nagusirako Euskaltel Euskadiren apustu nagusiak, Beñat Intxaustik, nagusitu den taldekidearengatik minutu erdira iritsi da. Aurreneko erasoa jo duen Andy Schleck eta Cunego 40 segundora helmugaratu dira, eta Arraten irabazteko askoren ahotan zegoen Purito Rodríguez, 49 segundora. Amets Txurrukak ihesaldian egin ditu kilometro asko eta saritxoa jaso du: mendiko maillota.

Azken bi etapetan, Orioko aldapek epaile lana egingo dute eta ezustekorik ezean, Valverdek, Hornerrek edo Gesinkek irabaziko dute aurtengo Euskal Herriko Itzulia. Izan ere, segundo bakarraren bueltan daude hirurak sailkapen nagusian. Haietako batek huts egin lezake, baina hirurek, nekez.

Argazkia: Susi Goetze (www.cyclinginside.com)