8000 kinielatik gora 2009ko Vueltan

8141 kiniela, Espainiako Vueltan inoizko markaKiniela egiteko epea bukatu berri da eta 8000 kinielatik gora egin dira, 8141 hain justu. Inoizko parte hartzerik handiena, beraz, Espainiako Vuelta batean Tropela.net-eko lehiaketan izango duguna. Guztioi lan talde osoaren izenean eskerrak eman nahi dizkizuegu lehiaketa honetan ere parte hartzeagatik.

Gogoratu zenbait sari ere izango direla Espainiako Vueltaren lehiaketa honetan eta Sariak atalean begira ditzakezuela.

Orain irailak 20 bitartean Vueltaz gozatzea besterik ez dugu.

Zorte on guztioi eta gozatu!

Vuelta hasteko bezperan ibilbideari begira

2009ko Espainiako Vuelta24 ordu eskas falta da 2009ko Espainiako Vuelta hasteko. Badirudi dagoeneko txirrindulariak prest daudela Holandako parajeetan edizio berri honi ekiteko.

Abraham Olano eta bere lankideek aurtengo Vuelta Holanda, Belgika eta Espainiako errepideetan jokatzea erabaki dute. Biharko hasiera Assenen jokatuko den erlojupeko motza izango da (4,8km) ingurukoa, esprinterrentzat egokia urrezko maillota janzteko. Erlojupekoa arratsaldeko 15:30ak aldera hasiko da eta azken txirrindulariaren helmugaratzea arratsaldeko 19:00etarako aurre ikusten da.

Holandan 2. eta 3. etapak jokatuko dira, lehena Assen eta Emmen artean, eta bigarrena Zuphen eta Venlo artean. Etapa hauek ia laua dira eta esprinterrentzako egokiak dirudite. 4. etapa Holandako Venlo eta Belgikako Liège herri ezagunean amaituko da. Etapa honetan 4. mailako mendate batzuk sartu dituzte, beraz, pentsa daiteke klasikoetan bezala ihesaldiren batek erabakiko duela etapa honetako garailea.

Asteazkenez atseden eguna izango dute txirrindulariek, Belgikatik Espainiara egin behar baitute “salto”. Garbi dago ibilbideak eskatuta hartu dutela egun hau atseden egun gisa eta zalantzarik gabe txirrindularientzat goizegi izan daiteke.

5. eta 6. etapak mediterraneo kostaldean jokatuko diren bi etapa  izango dira, bata Tarragona eta Vinaròs artean eta bestea Xàtiva inguruan.  Vinaròsen amaituko den etapan 2. mailako mendate bat igo beharko dute, baina etapa hasieran denez, ez zait iruditzen esprinterren taldeek etapa hau ihesaldiren bati oparitzeko izango direnik. Xàtivan jokatuko denak, berriz, 3. mailako hiru mendate izanik, ihesaldientzako aproposa dela deritzot. Ikusi beharko da.

7. etapan beste erlojupeko bat jokatuko da. Oraingo hau Valentzian izango da eta 30km distantzia izango duena. Erabat laua izaki, Cancellara bezalako espezialistentzat egokia ikusten dut.

Irailak 6 igandez hasiko dira mendiko etapak. Bigarren aste honetan 2009ko Vueltako mendiko etapa garrantzitsuenak pilatu dituzte eta badirudi Vueltaren garailea aste honetan bertan erabakiko dela. Alicanteko probintzian aurkitzen den Alto de Aitana izango da sailkapen nagusian eragiten hasiko den lehen igoera. 8. etapa amaiera bertan izango da 3. mailako 4 eta 2. mailako 3 mendate igo eta gero. 18 km inguruko igoera izango eta etapa amaieran bertan izaki, faboritoek beren indarrak erakutsi beharko dituztelakoan naiz.

9. etapak Alicanten bertan jarraituko du. Etapa hau ere menditsua da eta helmuga baino lehenago 1. mailako mendate bat igo beharko dute, Xorret de Cati gaina. Hau sailkapen nagusiko txirrindularientzat baino ihesaldi edota mendiko maillotaren lehian arituko direnen artean izango da interesgarri.

10. etapa trantsiziozko etapa bat izan daiteke. Ez dauka berezitasun gehiegirik Alicante eta Murtzia batuko dituen etapa honek ez bada azken kilometroetan dagoen 2. mailako mendatea. Mendate hau helmugatik 12 km ingurura dago eta kalte egingo die esprinterrei etaparen garaipenaren lehian zalantzarik gabe.

11. etapa azken atseden egunaren aurretik jokatuko da Murtzia eta Caravaca de la Cruz artean. Irteeratik 50 km-tara 1. mailako mendate bat aurkitzen da eta honek ihesaldiak sortzen lagunduko duela uste dut. Eguneko ihesaldia ondo antolatzen bada etapa garaipenaren lehian izan daitezkeela deritzot.

Ostegunean atseden hartuko dute txirrindulariek, beharko duten atsedena. Lasterketa lider denak hurrengo hiru egunetan jasan beharko dituen erasoetarako indarrak errekuperatzeko beharrezko izango du, eta berdin urrezko maillot horren atzetik dabiltzanek, indar guztiak beharko baitituzte hiru etapa horiei etekina ateratzeko. Hiru etapa hauek amaierak goian izango dituzte: lehena Velefiqueren gainean erabakiko da, bigarrena Sierra Nevada gainean eta hirugarrena Sierra de la Pandera gainean. Lehen bi etapak 170 km ingurukoak dira eta azken hau (beharbada txirrindulariek pilatuta izango duten nekea kontutan hartuta edo) 152 km-takoa. Abraham Olano eta bere taldeak, beraz, Almeria, Granada eta Jaenen jokatuko diren hiru etapa hauetan sailkapena erabakitzeko moduko etapak prestatu dituzte. Iraileko bigarren asteburua gorriz markatu beharrean izango gara ibilbide hau ikusita.

Vueltak izango dituen bi atseden egunak agortuta, astelehenean ere aurrera jarraitu beharko du tropelak. Esan bezala, nire ustez ordurako sailkapen nagusiko posturik garrantzitsuenak erabakita izan daitezke. 3. asteko lehen etapatan esprinterrak eta oraindik garaipenik eskuratu ez duten taldeetako iheslariak izango dira.

Oraindik sailkapen nagusian postuak aurreratu nahi dituztenek ostegun eta ostiralean jokatuko diren 18 eta 19. etapak erabil ditzakete horretarako, baina etekina atera nahi badute lasterketa asko gogortu beharko dutela iruditzen zait eta hori, itzuliko azken egunak direla kontutan izanda eta indarrak sobran izango ez direnez, zail iruditzen zait. Hori bai, mendiko maillotaren lehian dihardutenek ezin dituzte bi etapa hauek alferrik galdu.

Madrila iritsi bezperan, Vueltako hirugarren eta azken erlojupekoa jokatuko da. 27,8 km-tako neurketa izango da Toledon. Distantzia motz xamarra sailkapen nagusiari begira zerbait egin nahi bada, baina hori denbora tarteen araberakoa izango da. Lasterketaren nondik norakoaren arabera, erlojupeko hau zirraragarria ala tramite hutsa izan daiteke, eta zoritxarrez, interes gehiegirik piztuko ez duelakoan nago.

Igandean, irailak 20ean iritsiko da Vuelta Madrileko kaleetara. Itzuli handietan egin ohi den bezala, hiriburuan sei itzuli eman beharreko zirkuitu bat prestatu dute. Zalantzarik gabe esprinterrek beraien gaitasunak erakusteko azken etapa izango da. Lasterketako liderrak, berriz, ospakizunez eta podiumean jartzen dioten ereserkia egokia den ala ez ziurtatzeaz besterik ez du arduratu beharko.

Ikuskizuna hastear dago. Kinielak prest? Ba zorte on guztioi!

Tropela Elkarteak langile bat behar du

Tropela.netIaz Tropela Elkartea langile baten bila zebilela adierazi genuen. Azkenean egoerak egoera, ez zen inolako kontrataziorik egin. Orain, ordea, langile bat hartzeari berrekin nahi diogu.

Aurreko adierazpenean egiten genuen bezala, komertzial edota marketing perfila betetzen duen pertsona baten bila gabiltza. Hasteko 6 hilabeterako iraupena izango luke lanaldiak eta lanaren zeregin nagusiak babesle nagusiak topatu eta publizitatea jartzera interesatuta leudeken entitateekin harremanetan egotea izango lirateke.

Lan postua emateko garaian ondorengo ezaugarriak hartuko dira kontuan:

– Euskara
– Harremanetarako erraztasuna
– Mugikortasuna

Interesatuta dagoenak bidali dezala bere curriculuma tropela@tropela.eus helbidera irailak 20a baino lehen. Epe hau amaitutakoan hautagaiekin harremanetan jarriko gara hautaketa prozesuari ekiteko.

Aldaketak Astana taldean

Vinokourov, Ulrich eta ArmstrongAtzo bukatu berri zen Irlandako Tourra. Irabazlea Downing izan zen, 31 urteko ingelesa. Amaitu ez bazuen ere, lasterketa berean izan da Armstrong Texaseko txirrindulari famatua. Hiru eguneko lasterketa izan da Irlandako lurretan jokatu berri dena eta Armstrongek bertan lehiatzeko hitzordua zuen.

Lasterketa hau izango da Armstrong azkenengoz Astanaren maillot urdinaz bideetan ikusi duguna. Dagoeneko Tour Down Under-en hasi zuen denboraldia aurtengoz bere amaierara iritsi zaio amerikarrari. Astanak, edo hobeki esanda, Bruyneelek, aukera eman zion Armstrongi aurten talde urdinean lehiatzen aritzeko. Egia esan espero baino emaitza hobeekin gainera: Giroan 12. postuan sailkatu zen eta Tourrean 3. postuan. Bere hitzetan, doan aritu den urte honetan txirrindularitzara itzultzearen arrazoia kantzerraren aurkako duen fundazioarentzat dirua biltzea izan da. Seguru zenbait milioi dolar biltzeko gai izan dela bere bizikleta ezberdinekin hara eta hona. Eta ezberdinekin diot, berak esan zuen bezala, hauek enkantean saltzeko helburuaz erabili baititu eta Tourrekoa historiako bizikletarik garestiena izango dela aurreratzen zuen. Ez dakit saldu dituen ala ez, ez eta zenbatean, baina gustura jakingo nuke.

Kontua da Armstrongek bere bide laburra egin duela Astanan, polemika eta guzti. Ez baita ahaztekoa izango Contador eta bera talde berean izateak sortarazi duen ikusmina. Pena Gaztela eta Leongo lehen etapa hartan Armstrong erori izana, hala gertatu ez balitz, beharbada bestelako emaitzak lortuko zituela uste baitut. Hala ere, hori nire imajinazioaren fruitu besterik ez da.

Armstrong badoa eta Vinokourov itzuli da. Kazakhstandarrak bere itzulerako debuta l’Ain-eko Tourrean egin zuen orain egun batzuk esan bezala, garaipen eta guzti. Kazakhstandarra Vueltan ikusteko aukera altuak daudela dirudi, izan ere Astanak lehen erreserba gisa gehitu baitu bere zerrendan. Ez da harritzekoa izango, beraz, Vinokourov Assen-eko irteeran bere maillot urdinarekin ikustea.

Rasmussen-i ere amaitu zaio zigorra. Honek ere lehiaketa ofizialetan parte hartzeko aukera dagoeneko badu. Bere esanetan Espainiako Vueltan parte hartu nahi izan omen du, baina bere taldeak lehen izen ematean zerrendan gehitu ez zuenez, ez du posible izango. Lastima, gogoa baitut daniarra berriro ere errepidean ikusteko. Eta are interesgarriagoa litzateke Vuelta bai Rasmussen baita Vinokourov biak, orain bi urteko Tourrean baztertuak izan ziren txirrindulariak, beraien itzulerarako lasterketa hau aukeratu izan balute.

Kritika dezagun kazetaritza profesionala

AS-eko artikuluaZerbait idazteko gogoz nintzen eta ez nuen erakartzen zidan informaziorik irakurtzen. Hor nenbilen prentsa ezberdinetan irakurtzen eta hara, hau da altxorra aurkitu dudana!!

Bakoitzak bere etxe hoberena dela esatea eta hori goraipatze ez dut gaizki ikusten; norberak hori ez badu egiten akabo! Baina bestea da aldamenekoa kritikatu eta gutxi estera iristea. Azken hau ez dut gogoko. Hori da gaur AS-en argitaratu duen artikuluan egiten duena: “El ciclismo francés baja a ‘Segunda División'”.

UCIren munduko sailkapenaren arabera, Espainia da puntu gehien duen herrialdea, Italia eta Australiaren aurretik. Zorionekoak espainiarrak (tartean euskaldunak) sailkapenean aurrenak direla eta. Frantziarrak 13. postuan dira eta badirudi horrek espainiarrak gehiago pozten dituela, AS-eko kazetariak behintzat bai. Artikulu honek kiroltasuna eta giza-legetasuna hankaz gora botatzen dituela iruditzen zait.

L’Equipe-n dagoeneko frantziar txirrindularitzaren egoerak kezka sortu die. UCIren sailkapen honen arabera 6 txirrindulari baino ezingo ditu eraman talde frantziarrak. Kezkagarria, zalantzarik gabe, frantziar txirrindularitzan gertatzen ari dena, baina ez dut uste asko itxaron beharko dugunik berrindartze bat ikusteko.

Pertsonalki, nahiago nuke Espainia sailkapenean beherago egongo balitz eta dopinaren aurka serioago arituko balirateke. Badirudi emaitza onak daudenean bestelako puntu beltz guztiak ahaztu egiten direla artikulu honetan egin den bezala.

Baina esan dizuedan bezala, artikulu hau altxor bat da. Orain arte kontatu dizuedana nahikoa bazen ere, orain noa kazetaritza profesionala kritikatzera. Artikuluaren bukaeran frantziarrek irabazitako azken lasterketan gogora ekartzen dira. Informazio honen arabera, 1985eko Tourra Anquetilek irabazi zuen. Kontxo! Anquetilek, beraz, 5 Tour irabazi zituen eta azkena 51 urterekin, hil baino bi urte lehenago! Hori bai marka!!!! Ta ni jakin gabe.

Noski, informazio hau ez da batere zuzena. 1985ean Hinaultek irabazi zuen Tourra. Hau izan zen Tourra irabazten azken frantziarra. AS-eko J.Leiva kazetariak hanka sartu du eta oraindik zuzenketa egin gabe jarraitzen du nahiz eta artikuluaren iruzkinetan jakin arazi dieten (7etan argitaratutako artikulua da). Kazetaritzaren herrialdeen arteko sailkapen bat egin beharko bagenu, non jarriko beharko genuke Espainia?

Argazkia: AS.com