Tropela Hondartzan

Tropela Hondartzan 2015Urte batzuetan zehar buruan bueltaka ibili ondoren, Tropela saretik hondartzara jaisteko urratsa emango dugu. Honela, gure hondartzetan galtzeko zorian den ziklistatxoen eta kaniken jokoa berreskuratzeko ekimen baten berri eman nahi dizuegu.

Honela, irailaren 13an Zarauzko pasealekuan Tropela Hondartzan izena jarri diogun ekitaldia antolatu dugu. Igande goiz eder bat pasatzeko bi osagai desberdin izango ditugu bertatik bertara:

Tropela Hondartzan 2015ZIKLISTATXOEN TXAPELKETA

Batetik, hondarretan, hainbat zirkuitu egin eta zirkuitu hauetan kaniken laguntzaz ziklistatxoen lasterketak egingo ditugu. Txapelketa taldeka izango da eta azkarrenentzat sariak izango dira. Azkarrenarentzat bakarrik ez, zirkuiturik dotoreena egiten dutenentzat, ziklistatxorik eleganteenarentzat, kiroltasunaren saria eta beste hainbat sorpresa! Parte hartzekoak bazarete, txapelketaren antolaketa errazteko komenigarria da izen-emate orri hau beteko bazenute. Ez dugu araudi zorrotzik jarriko eta ez gara epaile lanetan jarriko baina irizpide batzuk zehazte aldera jokoaren araudi txiki bat idatzi dugu.

VINTAGE ERAKUSKETA

Bestetik, pasealekuan bertan, lehengo txirrindularitzaren erakusleiho moduan erakusketa bat jarriko dugu. Bertan, izango dira Jorgek eskuz pintatutako ziklistatxoak, Urtekariaren bildumako kromo eta aldizkariak, Iñaki Lakarraren bildumako ur-potoak, Libros de Rutaren libururik berexienak, Juan Mari Tolinen argazkiak eta abar luze bat. Guzti hau musikarekin goxatuz eta lagun giro eder batean egingo dugu.

Tropela Hondartzan 2015A! Bertan erakusteko moduko ziklistatxoak, kromoak, argazkiak edota beste bitxikeriaren bat baduzu, gustura egingo dizugu tokia azokatxoan.

Beraz, gogoratu: Irailaren 13an, igandearekin, zita bat duzu Zarauzko malekoian.
Zatoz eta animatu zure ingurukoak. Bertan ikusiko dugu elkar!

Eta ez ahaztu trasteroan gordeta egon daitezkeen ziklistatxoak eta kanikak ekartzea!

JOKOAREN ARAUDIA

IZENA EMATEKO INPRIMAKIA

Laboral Kutxa Saria Vueltan ere bai!!

Laboral Kutxa Saria Vuelta 2015Bihar abiatuko da Espainiako Vuelta, denboraldiko azken itzuli handia. Lehiaketa honek ere Laboral Kutxa Saria sailkapena izango du.

Gogoratu behin kiniela egin eta gero izena ematea beharrezko izango duzuela Orbea bizikleta, erosketa bonu, akzio kamerak,… sarietakoren bat eskuratu nahi baduzue. Ez galdu aukera!!

Gure aldetik Laboral Kutxari beste behin ere eskerrak ematea dagokigu Tropelaren proiektuari ematen dion babesagatik, izan ere babestutako sailkapenez gain, berriki kaleratu dugun Tropelaren APP berriaren babesle baita.

Zorte on guztioi!!

Tourrean ere Laboral Kutxa Saria!

Laboral Kutxa babestutako sailkapenaLarunbatean Frantziako Tourra abiatuko da, denboraldiko lasterketarik garrantzitsuena. Iaz estrenekoz izan genuen moduan, aurten ere Laboral Kutxa Saria sailkapena izango dugu.

Gogoratu behin kiniela egin eta gero izena ematea beharrezko izango duzuela Orbea bizikleta, erosketa bonu, maillot, akzio kamerak,… sarietakoren bat eskuratu nahi baduzue. Ez galdu aukera!!

Gure aldetik Laboral Kutxari beste behin ere eskerrak ematea dagokigu Tropelaren proiektuari ematen dion babesagatik, izan ere babestutako sailkapenez gain, berriki kaleratu dugun Tropelaren APP berriaren babesle baita.

Zorte on guztioi!!

Tropela APP-a hemen da!!!

tropela app

tropela appAzkenean bai, hemen duzue Tropelaren APP berria, bai Android bai iPhone gailuetarako ere!!!

Aspalditik genbiltzan Tropelaren mugikorretarako APP-a garatu eta argitaratzeko gogoz eta asmoz, baina ez da posible izan gaur arte. Buru belarri aritu gara lanean eta honatx emaitza. Bazen ordua, ezta? Guk ere hori uste dugu :-)

APP-ak babesle nagusi bat du, Laboral Kutxa hain zuzen ere. Dakizuen moduan, iaztik Laboral Kutxa Tropelarekin elkarlanean ari da gure proiektuarekin bat egin eta aurrera egiten laguntzen. Aurten Euskal Herriko Itzulian, Italiako Giroan eta orain Frantziako Tourreko lehiaketan Laboral Kutxaren babestutako sailkapena izango dugu. Baina horrez gain, APP-aren babesle nagusia da. Gure eskerrik beroenak Laboral Kutxari gugan jartzen ari den konfiantza guztiagatik!

APP-aren bertsio hau lehen pausua da eta ibilbidea hasi besterik ez du egin. Konponketak (seguru zuzendu beharreko gauzak ditugula!) eta hobekuntzak etorriko dira, ideia asko baititugu eta denak ezin ba batera gauzatu!

Eta prezioa? DOAN!!!! Bai, guztiok erabili ahal izango duzue zuen mugikorretan eta Luxuzko Gregario bazarete funtzionalitate gehiago izango dituzue.

Zeren zain zaudete APP-a zuen mugikorretan instalatzeko? Edozein iradokizun, komentario,… idatzi lasai edo bidali emailez nahiz Facebook edo Twitter bidez eta kontutan izango ditugu, orain arte jaso ditugun guztiak kontutan izan ditugun moduan.

On egin!

 

tropela appstore

tropela google playstore

Tropela denda ireki dugu!

Tropela dendaTropela ezagutzen duzuenok badakizue ez dela gauza berria maillot, txapela edota kamisetak saltzen dituguna, baina beti faltan bota izan dugu salerosketarako modu egoki bat. Azkenean atal berri batean denda sortzea erabaki dugu eta jada irekita duzue!

Gainera denda estreinatzeko produktu berriak ditugu, batez ere orain domeinu berria dugulako, tropela.eus. Hauek dituzue:

tropela.eus ekipamendu berria, maillot eta kuloteak. Aurreko diseinuaren hariari jarraituz, diseinu berri bat egitea egokia zela pentsatu genuen. Espero dugu gustuko izango duzuela.

tropela.eus txapelak.

Luxuzko Gregarioen bidoiak.

– kamisetak, gizon nahiz emakumezkoentzat.

Lehendik genituen produktuak beherapenekin aurkitzen dira. Gainera, Luxuzko Gregario bazarete, deskontu gehigarriak izan ditzakezue, * ikurrarekin aurkitzen diren produktuak hain zuzen ere.

Espero dugu denda gustuko izango duzuela eta batez ere produktuak. Gogoan izan salmenten irabaziak Tropelaren proiektuak aurrera egiteko erabiliko direla, beraz, ez izan zalantzarik eta animatu zure eskaria egitera!