Kategoria Artxiboak:Lehiaketak

Vaitkus ez da gaurko etapan irtengo, Hushovdek min handia du nerbio ziatikoan, Bennatik ez du saihetsik hautsita eta irtengo da, Cancellara liderrak kolpea du eskumuturrean eta irtengo da, Ventoso, Hoste, Fred Rodriguez… Eta Cavendish gaztearena ere marka da gero… Lehenengo etapan erori eta atzo ere sekulako kolpea hartu zuen (telebistako irudi ikusgarrietan argi ikusi zen).

Eta bitartean, Steegmans. Aurten, hiru garaipenekin zen, eta ez nolanahikoak: Algarven, Haselbacher, Vaitkus eta Petacchi garaitu zituen; La Pannen, Bennati, Balducci Pollack, Brown eta beste batzuk; eta Dunkerken ere irabazi zuen.

Eta atzo, Boonen maisua bigarren utzi zuen. Ez da edozein, ba, Steegmans.

Gaur etapa luzea dute, eta esprinta izango da, ziurrenik. Ea, bada, nola erantzuten duten atzo erori zirenek. Bestela, betikoa izango dugu: McEwen, Boonen…

Azken urteetan Frantziako Tourrean sprinterrik onena izan dela uste dut inork ez duela zalantzan jartzen. Maillot berdea ez du beti irabazi izan baina esprintetan besteek baino martxa bat gehiago duela erakutsi izan du. Eta aurtengoan ere bide berdinetik dioala dirudi… atzoko erorikoak besterik esaten ez badigu behintzat.

Azkenengo zuzengunean erritmo aldaketa egin zuenean denak gurpiletik aterata irabazi zuen, nagusitasun osoaren seinale. Nahiz eta Hushovd edo Boonen bezalako txirrindularik han ziren, ez zuten irabazteko inongo aukerarik izan. Eta hori guzti kilometro gutxi aurretik izan zuen erorikoaren ondoren.

Ikusiko dugu gaurko honetan ere australiarra dugun nagusi edo atzo agertu ez ziren Bennati, Napolitano, Cavendish edo Zabelek, Hushovd, Boonen eta Freirerekin batera ezustekoan harrapatzeko moduan diren.

Tropelako lehiaketan oso gutxik hartu duten Murilo Fischerrek puntuak ematen jarraituko duela uste dut. Bere puntuak garrantzitsuak izan daitezke aurrean dabiltzan taldeentzat.

Larunbatean gertatutakoa aspaldian ikusi gabe ginan. Nola liteke hain kilometro gutxitan (7,9km) txirrindulari batek bigarrenari 13 segundu eta hirugarrenari 23 segundu ateratzea? ez da ulertu erraza, hala ere Cancellara tartean denean edozer espero daiteke. Nik neuk oraindik ahoa zabalik jarraitzen dut emandako ikuskizunarekin.

Erlojupeko motzetan areriorik ez duela erakutsi du, ez eta gerturatzen zaionik ere. Suitzako Tourrean aurreneko erakustaldia eman zigun eta Frantziako Tourrean hori berretsi besterik ez digu egin. Tourrean geratzen zaizkion helburuak beste pare bat egunetan lidertza mantentzea eta erlojupeko luzeetan ere bere maila erakustea izango da. Duela urte batzutik honutz asko hobetu da erlojupeko luzeetan (urrutira joan gabe hor dugu azken munduko txapelketan egin zuen sarraskia), hala ere prologoan baino arerio gehiago izan behar lituzke, batez ere, esaten duten bezala aurreneko erlojupekoak bere gogortasuna baldin badu. Vinokourov, Kloden, Zabriskie eta bestelakoen aurka lan handiak izan behar lituzke, baina Cancellara tartean denean eta erlojupekoa denean, nik suitzarraren kontrako apusturik ez nuke onartuko badaezpada. Jadanik kuriositatez nago aurreneko erlojupekoan zer egingo duen jakiteko.

Azkenean sartu ditugu emaitzak! Ez da lan erraza izan erabiltzaileak aztertzea eta erabakitzea onargarriak ziren ala ez. Kasu batzutan zalantza asko izan ditugu eta erabakirik zuzenena hartu beharra genuen. Arauak garbi jarri genituen eta hauek betetzea izan dugu helburu. Izan ere doako lehiaketa da eta guztiok aukera berdinak izatea nahi dugu.

Aztertu ditugu erabiltzaile guztiak eta ezabaketen ondoren 6.269 kiniela ditugu lehiaketan. Emaitzak ere sartu ditugu jada. Badakigu asko zinetela gogo biziz atzoko eta gaurko emaitzak jakiteko. Lasai, geu ere bai.

Atzoko sarrerako etapan ijito ordiziarra izan genuen garaile. Beretzat izango da Eneritz Iturriagaren maillota eta 3 ardo botila. Bigarrena aupahorner hernaniarra izan da eta berarentzat Argiaren mahai jokoan. Gaurko etapan lehen bi sailkatuak amatio eta aupagu bi emakumezko beasaindar izan dira. amatiok Mikel Gaztañagaren maillota irabazi du.

Zorionak guztioi eta zorterik onena opa dizuegu! Hau hasi besterik ez da egin!

Erabiltzaile eta kiniela kopuru handia dela eta guztiei errepaso bat ematea denbora dezente joko duenez, gaurko prologoko emaitzak eta sailkapenak bihar eguerdian jarriko ditugu. Tropelako lehiaketako arauak jarraituz, datu faltsuak dituztenak eta kiniela bat baino gehiago egin dituzten erabiltzaileak aztertu eta parte har dezaketen ala ez erabakiko da.

Barkatu eragozpenak.

Tropela Elkartea