Kategoria Artxiboak:Txirrindularitza

Gaurko honetan ez naiz arituko ez etapa irabazleari buruz, ez Giroa irabazi dezaketenei buruz, ez ibilbideari buruz… gaurko honetan Bettini “Kilkerra” handiari buruzko pare bat hitz egin nahi nituzke.

Nahiz eta gero eta gehiago diren Puerto Operazioan “Pepito” gaitzizenaren atzean dagoen txirrindularia dela esaten duten ahotsak, txirrindulari honen azken urteetako ekarpenek berarenganako miresmena bakarrik ekar diezaioke txirrindulari zale orori. Ia edozein klasiko (agian Paris-Roubaix salbu) irabazteko gai den txirrindulari honi, munduko sprinterren aurrean borroka egitea tokatzen zaionean ere hor aurrean izaten da. Ikaragarria da McEwen edo Petacchi bezalako sprinter petoekin buruz-buru iharduteko ahalmena izatea.

Ea berarentzako aproposagoak diren etaparen batean eskuak igota ikusteko moduan garen. Frascatin amaitzen den etapak aproposa ematen du, profilaren arabera behintzat.

Txirrindulari honek sortzen duen miresmena, Tropela.net eko kinieletan era ikus daiteke, %70ak baino gehiagok aukeratu baitute berau.

Hilaren 12an hasiko da Italiako Giro famatua. Noski, Tropelean ere lehiaketa izango da aurten ere lasterketa honen inguruan. Beraz, adi!!

Baina Giroaren bezperatan, beste italiar bat dugu albiste: Ivan Basso. Iaz Puerto Operazioak eraginda Tourretik alboratua izan eta gero, atzo taldea uztea erabaki zuen italiarrak. Baina zergatik orain? Zer gertatu da?

Italiako Komite Olinpikoak kasua artxibatzea erabaki bazuen ere iazko urrian, orain azken egunetako berrien ostean, gehiago argitzeko erabakia hartu du. Ullrich alemaniarrari bezala, ADN froga bat egitea eskatu zaio Bassori. Ullrich talde gabe geratu zen eta Bassok taldea utzi du bere kabuz. Bihar joango omen da azalpenak ematera erakundeen aurrera. Badirudi alemaniarraren kasuan prozesua azkarrago joan zela eta ondorioak lehenago pairatu zituela; Bassori, berriz, orain etorri zaio ordaina. Bazen garaia!!

Kontuak kontu, badirudi beste 47 txirrindulariren izenak badirela Puerto Operazioaren txostenen batetan. Noiz agertuko dira? Giroa hastear denean? Tourrean?

Apirila hasieran Belgikako harbide eta Euskal Herriko mendietan ibili dira Pro Tour mailako zein beste kategoria bateko txirrindulariak. Orain “infernuak” atzean utzi eta beste ezaugarri batzuk dituzten klasikoak izango dituzte gainditzeko hilabetea amaitu bitarte: mendixka edo muino gogorrez osaturiko egun bakarreko lasterketa luzeak. Hori bai, Benelux delakotik ez dira aldenduko. Honela, infernuak igandean izango du jarraipena Herbeheretako Amstel Gold Race klasikoan.

Argazkilaria: “Fotoreporter Sirotti”

Garagardo izena duen lasterketa honek bere 42. edizioa egingo du, geroz eta gehiago azpimarratuz klasiko deitura nondik datorkion. Berbera izango da aipatutako ibilbidearen erabateko aldaketa ekarriko duen lehenengoa. Protagonisten artean ere orain agertu ez diren izen ezberdinak nabarmenduko dira. Ezaugarri ezberdinak dituztenak. Herbeheretako probaren ostean etorriko dira Flèche Wallonne (apirilak 25) eta Liège-Bastogne-Liège (apirilak 19) probak hilabeteari modu gogorrean amaiera emateko. Baten batek ere pentsa dezake honela txirrindulariek aspertzeko betarik izango ez dutela. Ikusleok ere ederki probestuko dugu muinoetan emango den ikuskizuna, baldin eta lehia aurreko urteetan bezain estua izaten bada.

Continue reading “Amstel Gold Race 2007, garagardoaren klasika”

Oraindik zale askoren begiak Euskal Herriko Itzulian badira ere, igande honetan urteko probarik ikusgarrienetakoa korritzen da, Paris – Roubaix, txirrindularitzako 5 monumentuetako bat. Ez dugu euskaldunik bertan postu onik lortzeko moduan, baina ziur naiz txirrindularitza zale den oro proba hau ikusteko zain izango dela.

Espezialistentzako proba dugu hau. Bertan ez da erraza edozeinek karrera hau amaitzea, zer esanik ez beraz, ondo amaitzeko orduan edo podiumean sartzerako orduan. Beti esaten dute, proba honek aurreneko alditik maitemindu egiten zaituela… edo gorrotatu eta gehiago ez duzula korritzen. Continue reading “Paris – Roubaix 2007”

Duela egun gutxi esan nuen bezala, pertsonalki, urteko txirrindulari denboraldiko zatirik ederrenera iritsi garela uste dut. Askok bestelakoa esaten badidate ere, ez dut uste Tourreko mendiko etaparik gogorrenean ere zenbait klasikotan gozatu daitekeen ikuskizunaz gozatzeko moduan izango nintzatekeenik. Zer egingo diogu bada? itzuli handiena baino, klasikoen zaleagoa naiz, aukera baldin badut, itzuli handietako etaparik galtzen ez badut ere.

Aurreko astetik hasita (Milano-San Remotik nahi baduzue, beste klasiko mota bat baldin bada ere) klasiko ikusgarriak hasi dira, hala nola, E3 Harelbeke, Boonenek 4. urtez jarraian irabazi du, Van Looyren marka berdinduz, edo Flecha Brabancona, bertan Freire hirugarren urtez jarraian gailendu delarik. Klasiko hauetan ikusi denak, batez ere E3 Harelbeken, igandean bere jarraipena izan dezake. Hala izan du, behintzat, aurreko urteetan. Eta zer ikusi da bertan? bada azken urteetako berdinak dabiltzala jo eta su, gazte batzuren baimenarekin.

Egun gutxiren buruan UCI ProTourreko puntu asko banatuko dira, Euskal Herriko Itzuliaz gain, Flandriako Tourra, Paris- Roubaix, Gante- Wevelgem, Fleche Valonne, Liege-Bastogne- Liege eta Amstel Gold Race korrituko baitira. Bi zati nabarmendu daitezke klasikoen zati honetan, orokorrean esanda, “Harrizaleena” eta “Itzuli handietakoak”. Milano-San Remoren ondoren, belgikako proba ikusgarrien ordua da. Momentuz, “harrizaleetara” mugatuko dugu textua, besteentzat tartea izango baitugu hemendik egun batzutara. Continue reading “Flandriako Tourra 07”