Hilabetekako Artxiboak:urria 2009

Zerua zainetan dutela

Laborategiko odolaBagenekien dopinari muga jartzea zail izango zela. Azken ikerketa polizialen arabera, egungo dopin kontrol guztiak saihesteko balio duen teknikaren berri bat ezagutu dugu: ozonoa zainetan sartzea. Zeinek esperoko zuen dopin teknikarik hoberena zerua zainetan sartze izango zela.

Dirudienez guztia Rebellin-en positiboaren ikerketak eman du ezagutzera teknika berri hau. Dirudienez Molleta txirrindulariari, orduan Gerolsteiner taldeko taldekidea zenari, poliziek xiringa bat aurkitu zioten hortzetako pastaren edukiontzi batean. Honek Lazzaro medikuak emana zela argitu zien poliziei.

Ikertzaileek Lazzaro mediku italiar hau ikertzeari ekin zioten eta esan dutenez 15 urteko igerilari bat teknika honen bidez nola tratatzen zuen grabatuta dute. Bai igerilaria eta bere gurasoa ere ikerketa pean daude, izan ere grabaketa horretan gurasoak tratamendua aplikatu artean bertan baitzen.

Teknika berri hau “ozono terapia” bezala eman da ezagutzera. Medikuak kirolariari 200 zentimetro kubiko inguru odol ateratzen dio eta makina baten bidez ozonoaz nahasten du (O3). Behin ozonoaz nahastuta, berriro ere kirolariari txertatzen zaio. Prozesu honetan burdina ere txertatzen zaio kirolariari globulu gehiago sor ditzan, hots, gaitasun fisikoa handi dakiokeen.

Zalantzarik gabe osasuna arriskuan jartzen du teknika honek, besteak beste enbolia bat izateko arriskuak nabarmen handitzen baitira. Kontrolei dagokienez, berriz, egungo laborategi azterketen bidez ezin da antzeman hematokrito eta hemoglobina mailak konstante mantentzen baitira.

Garbi dago zer egin behar den zerura iristeko: zainetan zerua txertatu. Inork ez zaituzte antzemango eta errendimenduak estralurtar baten parekoa izango duzue. Hori bai, osasuna arriskuan jarriaz. Hurrengoa zer izango ote da.

Anton, Sicard eta Intxausti

Benat Intxaustiren aurkezpena

Gaur aurkeztu dute Beñat Intxausti Euskaltel-Euskadiko txirrindulari moduan. Fuji-Servetton aritu da aurten eta lehenago Saunier Duval eskandaluz inguratu zen taldean, beti ere Matxin arduradun zela.
Fujik jarraitzeko beste babesle bat behar zuen eta hori ere lortu berri du. Honek lanak zaildu dizkio Euskaltel-Euskadiri fitxaketa gauzatzerakoan, baina azkenean lortu du. Jakin nahiko nuke Matxinek libre uzteko eskutitzagatik zenbat jaso duen.
Postean jarri nahi nuena, ordea, ez zen hori. Gaurko prentsa aurrekoan talde laranjak proiektu berri esperantzagarriaz hitz egiteko aprobetxatu dute. Beren hitzetan, proiektu berri honen ardatz txirrindulari gazteak izango direla esan dute, Igor Anton, Romain Sicard eta Beñat Intxausti besteak beste.
Proiektu berria? Orain artekoak ez al du balio? Aurten bi dopin kasu izan direlako? Samuelek Vuelta irabazi ez duelako? Zer izango du ba ez berdin proiektu berri honek?

Bi asteren buruan Patxi Vilak zigorra beteta izango du

Patxi VilaEuskadi Irratian berriki Txetxuk Patxi Vilarekin hitz egin du. Bertan adierazi dute nola TASek testosteronaren deribatuagatik emandako positiboaren zigorra 2 urtetatik urte t’erdira jaitsi diotela. Ondorioz, zigorraren kontaketa iazko maiatzaren 5etik aurrera hasi zenez, azaroan 5etik aurrera zigorra betea izango du. Martxoan Euskadi Irratiko elkarrizketa batean errua aitortu zuen eta gaur ere hala egin du, nahiz eta “nahi gabe”ko dopina dela argudiatu zuen gaur egin duen bezala.

Argi ez dagoena da zein izan den TASek erabaki hori hartzeko arrazoia ezta ere ia Patxi Vilak UCI ProTourreko lasterketaren batean aritu daitekeen ala ez. Oraingoz Patxi Vilak esan duenez hiru kontaktu ditu eta horietatik bi ProTourrekoak omen dira. Hori bai, argi utzi du oraindik eskaintzarik ez duela eta “maillot neutroarekin” arituko dela oraingoz.

Garbi dagoena da Patxi Vilak asko sufritu duela denbora tarte honetan eta komunikabideei bere eskerrak eman dizkie berarekiko izandako jarrerarengatik. Egindakoa ordaindu du, eta orain indartsuago sentitzen omen da eta etapa berri honi ilusioz ekingo omen dio.

Dopin kasuren bat badago Eusko Jaurlaritzak dirulaguntzarik ez du emango

Miguel MadariagaHori da egungo Eusko Jaurlaritzako gobernuak plazaratu duena. Dakizuen bezala aurten amaitzen da Eusko Jaurlaritza eta Euskaltel-Euskadi taldearen artean zuten ia milioi bat eurotako hitzarmena eta berritzea tokatzen da.

Egungo gobernu berrian aurten izan diren Iñigo Landaluze eta Mikel Astarlozaren dopin auziek alarma piztu dute. Beno, gizartean bertan ere bai, eta honek diru publiko eta talde laranjaren inguruko eztabaida bizitu du Tropela.net-en ere izan den bezala. Gertaera hauen aurrean, gobernuak klausula bat gehitu nahi omen du hurrengo hitzarmenean. Klausula honen arabera Euskaltel-Euskadiko txirrindulariren batek positiboren bat emango balu automatikoki diru-laguntzak kenduko lizkioke Eusko Jaurlaritzak. Uste dut guztiok onartzen dugun ekimena dela eta beharrezkoa jazoera hauek guztiak kontutan hartzen baditugu.

Oraindik hitzak besterik ez dira, hitzarmena gauzatu aurretiko elkarrizketen inguruko adierazpenak. Ikusi beharko da azkenean zer sinatzen den, baina dagoeneko Madariagak puntu hau gehitzeko arazorik ez duela ikusten adierazi du. Bere esanetan “jendeak talde honek (Euskaltel-Euskadik) dopinaren aurka zenbat egiten duen jabetu” beharko omen luke. Hala bada, zergatik babestu du taldeak Mikel Astarloza analisi eta kontra analisiek ekaineko laginean EPO aztarnak antzeman badituzte? Kontrakoa pentsatzera eramateko frogak badituzte plazaratzeko garia badela deritzot. Gustatuko litzaidake Euskaltel-Euskadi taldeak dopinaren kontra aritzen dela sinistea, baina egun ez dut horretarako arrazoirik ikusten.

Argazkia: www.diariovasco.com

Gilbert denboraldi amaieran jaun eta jabe

Gilbert. 2009ko Lombardiako Giroan garaipenaTxirrindulari denboraldia aurtengoz atzoko Lombardiako Giroarekin amaitutzat ematen da. Tropela.net-en Munduko Txapelketarekin amaitu ziren lehiaketak, baina tartean behin zerbait argitaratzeko behar besteko informazioa izango denez, horri ekin nahi diot post honekin hurrengo lehiaketa iritsi artean.

Gaurkoan Gilbertez hitz egingo dizuet. Ikaragarria izan dira Belgikarrak azken hilabete honetan lortu dituen garaipenak: Coppa Sabatini, aurreko igandean Paris-Tours, ostegunean Piemonteko Giroa eta atzokoan Lombardiako Giroa. Zalantzarik gabe argi geratu da egun bateko lasterketatan Gilbertek zer esan asko ematen duela. Bere esanetan argalago iritsi omen da denboraldi amaierara eta horrek lanak asko erraztu omen dizkio. Taldekideen lanak ere, zalantzarik gabe, bere zerikusia izan du atzoko kasuan bezala (Lloyd eta Evansek ederki lagundu zioten). Argi geratu da horrelako lasterketatan txirrindulari gutxirekin helmugara iristen denean (atzokoan Samuel Sanchez-ekin, aurreko igandean Bozic eta Boonen-ekin) Silence-Lottoko klasikomanoak ez duela hutsik egiten.

Urte osoari begirada bat emanda, azken asteotan lortutako garaipenez gain, Giroko 20. etapan lortu zuen garaipena eta Ster Electrotoer 5 eguneko itzulia (4. etapan garaipena lortu zuen) irabazi dituela jabetuko gara.

Hurrengo denboraldiari begira jarrita, Gilbertek lehen jomuga Liège-Bastogne-Liège lasterketan omen du. Gogoan izango ditugu udaberria iristen denean Belgikarrak esandakoak.