Euskara, teknologia eta txirrindularitza
Transiziozko etapa Italiako Giroko 15. etapa hau. Espero bezala ihesaldiak bide egin du eta azken metroetan bi txirrindulari iritsi diren horretan, Campenaerts (TQA) izan da azkarrena. Sailkapen nagusian aldaketarik ez eta Bernalek (IGD) jarraitzen du buruan. Hori bai, Buchmannek (BOH) etxerako bidea hartu behar izan du eroriko baten ondorioz.
Gaurko etapak emandakoa eta biharkoak eman dezakeenaren ingurukoak bildu ditu Egoitz Lizasok (@elizaso) podcast berri honetan.
Zain ginen Zoncolaneko etapa iristeko eta iritsi da eguna. Akaso gehiago espero genuen, baina gauza batzuk argitzeko balio izan du. Alde batetik ihesaldikoen lehian nola Fortunatok (EOK), Contadorren talde gonbidatuko txirrindulariak, garaipen handia lortu duen Zoncolanen. Bestetik, hautagai nagusienei dagokionez, Bernal (IGD) indartsuena dela eta koxka bat beherago Simon Yates (BEX) dagoela ikusi da.
Atzoko etapak emandakoa eta gaurkoak eman dezakeenaren ingurukoak bildu ditu Iban Perezek (@piban) podcast berri honetan.
Ibilbideak hautagai nagusien artean denbora tarteak ateratzeko aukera eskaintzen bazuen ere, berriro ere ihesaldiak bidea egitea lortu du aurtengo Giro honetako 12. etapa honetan. Hamalau bat laguneko ihesaldia izan da, baina etapa biren artean erabaki dute: Vendrame (ACT) eta Hamilton (DSM). Azkenean azkarrena Vendrame izan da eta berak eraman du etapa. Sailkapen nagusian aldaketarik ez Solerrek (MOV) erorikoa izan eta etxerako bide hartu beharrean izan dela salbu.
Gaurko etapak eta biharkoak eman dezakeenaren ingurukoak bildu ditu Egoitz Lizasok (@elizaso) podcast berri honetan.
Sterratoko etapa izan da hamaikagarren hau. Bertan ihesaldiak behar besteko abantaila izan du etaparen lehian izateko. Bi gazte izan dira protagonista bertan, Covi (UAD) eta Schmid (TQA), non azken honek garaipena lortu duen. Sailkapen nagusian ere lehia izan da eta Bernal (IGD), liderra, guztien gainetik gailendu da.
Honen eta biharko 12. etapak eman dezakeenaren inguruan aritzen da Egoitz Lizaso (@elizaso) podcast berri honetan.
Ihesaldiak bidea egitea lortu du gaurko Giroko 8. etapa honetan. Bertan bederatziko bat izan da eta azken igoeran izandako erasoen artetik gailentzeko gauza izan dena Lafay (COF) izan da. Faboritoen artean zerbait ikustea espero bagenuen ere, esan daiteke nagusienak batera heldu direla eta aldaketarik ez dela izan. Valterrek (GFC) jarraitzen du arrosaz.
Gaurko etapaz eta biharkoak eman dezakeenaz aritzen da Egoitz Lizaso (@elizaso) podcast berri honetan.