uztaila 2009 – 5 orrialdea – Tropela.eus bloga

Zorionak guztioi! 10.000 kinielaren helburua lortu dugu!

Eskerrik asko guztioi! 10.000 kinielaren helburua lortu dugu. Zehazki 10.491 kiniela egin dira azken hiru aste hauetan 2009ko Frantziako Tourrean lehiatzeko. Orain gozatzea besterik ez zaigu geratzen. Guk gure eskuetan dagoen guztia egingo dugu hala izan dadin.

Zalantzarik gabe zifra hau zuei eskerrak izan da. Asko izan zarete, era berean, zalantzak eta izan dituzuen arazoak gainditzeko laguntza eskatu diguzuenak. Guztira 150 kontsulta inguru erantzun ditugu eta askok eskerrak eman dizkiguzue emandako laguntzagatik. Guk ere zuen laguntza ere asko estimatzen dugu eta hori Tropela.net-eko kamisetak erosiz edo donazioren bat eginez burutu dezakezuela gogorarazi nahi dizuegu. Zenbaitek bide horien bidez laguntza eman digute eta gure eskerrik beroenak eman nahi dizkizuegu. Gainontzekooi berdin egin dezakezue merezi dugula uste baduzue.

Azken urteetan egin ohi dugun bezala, erabiltzaileak errepasatzen izango gara hurrengo orduetan. Errepaso honetan erabiltzaileek Tropela.net-en arauak betetzen al dituzten ala ez egiaztatzen izango gara. Hori dela eta, errepasoa bukatu artean, ez ditugu sailkapenak eguneratuko.Â Sentitzen ditugu eragozpenak.

Ikusiko zenuten bezala, aurtengoan erabiltzailea aktibatzeko eskatu zaizue. Honen helburua zuen posta elektronikoak egiaztatzea da. Aurten sariak jaso ahal izateko erabiltzaileak aktibatuta izan behar du, beraz, ez itxaron gehiago eta aktibatu zuen erabiltzaileak lehenbailehen.

Berriro ere eskerrak eman nahi dizkizuegu gure lehiaketa 2009ko Frantziako Tourraz gozatzeko tresna gisa aukeratu izanagatik eta gure zorterik onenak guztioi!!

Boonen eta Astana hizpide bezperatan

Tom Boonen Azken unera arte Frantziako Tourrean denetarik gertatu daiteke. Orain bi urte zenbaitek gogoratuko duzue zer nolako nahastea eragin zuen Puerto Operazioak. Nahastea baino txikizioa hitza bera egokiagoa izan daiteke 2006ko Tour atari hura definitzeko.

Gaur ez noa dopina aipatzera (Dekkeren kasua adibidez), baina bai Booneni jazo zaiona. Dakizuen bezala orain aste batzuk kokainarekin positibo eman zuen berriro ere belgikarrak. Bai, iaz gizajoa Tourretik kanpo geratu zen beste kontrol batean positibo eman zuelako (festa zalea izango da eta ezin ekidin!). Hala ere, aurtengoan ez dute zigortu eta atzo, Monacon zegoela, dudako txirrindularia bazen, gaur lehiatzen utziko diotela konfirmatu dute. Iritzi bat ematekotan, Belgikako txapeldunak 2009ko Tourra lehiatzea merezi duela esango nuke ASO kontra azaldu bada ere. Honek gure kinielan aldaketak egitera bultza al gaitzake? Ez dakit, baina kontutan hartzeko txirrindularia behintzat badelakoan naiz.

2009ko Tour bezperako prentsaurrekoa: Bruyneel eta Contador Ikusmin ikaragarria eragin duena, berriz, Astana taldea izan da. Atzo non edo non irakurri nuen Contador eta Armstrong ez zirela prentsa aurrera batera agertuko eta hala izan da. Bruyneel eta Contador bakarrik agertu dira, eta oraindik ongi ulertzen ez dudan arrazoiengatik, guztioi taldeko liderra Contador dela adierazi digute. Contadorrek aste honetan adierazi du presio gehiago sentitzen duela aurten orain dela 2 urte baino eta egia esan, ez dut uste horrek onik egingo dionik. Dagoeneko mundu guztiak Tourreko faborito nagusi bezala jo izanak espainiarra urduri jarri badu, zergatik atera bezperan prentsa aurrera talde burua bera dela esanaz? Ez dakit ez ote den Bruyneelen amarruren bat gainontzeko taldeak nahasteko.

Armstrong eta Bono 2009 Tour bezperan zerbait hartzen Armstrong–Contador binomioaz hitz egiterakoan, eztabaida Contador–Leipheimer-en aldera pasa nahi izan du gogora ekarriz 2007ko Tourrean bi taldekideen arteko aldea minutua baino txikiagoa izan zela. Zein da Bruyneelen asmoa? Armstrongek egin dezakeenari garrantzia kendu eta gainontzeko taldekideen artean banatu presio hori? Badirudi Armstrongek aurten batzuk espero duguna baino gehiago egin dezakeela, eta taldeko zuzendariak ere hala pentsatzen duela. Hori da nik jaso dudan inpresioa.

Armstrong bitartean gaur lasai ibili da Bono U2ko adiskidearekin. Ez zaio presiorik nabari honi, ez?

Frantziako Tourra. Multzoen analisia (VI). Besteak

Multzo honetatik lau lagun hartu behar dira, eta badago non aukeratu; hori dela eta, hainbat izen hartu eta hiru zatitan banatuko dut nire pronostikoa: sailkapen nagusian aurrean egon daitezkeenak, esprintetan ager daitezkeenak eta etapa ehiztariak. Asko geratuko zaizkit kanpoan, baina lehiaketari begira puntuak batu ditzaketen ziklista nagusiak aipatuko ditut.

Sailkapen nagusiari begira:

Luis Leon Sanchez (CAISSE): 26 urteko espainiarra. Iaz 7. etapa irabazi zuen Tourrean. Mediterraneoko Itzulia eta Paris-Niza irabazita da aurten, eta etapa bat Tour de Haut Var-en, beste bat Paris-Nizan eta beste bat Euskal Herriko Itzulian. Multzo honetako izarra dela esango nuke, taldeko liderra, Tour ederra egiteko moduan ikusten dut, eta baita Tropelakideok ere, oraingoz %50ek hartu dute-eta. Gauza bat du kontra: orain arte, hiru asteko itzulietan ez du ezer egin sailkapen nagusian, eta hori kontuan hartzekoa da.

Linus Gerdemann (MILRAM): 27 urteko alemaniarra. Bayern-Rundfahrt Itzuliko sailkapen nagusia irabazi zuen maiatzean, baina Suitzako Itzulian ez zen fin ibili. Sailkapen nagusia lehiatzeko asmoz doa Tourrera, baina adierazi du ez dakiela ze sasoi puntutan dagoen. Lehenengo 15en artean sailkatzeko moduko ziklista da.

David Millar (GARMIN): 32 urteko eskoziarra. Dauphine Libereko sailkapen nagusian 9. izan zen, mendiko etapetan nahiko aurrean ibilita. Giroa korritu du. Horretaz aparte, ez du gauza handirik egin aurten. Oso talde indartsua dauka taldekako erlojuperako, eta, kontuan hartuta Tourrean ez dela beste urte batzuetan besteko mendate gogorrik izango, lehenengo hamarren artean sailkatzea izan lezake helburu. Hala ere, haren urte onenak pasa ziren, zigor aurrekoak. Eta Vande Velde du taldeburu.

David Arroyo (CAISSE): 29 urteko toledoarra. Giroa egin du eta 11. sailkatu da. Mendate gogorragoak behar omen Continue reading “Frantziako Tourra. Multzoen analisia (VI). Besteak”

Aurtengo Tourra sariz beteta dator!

2009ko Frantziako Tourreko sariak Tropela Elkarteak krisialdiari aurre egin nahi dio eta inoiz baino sari gehiagorekin dator aurtengoan. Sari ugari eta era guztietakoak, eta beti bezala, doan.

Sailkapen nagusirako sariak

Sailkapen nagusiari dagokionez, lehen postuentzat ondorengo sari hauek ditugu:

1. Aste buru zoragarri bat Kanariar irletan bi pertsonentzat Eroski Bidaiakek eskainita.
2. Mendiko bizikleta zoragarri bat Kirol Jokoak apustu etxeak eskainita
3. Atxaspi Hotelerako relax asteburu bat bi pertsonentzat Atxaspi Hotelak berak eskainita
4. Zarauzko Olatu Hotelean asteburu bat Olatu Hotelak berak eskainita.
5. Rezola sagardotegian 6, 4 eta 2 lagunentzako hiru otordu sagardotegiak berak eskainita
6. Hernialde Ostatuan 2 lagunentzako otordu bat ostatuak berak eskainita.
7. 2 otar zoragarri Jakionek eskainita.

Eta hau gutxi balitz, ESAITek eskainitako ekipamenduaz gain, Lance Armstrong (7 Tourren garailea) eta Alberto Contador (2007ko Tourreko garailea) txirrindularien maillotak sinatuta izango ditugu banatzeko.

Eta hau ez da guztia: zenbait eskualde eta herrietako lehen postuentzat ere sariak izango dira. Beraz adi, zure herri edo eskualdean saritua izan baitzaitezke.

*Eskualdean
1. Hitzako 5 harpidetza Behe Bidasoan, Busturialdean, Donostia-Beterri, Goierri, Lea-Artibai, Oarsoaldea, Tolosaldea eta Urola-Kosta eskualde bakoitzean.
2. Urola-Kostan 12 izozki Kutixi artisau izozkiak dendaren eskutik

*Herrietan
– Azkoitiako herrian bi pertsonentzako otordua izango da Errexil erretegiaren eskutik.
– Zarautzen 12 izozkiko saria Kutixi artisau izozkiak dendaren eskutik.

Etapa bakoitzeko sariak

Baina aurreko zerrenda hori bukaerako sailkapeneko sariak dira. Noski, orain arte bezala, egunero izango diren etapetarako sariak ditugu. Etapetan lehen postuan geratzen direnentzat euskal txirrindulariek sinatutako maillotak izango dira.

Eskualdeei dagokienez, Urola-Kostako parte hartzaileak gustura izateko moduan dira; etapetan lehen postuan sailkatuko direnek Zarauzko Kutixi artisau izozki dendak eskainita 3 izozki irabaziko dituzte. Zarauztarrek, berriz, eskualdekoaz gain, herriko lehena izateak 3 izozkiren saria ere izango du.

Ikusten duzuen bezala sari ugari ditugu 2009ko Frantziako Tourreko Tropela.net-eko lehiaketan banatzeko. Ez al duzu oraindik izenik eman?