Lehiaketak – 234 orrialdea – Tropela.eus bloga

Vuelta erabakita?

Hor nonbait. Egia da egun asko geratzen direla oraindik eta edozein ezusteko izan dezakegula (kirol arlokoa edo ez) baina Vueltan izan diren 3 etapa garrantzitsuenetan, Lagos, erlojupekoa eta Cerler, nahiko izan dira Menchovek besteengan duen nagusitasun osoa erakusteko. Gauzak asko okertu beharko zaizkio Madriden urrezko maillotarekin ez ikusteko.

Izan ere, egun asko geratu izanagatik ez dago inongo gogortasunik denborarik sartzeko. Arcalisko etapa, Monachil igo behar duteneko etapa eta Abantos etortzen zaizkik burura, berauek ere inongo gogortasun berezirik ez dutenak. Vuelta hasieran nioen bezalaxe aurtengo ibilbidea lotsagarria dela esaten jarraitzen dut. Vueltako bi etapa garrantzitsuenetako errepide baztarretan ikusi den jende kopuru urriak proba hau aldapa behera doala frogatu besterik ez dute egiten. Niri lotsagarria iruditzen zait, benetan. Egia da ibilbide gogorragoa izan balitz errusiarrak oraindik denbora tarte handiagoak izango lituzkeela, hala ere, beste txirrindulariek denbora tarte horiek errekuperatzeko aukerak eman behar zaizkie eta aurtengo Vuelta honetan ez dituzte aukera horiek soberan izango.

Esprinterren ordua?

Bai, bai, Freire, Bennati eta Bettini ere esprinterrak dira, baina beste batzuez ari naiz, izen handia duten lagun biz hain zuzen esprinter puruagoak agian; izan ere, non daude Petacchi eta Boonen?

Bada, gaur eta bihar dute, nire ustez, azken aukera Espainiako Itzulian zerbait egiteko. Argi dago ez daudela sasoian; ez, behintzat, aipatu ditudan hiru horien parean. Era berean, Duque eta Gilbert egiten ari diren lana ere azpimarragarria da.

Baina beste batzuek ere agertu beharko dute egun bi hauetan, ze bestela jai izango dute aurrerago: Greipel, Usov, Chicchi, Clerc, Furlan…

Nork irabaziko du gaur? Eta bihar? Etapa antzekoak biak ere, esprinterrentzat egokiak. Boonenek eta Petacchik ezustekorik emango dute? Nik ezetz diot. Egin apustu.

Hautagaien ordua

Azkar datorkigu aurten Espainiako Vueltako aurreneko etapa garrantzitsua. Asturiasen egin daitezkeen mendiko ibilbide ikusgarriekin ahaztu eta azken mendaterarte erraza izango den ibilbide bategatik egin dute apostu, helmuga Lagos de Covadonga izango delarik. Garai batean erabakigarria zen arren orain segundutxo batzuen aldea lortzeko besterik ez da izaten, nahiz eta Vueltan segundutxo horiek zeharo garrantzitsuak izaten diren, eta agian aurten sekula baina gehiago.

Proba hasi aurretik aipatzen ziren izen nagusiak bihar agertu beharrean dira, biharkoaz gain datozen 7 egunetan baitaude etapa garrantzitsuenak eta bihar aurrean agertu ezean Vuelta egun gutxiren barruan gal dezakenaren seinale izan baitaiteke txirrindulariarentzat.

Gomez Marchante, Sastre, Menchov, Pereiro, Samuel, Devolder, Brajkovic, Lopez, Piepoli… hauen ordua iritsi da. Bihar etapa Gomez Marchante bezalako txirrindulari batentzat aproposa izan daitekeela uste dut. Aldiz, askok faboritoen artean jartzen duten Cadel Evansek huts egin dezakeela uste dut. Egia da gaurko amaiera gogortxoan aurrean izan dugula baina harritu egingo nintzateke bihar aurreneko taldeak ikusiko banu australiarra.

Ziurrenik biharko etapa garaileak lidertza ere har dezake, arrazoi bikoitza beraz erasoaldi baten ondorioz etapa irabazteko ahalegin indartsuagoak ikusteko.

Espainiako Vuelta, urteko 3. “itzuli handia”?

Larunbatean martxan jarriko da 3 astetan lehiatzen den azken proba. “Itzuli Handiak” bezala ezagutzen dira Italiako Giroa, Frantziako Tourra eta Espainiako Vuelta. Hala ere, azken urteetan Espainiako Vueltak garrantzia apur bat galtzen ari dela garbi dut eta horren erru handia ibilbideek dute. Egia da azken urteetan edizio bat edo bestek “aprobatu” duela baina oso ibilbide eskasak nagusi izan ditugula esatean ez dut uste errurik egiten dudanik. Eta aurtengoa, agian, aspaldian lasterketa bat prestatzerako orduan egin den ibilbiderik negargarriena dela deritzot. Ez dago goi mailako mendirik, “media montaña“ko etapa gutxi, etapa labur asko… penagarria iruditzen zait. Espainiako Itzuliak hobetzeko asko duela iruditzen zait eta horien artea ibilbidearen arazoa dago. Ibilbideaz gain fetxak eta zaleen falta (penagarria izaten da zenbait mendiko etapetan izaten den zale kopuru txikia) ere gabezia handiak dira munduko 3. itzuli garrantzitsuena kontsideratuta dagoen batentzat.

Momentuz partehartzeak esku bat botatzen dio itzuliari, bertan Evans, Menchov, Cunego, Sastre, Marchante, Samuel, Rebellin, Bettini, Boonen, Freire, Zabel, Petacchi, Bennati… ikusteko moduan izango baikara, nahiz eta batzuk begiak Munduko Txapelketetan gehiago izan dituzten.

Azken urteetan Alemaniako Tourra indar handia hartzen ari da eta ez nintzateke batere harrituko urte gutxiren barruan momentu honetan Espainiako Itzuliak duen lekuan jarriko balitz.

Proba honetan interesa duten orok espabilatu beharko du, itzuli hau gainbeheran dela ematen baitu. Zenbait aldaketek mesede handia egin diezaiokete Vueltari baina ez dut ikusten aldaketa horien berririk. Zer deritzozue?

Frantziako Tourreko izen batzuk

Amaitu da aurtengo Tourra ere! azken egunetan kirol arlotik kanpoko berriek indar handiagoa izan badute ere, Tour ikusgarri eta erakargarria ikusi dugunaren sentsazioa geratu zait. Urte osoa proba honi begira egoten den txirrindulari asko da tropelean eta horietako oso gutxik aurkitzen dute saria bertan. Beste askok suspentso handi batekin bueltatu behar izaten dute etxera, iraileko azterketetan (Espainiako Itzulia, Mundialak, Lombardia…) aprobatzeko asmoarekin. Hona hemen onerako edo txarrerako protagonista izen direnen laburpentxo bat.

Alberto Contador : 24 urteko gazte honek, Tourreko bere bigarren partehartzean irabazteko gai izan da. Aspaldidanik esaten zen Tourreko irabazle izan zitekeela, neuk behintzat hain azkar lortuko ez zuela pentsatzen banuen ere. Errepidean bera baino hobeago bat izan arren, Rasmussen, maillot horia Pinto aldera ekartzeko moduan izan da. Aurten gainera denboraldi hasiera bikaina egin ondoren hemendik aurrera deskantsatzeko ordua iritsi zaiola uste dut.

Michael Rasmussen: errepideko gizonik indartsuena izan arren, bere taldeak kanporatu zuen Tourra prestatzeko egunetan bere egoerari buruzko gezurrak esateagatik. Golpe handia izango zen berarentzat, ikusiko dugu burua altxatu, talde berri bat aurkitu eta bere mailara itzultzeko gai den.

Euskaldunak: Euskaltel Euskadikoak orokorrean oso ondo, Zubeldia eta Astarloza 10 aurrenekoetan eta ihesaldietan protagonista Ruben Perez, Txurruka, Verdugo eta Landaluzerekin. Mayo Alpeetan oso ondo baina Tour amaierako berriak dena hankaz gora botatzen du. Vilak eskutuan pasa ditu 3 asteak baina eraman duen denboraldiarekin ni behintzat ez nago gehiago eskatzeko. Garaterengandik gehiago espero nuen, puntu bat edo bi falta izan zaizkio onenekin ibiltzeko.

Fabian Cancellara: Aurreneko asteko protagonista nagusia. Prologoan eta Compiegnen lortutako garaipenak ikusgarriak. Txirrindularitzan ikusten diren erakustaldien parte handi bat suitzar honek ematen ditu.

Yaroslav Popovych: oso gutxi irakurri dut ukrainiarrari buruz baina Tourreko protagonista handi eta garrantzitsua izan dugu. Bere taldeburuentzako sekulako lana egin ondoren (tropela txiki-txiki eginda uzten zuen tiraka hasten zenean) sailkapen nagusian 8. amaitzeko gai izan da. Talde lanerako munduan dagoen txirrindulari onena dela esatearekin ez dut uste errurik egingo nukeenik.

Sprinterrak: ez da dominatzaile garbirik izan. Horren lekuko McEwen, Boonen, Hushovd, Bennati eta Hunterren garaipenak.

Ibilbidea: beti bezala Tourra gogorra izan da eta horretan ibilbideak lagundu du, nahiz eta txirrindulariek ez dituzten aprobetxatu hain ondo kokatuta zeuden Cormet de Roseland, Bales edo Aubisqueko etapa osoa. Ibilbide zoragarria zuten baina txirrindulariek nahi ezean antolakuntzak ezin du ezer gehiago egin.

Aprobatu ez dutenak: nik uste nuenera gerturatu ez direnen zerrenda honako hau da. Pereiro, Karpets, Valverde, Eisel, Cavendish, Zabriskie, Moreau, Anton, Schumacher, Kohl, Ventoso. Noski, batzuk gehiago agertu dira baina ez dut uste euren helburuak lortuta bueltatu direnik etxera.

Vinokourov, Moreni, Sinkewitz eta Mayo: Tour honetako berririk txarrenak (edo onenak, nondik begiratzen den arabera). Sekula ez nituen konpartitu Tourreko antolakuntzak bere probarekiko izaten zuen “garbi ” hotsa. Kasu hauek hori erakusten dute. Zer egin behar denaren eztabaida denen artekoa izan behar da baina zerbait egin beharra garbi ikusten da.

Asko izango dira jadanik datorren urtera begira hasiko direnak baina aurrez lan asko egitea tokatuko zaie. Hurrengo zita Espainiako Itzulia. Joan prestatzen zuen kinielak, ezustekoak eta abarrak, Tropelako lehiaketa berriro martxan izango baita.