Kategoria Artxiboak:Txirrindularitza

Egun batzuk besterik ez da falta lagun askoren urteko hitzordu garrantzitsuenerako: 205 kilometro aurretik, eta lau mendate.

-Somport: Sabiñanigotik Jacara arteko urduritasunak-eta atzean uzteko, portu eramangarri baina luzea. Malda handirik ez, baina ez da komeni dena ematea, hura igo eta oraindik 150 kilometro gelditzen dira-eta.

-Marie-Blanque: hura igotzen hasi orduko, 100 kilometro hanketan. Zer esan mendate horretaz… Hamar kilometro luze, eta azken laurak izugarriak, malda %10-%12 inguruan, konstante, atsedenik ez… Proba guztiko malda gogorrenak, eta partaide gehienak gorputza alde batera eta bestera mugitzen, garapen txikienarekin: plater bi eramanda, atzean 28ko hortza; plater bi baina compacta eramanda, atzean 25arekin nahiko; hiru plater eramanda, arinago. Hori bai, mendatea pasatu eta berehala jan eta edan postuak daude, beharrezkoak.

-Portalet: iritsi gara momentu erabakigarrienera. 29 kilometroko igoera eta %4ko batze bestekoa. Ba, malda handirik ez! Hori pentsatuko dute askok, baina errealitatea oso bestelakoa da. Izan ere, datu batzuk: ordurako 127 kilometro hanketan; eguerdi aldera igotzen denez mendatea, bero izugarria, benetan, eta azkeneko kilometroetan itzalik ez; aurretik egindako esfortzua ondo neurtu den edo ez, zeru edo infernu bilaka daiteke… Continue reading “Quebrantahuesos 2007, zapatuan”

Iaz Puerto Operazioan bere izena azaldu zen. CONIk, behar besteko frogarik ez zela eta, kasua artxibatzea erabaki zuen baina datu gehiago baleudeke, berriro ere kasuarekin jarraitzeko aukera gorde zuen. Eta halaxe izan da.

Tirabira nahaspilatsu hartan, Bassok erruduntasuna aitortu zuen eta bere kolaborazioagatik zigorra jaistea eskatu zuen. Beharbada bere kolaborazioa ez da behar bestekoa izan, beharbada zigortzaileek gupidagabe jokatzea erabaki dute. Kontuak kontu, 24 hilabetez txirrindularitza profesionalean aritu ezinda baztertuko dute. Ullrichek bezala Bassok ere txirrindularitza utziko al du? Azaroan 30 urte beteko ditu eta ez dakit ba…

Tourra ere badator. Bai, tamalez Puerto Operazioak ere bere partaidetza nabarmendu nahiko du aurtengo edizioan ere. Seguru txirrindulariren bat edo eta talde oso bat kanporatua izango dela, beti ere zurrumurruei kasu egin ezkero. Beraz, adi ibil zaitezte hurrengo egunetan Tropela zaleok zuen kinielak egiterako garaian!

Euskal Bizikletaren ostean, emakumeei dagokie euskal errepideetan barrena bizikleta gainean aritzea. Bihar hasiko da Emakumeen Bira. 5 egunetan zehar hogei talde eta 120 txirrindulari inguru izango dira lehiaketan. Euskal ordezkaritzan Bizkaia Panda Software talde bizkaitarra izango da.

Aurtengoan Eneritz Iturriagak ez du parte hartuko, jakingo duzuen bezala gaixo izan baita orain hilabete inguru arte eta ez dago sasoi betean. Dirudienez bere helburua Italiako Giroan parte hartzea da. Ia bere maila lortzen duen eta Italian garaipenen bat eskuratzeko gai den. Gure animorik beroenak Eneritzi!

Iazko garaile izan zen Svetlana Bubnenkova Fenis-Colnago taldeko txirrindulari errusiarra era bertan izango da eta seguru aurtengoan iazkoa errepikatzeko gogoz izango dela.

Bihar Iurretan 4,3 kmtako erlojupekoa jokatuko da arratsaldeko seietatik hasita. Bigarren etapa Elorrio-Elorrio izango da, hirugarrena Eibar-Eibar, laugarrena bi sektoretan banatua, Urduña-Urduña 13,6 kmtako erlojupekoa goizean eta arratsaldean Urduñatik Bilborako lasterketa. Igandean eguerdiko ordubata aldera amaituko da Bilbotik Iurretarako bidea egin ostean.

Zorterik hoberena opa diegu gure ordezkari euskaldunei!

Aketza Peñak giroa bertan behera utzi behar izan du ustez apirilaren 24ean jokatu zen Trentinoko Giroko lehen etapan nandrolona sustantzia kontsumitu baitzuen. Hala jakinarazi die UCIk Galdeano eta Madariaga Euskaltel-Euskadiko arduradunei.

Dirudienez ezusteko gernu azterketa batetan onartutakoa baino balio altuagoak neurtu dituzte, oraindik balio hau jakitera eman ez arren. Horrelako kasuetan taldeek egin ohi duten bezala, Italiako Giroa korritzen ari zen txirrindularia lasterketatik alboratu dute eta etxera bidean jarri dute lehenbailehen azalpenak eman ditzan.

Hilabete eskas falta da Frantziako Tourra hasteko eta horrelako kasuek ez diote mesederik egingo ez Euskaltel-Euskadi taldeari, ez beste edozein talderi ere. Hala ere ez dut uste hau kasu bakarra izango denik, eta seguru naiz gehiago ere izango direla. Oraindik Tourra hasteko tarte honetan askorako dago; gogoratu bestela iaz ze saltsa izan zen! Aurtengoa lasaiagoa izango al da? Zoritxarrez ezezkoan nago.

Datorren igandean, ekainak 3, Euskal Herriko beste txirrindularitza proba bat izango dugu Laudion. Txirrindulari profesionalentzat Araban egiten den proba bakarra da eta aurtengoa ere ongi prestatuta dute antolatzaileek. Laudio Sari Nagusiaren 58. ekitaldian ehun bat txirrindularik parte hartzea espero da eta irteera eta helmuga Laudion bertan izango ditu.

Ibilbideko oztopo nagusiak Makuartu eta Garateko gainak dira eta azken honek lasterketako irabazlea erabaki dezake, Laudioko helmugatik 5 kilometrotara baitago.

Ea euskal txirrindulariren batek beste garaipen bat lortzen duen hilabete hau nahiko oparoa izaten ari baita euskal garaipenei dagokienez (Koldo Gil, Mikel Gaztañaga, Igor Anton eta Pablo Urtasun). Informazio gehiago izateko Euskal Txirrindulariak atala begiratu dezakezue.